ساعدوني فيني جرثومة المعده

[ابوامال1]

السلام عليكم ورحمة الله وبركاته
ياجماعه فجاه جاني انتفاخ والم بالجهه اليمنا وانتفاخ بالبطن علما عندي قولون قبل وعندي حصا المراره وبخزتني قبل سنتين ولا عادت المهم بعد تقريبا شهر من الوجع فجا جاني خوف من الموت والحمدلله انا مومن ورحت قلت نحلل طلع فيني جرثومة المعده وكرهت الدنيا وصرت ماحب الناس ولا اجلس مع احد ولو يسولف علي احد ما اركز واذا مثلا هدو وطلع صوت لو طقت عود احسه داخل اعصابي كلها تراعد واحيانا اعرق خفيف ومافيني حراره احسها داخليه. مرات اشوف. طبعا عطاني الدكتور اعلاجات من 6 ايام احس رجليني تنمل احس اقدامي من تحث تنمل احس بخوف من الموت احس بعدم تركيز وعدم القدره علا اعمالي وكاني ارا كل شي بعيد. احس بعدم ارتياح وعدم القدره علا النوم وقالي الدكتور عادي هذا نفص فيتامين ب12 ويسببلك كل الي قلته واذا عطاني الابره احس شي يعورني جيهت الالم الب ببطني واحترت الحمدلله علا كل حال من الاحوال
والي جرب وعالج يقولنا والي ماجرب ويجيه وسواس وخوف وانطوا وماله خلق احد ولا له خلق شي. تراه نقص بالفيتامين ب 12 المشكله ان الجرثومه تمنع الجسم من امتصاصه نبي العلاج ياخوان بعد الله سبحانه وتعالى
لا اله الا الله محمد رسول الله

[ابوامال1]

معليش قبل كم سنه انصبت بالحما المالطيه لا يكون بدايتها اختلفت علي والله

[المتليك]

ربي يشافيك ويعافيك من كل مكروه
يوصفون عسل المانوكا لجرثومة المعدة حاول تكتب في قوقل عسل المانوكا وسوف ترى الكثير من المواضيع التي تتحدث عن فائدتة وماتشوف شر

[تساهيل1]

يا الله ياكريم ياعليم
يارحمان يارحيم انك تشفي ابو امال
وتكفيه وكل مسلم من الشرور

وماتشوف شر يا ابو امال

عين خير يبو امال وخل ثقتك بالله كبيره
الوالده قبل فتره حصل لها نفس المشكله
وتعالجت في مستوصف خاص والحمد لله زال المرض
الدعوى بسيطه شوي علاج وحميه يوصفها لك الطبيب وخلاص
تزين الامور باذن الله

[escape_man]

نقص فيتامين B12 يسمونه الأنيميا الخبيثة لانه ينقص بدون اعراض تطلع على المريض الا بمراحله الاخيرة الي تشمل الوهن وضعف الشهية والوسواس وفقدان الذاكرة الى ان تتطور لضعف الاعضاء الداخلية مثل القلب والبنكرياس والكبد وتشحمها

جرثومة المعدة واضطرابات المعدة عموما تسبب نقص فيتامين B12 يابو آمال لكن الي ابي تعرفه انه نقص هالفيتامين وعلى شان توصل للاعراض الي ذكرتها يحتاج 3-5 سنين مو بشهر وشهرين او حتى سنه.

الفيتامين يتفكك بالمعدة ويتم امتصاصه بآخر الامعاء الدقيقة.

اسباب نقصه متعددة فسبب يكون اضطرابات المعدة ووجود تقرحات بسبب جرثومة المعدة او الالتهابات. او حساسية يسمونها حساسية القمح او مثل ماهو معي جسمي عنده مضادات لهالفيتامين فما يمتصه بالمعدة فاضطر اخذه حقن دورية كل شهرين تقريبا مدى الحياة حتى احافظ على نسبته الطبيعية بالجسم.

فانت الآن حافظ على مضادات الجرثومة الثلاثية .. راح تتعبك شوي وتحس فعلا انك متعب ومو طايق احد لكنها باذن الله شافية من الجرثومة.

بعدها اعمل فحص بعد 3 شهور لفيتامين B12 وشوف اذا نازل عن المعدل الطبيعي وخل الدكتور يبحث سبب نقصه عن طريق 3 فحوصات ترسل لألمانيا وتحدد بالضبط اذا عندك حساسية او جسمك مو قابل لتفكيك هالفيتامين.

وعوافي ان شاء الله

[ناصح]

أخي الفاضل

سبق أن أصبت بجرثومة المعدة

وطبقت كورس المضاد الحيوي ورجعت بعد سنة

ثم طبقت طريقة الدكتور جابر القحطاني ونجحت بشكل ممتاز والآن لي اكثر من خمس سنوات بدون مشاكل..

والطريقة هي تقوم بهرس ثوم طازح في علبة زبادي وتأكله على معدة فارغة 3 مرات في اليوم

ونسأل الله أن يشفيك ويعافيك

[ابوامال1]

الله يجزاكم خير ويرحم والديكم والله يشفيكم ويشفينا حنا ومرضا المسلمين

بي يعني هالوسواس منها او من. شي ثاني

[البوووووش]

ياخوي استمر على علاج الدكتور وخاصة المضادات على شأن تقضي على الجرثومة ولاتهملها فهي في اغلب الاحيان تسبب قرحة في المعدة من الصعب علاجها وبعدين اذا خلصت العلاج راجع الدكتور وسوى اختبار تنفس للجرثومة حتى تعرف اذا راحت والا لا وانصحك ياخوي لاتفكر ترى الامر بسيط واذا تعبت ممكن تراجع دكتور نفسية وتاخذ من عند علاج يهديك هذة الفترة لين تروح الجرثومة وتتماثل للشفاء ارجو ان اكون قدرتك افيدك والله يشفيك

[ابوامال1]

الله يجزاكم خي
ر اخوي سبيس مان صحيح النغزات خفيفه من 4 سنوات تقريبا

[كايد]

عليك والثوم

[ابوامال1]

رحت حللت الحين وطلع عندي حما التيفود والله اعلم انها من التهابات المراره
الله يشيفنا وجزاكم. الله خير

[حطاب الشمال]

يا اخوي انا جاني مثل اللي جاك وهالحين الحمدلله والشكر ماخليت ولا مكان الا جيته على شان العلاج وقابلت واحد وعلمته بمرضي وقال فيه استشاري في جده باطنيه قلت اروح وفعلن رحت ويوم جيته وشرحتله وضعي قال ما راح اعطيك علاج لين اسوي منظار وقلت يادكتور مسوي منظار مرتين قال حتى لو سويته عشر مرات لازم انا اللي اسويه بنفسي المهم سوالي منظار بعد التخدير واول مره اسوي منظار وانا مخدر لان با العاده لازم تسويه وانت صاحي وتطلع روحك وانت يوم يدخلون اللي في فمك المهم بعد ماصحيت من التخدير قال فيك جرثومة المعده وفيك التهاب والمعده مفتوحه عندك قلت وش العلاج قال اعطيك خمسه انواع طبعا كلها حبوب ثلاث انواع تستخدمها لمدة عشرة ايام ونوعين تستخدمها لمدة ٦ اشهر وفعلن استخدمتها وهالحين يا ياربي لك الحمد والشكر ويا ابو امال انا عارف هالحين تفكيرك في مرض خطير وفي الموت واشياء كثيره على كل حال اذا بغيت عنوان الاستشاري ولا اي مساعده ابشر وانا خوك راسلن ولا ارسلي رقمك والله يشفيك ويشفي كل مريض وصلى الله وسلم على سيدنا محمد وعلى اله وصحبه وسلم تسليمأ كثيرا.

[ابوصالح3]

تبي نصيحتي سو طريقة الدكتور جابر القحطاني اللي ذكرها استاذنا الفاضل ناصح هذي للمعده والجرثومه ؟؟

اما الخوف والقلق والتفكير بالموت ؟؟ اعلم اخي الكريم ان خيروسيلة للعلاج النفسي هي الايمان بالله

ثم بفعل اسباب الشفاء عليك بالرقيه ثم الرقيه ثم الرقيه ؟ وسافر غير جو ؟ واياني واياك تروح لدكتور نفسي لان علاجاتاهم مخدرات ومنومات ومهدئات ,,, خلك طبيعي لين تزول هالمحنه وعسى الله يشفيك من عنده

[أطلال نجد]

و عليكم السلام و رحمة الله و بركاته

عليك بنصيحة الدكتور القحطاني و الدكتور ناصح

الزباي و الثوم المهروس على معدة فارغة

و أنا أنصحك بإضافة الحبة السوداء مع الثوم و ما قدامك إلا العافية بإذن الله

[sh3ab]

الله يشفيك من كل مرض يارب ويفرحك بالصحه والعافية
أطلب من الله الشفاء

[ابوامال1]

جزاكم الله خير وماقصرتو ونبي نشوف وشيصير معانا
وبيض الله وجهيكم والي عنده
تجارب لايبخل

[-الساري-]

أبو مال :
جرب طريقة أخوي ناصح . وإذا تقدر عليه وماعندك ضغط الله يحفظكم جميعاُ ، أنا من الناس اللى كلمت جابر القحطاني ، وقال لي على الطريقة
6 حبات فص ثوم الصباح فصين مهروسه أو قطع صغار تبلعها بي مويه (الثوم يهط الضغط ) أنتبه
الظهر فصين نفس الطريقة
المساء فصين نفس الطريقة

أذا ما تقدر عليها (عشان ريحت الثوم)عندك الثوم المجفف عند العطارين ،وإذا ماتبغي الثوم عشان ريحته
عندك (حبوب الثوم )إلماني 50 حبه 55 ريال

وحاول قدر الإمكان أن تبعد عن الالبان - الجبن- الدسم لحم- التخفيف من الشاهي والقهوة بأنواعها).


ملاحظة : أنا جربت كلام أخوي ناصح . والحمد الله .
وهي لها نسبه معينه موجوده في كل إنسان ،بس عند زيادها تصل إلى 40 -30 والطبيعي
الظاهر 20 بالمية
جلست على الحالة 3 اشهر ورجعت ،وجلست شهرين والحمد الله .

أسبابها :
1- أكل المطاعم
2- أكل الحوم غير ناضجه .يعني ما استوت
3- أنتقل عدوه

[ابوامال1]

الله يشيفنا يارب

[تربة الشمال]

الله يشفيك من كل مرض يارب ويمتعك بالصحه والعافية

[ابوامال1]

الله يجزاكم خير
واخذ مضادات حيويه وفيتامين. ب12 ابر وكني اشوا والحمدلله
ياهو مشكله فيتامين ب 12 بسبب مشاكل كثيره
وسوسه

[مشعل666]

الله يكتب لك الشفى من عنده

[ابوامال1]

اللهم امين

[bobe22]

أسال الله العظيم رب العرش الكريم أن يشفيك و يعافيك أخوي ..




يا اخوي انا جاني مثل اللي جاك وهالحين الحمدلله والشكر ماخليت ولا مكان الا جيته على شان العلاج وقابلت واحد وعلمته بمرضي وقال فيه استشاري في جده باطنيه قلت اروح وفعلن رحت ويوم جيته وشرحتله وضعي قال ما راح اعطيك علاج لين اسوي منظار وقلت يادكتور مسوي منظار مرتين قال حتى لو سويته عشر مرات لازم انا اللي اسويه بنفسي المهم سوالي منظار بعد التخدير واول مره اسوي منظار وانا مخدر لان با العاده لازم تسويه وانت صاحي وتطلع روحك وانت يوم يدخلون اللي في فمك المهم بعد ماصحيت من التخدير قال فيك جرثومة المعده وفيك التهاب والمعده مفتوحه عندك قلت وش العلاج قال اعطيك خمسه انواع طبعا كلها حبوب ثلاث انواع تستخدمها لمدة عشرة ايام ونوعين تستخدمها لمدة 6 اشهر وفعلن استخدمتها وهالحين يا ياربي لك الحمد والشكر ويا ابو امال انا عارف هالحين تفكيرك في مرض خطير وفي الموت واشياء كثيره على كل حال اذا بغيت عنوان الاستشاري ولا اي مساعده ابشر وانا خوك راسلن ولا ارسلي رقمك والله يشفيك ويشفي كل مريض وصلى الله وسلم على سيدنا محمد وعلى اله وصحبه وسلم تسليمأ كثيرا.

أخوي حطاب الشمال .. إش اسم الاستشاري ؟
الرسائل غير مفعلة عندي لقلة المشاركة .. و جزاك الله خير

[خالد الخمعلي]

ربي يشافيك ويعافيك من كل مكروه

[ابورايف]

أخي الفاضل

سبق أن أصبت بجرثومة المعدة

وطبقت كورس المضاد الحيوي ورجعت بعد سنة

ثم طبقت طريقة الدكتور جابر القحطاني ونجحت بشكل ممتاز والآن لي اكثر من خمس سنوات بدون مشاكل..

والطريقة هي تقوم بهرس ثوم طازح في علبة زبادي وتأكله على معدة فارغة 3 مرات في اليوم

ونسأل الله أن يشفيك ويعافيك

ماذكره مشرفنا ناصح هو أفضل علاج للقضاء على الجرثومه

أسئل الله لك ولجميع مرضى المسلمين بالشفا العاجل

تقبل مني كل تحيه عطره