المساعد الشخصي الرقمي

مشاهدة النسخة كاملة : تعقيب مهم على موضوع مضغوط ريدان (( صور لا تفوتك)) !!!!!


ALBDRANE
30/09/2006, 09:57 PM
حياكم الله
الحقيقة انه لايوجد اي فروع للمطعم في الرياض فقط في الغربية ولا شارع حمزة ولا يحزنون كلهم يحتكون بالاسم ومعلوماتي من مصدر قريب جداً
اخر مرة كليت فيه كان في فرع العزيزية في مكة بس المشكله ماعندهم عائلات .


واهديكم هذه الصورة لافضل مضغوط وترىريدان يحلم يسوي زيه والطبخة تصليحي وسلامتكم
http://www.mekshat.com/pix/upload/images20/mk34504_44.jpg


وهذا عقب ما نكبناه في الصحن ........
http://www.mekshat.com/pix/upload/images20/mk34504_555.jpg
مرقاب الشرق
30/09/2006, 10:14 PM
ياسلللللللللللللللللللللللللللللللللام عليكم قامت تناقط سع!!!!!!! .
الله يسامحك ماعزمتن عليه !! الجايت اكثر انشالله .
كحيلان 11
30/09/2006, 10:19 PM
ووووووووووووووش حادك على ذا الشغل يا اخوي قطرة سعبولتي .........
واما عن ريدان ففيه فرع في الرياض في شارع الشفاء
ALBDRANE
30/09/2006, 10:40 PM
الي في الشفا والي في حمزة كلهم جيتهم وسئلتهم وبنفسهم نفو اي علاقة لهم بريدان الاصلي ولوهم تبع ريدان الاصلي كان تشوف الحلويات الي عند الباب وانت طالع وبعدين دقق في اللوحة الي فوق المحل وتشوف ان الاسم يختلف (( حركات )) !!
الجندي2005
01/10/2006, 03:21 AM
خوووووووووووووووووووش شغل حلولات اللي معكم
همّام
03/10/2006, 05:09 PM
أذكر في حي المروج بالرياض فرع لهم

هل هو بعد تقليد ولا أصلي

أفيدوناااااا

ترى مرة اخذت منهم وجاز لي بالحيل
متيم البر
29/10/2006, 05:12 PM
يوجد فرع في شارع خالد بن الوليد (أنكاس سابقاً) جنوب تقاطع طريق الملك عبدالله. أنا جربت المضغوط عندهم وطعمه رهيب. لكن ما أدري إذا كان هو المطعم الأصلي ولا لأ.

أرجو الإفادة ممن لديه معلومات

مع التحية
kaaaatm
30/10/2006, 06:18 PM
يا رجال عجل علينا بالطريقه بلا ريدان وبلا وجع راس اهم شيء الطعم


وانا ضيعت مع الصور
ولد عنيزة
30/10/2006, 06:36 PM
تسلم الايدين ياليتي معكم احس إنه شي بالعافيه
الطباخه
01/11/2006, 02:15 AM
روووووووعه ..زين اخوي شنو نوع الرز الي استخدمته ؟؟
نقى بنبان
01/11/2006, 04:28 PM
تسلم اياديك... واضح انك معلم

لي ملاحظتين تخصني وليس بالضرورة تعم

الاولى: اني مااستطعم الضب بالبيت، وزينته الى قام يفر البلف وانت قاعدن بسمردحة لينة مسيان، تشرب القهوة والضبان مالهن ساعة مذبوحات (طازجة من النثيلة ..... الى ماتحت الفنيلة:p ).

الثانية: أشيل الجلد واكبس عليهن بدون صلصة او طماط، ترى الجلد هو سبب الزخمة بالضب.

تحياتي
الروض1
02/11/2006, 01:51 PM
احسن مطعم في مكه اسمه كبسة حاشي احسن طبخ ذقته عنده شي يفوق الوصف
ALBDRANE
24/11/2006, 01:27 AM
الاخ نقى بنبان تحياتي ولا يهونون الجميع
اولاً : الضبان طبخناها وهي مازالت تحرك في القدر لان المطبخ هذا في مزرعة ( أستراحة ) قريبه من الموقع الي نصيد فيه شمال الرياض
ثانياً : ما يجوز لي طعم الضب الى صار مصلوخ وكذلك شكل اللحم ما يجوزلي مصلوخ .
وكل نفس وما تشتهي

والرز نوعه أبو تساس
خادم الإسلام
26/11/2006, 11:11 PM
حقيقة يوم أني شفت الضب انسدت نفسي وشوري عليك ظفه بسفرته اللي هو عليها وحطه عند الباب وقلي وين مكانكم عشان أجي واخذه واوديه بيتنا :d :d
ALBDRANE
28/11/2006, 01:51 AM
أول شي ما حطينا سفره وبعدين تنسد نفسك كثرررر منها وانشاء الله تجي فرصة وتشاركنا وتحياتي
ضلع الرقيبه
28/11/2006, 02:32 AM
ماشاء الله عليك طبخ كايف احسن من مطاعم الكاتم كلها

اذا كذا طبخك وش تبغى في المطاعم يا ناس الكاتم الطبخ فيه سهل مره وسريع وش يحدكم على المطاعم

مشكور اخوي
حمود الغيث
28/11/2006, 10:13 AM
السلام عليكم ورحمة الله وبركاته
س/هل الطبخة تعتمد على قدر الضغظ من ناحية النوعية
س/هل هناك قائمة عن كيفية طريقة طبخ الضبان من طقطق إلى سلام عليكم
س/ماهي نوعية الرز
وبالهنا والعافية
تحياتي وتقديري لك يالبدراني وجميع الأخوان
ALBDRANE
28/11/2006, 10:55 AM
حمود الغيث
أبشر بالغيث
من طرف القدر كله واحد اهم شي يكون قدر ضغط
ومن طرف طريقة أعداد الطبخة ما تختلف عن اللحم بس لمسلت خفيفه وبما انك ودك تعرف فسوف أرفق جميع الصور مع الشرح للطبخه قريب جداً وفي نفس الموضوع
واما من طرف نوع الرز فهو أبو الكاس وليس شرط الانواع الزينه كثيرة

وشكراً على مرورك
ALBDRANE
28/11/2006, 09:36 PM
الاخوة الكرام شكراً على مروركم


الكثير منا يعرف طريقة طبخ الضبان قي قدر الضغط والقليل لايجيده وفي الحقيقة لا يختلف عن غيره كثير وقد طلب مني بعض الاخوة طريقة طبخه وسوف أشرحها بطريقتي وكل نفس وما تشهي وكل وطريقته وعذراً على عدم أرفاق الصور في بدايةالموضوع فقد تحمست لرفع الصور بعد ما طلبت مني :



1- تعرفون أن الضبان تختلف عند أهل الذوق يعني ( فيه كبارعويد وفيه صغار مطاريس وفيه بعضها غير نظيفه الخ ...) المهم تدور الزينه الي تفتح النفس مثل هالصورة ودقق في الضب ونظافته ( مزايين ) .

http://www.mekshat.com/pix/upload/images23/mk34504_443.jpg

-2تاخذون قدر حاجتكم في الصيد وعند الطبخ وتحاول أن تكون الاحجام متساويه عند الطبخ وتضع الكميه المناسبه منها في قدر عادي وتفوح بدون أظافات لمدة ( 5 ) دقائق فقط ليسهل تقشيره ثم تقشر وتغسل ، وأنا عن نفسي ما أحبهامصلوخه لان الطعم يتركز في جلده والجلد يحافظ عليه من التفتت داخل القدر ناهيك عن منظرهن على الصحن
http://www.mekshat.com/pix/upload/images23/mk34504_dsc02767.jpg
-3 تاخذ من شحم البطن ( السلايق أو الثروب ) وتحمسها مع البصل والثوم .

http://www.mekshat.com/pix/upload/images23/mk34504_dsc02770.jpg

-4 ثم تضع اللحم عليها والبهارات المطحونه ثم تقلبها حتى تسخن.

http://www.mekshat.com/pix/upload/images23/mk34504_dsc02771.jpg


-5 تضيف الماء حت يتغطى اللحم وتضيف الملح وباقي البهارات الغير مطحونه ( ليمون أسود ياهو شي مع المضغوط والقرفه وهيل المهم حسب الرغبه ) وبعدين تكتم أبو القدر وتحسب له (45)دقيقة من يبدا يتستس :hot: http://www.mekshat.com/pix/upload/images23/mk34504_dsc02773.jpg
-6ثم بعده يظاف الرز والفلافل والكبيدات وتتاكد من كمية الماء هل تكفي لطبخ الرزيعني القيمه على قولتهم وتكتم مهوب أبوه ذا المره أدون شوي (قصر على النار ) وأحسبله ( 10 ) دقايق من يبد يتستس القدر


وبعده تفتح غطاه ويطلع مثل هالصورة:

http://www.mekshat.com/pix/upload/images23/mk34504_dsc02774.jpg



-7 ثم تغرفه وتسمون وبالهناوالعافية :

http://www.mekshat.com/pix/upload/images23/mk34504_dsc02776.jpg



**صورة للمطبخ وهو عبارة عن مطبخ صغير في مزرعه بالقرب من موقع الصيد

http://www.mekshat.com/pix/upload/images23/mk34504_dsc02769.jpg

أرجو أن أكون وفقت في طرح الموضوع وتحياتي للجميع ونلقاكم في مواضيع جديدة:heart:
ع العمرو
06/10/2007, 04:29 PM
تسلم أدياتـــــــــــــــــــــــــــــــــــــــــــــ ــــــــــــــــــــك
والله يعطيك العافيه