وبعدين مع حرارة البترولة

[ذيب اللابه]

السلام عليكم ورحمة الله وبركاته


الله يسعدلي ايامكون كلياتكون :D

ي جماعة الخير عندي بترولة 93 الحرارة فيه من دون المكيف زي اللوز يبويا
لكن المشكلة مع المكيف من يوم ما تشغله ومع الزحمة وهو واقف في ذي القايله ترتفع الحرارة تدريجيا اليم ما تطق النص

والقطع اللي غيرتها

اديتر اردني ومشهودله بامتيازه من مجربين بس المويه معبيها من البزبوز
كلتش المروحة
كنت شايل بلف الحرارة لكن رديته لانه مع الخط وفوق سرعة الـ120 ترتفع الحرارة تدريجيا وتتعدا النص سواء بمكيف ولا بدون
طبعا الجيب بدون مراوح اضافيه


والمشكلة الثانية
مافي سلكون او معجون يمسك جلدة عوامة البنزين اذبحتني ذي الجلدة من تهريب البنزين
اغيرها جديدة ومافي فايدة فيه تهريب بنزين حطيت سلكون حق السباكة وسلك يومين بعدها قام يهرب



ويسعدلي ايامكون كلياتكون :]

[sgl2002]

طيب اذا اشتغل المكيف هل يرتفع معك صوت السيارة وضغط المكينة يرتفع؟

[ذيب اللابه]

طيب اذا اشتغل المكيف هل يرتفع معك صوت السيارة وضغط المكينة يرتفع؟

تقصد التماتيك وترتفع صوت المكينة على قولتك




بس سوال للمجربين سمعت انا ان البلوف لها علاقه بالحرارة
علما بان عندي عصافير البلوف متأاكله والبلوف لها صوت !!

[عقووول]

اخوي تاكد من مروحة المكيف لايكون تعكس الهواء

بدل ماتدخل الهواء اطلعه

[السليطين]

اول شي صيخ الاديتر .. موب تنظفه ! صيخه بعض الاخوان نقول لهم صيخوا يروحون ينظفون فقط وهذا غلط ... لازم يفك الاديتر وتفك الطبه العلويه ويتم بعدها التصييخ .. وركب البلف . واذا ماراحت الحراره . ركب اديتر نحاس اربع رصات .. غير الاربع لاتركب ..

وان شاء الله امورك طيبه

[كولونيل]

كثر الكلام مايودي ويجيب
انت غيرت كل القطع الاساسيه
لاكن بقي عندك كم شي وهي وزن بلوف اول شي ووزن ديلكو
غير حساس الحراره يجي حول الكوع
وشيك على طرمبة المويه كانها سليمه

مالك الا مسح راس او تجيب جديد
اللي يقول مروحه ومدري ايش اقوله ماعليش ماعندك سالفه

و موفق ان شاء الله

[مركز حراره]

شوف مويت البزبوز غلظتخرب الاديتر الصح مويه اصليه
2- ركب مراوح كهرب ولغ البلد وضمان الحراره لو تبي 10ساعات وقف والمكيف شغال

[شنطة عده]

ركب مروحة تبريد امام رديتر المكيف واشبكها مع تشغيل المكيف
يعني تشتغل با ستمرار مع تشغيل المكيف
واحرص على الي دفعها قوي

[ls1.5700]

انا اضم صوتي للاخوان مركز حراره وشنطة عده
ولا يهونون باقي الاخوان

[ابوتركي1010]

بخصوص الحرارة فادوك الاخوان ما قصور وان شاء الله تنحل عندك ام بخصوص مشكلتك الثانيه علاجها عندي بإذن الله صارت معي قبل كم يوم معاي بترول 97 وريحة البنزين جننتني خاصة اذا عبيت التانكي فل مرة من المرات عبيت فل ورحت مشوار ورجعت للبيت وكشفت على العوامه لقيت التهريب منها فكيت العوامه ولقيتها مصدية مرة فكيتها ورحت لقطع الغيار نيسان قلت عطني عوامه بترول 97 قالي 500 صراحه تفاجئة بالقيمة قلتله في بديل قالي البديل عوامه حقت بترول موديل 91 بس الفرق الفيش حق الكهرباء صغير قلت هاتها قلت كم حقك قال 180 ريال وخت معها جلدة الوجة25 ريال ما صدقت اختها وقصيت الفيش وركبت الفيش الثاني وركبت زي الحلاوة وانا فرحان مرة قلت مشكلة التهريب ان حلت رحت مشوار بسيط ورجعت لقيت التهريب أخص من اول فكيتها لقيت كل شي سليم رجعتها أخت لفه بسيطة التهريب زي ماهو قلت لاحول ولا قوة الا بالله رجعت افك واربط افك واربط ما فيه فائدة شوفو يوم أراد الله عز وجل ان يحل مشكلتي في اثناء الربط احد المسامير انفرط معاي من كثر الربط والفك خليته مفتوح ما ربطة ربطة المسامير الثانية ومشيت مشوار ورجعت لقيت التهريب توقف نهائي قلت الحمد لله طلعت المشكلة من مكان المسمار المنفرط اذا شديت علية طلع البنزين يهرب واذا خليته مفتوح يوقف التهريب شلته تماماً والحمد لله لا تهريب ولا ريحة

[أبوأسامه...]

اوزن الديلكو وتأكد من الأتوماتيك والطرنبة حقت الماء والطبات والطبات والطبات صارت مع واحد من الشباب صيخ الاديتر وخفت شوي الحراره وبعدها غير القربه حقت الرديتر وخفت صارت توصل النص وهو واقف وان مشى وطول ترتفع شو شوي وراح لمكانيكي قاله المشكله السياره ماهي صافيه ونظف الكبليتر ولقى ابريتين مسكرات وغيرهن ونفس الشي اخر شي قال ابغير الديلكو وراح للوكاله لقاه 1500 طبعا انصدم راح التشليح يدور سأله راعي التشليح قاله ايش المشكله قال الديلكو فيه فضاوه قاله رح اكبس له رمان مايكلفك 120 ريـال
وان بغيت عندي بــ400 اعطيكياه المهم طلع الرمان مكسور وغيره وركبه وسكر اللي الي يطلع من المكينه ويشبك بقربت الكبليتر سكره ببوجي وزانت الحين يخليها اربع خمس ساعات ماتعدى الربع

[سوبر VTC]

الاخوان ماقصروا
شف ردي هنا بخصوص الغطا

http://www.mekshat.com/vb/showthread.php?t=578444

[مدرس بالغصب]

اعتقد ان هذي مشكلة عامه في كل الباترولات كل من شفت يشتكي من الحرارة

[كاشت بالبر]

أنا ما عندي خبره كبيره بالسيارات القديمه
لكن بقولك رأيي المتواضع

ما أنصحك بماء البزبوز كله أملاح والخ... راح يسبب صدأ و تآكل للرديتر وطرمبة الماء وبلف الحراره ومسارات الماء بالمكينه ؛ والصدأ والتآكل راح يقلل من فعالية التبريد وتشتيت الحراره

فرّغ ماء الراديتر بالكامل وأغسله ؛ ثم عب ماء راديتر أحمر حق تويوتا
الجالون الواحد بـ 40 ريال
لكن حاول تاخذ شيء تاريخ انتاجه جديد 2013 ؛ لأن ماء الراديتر له صلاحيه معينه

وكرتون الماء المقطر بـ 9 ريال من محلات الجمله ( فيه 12 علبه )

و اذا انت تستخدم ماء البزبوز من مدة طويله سو تسييخ عشان تنظفه من الصدأ


وكم تحتاج جالون .. تعتمد على سعة ماء راديتر سيارتك ؛ يعني تختلف حسب السياره :

بعض السيارات تحتاج جالون و الباقي ماء مقطر
وبعض السيارات تاخذ ماء كثير وتحتاج جالونين والباقي ماء مقطر

لكن ترى أغلب ماء الراديتر اللي بالسوق مخلوطه ومخففه بالماء المقطر بنسبة 50% وجاهزه للإستخدام ؛ ومكتوب عليها PRE-MIX أو 50\50

و DO NOT ADD WATER يعني لا تضيف ماء


شيك على غطاء الراديتر
http://arrc.ebscohost.com/ebsco_static/repair-tips/chiltonimages/tccs/tccs1079L.gif
http://www.csedan.com/images/books/2577/3/index.18.gif


وتأكد أن مافيه طين أو أوساخ عالقه على الراديتر من الخارج .. اغسله وهو بارد عشان لا ينشعر لا سمح الله

وتقدر تركب مروحه كهربائيه واحده إضافيه تشغلها عند الحاجه بفاصل ؛ أو تشبكها على كتاوت وحساس حرارة وتصير تشتغل من نفسها اذا ارتفعت الحراره


وبالزحمه حاول تخلي مسافه شوي بين سيارتك وبين السياره اللي قدامك .. يعني لا تلّحم بالسياره اللي قدامك .. عشان المراوح تسحب هواء بارد بشكل أفضل