تناسب التشك مع ضوق الماصوره [الأرشيف]

الشمروخي

06/07/2013, 05:04 PM

بسم الله الرحمن الرحيم
السلام عليكم
موضوع بسيط وخفيف وممكن سبقنى احد فيه بس للتذكير والرجاء من اهل الخبره مشاركتي موضوعي وزياده في المعلومات
موضوعي عن ضوق الماصوره من بدايه الماصوره الى التشك وان كل شوزن له ضوق محدد بس وش المناسب لهذا الضوق وطول التشك
والاضواق هي 18.3 وهذا اضوقهن وثم 18.4 و 18.5 و18.6 و18.7 و 18.8 وهذا اوسعهن
اولاً الماصوره مقاس 18.3 افضل تشك له هو 670
ثانياً الماصوره مقاس 18.4 افضل تشك مناسب هو 680
ثاثاً الماصوره مقاس 18.5 وهذا نادر افضل تشك مناسب 690
رابعاً الماصوره مقاس 18.6 افضل تشك مناسب من 695 الى 700
خامساً الماصوره مقاس 18.7 افضل تشك مناسب من 705 الى 710
سادساً الماصوره مقاس 18.8 افضل تشك مناسب 715
ويشترط ان مايزود طول التشك خارجي عن 2 انش
هذا معلوماتي ومن تجربه ومن عنده معلومات نبي نفيد ونستفيد

الشمروخي

06/07/2013, 05:10 PM

وللمعلومه كل ماضاقت الماصوره كل ماقل تناسب بعض انواع الفشق له مثال ١٨.٣ مهب اي فشق زين عليه وتلقى راعيه يعذرب بانواع واجد منهن ويجوز له قليل وافضل الضغوط له البسيطه ٣٢ و ٢٨ فيهن ابداع
وراعي الماصوره الاوسع كلش يمشي معه واي ضغط يجوز له
وانت اخبر هذا ماعندي والله يوفقكم

الشمروخي

06/07/2013, 05:21 PM

والرجال اللي مهب راعي ضغوط عاليه افضل شي له ياخذ شوزن بيت النار فيه ماقنوم وتحت يعني ٣ انش بالكثير واذا مايتعدى ٤٠ ياخذ ٢. ثلاث ارباع وهذا نادر بالشوازن الجدد لان كل ماصغر بيت النار كل مازادت حراره الحلبي وتنظيمه
مثال بنلي ايقل ٢ ٣.٥ بيت النار و بنلي M2 بيت النار ٣ انش من تجربه الشباب الا ام ٢ احر ولارموا مسافه ٣٥ متر مثلاً ايقل ٢ تصوب الطير مثال قوقسي والام ٢ تذبح من عدت رميات
دليل اخر ضوق الايقل ٢ ١٨.٣ وسوبر ماقنوم مجرد ماتركب ماصوره ٣٠ بلجيك او ريفال بيت النار ٣ انش تنبسط به والسبب بيت النار وليس الطول لان الطول ممكن تركب تشك ٢ انش من شركه ممتازه وتزين بس ماتاصل الريفال بسبب بيت النار
وكذالك تجربتي باليوركا برتا ١٨.٦ واكستريما ١٨.٦ اليوركا احر وانظم وادق بالطلقه بسبب بيت النار باليوركا ٣ انش والاكستريما ٣.٥

الشمروخي

06/07/2013, 05:32 PM

فاضي بهالسبت ومتعود على الدوام فاعذرونا على الفلسفه

ابونايف....

06/07/2013, 05:44 PM

السلام عليكم ياالشمروخ طيب البنلي ايقل 2كم الرقم وماالتشوك اللي ذكرته يناسبله.....

الشمروخي

06/07/2013, 05:47 PM

ايقل ٢ تجي ١٨.٣ وتجي ١٨.٤ واكثرهن ٣ فالتشك المناسب ٦٧٠ خارجي ٢ انش واحرص على الشركه الطيبه مثل برايلي او من نفس شركه بنلي ويسمى اكسترا فل للبنلي

قلم5

06/07/2013, 06:08 PM

والكمفورت الفل تشل
كيف وضعها وكم بيت النار
الله يعطيك العافيه

الشمروخي

06/07/2013, 07:10 PM

18.3 وفل تشك مقاسه ٦٨٥ وبيت النار ٣ انش وضوق الفل تشك يختلف قليلاً عن التشكات لان مسافه الضوق بالتشك ١ انش واللي بدون تشكات انشين ف ٦٨٥ مناسب له ولوه تشكات ٦٧٠ او ٦٧٥ افضل له
والله يعافيك

بيكال الوشم

06/07/2013, 08:09 PM

طيب يالشمروخي
انا عجزت و طقت تسبدي و فحّت شرايين قلبي مالقيت مقاسات التشوكات
مثل الحين تشوك 660 كم مقاسة بالملي هل هو 15 ملي قطره او 16
و 670 كم مقاس قطرة و انت ماشي لين تشوك 700

دورت مقياس الكتروني بالملي مالقيت

ان كان عندك علم عن مقاساتهن لا تبخل علينا

اخوك ....

ابو فزاع.

06/07/2013, 08:36 PM

احب انوه على معلومة

ان لكل طريدة > تشك و فشق معين بحيث او مثال

الان اغلب او افضل صيد عندي بام حبة لسبب وسع وكبر دائرة الانتشار لديها ( الجرجس ) < مثال
ولاكن لا يعقل الرمي بتشكات او بتساع تشك 660 وخلافة
ولك القياس و اختيار الانسب

وكل شخص يقدر يقيس الافضل لدية ( عن طريق التجارب و القياس على ارض الواقع )

مجرد سؤال على بعض الاحكام لديك

اولاً الماصوره مقاس 18.3 افضل تشك له هو 670
هل هذا المقاس اوالاقتراح يتناسب مع جميع الطرائد ...؟
وكل المقاسات المذكورة تندرج تحت السؤال
اكيد بتقولي الاغلب من ناحية السوق وتأخير الانتشار ولاكن اجزم انه لورميت به على طرائد صغيرة او قريبة انك حتشوف مجرد غبار :) ولن تجد شي
فلذلك ارجع وقول لكل طريدة طريقة < > ولكل مسافة فشق او تشك

سوال اخر :(
ويشترط ان مايزود طول التشك خارجي عن 2 انش
اعرف وجربت تشكات تزيد عن ال 3 انش وفعلها صدقني لو ببالغ بقول افضل ما رئيت

ارجو تقبل وجهات النظر و الموضوع للنقاش
لك فائق احترامي

الشمروخي

06/07/2013, 10:40 PM

وجه نظر طيبه وكلام سليم اخوي سبر انا حددت وقصدي واضح الافضل للرمي الطيار وواقع بعيد قميري خضاري قوقسي او بط ورهو بعدطبعاً بالبعيد

اما واقع وقريب او طيار وقريب او ارنب بليل او جرجس اكيد له شي يناسب ووسيع اجل وش له الباقي اتكلم عن السوق والتونس

اما من ناحيه ازود من ٢ انش مااقول شين بس مايفرق بالذات بالمقاسات اللي ذكرته اما تجيب تشك مقاس ٦٩٠!بشوزن ١٨.٣ وطويل مثلاً اربعه انش اكيد افضل من ٦٩٠ داخلي وقد جربت بيكال ٢٨ انش بضوق ١٨.٤ وتشك ٤ انش بضوق ٦٩٠ خبال ومهب طبيعي لاكن ركبته ببيكال ٣٠ صارت دمار وال٣٠ بتشك ٦٨٠ خارجي انش غطت على الطويل فالواضح ان الشوزن ماتصلح فوق ٣٢ باي تشك الا لاصارت بلد فل تشك ٣٤ او ٣٦ زي بعض الستفنس ناجح لاكن شوزن تشكات ال٣٠ لاتتعدى ٢ انش وال٢٨ بالكثير ٤ انش شرط اوسع من المفضل له [/COLOR][/COLOR]

الشمروخي

06/07/2013, 10:53 PM

اخوي بيكال الوشم ابشرك المقياس عندي
طبعاً الشوازن مقياس السبطانه ١٨.٤ يعني ١٨.٤٠ والباقي كذالك
مقاس ٧٠٠ يعادل ١٧.٨٠ يعني ١٧.٨
وال ٦٩٠ يعادل ١٧.٥٠ / ١٧.٥
وال٦٨٠ يعادل ١٧.٣٠ / ١٧.٣
وال٦٧٠ يعادل ١٧ فقط
وسلامتك

بيكال الوشم

06/07/2013, 11:08 PM

طيب يا بعدي ٦٧٥ عاد هذا التشوك اللي معي وهو الوحيد اللي ما حطيته ههههههههههه

اقولك يا بعدي انا اقلب راسي من المقاسات و التطبيق
ماصورتي كروم ٢٨ انش ١٨.٤ قطرها
وش اللي يطبق عليها تتوقع

الشمروخي

06/07/2013, 11:24 PM

٦٨٠ خارجي اثنين انش بتنبسط به وال٦٧٥ ممتاز فرقهن بسيط
وال٦٧٥ يعادل ٧.١٥

الشمروخي

06/07/2013, 11:27 PM

ولو لقيت ٦٩٠ طول ٤ انش بعد ممتاز

بيكال الوشم

07/07/2013, 12:27 AM

٧.١٥ ملي ؟

طيب يخوك انا في راسي شي محيرني من زماااان
وش يفرق التشوك الداخلي عن الخارجي

لدرجة ان بعضهم يقص تشوكه الخارجي يصير بس لحد الشفة حقت الماصورة

الشمروخي

07/07/2013, 01:03 AM

مايفرق شي وياكثر التوهمات بخصوص هالشي اللي هو القص
اما من ناحيت التخريق التشك المخرق يقولون يخفف من ارتفاع السبطانه بعد الرمي الزمه الزايده يعني والله اعلم لم اجرب هالشي

الشمروخي

07/07/2013, 01:04 AM

17.15 mm نعم اللي هو 675

بيكال الوشم

07/07/2013, 03:04 AM

طيب يالشمروخي اذا كان ماله سنع و كله توهمات
ليه طلعو تشوك ٢ انش و ٣ و ٤
اذا كان قص التشوك او تركه على حاله واحد اذا المقاسات الطويلة من التشوكات مالها سنع

بيكال الوشم

07/07/2013, 03:05 AM

طيب يالشمروخي اذا كان ماله سنع و كله توهمات
ليه طلعو تشوك 2 انش و 3 و 4
اذا كان قص التشوك او تركه على حاله واحد اذا المقاسات الطويلة من التشوكات مالها سنع .

أبوصالح9

07/07/2013, 05:52 AM

مايفرق شي وياكثر التوهمات بخصوص هالشي اللي هو القص
اما من ناحيت التخريق التشك المخرق يقولون يخفف من ارتفاع السبطانه بعد الرمي الزمه الزايده يعني والله اعلم لم اجرب هالشي

وكلامك على متمه يالشمروخي التشوك المخرق افضل من ناحية الطيار وكثافة الانتشار وتخفيف الارتداد فقط

عندي 690 مخرق + 680 عادي وكلهن امريكي والبارود روسية 30 انش

680 افضل بالنسبة لي من 690 واذا تمرن الواحد عليه بيحط 690 احتياط مثل ماسويت--لكن 690 للجرجس علاج

مع 680 لاحياة بعد الرمي سواء واقع ولا طيار--ولكن فيه نقطة مهمة ترا الفشق يلعب دور كبير على حسب نوع السلاح والماصورة بمعنى ان الفشق ماراح يتوافق مخابيطه مع اختلاف نوع البارود - عشان كذا نصيحة للجميع تبي توفر فشق وتلقى صيد جرب نوع الفشق على بارودك ولاتاخذ فشق يمدحونه العالم لانه يمكن مايناسب سلاحك

فمان الله

الشمروخي

07/07/2013, 03:20 PM

شرفني مروررك ابو صالح وفخر وجودك بالموضوع بيكال ١٨.٤ افضل شي له ٦٨٠ من ركبه مافكه
وكلامك على متمه
واما الفشق لو جربت شوزن وسيع كلش بيجوز لك ياممتاز ياجيدجداً بالبرتا ١٨.٦ ماقد عبت فشق الا ابو نجوم ماله حل
وبأمان الكريم

الشمروخي

07/07/2013, 03:30 PM

طيب يالشمروخي اذا كان ماله سنع و كله توهمات
ليه طلعو تشوك 2 انش و 3 و 4
اذا كان قص التشوك او تركه على حاله واحد اذا المقاسات الطويلة من التشوكات مالها سنع .

الشركات الاصليه اندر من النادر تصنع تشك فوق 2 انش هذا واحد الطوال مره ياباكستاني يا بريده محلي
ولا قلت وهم بطول التشك الوهم بالقص

ثانياً تدري ان ضوق التشك باخره تروح تقص اخره وش يعني ( مهب وهم الا خبال ) التشك من اوله متناسق مع ضوق الماصوره واخره هو الضيق بعضهن اخر انش من التشوك ضيق وبعضن انش ونص تروح تقص الضيق وش يعني ( وهم )2

منسدح بسطح

07/07/2013, 05:20 PM

مساك الله بالخير اخوي الشمروخي انا من المتابعين لك ودايم استفيد من تعليقاتك بس حبيت
اسالك كم سؤال يالغالي بحكم خبرتك انا عندي شوزن ونشستر طول الماصوره 32 ابي اعرف كم مقاس بيت النار هل 18.8 او 18.7 وياليت تفيدني بالانش يعني 3 انش او 3.5
وابيك تعطيني افضل تشك استخدمه للخضاري الطيار وللعب معني هاوي ترا مهب محترف بالمعنئ الأصح اهم شي الطير مايضيع
وسلامتك يالغالي×

الشمروخي

07/07/2013, 08:19 PM

بالنور والسرور ونشستر لااعلم كم ولا سجل عليه شي بس ٨٠٪ ١٨.٨ وان ٢٠٪ ١٨.٧ وكلهن طيبات
وبيت النار ٣ انش لان الونشستر ٣٢ ماتجي سوبر وافضل الماقنوم ٣ انش وافضل تشك للونشستر رقم ١ طبعاً مايجي مع ال٣٢ فاشتر واحد من السوق حق ماكسوس او ونشستر ٣٠ انش ضوقه ٧١٠ او اشتر اكسترا فل ٧٠٠ وخيااال طيار اما الفشق للخضاري بحكم الخضاري صلف فان لقيت رقم ٤/٣٤ او ٣٦ /٤ فهذا دواه او ٣٢ ٤
اللي بعده ٦/٣٦ كاكا خبل على الونشتر وزي ماقال ابو صالح شف فشق يناسب بالتحربه
ومادامك هاوي بتضيع واجد لين الاحتراف طبيعي

وتكفى الخضاري ونا خوك لاتصيد الا بالشتاء وتمرقه لاتخليه او عطه لك عامل يقدره مهب ياخذه ويجدعه

منسدح بسطح

07/07/2013, 09:59 PM

بالنور والسرور ونشستر لااعلم كم ولا سجل عليه شي بس 80٪ 18.8 وان 20٪ 18.7 وكلهن طيبات
وبيت النار 3 انش لان الونشستر 32 ماتجي سوبر وافضل الماقنوم 3 انش وافضل تشك للونشستر رقم 1 طبعاً مايجي مع ال32 فاشتر واحد من السوق حق ماكسوس او ونشستر 30 انش ضوقه 710 او اشتر اكسترا فل 700 وخيااال طيار اما الفشق للخضاري بحكم الخضاري صلف فان لقيت رقم 4/34 او 36 /4 فهذا دواه او 32 4
اللي بعده 6/36 كاكا خبل على الونشتر وزي ماقال ابو صالح شف فشق يناسب بالتحربه
ومادامك هاوي بتضيع واجد لين الاحتراف طبيعي

وتكفى الخضاري ونا خوك لاتصيد الا بالشتاء وتمرقه لاتخليه او عطه لك عامل يقدره مهب ياخذه ويجدعه

الله يعافيك اخوي الشمروخي كفيت وفيت
انا طال عمرك استخدم فشق الألمبي 32/7.5 ماشي حاله وابشرك الخضاري اللي اصيده خابرن لي راعي حلال ياكله ويطلبه مني والحمدلله
لكن ودي اسالك عن فشق توه نازل اذا كانك جربته اولمبي ماكس لونه ارزق والكأس حق الفشقه طويل على غير العاده هل الطول ذا فيه ضرر او وش وضعه وليش طويل كذا زيادة بارود يعني ؟

الشمروخي

07/07/2013, 10:41 PM

شرى منه اخوي خمس دستات وشفت النجوم بالصفره اللي تحت وعرفت بدون تجربه انه ماعندك احد واخوي يقول وسط والطول ماله دخل بالبارود مالي خبره بفايده طول الكاس

MSA-KSA

08/07/2013, 11:27 AM

ثانياً تدري ان ضوق التشك باخره تروح تقص اخره وش يعني ( مهب وهم الا خبال ) التشك من اوله متناسق مع ضوق الماصوره واخره هو الضيق بعضهن اخر انش من التشوك ضيق وبعضن انش ونص تروح تقص الضيق وش يعني ( وهم )2

:good2::good2::good2::good2:

السلام عليكم
يا أخوان بالنسبه للتشوكات العبره هو مقدار تضويق السبطانه

مثال بسيط
عندك بندقين
الأولى قطرها 18.4 ملم ( 0.724 انش)
الثانيه قطرها 18.8 ملم (0.740 انش )

وركبت على كل واحده تشوك Full بمعنى يضوق السبطانه بمقدار 0.030 انش
فرماية البندقين من حيث توزيع الحلبي ستكون واحده

ولو قسنا التشوك في كل بندق سنجدهم كالتالي
قطر التشوك في البندق الاول = 0.694 انش
قطر التشوك في البندق الثاني = 0.710 انش

الخلاصه اذا اخترت تشوك مناسب لنوع شوزنك بدرجه مناسبه لنوع صيدك
فستحصل على نفس النتيجه تقريباً من حيث تنظيم الحلبي

الشمروخي

08/07/2013, 02:43 PM

كلامك على متمه ووفيت وكفيت يعني من كلامك ان شوزن ١٨.٨ بتشك مناسب زي ٧١٠ وشوزن ١٨.٤ بتشك ٦٩٠ بيصير الرمي واحد طبعاً انا معك بس لمسافه ٣٥ لاكن لو رميت بهن مسافه ابعد بتفرق الوسيع ١٨.٨ بتشك ٧١٠ اسرع انطلاق الحلبي ولا انضغط (انعصر) بوسط سبطانه ضيقه فالحلبي ماتشوه فتلقى الوسيع افضل بالبعيد وانظم ومحافظ على لمته وتجربتي كانت بين شوزن ١٨.٨ و١٨.٣ على قوقسي واقع على شجر مسافه فوق ٤٥ متر بال١٨.٨ كنت اصيد افضل من ١٨.٣
فاكثر تجارب الشباب مسافه ٣٠ واقل فاكيد زي بعض اذا ماصار الضيق افضل بالبعيد تنعكس الايه

منسدح بسطح

08/07/2013, 04:13 PM

شرى منه اخوي خمس دستات وشفت النجوم بالصفره اللي تحت وعرفت بدون تجربه انه ماعندك احد واخوي يقول وسط والطول ماله دخل بالبارود مالي خبره بفايده طول الكاس

اهم شي انه وسط عند المحترفين تلقاه ممتاز عند الهاوين مثلنا
لكن عندي سؤال ولا عليك امر وين احصله او مكان بيعه تشك 710 حق ونشستر
وياريت تنصحني بأسم منظف ودي ازيت البندق وانظفها بخاخ انشفت
مشكور يالغالي على اجاباتك وردك وسعة صدرك

slomi

08/07/2013, 04:32 PM

http://http://www.mekshat.com/pix/upload05/images253/mk12579_sl.jpgالسلام عليكم ورحمة الله
أولاً: أبارك لكم الشهر الكريم جعلنا الله وإياكم من الفائزين بصيامه وقيامه

ثانياً: أشكرك أخوي الشمروخي على هالموضوع الشيق والمفيد ولايهون الربع اللي معك
لدي سؤال لك والإخوان اللي مثلك وشرواك ..

من خلال الصورة ياليت تفيدونن عن قطر الماصورة ( السبطانة ) لأني قلبت البندق مالقيت غير الأرقام هذي
للمعلومية البندق سوبر بلاك إيقل 2
http://www.mekshat.com/pix/upload05/images253/mk12579_sl.jpg
http://[img]http://www.mekshat.com/pix/upload06/images/2013/07/mk12579_ØµÙˆØ±Ø© 1.jpg

فرخ الجني

09/07/2013, 12:12 AM

بسجل تجربتي ولكم الحكم بندقي ستوقر 2000 واعتقد مقاس الماصوره 18.3 وكنت مركب شوك ترولوك 660 خارجي الرمي بوه غريب بالحيل لين 10 متر تقريبا تقل ترمي بخرازه ثمن الي مسافة 25 متر تقريبا ما كنك ترمي وبعد 25 متر الى 50 او 60 متر تقريبا لو تلمس الطير حلبيه وحده مات ادري الكلام ما يدخل الراس بس هاذا اللي صار معي واللحين مركب شوك 675 داخلي ممتاز لابعد حد جربته قريب وسط بعيد ممتاز جدا جدا وجمعه وفرشه ممتاز وتعقيبا على الفشق انا معي فشق ال28 وال32 دمار شامل اما 36 مهب ابالحيل ومن تالي منب اشريه يرج الراس ورجف على الفاضي

الشمروخي

09/07/2013, 12:30 AM

اخوي فرخ الظاهر الستوقر ١٨.٤ والله يبارك يه
اخوي سلوم علينا وعليك والله يتقبل منا ومنكم صالح الاعمال البلاك ايقل يجي عليه رقم حول الصوره وتجي ١٨.٣ و١٨.٤

الشمروخي

09/07/2013, 12:32 AM

الله يجزاك خير اخوي منسدح تلقاه التشك عند الوسمي بالنسيم او بالنت انا يخاخ w90 اذا لقيته لايهون عليك

slomi

09/07/2013, 01:03 AM

أخوي الشمروخي
الماصورة هذي الأرقام اللي عليه من تحت
والأرقام الباقية هي معلومات الغرامات اللي تتحمله الشوزن

ابوعاشة

09/07/2013, 05:17 AM

اخوي الشمروخي صبحك الله بالخير

انا اشوف كل ماكان تنظيم التشك افضل تكون الطلقة تبعد مسافة افضل بحكم تجربتي بالبيكال تشك 690 وتشك 660 تشك 660 مايصلح ابدا الا لضغوط الخفيفة يعطي نتيجة افضل وكل رمية تختلف عن النثانية من ناحية النظم وتشك 690 رمية واحد وراكد بحكم توافق قطر السبطانة والتناسب في الضوق الين التشك ويطلع الكاس كامل بدون تقطيع

ومعلومة اخرى الكاس له دور كبير جدا في التنظيم يعني كل فشق له رمي يختلف عن الثاني واكثر الناس يمدح فشق معين في شوزن معينة ويشتريه واحد ويخيب ضنة في شوزن اخرى جربت الكاكا والارسي وانواع كثيرة الي جاز لبندقي فشق الجازال واللامبرو ممتاز جدا في البيكال بتشك 690

قنا

09/07/2013, 05:44 AM

الشمروخي الموضوع مهم جدا جدا وصراحه ماينزل مثل هالمواضيع "الخفيه" الا شخص بحجم ممارستك وخبراتك أذا تسمح لي بقول خلاصة تجاربي مع التشكات وتناسبها مع جف السبطانه وتضوقاتها بالنسبة للتركيات ام بطه وستوقر وبرديوس كل ماكان التشك ضيق وخصوصا من ترولوك كل ماكان رمي الفشق الارقام الخفيه 6و7.5 و9 ابداع وفي الضغوط والقرمات العاليه ينثر بزود الغريب تماما ان العكس يصير بالماكسس والونشستر اكس ثري من تجربه تشك رقم 980 ترولوك في رقم واحد والاصفار ابداع ..!؟ اما في البلاجيك القولد سابقا وحاليا الفيوجن تشك بلدها رقم 2هو الانجح كانها اختارت الوسطيه في الموضوع !! المساله معقده كنا اول ع ام شجره رميك واحد مايختلف لكن مع تطور الصناعه ماتطورت عندنا مفاهيم بعض الاشياء وفائدتها لكن مع مواضيع كموضوعك يالشمروخي اعتبره "تنويري" ويعم بالفائده ع اخوانا في الاسلام والهدف والهوايه المشتركه :) بيض الله وجهك وجزاك الله خير

أبوصالح9

09/07/2013, 02:18 PM

منسدح بسطح

09/07/2013, 03:31 PM

اخوي منسدح هذا نوع منتاز للتنظيف
http://imageshack.us/scaled/thumb/24/whna.jpg

http://imageshack.us/scaled/thumb/842/do76.jpg

واذا تبي بخاخ للتزييت رح للرماية وتلقى عنده بخاخ سعره 15ريال ميزته خفيف البخاخ مهب عندي الحين ولا كان ارسلت لك صورته - المارية ان غطاه احمر ولون العلبة سماوي تقريبا عليه صورة صاموله وابو جلمبو -اذا هي على خبري ولا غيروا الصورة هههههههه

شكله بخاخ سباكه ذا هههه تسلم يابو صالح عرفت هالبخاخ ذا كد شفته بمحل الكترونيات بس ماتوقعت انه ينفع للسلاح بشريه ان شاءالله وبمر الرمايه اسال عن الثاني مشكور يابعدي انا كنت ناوي ازيت البندق بزيت خياطه بس ربك ستر ههههه

بيكال الوشم

09/07/2013, 04:39 PM

يا منسدح بسطح
تراي زيت مكينة الخياطة من افضل الزيوت لمكينة الشوزن
صب لك في قاع الفنجال من زيت مكينة الخياطة و خذلك منديل و ابرمه خل راسه مثل الدبوس
ثم غطه في الزيت و مش الزيت في ( مجاري المكينة ) لا تحطه على المكينة بذاتها ، فقط في مجرا المكينة و ان شاء الله ماراح تعاني من تراكم البارود و الرايش في مكينتك مره ثانية ابد و هذي طريقة تقلل لصاحب السلاح من فك الشوزن و تنظيفها بشكل مستمر

اخوكم ....

الشمروخي

09/07/2013, 08:02 PM

اخوي قنا ووجهك ابيض وكلامك شرف لي
اخوي ابو عائشه كلامك مطابق لموضوعي كل ماصوره وضيق له تشك مناسب والبيكال افضل شي له ٦٨٠ افضل من ٧٠ و ٦٠ واللي بعد ال٨٠ بالطيب ٦٩٠ زي ماقلت يالغالي والمواصير الوسيعه التشك الضيق به مايصلح زي ماقلت الا بحاله وحده طير كبير زي الرهو مايهمه تنظيم لانه لاحقه حلبي لاحقه

أبوصالح9

10/07/2013, 05:30 PM

شكله بخاخ سباكه ذا هههه تسلم يابو صالح عرفت هالبخاخ ذا كد شفته بمحل الكترونيات بس ماتوقعت انه ينفع للسلاح بشريه ان شاءالله وبمر الرمايه اسال عن الثاني مشكور يابعدي انا كنت ناوي ازيت البندق بزيت خياطه بس ربك ستر ههههه

العفو وانا اخوك بس بغيت انبهك لمسألة التزييت

اول شي الزيت اسمه يوستا - USTA-

واذا جيت تزييت الاجزاء رج العلبة وبخ على عود قطن حق الاذان وامسح مره وحده بس يعني لا تحمس بالحيل وزيت اللي تبي - بس لاترش على المكينة مباشرة

فيضة بن سويلم

03/08/2013, 05:36 AM

اخوي الشمروخي

عندي التشك رقم واحد قسته بالقدمه العاديه لقيته 15 ملم يعني كم يعادل مقاس التشك علما ان الماصوره 18.4من الوسط بطول 30 انش ..

ماهو التشك المناسب لها لاني ناوي اشتري تشك خارجي

درب الحمراء

03/08/2013, 08:21 AM

الله يعطيكم العافية على التوضيح

موضوع يستحق أن يمر عليه غالبية أصحاب البنادق

الله يجزاكم خير و يوفقكم بالصيد الطيب ...

الشمروخي

03/08/2013, 08:45 PM

الله يجزاك خير ويرزقك الصيد
اخوي فيضه بن سويلم قياسك ماهو صحيح
١٨.٤ دايم تشك رقم ١ اللي معه ٦٩٠
وافضل تشك له ٦٨٠ خارجي داخلي كله واحد

S3oDi

03/08/2013, 08:59 PM

مساء الخير

الاخ الشمروخي (http://www.mekshat.com/vb/member.php?u=249928)
يعطيك الف عافيه موضوع يستحق التقييم

وعندي استفسار طال عمرك

الاستوقر 2000 وش افضل تشك لها ؟!

وشريت لي تشك 685 للاستوقر ولا جربته مابعد وصلني للحين :)

لكن هل منه خطر على السبطانه خصوصا للضغوط او غيرها من الفشق

احترامي وتقديري

الشمروخي

03/08/2013, 09:55 PM

اللي شريت له ممتاز الله يبارك لحلالك ويوفقك

فيضة بن سويلم

03/08/2013, 10:00 PM

الله يجزاك خير ويرزقك الصيد
اخوي فيضه بن سويلم قياسك ماهو صحيح
١٨.٤ دايم تشك رقم ١ اللي معه ٦٩٠
وافضل تشك له ٦٨٠ خارجي داخلي كله واحد

وياك اخوي الشمروخي انا قست التشك بالقدمه العاديه وتعرف ماهي دقيقه حيل http://www.mekshat.com/pix/upload05/images253/mk241995_88888.jpg

الشمروخي

04/08/2013, 02:31 AM

الا ماهي لم سالفه القياس
شوزنك فرانشي اذا فرانشي تشك الفل رقم ١ تراه ٦٨٥

فيضة بن سويلم

04/08/2013, 03:15 AM

الا ماهي لم سالفه القياس
شوزنك فرانشي اذا فرانشي تشك الفل رقم ١ تراه ٦٨٥

الله يجزاك خير على كذا اجل ما يحتاج اشتري له تشك....

بالله شرايك بالمواصير الي بلسوق منتشره يقولون فرنسيه واضنه باكستانيه تشبه لمواصير البلاجيك...

نوية ارهم :( وانا مكره بسبة الصده لليسار بصراحه اشغلتني لان المشكله بتركيب الماصوره من الجسر والخاتم فيه خلل وتصليحه شغلانه

الشمروخي

04/08/2013, 03:56 AM

صلحه ابرك واوفر لك وتزين الصده ورميه زين الفرانشي مايحتاج ماصوره
واما ماصوره فرنسيه يمدحونه ولا ادري عنه ماجربته

سعد العطاوي

04/08/2013, 02:46 PM

ياالشمروخي مساك الله بالخير عندي بنلي بلاك ايقل ٢ابي تشوك خارجي يغنيني عن ترهيم المواصير ابيه للمسافات البعيده
نركبه وقت الكرك بس وتحياتي لك

الشمروخي

04/08/2013, 05:16 PM

بالنور والسرور تشك ٦٧٠ خارجي انشين طيب ومايغني ١٠٠٪ يغني اتوقع ٧٠٪ لان ماصورت ايقل ٢ بيت النار سوبر ماقنوم والبلجيك باكثير ماقنوم فكل ماصغر بيت النار زارت حراره الرمي
ولا من ناحيت ماصورت ايقل ٢ والبلجيك كلهن ١٨.٣ الفرق بالطول وتقدر تعوضه بتشك اطول والفرق الثاني بيت النار

ابن كديميس

04/08/2013, 06:56 PM

ماشاء الله عليك ياخ محمد
موضوع قيم وياليت المشاركات عن المواصير والتشكات وبس بدون ذكر الماركات لتعم الفائده اكثر .
ادخل بقلب الموضوع فيه فرق بين التنظيم والحراره
التضويق بالااقطار الضيقه ازين حراره ويبن معك لاجربت ماصوره ضيقه مع ماصوره وسيعه بفشق 32 جرام
لان ظغط باروده قليل ونفجاره بقطر ضيق يحصل على انفجار قوي وانطلاقه سريعه اكثر من الماصوره بتضويق اوسع
هذا مجربه ومتاكد منه في بنادق نفس الموديل ونفس الماركه ذات اقطار مختلفه ومواصيرهن
بدون تشكات وكلهن من قدام ضيقات واقطارهن 18،3و18،5كلامي على ماشفت وجربت
صح نظم احلى التضويق الوسيع والاحظته من 20 متر الى 60 متر تقريبا نفس النظم دائره
وماحافظ على نظمه لاكن ماهو ماحافظ على حرارته والتضويق الضيق احلى حراره بس
ورشه يجمع فوق الزوم للمسافه المتوسطه والقريبه ولاينشر الا من مسافه بعيده ولانشر يكون غير منظم .
والقطر الضيق كله واحد
ترمي بفشق 32 و36 كله حول بعضه وتشوف 32 سريع وقوي .
والقطر الوسيع الاحظ الفرق بين 32و36 واحس انه خفيف 32 ونفس النتيجه معه باستخدام40 و36 .
وبنفس الوقت كلهم زينات ويصيدن .

كثير من الاخوان يخلط الامر بين المواصير التشوكات والعاديه بدون تشكات
المواصير العاديه تختلف اختلاف جذري عن المواصير التشوكات
المواصير العاديه يكون تمشي بتضويق تدريجي من اول الماصوره الى اخره
وتتحكم باختلاف الماصوره ثلاث اشياء تضويق القطر والطول للماصوره ومقاس الفوهه للماصوره من قدام
.واذا اختلف احد العوامل هذي فالختلاف يكون اختلاف جذريأُ لمقاس الماصوره كاملاُ واختلف النظم والحراره باختصار كل ماصوره تختلف عن ماصوره
مثل التشك اختلافه عن تشك اخر .
والمواصير التشكات اختلافها الواضح بتضويق القطر ومقاس التشكات الطول تاثيره بسيط
وأيد كلامك انه بختلاف طول بيت النار يأثر .
وثق ثق تامه انه الرمايه تتركز في المقام الاول على الرماي وتقديره الجيد فالرمي .

وياليت تركز في كلامي زين ياخوي محمد:).

قلب الداهية

04/08/2013, 07:53 PM

جربت الونشستر رقم واحد الفل احسن تشوك
كلما زاد الضغط ساقت اكثر والعكس صحيح

الشمروخي

04/08/2013, 07:56 PM

ركزت بكلامك واختلف معك بحكم ان معي شوزنين بنلي ريفاليوا ١٨.٣ ٣٠ انش فل تشك ومعي براونق اوتو ٥ الجديده ١٨.٨ تشكات
طبعاً اختلف معك بان الفل تشك تضويقه تدريجي زيه زي ام تشكات ادخل الكاس وادفعه بسيخ التنظيف مايوقف الا باخ الماصوره زي التشكات يعني ١٨.٣ من تعدا بيت النار الى قبل الاخير بانش او انشين حسب نوع الشوزن
ومن ناحيت حراره الرمي والسوق والنظم ( انا قياسي طير بعيد ) شنكوا جالون مايهمن ابد لانه من تجربه ارمي جالونين رميتين نفس المسافه والفشق ويختلف الرمي تلقى الاختراق ازود بواجد !!!!! فقياسي طير قوقسي بعيد بحكم القميري طبعاً ال ١٨.٨ تصيده بمسافه ابعد من الضيق ماهي من طلعه طلعتي اكثر الضيق ملخبط ويعتمد على الصدفه ويصلح للطير الكبير زي الرهو لان الرهو مايهمه تنظيم اهم شي حلبي ياصله ونفس الكلام على الوسيع يصلح لرهو ويصلح لصفار

فيضة بن سويلم

05/08/2013, 02:29 AM

جزاك الله الف خير يالشمروخي

ابن كديميس

05/08/2013, 06:40 AM

عفاك الله
المواصير مثل اصابع يدك
وهذا اللي صادفته فيهن وقلته للفائده باختلاف تضويقهن و مع انهن نفس بعض وصح كلامك الخبره مع الزمن وتجي من مواسم الصيد وان كان على الصدفه والحظ ماشاء الله اجل حظي يطش الطير من السماء .

الشمروخي

05/08/2013, 09:23 AM

الله يزودك حظ ومافيه ازين من البركه والحظ والوفقه الله يوفق الجميع

قلب الداهية

05/08/2013, 02:41 PM

يعني ماصورة ال A5 نفس مقاس ماصورةالونشستر SX3
كلها 18.8

top-talal

05/08/2013, 02:57 PM

السلام عليكم

الاخ / الشمروخي... مساك الله بالخير

ياليت تذكر افضل تشك للبراونق ماكسيوس العاديه
سواء للواقع او للطيار

الشمروخي

05/08/2013, 05:46 PM

رقم واحد لاتتعداه واثنين للقميري واللي حول حجمه اذا رهو خذ ٦٨٠

زياد البواردي

06/08/2013, 12:54 AM

الاخ الشمروخي السلام عليكم عندي سوبر بلاك2 18.4 وعندي شوك خارجي نوع فرانشي ابيض فل تنصحني اركبة وهل يتحمل ضغوظ ولك كل الشكر

twa505

28/01/2014, 07:49 AM

الشمروخي

28/01/2014, 07:58 AM

اخوي زياد لازم تعرف قياسه
اخوي 505
المكتوب 12 العيار الشوزن العادي 76 يعني بيت النار ماقنوم يرمي فشق من اضعف نوع الى 56 او فشقه طوله 76
اما 18.3 تلقاه مكتوبه بالسبطانه واذا مهب موجود فاذكر نوع الشوزن ويعلمونك الشباب وله مقياس بس ماتحصله

اابوكايد

28/01/2014, 08:52 AM

الاخ الشمروخي بالنسبه للبراندلي ضوق السبطانة غير موجود على الماصورة ووبعد بحث بموقع الشركة و جدته بموقع الشركة 18.3
يعني الافضل لها تشك 6.70 وكيف اقيس السبطانة

twa505

28/01/2014, 11:01 AM

اخي الشمروخي الله يسعدك ماقصرت نوع البندق ارثميس التركية واتمنى تعرفني على جميع مواصفاتها

وهذي الصورة ارفقتها

http://im34.gulfup.com/idaoD.jpg

http://im32.gulfup.com/2UlQX.jpg

والرمز ST 870 ايش معناه وكيفية التأكد من قياس السبطانة اذا 32 او 30 انش

الشمروخي

28/01/2014, 12:50 PM

ارثمتس جت 32 اكثرهن وتعرفه عبر المقياس المتري الموجود بالمحلات اللي فيه سم وانش والرمز 870 لااعلم عنه شي والتركيات اغلبهن 18.4 ضوقهن
البرندلي لاعالم عنه شي بس مدامه 18.3 فانسب شي له شك الفل بلد ولا 675 اما كيف تقيسه من داخل فليس متوفر قياسه

twa505

28/01/2014, 02:08 PM

الله يسعدك يا غالي ما قصرت

PATROL

28/01/2014, 09:16 PM

مساكم الله بالخير جميعا
عندي شوزن مكتوب عليها الارقام

CAL 12/76mm N.BD. ST 870

وانتم تتكلمون عن مقاسات ودي اعرفها مثال

3 انش و3.5 انش
وكذلك مقاس 18.3 ... الخ وكيف اعرف واقيس السبطانة

ولكم الشكر الجزيل

أنا عندي نفس الشوزن وجربت أغلب التشوكات وافضل شي رقم 685 بصراحه خيال برمي الطيار وتنظيم الحلبي خيال! انتبه لاتقرب التشوكات الضيقه مثل 670 و 660 لانها تلخبط الحلبي!
ارجو اني افدتك

الشمروخي

28/01/2014, 10:37 PM

اخوي باترول كلامك يدل ان البندق 18.4 وهذا اللي متوقع للبرندلي واكثر الشوازن فافضل شي 685 اللي هي الفل بلد

twa505

29/01/2014, 08:40 AM

عزيزي باترول التشوكات الي عندي 1و2و3و4و5
كان راكب عليها رقم 3 وبعدين جربت 2 وحسيت انه افضل
التشوك رقم 685 جا مع البندق وﻻ انت شاريه

abujasser

30/01/2014, 01:26 PM

ياخوان ابي اتشواك للبراندلي 670 او 680 فين احصله ومشكورين وجزاكم الله كل خير

PATROL

30/01/2014, 09:16 PM

عزيزي باترول التشوكات الي عندي 1و2و3و4و5
كان راكب عليها رقم 3 وبعدين جربت 2 وحسيت انه افضل
التشوك رقم 685 جا مع البندق وﻻ انت شاريه

التشوك رقم 2 يعتبر افضل تشوكات البلد!
اما بالنسبه لرقم 1 فاشل ويلخبط الحلبي!
التشوك اللي اقصده هو تشوك خارجي رقم 685 وهو الافضل ورميه خيال ماشاء الله

الشمروخي

01/02/2014, 07:42 PM

على العموم برندلي مثل بيكال ماصورته مهب دقيقه بيكال مكتوب 18.4 وقستهن بعضهن خمسه وسته واربعه فتلقى فرق بين بيكال وبيكال بالرمي وبنردنلي جربوه الربع نفس الشي بعضهن رميه خبل وبعضهن وسط وااحد شرى ثنتين وحده قرار وطيبه ووحده تهفي
على العموم جرب تشكات البلد ان صلحت ولاركب 675

hadi.9

07/05/2015, 05:41 AM

ثانياً الماصوره مقاس 18.4 افضل تشك مناسب هو 680

عليكم السلام ورحمة الله

بيض الله وجهك ماقصرت على الطرح نفس مقاس ماصورة البيكال 28 انش

لكن للأسف المواقع مافيها ها المقاس حصلت

من 632 الى675 مرقمه والباقي تجي رموز في موقع شركة ويلسون
ومقاسات 650 مكتوب جنبه 4xfull
660مكتوب 3xfull
670مكتوب2xfull
675 مكتوب hevishot
الي اكبر من ها المقاسات مكتوب
xfull,full,lightfull
موقع الشركه هنا (http://www.wilsonprecision.com/chokes.html)

اتمنى تفيدني والله يعطيك العافيه اخوي

الشمروخي

07/05/2015, 08:35 AM

وعليكم السلام
اكس فل 685
فل 695
الثالث 705

مشكله البيكال ضوقه مهب زي ماهو مكتوب 18.4 مافيه دقه بالصناعه يعني ممكن تجي 18.5 او18.6

احد الزملاء ركب تشك 700 فل لبيكال 28انش وانبسط عليه

hadi.9

07/05/2015, 12:21 PM

وعليكم السلام
اكس فل 685
فل 695
الثالث 705

مشكله البيكال ضوقه مهب زي ماهو مكتوب 18.4 مافيه دقه بالصناعه يعني ممكن تجي 18.5 او18.6

احد الزملاء ركب تشك 700 فل لبيكال 28انش وانبسط عليه

بيض الله وجهك
محتار بين 675 و685

او ياليت تنورني لاني اخذت تشوك من شركة بارلي modified
ماادري والله مقاسه 705 او 710

وجربته على فلينه كان رشه كويس من مسافة 28 متر
مع العلم اني اشوفه اضوق من تشوك الفل حق بلدها حتى الوالد شافه قال انتبه منه اشوفه ضيق وطوله 2 انش بعد مايركب على الماصورة وراسلت الشركة قال
ضوقه 0.20 لان ماعندهم مقاسات

انا بغيت للمسافة البعيده لاهنت
وابغى تنظيم في الرش شفت كثير يمدحو 675 و680
اتمنى تفيدني والله يرضى عليك

الشمروخي

07/05/2015, 07:00 PM

والله يالغالي بيكال 30 انش غير 28انش ال30 جربت عليه 680 افضل شي اما ال28 تشك 700 ناجح عليه والله اعلم جرب مع احد ربعك شف المناسب لك

hadi.9

07/05/2015, 08:05 PM

والله يالغالي بيكال 30 انش غير 28انش ال30 جربت عليه 680 افضل شي اما ال28 تشك 700 ناجح عليه والله اعلم جرب مع احد ربعك شف المناسب لك

بيض الله وجهك ربعي شوزن ام حبه ومكسره بعد مايعرفو ام خمس هههههه

لكن باخذ 675 واتوكل على الله لاني شفت مدح كثير عليه هو و680

والموقع للأسف مافيه في الموقع 680 ولاكان اخذته

الله يعطيك العافيه ويرضى عليك

الشمروخي

07/05/2015, 08:52 PM

الله يعافيك ويبارك بحلالك

hadi.9

08/05/2015, 10:12 PM

الله يعافيك ويبارك بحلالك

الله يخليك لعين ترجيك ويبارك فيك

اعذرني اتعبتك جيت بشتري التشوك طلع لي خيار احترت اختار ايش

طبعاً اخترت نوع البندقيه بيكال واخترت المقاس 675

واخترت شكل التشوك الاول ومدري ايش الفرق الي 70$ والي 75$

اخر خيار هو الي وقفت عنده

في خانة Internal Geometry
يوجد خيارين الأول taper-parallel
والثاني continuous taper
تحياتي لك

الشمروخي

08/05/2015, 10:50 PM

مهنى تعب بس انا مالي والانجليزي يالله عربي ونقطع

يمكن مخرق وعادي خذ العادي مايفرق شي او داخلي وخارجي ومايفرق شي حسب هواك الله يسهل لك الزين

hadi.9

08/05/2015, 11:58 PM

مهنى تعب بس انا مالي والانجليزي يالله عربي ونقطع

يمكن مخرق وعادي خذ العادي مايفرق شي او داخلي وخارجي ومايفرق شي حسب هواك الله يسهل لك الزين

بيض الله وجهك
راسلت الشركه يقول x full مقاسه 680
وقالي اختار taper parallel
موازي
ومستمر

بنطلب وعلى الله

وراح نوافيك باالتجربه في موضوعك ان شاء الله

موفق ياصاحبي

بينلي

09/05/2015, 01:40 AM

البيكال ركب تشك ٦٩٠ ترولك وان قدرت تلحمه بعد لاتتعب ودور غيره جربنا انواع التشكات

hadi.9

10/05/2015, 02:39 PM

البيكال ركب تشك ٦٩٠ ترولك وان قدرت تلحمه بعد لاتتعب ودور غيره جربنا انواع التشكات

للاًسف موقع الشركه احسه غبي شوي
مايقبل الابطاقة امريكيه ويشحن دولي
حاولت وراسلت لهم قال عندك وسيلة دفع او هذا نظامنا
وراسلت شركة ترولك قال نأسف لاتسطيع الشحن الى السعوديه
ندور موقع وان شاء الله نحصل
وتسلم على النصيحه وباخذها باالحسبان