المساعد الشخصي الرقمي

مشاهدة النسخة كاملة : الي عنده خبره وتجربه في صيد الاسماك يعطينا بعضمن تجاربه وخبرته(( اكرمونا بخبرت ))


coach
29/09/2006, 04:07 PM
السلام عليكم ورحمة الله وبركاته



<<< ارجو ان تثرونا بأجوبتكم حتى لو على سؤال واحد فقط >>>

:alarm:


الاخوة الاعزاء في منتدى مكشات وخصوصا قسم الصيد البحري, في الحقيقة

سبب كتابتي لهذا الموضوع لان يدي بادية تحكني تبي تصيد سمك وصيد البر ولله الحمد شبعنا منه فلذلك ماكتبت الى الان في منتدى الصيد البري اي موضوع ولكن اكتفيت بالتصفح اما بالنسبة لصيد البحر اخوكم صفر اليدين :j

فحبيت اقتبس من تجاربكم ونستفيد من خبرتكم منخلال هذه الاسئلة :good:





س1: كم تستغرق رحلة الصيد الفعلية ((اقصد. وقت جلوسك لإنتظار الصيد)) ؟

س2: هل اما كن الصيد داخل البحر ام على الشواطئ ؟ وإن كانت داخل البحر كم من المسافة لتجد المكان المناسب , وإن كانت على الشواطئ فهل هناك شواطئ مناسبة او معينه ؟ وهل كل نوع من السمك له مكان معين لصيده؟

س3: كم متوسط ما يستطيعه صيده الشخص الواحد في اليوم لو افترضنا المدة الفعلية 5 ساعات سواء بسنارة او بشبكة او على حسب طريقة الصيد المستخدمة؟

س4: ما اسهل طرق الصيد واسهل نوع يمكن اصطياده؟

س5: اعطونا بعض تجاربكم من أ-كم عدد اكثر مرة اصدتم فيها ونوعيت الصيد وكم اقل مرة ب- كم اطول مدة استغرقت الرحلة وكم اقصر مدة مع ذكر كمية الصيد





(( إذا كانت الاسئالة فيها شيء من الخطاء لعدم الخبرة مني ممكن تعديل السؤال والاجابة من قبل اهل الخبرة))

ونشكر الجميع على حضورهم حتى لو بالقراءة فقط ونتمنى المشاركة من الجميع وخاصة اهل الخبرة
ودمتم بصحة وعافية




اخوكم\ ابو عبد الملك
Alhzzen
30/09/2006, 10:04 AM
ج1:على حسب صبر الرجال الي قاعد ونفسيته لصيداممم احتمال 6 ساعات 7 ساعات 4ساعات
ج2:طبعا الاماكن في داخل البحر وخارج البحر(الشاطئ)-المسافه حسب االمنطقة الي انت خابرها بعضهم يمشون داخل البحر 3 كيلو او 4كيلو وبعضهم كيلو واحد او نص كيلوو-اكيد في شواطئ مناسبه ومعينه يحبها البعض يعني مثل الشاطئ اذا كان رمل هاذا نادر تصيد فيه انت حط من اي منطقة انت والشباب انشاء الله مراح يقصرون - الاقلبيه اممم نعم تقريبا سمك الهامور يحب الاماكن الصخرية وبعضهم يحب الاماكن العشبيه وبعضهم الرمليه بس الرملية تكون بعض الاحيان يكون عدد الاسماك السامه فيها اكثر من الصخرية والعشبيه.
ج3:اممم حسب الجو الي قاعد تقريبا اتوقع اذاا كان رجال واحد يمكن 10 سمكات في 6ساعات وبعض الاحيان يطلع بدون سمكة انت ماتقدر تحدد كم تصيد او المتوسط لانه رزق اممممممممممم طبعا الصيد بالشبك اكثر يكون لان لو جاك سرب سمك وانت حاط شبكك يمكن تصيد 15 سمكة 20 سمكة يالقليل 10 سمكات اما السنارة تصيد الاوله والثانيه والثالثه بعدين خلاص يصير السمك حذر.
ج4:امممم ماقدر والله احدد لك عند السنارة هي المنتشرة بس تتعلم طريقة الرميه وخلاص اما الخيط سهل بعد بس يبي له شوي تتعود على الرمية اما الشبك فهو سهل بس تتعلم طريقة تركيبه مع الموج اوضده او معه طبعا الاسهل(( السنارة ولازم تواجه صعوبة في رميها)) السنارة اكثر شي تصيد فيها الشعري الحاقول ............ألخ انواع كثيرة تصيدها بالسنارة في اسماك مو حذره مثل الحاقول والهوامور لانهم يلحقون اي شي الفرق بينهم بس السباحة السطحية للحاقول
ج5:والله اكثر مره صدت فيها تقريبا 15 سمكة من نوع صافي كانت قبل سنتين ونص بالشبك كانت مدة الرحلة 5ساعات ((العقير))
والله ياطويل العمر اقل مره ولاسمك كانت مدة الرحلة من الساعه 4 العصر الى5الفجر كانت في بحر العقير هاذا رزقي
اطول مدة كانت تقريبا 14 ساعة والكمية ولا شي
واقل مدة كانت 5 ساعات وصدنا فيها 15 سمكة صافي او اكثر

هاذاا الي اقدر اقولة لك يالغالي وسامحنا على القصور وحياك الله في المنتدى بينا


الاخوان اذاا كان في اي غلط ياليت تنبهوني
او معلومة تصححونها



شـــــــــــكــــــــــرا
vip2000
30/09/2006, 11:22 AM
اول شي نهنيك برمضان
وثاني شي جرب تطلع رحلة صيد 5 ساعات او 10 ساعات
اذا عجبك الوضع اللة يحيك
لان صيد البحر يختلف اختلاف كامل عن البر
واللة يوفقك;)
coach
01/10/2006, 12:53 AM
الحزين:
اه منك يالحزين تقول سامحني على القصور وانت ما خليت شي هذا طبع الكريم شرفتنا وانستنا وافدتنا

في اي بي:
تسلم يا بطل واشكرك على كرمك وبالنسبة ل5 ساعات فالوضع حلو شبه ماخذين عليها في البر
Alhzzen
01/10/2006, 01:54 PM
حيااااااااااااااك الله اخوي وحاظرين للغالين


شكرا
دايف ماستر
13/10/2006, 03:37 PM
بسم الله الرحم الرحيم
بالنسبه لصيد الناجل اهم شي الهدووووووووووووء والتقليل في التنفس واذا تنفست تنفس بهدووووووووووء والحركة تكون بطيئه جدا وانت تلاحق الناجل وحاول تغتنم الفرص اول باول واول ماتقرب منه بمجرد مايلف ارميه على طول وحاول يكون مسدسك من النوع اللي مايطلع صوت مثل الرايف او اي مسدس مطاطه مافيه حديد يعني حلقة المطاط حبل انا اتكلم طبعا عن صيد الغواصين بمعدات سكوبا دايفنك
coach
14/10/2006, 07:34 AM
تسلم يا بعدي
النوخذة
14/10/2006, 03:27 PM
س1: كم تستغرق رحلة الصيد الفعلية ((اقصد. وقت جلوسك لإنتظار الصيد)) ؟


والله ياخوي أعتبر نفسك طالع كشته برية , ومتى ماحبيت تبدأ تصيد , جهز عدتك وإبدأ
وبعدين المدة تعتمد على الطريقة اللي أنت بتصيد فيها , ممكن تكون شباك ( طرق الصيد بالشباك كثيرة وكل طريقة تختلف مدتها عن الثانية) وممكن تكون غوص وممكن تكون حداق (طرق الحداق واجد وكل طريقة تختلف عن الثانية )
والطرق اللي ما أعرفها هم واجد
وكل هالطرق تعتمد على مجهودك أنت

س2: هل اما كن الصيد داخل البحر ام على الشواطئ ؟ وإن كانت داخل البحر كم من المسافة لتجد المكان المناسب , وإن كانت على الشواطئ فهل هناك شواطئ مناسبة او معينه ؟ وهل كل نوع من السمك له مكان معين لصيده؟

تختلف المناطق يابو عبد الملك
فيه مناطق على الأسياف (جمع سيف وهو الشاطئ) ممتازة جدا جدا , والأحسن صيد داخل البحر
وماهو شرط إنك تدخل إلين تختفي علشان يكثر السمك , الدعوة زي البران بعض القيعان صيدها طيب وبعض القيعان مافيها الا الفلس
بس القاعدة تقول أن المناطق الصخرية صيدها أكثر
وبالنسبة للأسماك وتوجدها في مناطق معينة نقول نعم لأن بعض الأسماك تفضل أعماق معينة أو قيعان بمواصفات تعجب السمكة من ناحية المرعى والصخور والأماكن اللي تبيت وترعى فيها الأسماك

س3: كم متوسط ما يستطيعه صيده الشخص الواحد في اليوم لو افترضنا المدة الفعلية 5 ساعات سواء بسنارة او بشبكة او على حسب طريقة الصيد المستخدمة؟

ما نقدر نقول شئ
بعض الأحيان نجلس ثلاثة أيام ونجرب بمليون طريقة ولا نفرح بسمكة
وبالعكس مرات نعبي ثلاجاتنا بعد مانوصل بساعتين وأقل
والطريقة لها دور وأنا أخوك ومانقدر نقارن صيد الحداق بصيد الغزول أو صيد الغوص

س4: ما اسهل طرق الصيد واسهل نوع يمكن اصطياده؟

وهاذي مانقدر نحدد لأن الشغلة تعتمد عليك أنت (وش أنت محترف فيه )الشغلة اللي أنت تحبها بتحس أنها الأسهل أكيد لكن لو شرحنا سطحيا راح نقول أن الغزول ننصبها ونخليها وبعد فترة نشيكها وناخذ اللي فيها , هاذي طريقة سهلة وصيدها في العادة وافر وممكن لو قلنا غوص تنزل لك في قطعة صخرية صغيرة وتطلع منها ثلاجة كاملة في أقل من ساعة
إذن نقول مافيه طريقة سهلة لأن الدعوة إستمتاع بطريقة معينة ألا إذا كنت رايح علشان تعبي ثلاجاتك

أسهل نوع مانقدر نحدد لأن الطريقة توافق أسهل نوع

س5: اعطونا بعض تجاربكم من أ-كم عدد اكثر مرة اصدتم فيها ونوعيت الصيد وكم اقل مرة ب- كم اطول مدة استغرقت الرحلة وكم اقصر مدة مع ذكر كمية الصيد

طلعنا مرة من يوم الأربعاء ووصلنا المكان الساعة 11 في الليل ومشينا يوم الجمعة بعد الصلاة مباشرة
وكان معظم وقتنا مريحين وكان عددنا 7 أشخاص واللي يصيدون 3 بس الطريقة كانت غوص وال4 الباقين كانو يحدقون وتوفيقهم كان بسيط تقريبا مايجي المجموع أربعة كيلو وأما الغوص فهاذي صورة من الرحلة



http://www.mekshat.com/pix/upload/images16/mk5291_423.jpg


ومرة كشتنا نفس المدة تقريبا ونفس الطريقة ونفس المكان وكان هذا الصيد

http://www.mekshat.com/pix/upload/images16/mk9190_aslo10.jpg


ومرة رحنا يومين لنس المكان ولا رجعنا بشئ (وهاذي ياكثرها )


هذا اللي أقدر أفيدك فيه أخوي بو عبد الملك والسموحة إذا جاوبت غلط
coach
15/10/2006, 06:10 PM
ما شاء الله تبارك الله
اثاريك نوخذه اصلي
شكرا على المشاركة الطيبة واهتمامك بالموضوع
والصور الطيبة الي اثرت هذا الموضوع
س:وين البور هورس :) ؟
بن عاقول c.o
15/10/2006, 06:34 PM
وعليكم السلام .. الشباب ماقصرو الله يعطيهم العافية ومافي مانع أن تطلع على بعض المخاطر والصعوبات لهذه الهواية من خلال نوافذ مكشات وأهم شي السلامة والوقاية من الأخطار بعدين ياخذك الحماس من جرة الخيط للشعم وألا ملاحق الهامور بالمسدس وألا نصب الغزل على الأسياف وأنت ماتدري أيش ممكن يكون تحتك .. عموماُ أنتبه وأنا أخوك وخذ لك لفة على التعليمات والأساسيات لهواية الصيد ومن ثم الله يبارك لك بالصيد الوفير .وأهم شي إذا صاد خويك ألي جنبك صيد كبير وأنت تناظر كأنك تناظر من ورى شاشة تلفزيون يعني بالعربي مامن صيد أبد عندك أطلب من الله أن يزيد صاحبك أكثر وأكثر من ماصاد وأكيد ربي راح يرضيك وماترجع البيت ألا ثيابك زفر في زفر هههههههه ( صيد وفير ) ومع السلامة .
النوخذة
15/10/2006, 06:44 PM
حاضرين للطيبين أخوي coach

وأسعد اللحظات اللي نقدر نفيد فيها الطيبين شرواك

البورس هورس طال عمرك ( حقوقه محفوظة )

والحقيقة إني عارف إنه مضر , لكن مانستغني عنه خصوصا قبل الغوص
لأن غوصاتنا الحرة تستمر بعض الأحيان إلى أكثر من 5 ساعات
بالعربي مانت طالع الا والبورهورس قده تبخر
coach
16/10/2006, 05:07 AM
تسلم يا بن عاقول:
النية الزينه في الصيد اهم شيء هذي النصيحة المفروض يعرفها كل صياد ولكن الله يخلف

النوخذه :
5 ساعات واو ......... ماشاء الله تبارك الله عليك ماشاء الله ماشاء الله.....انا ما جربت الغوص ولكن احس انها طويله .
بس تبي الجد عجبتني مسألة انه يتبخر بالعافيه يا رب
النوخذة
16/10/2006, 03:23 PM
ما أبغى أعطيك من الشغلات الجامدة يابو عبد الملك
لكن خلني أقولك أن حنا نزلنا مرة من الساعة 7 صباح
وماطلعنا إلا الساعة 5 المساء وصيدنا كان متوسط
وكنا نازلين من السيف سنوركل ماهو سكوبا

وعندك مرة نزلنا الساعة 11 بالليل وكنا قاصدين قطعة معينة داخل البحر
تقريبا على مسافة كيلو من السيف وكانت ساقية (يعني في حالة مد)وذيك الليلة
ماكان فيه قمرة , الدعوة خرمس ولا كان فيه موج مرة يعني البحر صاير مسطرة
المهم يوم تناصفنا قي المسافة محاكيك ماجلان ضيع الدرب وهو أدرى واحد بالمكان
تلفت يمين ويسار بغيت أشوف السيف , مافي أمل , وبغيت أعرف مكان القطعة
ولا في فايدة . سألني الرجال اللي معي :ضيعنا ؟؟ قلت اي والله ضيعنا
قال:والسواة !! قلت له إنتظر الفجر علشان نشوف
وهذا اللي صار قمنا ندور على غير هداية ويوم قرب الفجر طحنا على قطعة
غير اللي نقصد والحمد لله توفقنا منها بشئ عدل
ويوم شق النور كانت السيارة عنا تقريبا 3 كيلو
coach
17/10/2006, 04:11 AM
يا حبيبي
يعني انا ضعت في البر حدود خمس مرات واطول مره كانت 5 ساعات بس الواحد يطلع راسه يشوف النجوم يطلع فوق السيارة

لكن في البحر ويييييين بتشوف وش بتسوي تدري (( قدم نفسك وجبة شهية لأبو قروش))

بس تبي الجد الحين اقدر اقول انك نوخذه من جد
بن عاقول c.o
17/10/2006, 06:12 PM
في أوجه شبه كثيره بين البر والبحر تطمّن أخوي coach وأنا دخلت البر كثر مادخلت البحر وشفت ياسبحان الله الكثير من الأشياء ألي ممكن جداُ تنطبق على البحر وحتى المخاوف الي طرحتها ( أنك تضيع في البحر :( ) ترى ماراح تفرق عليك كثير من البر فأغلب العوامل الطبيعية والمفاجأة منها مثل الهوى الشديد والعج أو الضباب في الليل أوالنهار أو مطارد الفريسة تصادفك نفس المخاوف في البحر إلا إنه تختلف بعض الشيئ في البحر وهذا البعض ألي بتتعلّمه من خلال نزلاتك المتكررة مع الشقردية وأكرر مع الشقردية عشان تتعلم منهم التصرّف الحكيم وقت الصجّية :D
وفي الأخير ..>> ( رغم أن البحر كله ماء وقليل ماتحصّل فيه يابسة كذلك البر كله رمل وقليل ماتحصّل فيه أشوية ماء ) ومن هنا ممكن تربط بينهم فكلّهم ممتع إرتيادهم .. وهالله هالله بنصايح النوخذه والشباب أهم أخبر .:)
coach
18/10/2006, 08:41 PM
تسلم يا بن عاقول :

هذي تنكتب بالذهب(( رغم أن البحر كله ماء وقليل ماتحصّل فيه يابسة كذلك البر كله رمل وقليل ماتحصّل فيه أشوية ماء )
حكيم
بس في نظري
تضل المعادلة اصعب في البحر.
دخولك ملموس وافكارك مجدية يعطيك العافية