هل يوجد بديل أفضل وأقوى للأسمنت للصق الحجارة

[فتى الوادي]

السلام عليكم :
عندي هالأيام تزيين مشب وذلك بالحجارة عى النمط الجنوبي .
واستتفساري هو : هل يوجد مادة لاصقة أقوى وأفضل من الأسمنت ؟!
وذلك لأستخدامها في لصق الحجارة بالجدار







......

[NATLUS]

وعليكم السلام ورحمة الله وبركاته

الي اعرفه ان فيه منتجات اقوى للصق الحجاره ممكن تحصلها في ساكو لكن طبعا اعلى تكلفه من الاسمنت

وفيه ايضا مواد ثانيه اقل تكلفه يجي غراء على شكل طحين مثله مثل الاسمنت

لو تشرح انت وش ناوي تسوي بالضبط ممكن نساعدك

[فتى الوادي]

شكرا اخي الحبيب ..
أنا عندي "مشب" غرفة 7.5 في 6 م
وناوي ألبس الجدار أحجار ... واريد مادة بدية عن الأسمنت تكون اقوى وأفضل .
والحجارة طبيعية وبعضها ثقيل نوعا ما .. وأخاف أن الأسمنت ما يمسكها أو تسقط ..

http://static4.depositphotos.com/1005048/387/i/950/depositphotos_3870619-The-pavement-of-granite-stone.jpg

[NATLUS]

فهمت الي تبيه ابشر

تعطيني يوم بس علشان اشوف لك افضل مادة ووين ممكن تحصلها فيه اذا ماانت مستعجل


الجدار مليس وبويه ولا بلك بس

والسؤال الثاني انت تبي تلبس المشب نفسه ولا الجدران وهل جهه وحده ولا كل الغرفه والارتفاع الى كم

[فتى الوادي]

الجدار مليس فقط
ارتفاع 1.10 في 7 متر
التلبيس من الخارج
في انتظارك بارك الله فيك .

[حزوبر]

السلام عليكم
هناك مثل الأسمنت الأبيض اسمها(فتونايت) كيسها ازرق سعر الكيس 20 ريال بطريق الخرج، يستخدمه المبلطين للسراميك والرخام للجدران والأرضيات،ولكن يجب أن يكون التلييس خشن ، ويشخط بمقدار 2ملي، على الجدار المراد تلبيسه بالحجر، أو أنك تجعل المبلط، ينقره بمطرقه خاصه رأسها مدبب تجدها عند محلات ادوات البناء

[فتى الوادي]

فتونايت معروف وهو غراء للسيراميك ... لكن هل هو أقوى من الأسمنت في تحمل وزن الحجارة ؟
المعروف أن وزن السيراميك خفيف .. لكن الحجر الطبيعي أثقل وزنا من السيراميك ..

[NATLUS]

بما ان الارتفاع 1.10 فا الامر بسيط ان شا ءالله والاسمنت يكفي لكن طريقة تثبيته هي الاهم

فيه نصائح يمكن تفيدك لان تركيب الحجر الطبيعي جماله في عشوائيته
1 تحدد مكان الشغل بخط من البدايه علشان يكون على مستوى واحد
2 قدامك حلين اما تنقير الاسمنت مكان الشغل او تشيله وتسوي طبقه جديده تحت الخط وبعدين تجرشها بخطوط عرضيه ( انا مرفق ملف فديو اخر المشاركه ) في حالة انك سويت طبقة جديده بعد ماتسوي الخطوط العرضيه تخليها يوم او يومين الى ان تنشف تمام لانها هي الي راح تمسك الحجر
3- قبل ماتبدا في التركيب حاول ترتب الحجر على الارض وتغير الى ان توصل للشكل المطلوب قبل التركيب هذي تسهل عليك الموضوع ولا تتفاجأ بشكل مايعجبك ( احيانا راح تحتاج تكسر بعض القطع )
4- عند تركيب اي قطعه يرش المكان الي راح تثبت فيه على الجدار مويه خفيفه علشان يثبت اكثر ( ممكن تستخدم بخاخ عادي )
5- حاول تكون فيه فراغات بسيطه بين كل قطعه وقطعه لانك راح تعبيها بالاسمنت + مضاف عليه لون يكون اقرب لشكل الحجر وهذي افضل من التلاصق بين الاحجار اولا شكلها احلى وثانيا تعطي ثبات


http://www.youtube.com/watch?v=tHiGNX4EvGI

الفديو من اربعة اجزاء تفرج عليه وشف بقية الفديوهات

( ملاحظة التركيب في المقاطع كان على خشب وفي مثل الحاله هذي يستخدمون شبك حديدي وبعدها يغطى بالاسمنت ) طبعا احنا راح نبدا من الاسمنت على طول

[فتى الوادي]

شكرا اخي الكريم :
لا أخفي عليك اليوتويوب ما قصر معي ... وقبل أن أنزل الموضوع في مكشات سبق لي أن راجع هذا الفيديو بالضبط بأجزاءه الأربعة .
.... لا يزال الموضوع هل فيه بديل عن الأسمنت أقوى ؟
وهل لا بد من خلط الرمل مع الأسمنت ؟

[فتى الوادي]

استعنت بالله وبدأنا في الشغل
وهذه بعض الصور على قد الحال وقبل التنظيف والتلميع


http://www.mekshat.com/pix/upload06/images/2013/07/mk213_img_2817.jpg
http://www.mekshat.com/pix/upload06/images/2013/07/mk213_img_2818.jpg
http://www.mekshat.com/pix/upload06/images/2013/07/mk213_img_2819.jpg
http://www.mekshat.com/pix/upload06/images/2013/07/mk213_img_2816.jpg

[عود رمث]

السلام عليكم

أولا : ما أدري وش صار عليك مع المنشار ؟؟

ثانيا : الغراء ممكن تحصل عند محل العواد للديكورات الحجرية ..

مكانه الرياض طريق الخرج القديم .. بس بالضبط ما أعرف وصفه ..

المهم عنده غراء خاص للحجر الطبيعي يجي سائل بجراكل ويخلط معه مادة ثانية من جالون ..

لونه تقريبا رصاصي .. وممكن تاخذ منهم ترويبة مناسبة .. لكن خذ معك قطعة حجر علشان اللون ..

والله يسهل أمرك

[عود رمث]

ما شاء الله عليك ..

خلصت وأنا توي أعلمك ..

الله يوفقك

[فتى الوادي]

http://www.mekshat.com/pix/upload06/images/2013/07/mk213_img_2820.jpg

http://www.mekshat.com/pix/upload06/images/2013/07/mk213_img_2825.jpg

[NATLUS]

ماشاء الله شكله جميل

الاسمنت لازم يخلط مع رمل ثقيل

الحجر متوازي مع مستوى الجدار صحيح ؟ معطي شكل حلو ماشاء الله

[NATLUS]

الشينكو الي فوق فيه مادة عازله مثل الرول وتلحم بالنار الي اعرف انها تركب على الصفائح الحديديه لكن مايمنع تسأل يمكن تركب على الي عندك

[فتى الوادي]

بالنسبة للشغل لم ينتهي بعد ..
باقي بعض اللمسات والتحسينات ...
أخي " NATLUS " ما هي العازل اللي تقول عليه ؟ وأين أجده ؟ وهل هو ديكور أو عازل فقط ؟
انا ناوي اعمل ديكور خشب يغطي الشينكو ويعطي منظر في عبق الماضي .

[NATLUS]

http://alwefi11.blogspot.com/2012/10/blog-post.html


هو عازل فقط يجي على شكل رول اسود ويلحم بالحراره اسمه py الي راح تستفيد منه اولا عزل مائي ممتاز ثانيا يخفف من صوت سقوط المطر على الشنكو
و سعره معقول في حدود 16 ريال للمتر مع التركيب ماادري اذا ارتفع الان

شف في اللنك الي فوق مشروع عمل مشب ومستخدم الرول وعلى فكره واحد يذكر انه استخدم نفس الرول على الشنكو وكانت النتيجه ممتازه بس اتوقع راح تزيد معك الامتار بحكم ان الشنكو متعرج لكن الموضوع في النهاية بسيط

لما تبحث عنه دور في المحلات المتخصصه في العزل

شف النك هذا يمكن يفيدك اكثر
http://www.homekw.com/bet/showthread.php?16843-%D9%85%D8%A7%D9%87%D9%8A-%D8%A3%D8%AC%D9%88%D8%AF-%D8%A7%D9%84%D8%B9%D8%B2%D9%84-%D8%A7%D9%84%D9%85%D8%A7%D8%A6%D9%8A-%D9%84%D9%84%D8%A3%D8%B3%D8%B7%D8%AD-%D9%81%D9%8A-%D8%A7%D9%84%D9%85%D9%88%D8%AC%D9%88%D8%AF-%D9%81%D9%8A-%D8%A7%D9%84%D8%B3%D8%B9%D9%88%D8%AF%D9%8A%D8%A9/page3

[NATLUS]

شوري عليك ان العزل يكون فوق الشنكو
وتحت تقدر تسوي الديكور الي تبيه ... اهم شي الميول فوق

[فتى الوادي]

الشينكو غير ظاهر من الخارج .
كما أن العزل هذا غير موجود لدينا في المحافظة .. ولو جبته من الرياض لن أجد من يركبه ويضبطه .

[الوافي.]

الحمد لله حسبت انه يبي يحط الحجر من الداخل