أكره التقنية فقد أصبحت الرحلات بعدها بلاطعم

[راعي ساموده]

السلام عليكم ورحمة الله
ربما لن يفهم مغزاي من العنوان إلا من جيل الرحلات ماقبل التقنية اللذي جرب المفاجئات جميلها وسيئها وغامر في الصحاري والقفار بلا قارمن ولا ثريا ولم يعلم ما ينتظره من خضره وأمطار وشعاب من مواقع النت وتقارير الكشاته،،،
كان يدخل الصحراء أياما ويقطع مسافات شاسعة لا يقابله إلا القليل من عشاق المغامرات في الصحراء
أيام جميله ومشاعر أجمل كنا نعيشها سابقا قبل أن نستطيع أن نشارك في مقانيص الربع الخالي في غرف بيوتنا عن طريق الايباد، وقبل أن نرى سيارات كامري بعوائلها وأطفالها تجوب غياهب الصمان ،،،

عزيزي القارئ هذه خاطره أحببت المشاركة بها فإن لم تعجبك وهذا من حقك فأرجوا أن يكون ردك لطيفا ومنطقيا

[ساهر حايل]

هلا وغلا الف بالامير .. كلامك رائع والله واان معك بما قلت ولكن كانت محفوفه بالمخاطر والتوهيقات ليست كما هي الآن .. الود ودك لا جيت تطلع للبر الجوال يجلس بالبيت اما القارمن والجهاز مريح وخدوم والله .

ولا تنسى ايام زمان العقال كثير من اصحاب البر والرحلات عكس هالأيام يضيعون ومعهم كل أجهزة الدنيا :)


يسلم لنا بوحك والله يعيد كل يوم سعيد عليك وعلى المسلمين يارب ..

[مرهمه]

اخي العزيز راعي ساموده ربما تكون خاطرتك نابعه من روئية سلبية نوعا ما
اقولك ليش باختصار اولا التقنية زينه من ناحية انها تساعدك على تحديد المكان اللي ودك تكشت فيه بسهولة عند استخدام اجهزة الملاحة وتعطيك علم مسبق عن طبيعة الموقع بعد ما تشاهد على التقارير الموجودة بالمنتدى
بالاضافة الى ان التقارير توسع صدر الواحد لامن صار الجو مثل الحين حر وغبار ولا يمديك تكشت
اما العوائل اصحاب الكوامري فأنا اقولهم قواكم الله وسعو صدوركم والبر ليس محصور على فئة من الناس
المهم ان تترك المكان كما كان او احسن مما كان.

[الرحال الحزين]

مرحبا اخي راعي ساموده

اتفق معك في ناحيه واختلف معك في ناحيه

الجارمن مهم جدا في تحديد المواقع وهذا لاغني عنه وليس كل الناس لديها ذاكره قويه مثلك ماشاء الله تبارك الله وكذلك هاتف الثريا ممهم لو حصل شي لاقدر الله والجوالات العاديه الخاصة بالاتصال فقط ضروريه

اما الجوالات التقنيه انتر نت ومادري وشو هذي مالها داعي وتسرق منك الوقت وانت في احسن الاماكن
والله انا نطلع الطلعه كلهم لي معب روسهم في جولاتهم تقول بزران الله يهدينا وياهم

وهذا رايي وارجو السموحه منك

[escape_man]

راعي ساموده .. راحت عليك

الجيل هذاك انتهى و مابقى له الا الذكريات

يوم العشب بالصمان يغطي كفرات الجمس والعالم تخيم على حدود الروضة مو بوسطها

انا ابشرك حالف ما اطب الصمان يمكن من 8 سنين

[راعي ساموده]

هلا وغلا الف بالامير .. كلامك رائع والله واان معك بما قلت ولكن كانت محفوفه بالمخاطر والتوهيقات ليست كما هي الآن .. الود ودك لا جيت تطلع للبر الجوال يجلس بالبيت اما القارمن والجهاز مريح وخدوم والله .

ولا تنسى ايام زمان العقال كثير من اصحاب البر والرحلات عكس هالأيام يضيعون ومعهم كل أجهزة الدنيا :)


يسلم لنا بوحك والله يعيد كل يوم سعيد عليك وعلى المسلمين يارب ..

هلا بك أكثر ويشرفني وجودك وردك ،، وأنا اتفق معك إذا نطلب الراحه والوصول بأمان

[راعي ساموده]

اخي العزيز راعي ساموده ربما تكون خاطرتك نابعه من روئية سلبية نوعا ما
اقولك ليش باختصار اولا التقنية زينه من ناحية انها تساعدك على تحديد المكان اللي ودك تكشت فيه بسهولة عند استخدام اجهزة الملاحة وتعطيك علم مسبق عن طبيعة الموقع بعد ما تشاهد على التقارير الموجودة بالمنتدى
بالاضافة الى ان التقارير توسع صدر الواحد لامن صار الجو مثل الحين حر وغبار ولا يمديك تكشت
اما العوائل اصحاب الكوامري فأنا اقولهم قواكم الله وسعو صدوركم والبر ليس محصور على فئة من الناس
المهم ان تترك المكان كما كان او احسن مما كان.

أحسنت ،، فعلا نظرتي سلبيه جداً والتقنية مهمه وتنفذ الكثير بعد الله والكل له الحق بالتنزه والفسحه ولكن مشكلة الشيبان مثل أخوك ما يحب يشوف جرة سياره حوله ههههههههه

[راعي ساموده]

مرحبا اخي راعي ساموده

اتفق معك في ناحيه واختلف معك في ناحيه

الجارمن مهم جدا في تحديد المواقع وهذا لاغني عنه وليس كل الناس لديها ذاكره قويه مثلك ماشاء الله تبارك الله وكذلك هاتف الثريا ممهم لو حصل شي لاقدر الله والجوالات العاديه الخاصة بالاتصال فقط ضروريه

اما الجوالات التقنيه انتر نت ومادري وشو هذي مالها داعي وتسرق منك الوقت وانت في احسن الاماكن
والله انا نطلع الطلعه كلهم لي معب روسهم في جولاتهم تقول بزران الله يهدينا وياهم

وهذا رايي وارجو السموحه منك

رأيك جميل ومنك نستفيد ولكن إحساسي يقول أن اغلب اللي تشوفهم بالبر بعد التقنية لم يجدوا متنفس آخر فكان النزهات البريه خيار متاح وسهل فأفسد أغلبهم المكان وتأذى منهم الإنس والجان

[راعي ساموده]

راعي ساموده .. راحت عليك

الجيل هذاك انتهى و مابقى له الا الذكريات

يوم العشب بالصمان يغطي كفرات الجمس والعالم تخيم على حدود الروضة مو بوسطها

انا ابشرك حالف ما اطب الصمان يمكن من 8 سنين

انت شكلك خويي ههههه
راع البر راعي هوى ويطرب لامنه توسط الصحراء ويبادلها العشق بالمحافظة عليها ونظافتها، وقبل التقنية كانت المكاشيت غرابيل وتعب مايمشيلها إلا هاويها
أما الحين اللهم لك الحمد نعمه وخير وتساهيل وصار يطلع القاصي والدنيا وأغلبهم لايراعي حرمة مكان أو زمان لدرجة مره ماقدرنا ننام بإحدى فياض الصمان من الطرب والتفحيط حولنا

[ابن عكاش]

اتفق معك اخوي راعي ساموده في كثير مما قلت وان كنت انا لم الحق على هالجيل لكن لحقنا على ايام كان القارمن بـ3500 ولا يشتريه الا قله من الناس فكان هواه البر الحقيقيين هم من يجوبون الفيافي والقفاري
للأسف اقولها بمراره منتدى مكشات اول من كان السبب في تدمير الصحاري ولا تفهمون كلامي خطأ ولا اقصد الإساءه له لكن المواضيع التي تطرح عن الربيع واحداثيات المواقع وطريقة كثير من مواضع الرحلات كانت السبب في غزو الصحاري من ما هب ودب بعدها شف مايخلفونه من قمامة اعزكم الله وتدمير لمراعي وغير ذلك
لذا ارى انا تتعاون المنتديات لتثقيف الناس ووعيهم بضرورة المحافظه على النظافة وعلى المراعي من العبث وكذلك انصح بعدم ذكر الأحداثيات لأن راعي البر يعرف وين الربيع بالوصف او بمتابعة الحياء اما اللي مهوب عارب الربيع اللي بالإحداثية هذا مكانه المخططات مع احترامي الشديد
هذا مالدي اتمنى انا لا افهم خطأ
تقبل مرمري

[escape_man]

اتفق معك اخوي راعي ساموده في كثير مما قلت وان كنت انا لم الحق على هالجيل لكن لحقنا على ايام كان القارمن بـ3500 ولا يشتريه الا قله من الناس فكان هواه البر الحقيقيين هم من يجوبون الفيافي والقفاري
للأسف اقولها بمراره منتدى مكشات اول من كان السبب في تدمير الصحاري ولا تفهمون كلامي خطأ ولا اقصد الإساءه له لكن المواضيع التي تطرح عن الربيع واحداثيات المواقع وطريقة كثير من مواضع الرحلات كانت السبب في غزو الصحاري من ما هب ودب بعدها شف مايخلفونه من قمامة اعزكم الله وتدمير لمراعي وغير ذلك
لذا ارى انا تتعاون المنتديات لتثقيف الناس ووعيهم بضرورة المحافظه على النظافة وعلى المراعي من العبث وكذلك انصح بعدم ذكر الأحداثيات لأن راعي البر يعرف وين الربيع بالوصف او بمتابعة الحياء اما اللي مهوب عارب الربيع اللي بالإحداثية هذا مكانه المخططات مع احترامي الشديد
هذا مالدي اتمنى انا لا افهم خطأ
تقبل مرمري

انا ابري مكشات وغيره من المنتديات الي تدعم الهواة وتعتبر متنفس لهم سواء بالتعبير عن حبهم لهواية معينة او تجمعهم لتبادل الخبرات والآراء.

الخطاء سلوكي تربوي .. من البيت للمدرسة للشارع للحاره

بالبر يهدمون الطبيعة وبالمدينة يهدمون السمات الي لابد يتحلى بها المسلم العربي

مكاشيت الرياض مايبيلها خرايط واحداثيات .. رح شفها !!

ماتقدر تجلس اذا انت انسان بالغ عاقل

الحدايق - الشوارع - وسط البيوت اذا مافيه خدامه الا من رحم ربي

[قرناس حائل]

كلام في الصميم

تحياتي لك

[الوافي.]

اتفق معك اخوي راعي ساموده في كثير مما قلت ما عدا القارمن فهو من مستلزمات الرحلة
فاذا كنت تكره التقنية جرب انك تكشت على ذلول واترك السيارة اجل
وش رايك نجرب نكشت على حمير اعزكم الله
هههههههه

[فيصل بن طلال]

والله انك صادق وانا من زمان اتحسر على هذا الموضوع والسبب ان القارمن جعل الاطفال اللي شاري له والده او والدته جيب ربع او شاص تقرض الاشجار وتفحط على العشب وتقتل كل حيوان يمشي على الارض في مناطق نذكرها قبل 20 عام واقل من ذلك كانت بكر وطبيعه خلابه واضف على ذلك الان اذا طلعت البر وشبكة الجوال واصله تلقى كل واحد يطقطق بجواله على الواتس ولا فيه سوالف رجال ولا يشتغلون مثل اول يعني زمان النشاماء راح .

[عيد ثاني]

راعي ساموده ..

أيام زمان كانت كالهديه الغير متوقعه ..

الآن كالهديه المعروف صاحبها وقيمتها وكل شيء عنها ...

[قناص الحوى]

بسم الله الرحمن الرحيم
كلامك صحيح تماما لم يعد للطلعات للبر طعم من يوم دخلت التقنية من قارمن وايباد وكناود وأيكوم وغيره صار الوراعين مع هالأجهزة تلقاه في كل مكان في البر في عمق البراري والقفار والأماكن الموحشة حتى صارت برارينا تعج بالناس من كل الفئات والأعمار ولم يعد لها ميزة الخلوة والخلاء والقفر والوحشية وصرت كأنك داخل حدود العمران مع كثرة الناس , وقضوا على البيئة والحياة الفطرية والنباتات والأشجار ودمروا ولوثوا البيئة , وأهل البر الحقيقيون ماهم محتاجين مثل هالأجهزة لأنهم رجال يعتمد عليهم وفيهم من صفات الرجولة والشدة والجلد والصبر والعزيمة مايغنيهم عنها بأذن الله , الله يرحم رجال الزمن الماضي وكبار السن والشياب والله ماكنت تلقا في البر إلا أهله الحقيقين من البادية أو من تربوا فيها أو من هم قريبون جداً منها وملاصقين لها , ولا كنت ترى قناصين إلا من شابت روؤسهم في هذه الهواية وهم مع هذا قلة , هلحين والله المستعان كل صار مسوي راعي بر وراعي مقانيص وكثير منهم لو يمسي عليه الليل في البر لمات من الفجعة , أعذرني ولكن هيضت أشجاني على زمن جميل عشناه

[ابو طاهر]

وعليكم السلام

انا اتفق معك ياراعي ساموده في بعض واختلف معك في بعض
وهو ان الخطا كما ذكروه بعض الاعضاء انه عدم التوعية وعدم استعمال التقنية في مجالها الصحيح...

[خيال الغلبا]

راعي ساموده اشعر واعيش نفس مشاعرك


طيب وش الحل

[khabari]

ذكرتنا بما مضى الله يحييك واضيف على ماقلت ان الناس كانت تقطع البراري ظعون ومظاهير وكنا صغار ويعادلونا فوق القعدة(الرحول) والاهم اني ما أذكر في يوم من الايام ضيعوا المكان اللي يبونه.

[دليلة1]

صدقت يالشايب :) ..

مخيمين قبل 14 سنة تقريبا في طرف روضة الخفس اللي قريبة من الخط
ومعروفة عند الكثير وكان وقت عطلة وربيع ..
5 أيام ماشفنا فيها إلا زول سيارة شاطفه من بعيد .. والآن ..؟
ناهيك عن الأماكن داخل الصمان اللي ماكنا نشوف فيها إنس ولا جان ..؟

الله يعينا على التوالي ..

[راعي ساموده]

كلام في الصميم

تحياتي لك

شرفني مرورك ،، ولزوم تدبير خطه بديله :good:

[راعي ساموده]

اتفق معك اخوي راعي ساموده في كثير مما قلت وان كنت انا لم الحق على هالجيل لكن لحقنا على ايام كان القارمن بـ3500 ولا يشتريه الا قله من الناس فكان هواه البر الحقيقيين هم من يجوبون الفيافي والقفاري
للأسف اقولها بمراره منتدى مكشات اول من كان السبب في تدمير الصحاري ولا تفهمون كلامي خطأ ولا اقصد الإساءه له لكن المواضيع التي تطرح عن الربيع واحداثيات المواقع وطريقة كثير من مواضع الرحلات كانت السبب في غزو الصحاري من ما هب ودب بعدها شف مايخلفونه من قمامة اعزكم الله وتدمير لمراعي وغير ذلك
لذا ارى انا تتعاون المنتديات لتثقيف الناس ووعيهم بضرورة المحافظه على النظافة وعلى المراعي من العبث وكذلك انصح بعدم ذكر الأحداثيات لأن راعي البر يعرف وين الربيع بالوصف او بمتابعة الحياء اما اللي مهوب عارب الربيع اللي بالإحداثية هذا مكانه المخططات مع احترامي الشديد
هذا مالدي اتمنى انا لا افهم خطأ
تقبل مرمري

كلامك جميل ودقيق ،، واتفق معك أن وجود المنتديات ساهم بشكل سلبي على البيئة والحياه الفطرية ،، انظر خيمة الصيد البري وشف مواضيع التنافس السئ والهياط بالتفاخر بعدد الصيد اللي اعتبره إباده

[راعي ساموده]

اتفق معك اخوي راعي ساموده في كثير مما قلت ما عدا القارمن فهو من مستلزمات الرحلة
فاذا كنت تكره التقنية جرب انك تكشت على ذلول واترك السيارة اجل
وش رايك نجرب نكشت على حمير اعزكم الله
هههههههه

هلا بك اخوي ،، وإذا لم تمر بتجربة سابقه ماقبل التقنيه فصعب جداً تعيش أجواء ذيك الأيام، وياليت تسأل إذا حولك شايب راعي بر يفيدك أكثر
تقبل تحياتي

[راعي ساموده]

والله انك صادق وانا من زمان اتحسر على هذا الموضوع والسبب ان القارمن جعل الاطفال اللي شاري له والده او والدته جيب ربع او شاص تقرض الاشجار وتفحط على العشب وتقتل كل حيوان يمشي على الارض في مناطق نذكرها قبل 20 عام واقل من ذلك كانت بكر وطبيعه خلابه واضف على ذلك الان اذا طلعت البر وشبكة الجوال واصله تلقى كل واحد يطقطق بجواله على الواتس ولا فيه سوالف رجال ولا يشتغلون مثل اول يعني زمان النشاماء راح .

كلام سليم ،، وربما يعجب هالوضع الكثير لكن أنا من القله التي تعتبر أن التقنيه تم استخدامها بشكل سلبي أضر بالحياة الفطرية بشكل عام

[راعي الرود]

كم واحد وافته المنيه بسبب الهلع و الجوع والعطش في الخلا في ذاك الزمان و في هالزمان لو تقارن بتحصل ان العدد يقل بشكل كبير و الحمد لله اولاً و اخيراً هذا بفضله ثم بفضل هالتقنيه

نعمه من الله انك تشق لك مئات الكيلومترات قطوع و القارمن يعلمك وين ارضك فلو لا سمح الله تعب احد معك او احتجت مساعده تعرف وين تروح

الاحتياط واجب الواحد طالع يوسع صدره ماودك يصير شيء لا سمح الله يكدر الامور

اللي يبي القارمن يستعمله واللي رازقه الله بنعمه الذاكره و يدل دربه و يتذكر ويحس انه مايحتاج قارمن له حريه الاختيار لكن الاحتياط طيب و يغنيك عن امور كثيره

[ذئب الدهناء]

الله يهديك ياراعي ساموده

لقد حجرت واسعآ

انا اعتبر الشاب اللي يشري سيارة بر واجهزة ملاحه ويشغلها ويستفيد منها ويكشت ويعرف الدروب ( مرجله )

احسن طال عمرك من الشاب اللي يفحط ويدور بها الشوارع ويوذي خلق الله

اما قضية ان الانسان يكشت على كامري فهذه مسألة شخصيه وكل واحد حر بسيارته

تحياتي لك وشكرا لك على الموضوع

[الوافي.]

المهم ان الواحد لا يخلي كل وقته مع هالجوالات
اما القارمن فهو ضرورة يابو عبدالله شئت ام ابيت
وبعد الكنوود والايكوم
عندك مانع
وان مارضيت نقول الثريا
نعم كثير اعطانا اياها الله ليش نمنعها

[ابو البر]

شكرا راعي ساموده
اولا : من اول كان الناس تطلع للبر للصيد او خلافه في وقت لم تمتد المدنيه ولم تكبر / ولم يكن هناك بحث عن الهدؤ والراحه بعيدا عن المدنيه .وبالتالي لم يكن اعداد الكشاته كثير .
ثانيا : البحث عن الهدؤ والراحه خارج المدن طبيعه فطريه سبقنا بها دول كثيره وقامو بصناعة سيارات منزليه تشبه البيت(الكرفان ) لآن الغرض من الخروج للبر او خارج المدن كما اسلفت هو البحث عن الهدؤ وليس قياس مدى تحمل الشخص البدنيه وتحديه للطبيعه .
ثالثا: لازال ينقصنا ثقافة التنزه والصيد والمحافظه على البيئه مما يجعلنا نتحسر على كل شبر من موقع كنا نذكره في الماضي على انه من الأماكن المشهوره المليئ بالعشب واماكن تجمع الأمطار .....بسبب الجهل الواضح في الكثير منا وبنسبه لاتقل عن 90% بدون استثناء ////فالعاقل منا صحيح انه يقوم بالتنظيف بعد انتهاء رحلته ولاكن سيارته وسيارات اهل الرحله في وسط العشب وتهرب زيت ويقول انه شال كيس زباله ورماه على طرف الأزفلت (هاذا مثال بسيط) .(شطحه عن الموضوع ) .
رابعا : موضوعك كبير كبير كبير / اكبر من مما تتصوره او يتصوره من فعلا يحب الطبيعه والأستمتاع بها .
والتدمير مستمر الى ان تجد محميات لكل الكائينات الحيه والمناطق الطبيعيه بكل انواعها واشكالها (محميات محميه بقوة التوعيه ومخاطبة عقول الناس ) وليس بشبوك لحماية كم غزال وكم ارنب .

تفضل بقبول اعتذاري عن العشوائيه في ردي كما هي عشوائيتي وجهلي وغبائي في التعامل الواعي مع الطبيعه عند طلوعي للبر .
وشكرا .

[أبو جراح11]

اتفق معك اخوي راعي ساموده في كثير مما قلت ما عدا القارمن فهو من مستلزمات الرحلة


فاذا كنت تكره التقنية جرب انك تكشت على ذلول واترك السيارة اجل
وش رايك نجرب نكشت على حمير اعزكم الله

هههههههه



على ذلول ياسلام

[أبو جراح11]

البساطة تعطي للكشتة نكهة خاصة
كما أن حظور الأجهزة ليس مشكلة
لكن تستخدم للضرورة فقط
والكشتة
تبقى في ذاكرة الإنسان إن كانت جميلة
وجمالها يتحقق بخويا سنعين
يتفانون ويسامون في كل شيئ00

[Al3rands]

كلام جميل جدا

[سفاح الصفاري]

اخي العزيز راعي ساموده ربما تكون خاطرتك نابعه من روئية سلبية نوعا ما
اقولك ليش باختصار اولا التقنية زينه من ناحية انها تساعدك على تحديد المكان اللي ودك تكشت فيه بسهولة عند استخدام اجهزة الملاحة وتعطيك علم مسبق عن طبيعة الموقع بعد ما تشاهد على التقارير الموجودة بالمنتدى
بالاضافة الى ان التقارير توسع صدر الواحد لامن صار الجو مثل الحين حر وغبار ولا يمديك تكشت
اما العوائل اصحاب الكوامري فأنا اقولهم قواكم الله وسعو صدوركم والبر ليس محصور على فئة من الناس
المهم ان تترك المكان كما كان او احسن مما كان.



انا اوافق صاحب الخاطره ابو ساموده
هو يقصد ان البر له نكهته اول قبل الاجهزة و التقنية
اما ان البر غير محصورة على فئة معينة صح غير محصور لاكن ليس كل الناس اهل بر

و الدليل يا كثر حوادث الضياع و الموت و الاسباب هي
تعطل جهازهم او غراز ولا يعرفون كيف يطلعون الا لين يجيهم احد من اهل البر و يطلعهم و العطش

فا البر يبقى لاهله :good:

[منصور العلي]

عز الله انك صدقت


والله انك قلت اللي نبي نقوله ,, وازيد عليك ببعض الشي


بعض الناس اللي اذا شاف له سحابه ركب موتره وشال كاميرته وقعد يلاحق السحابه ولا عاد خلاها تمطر قومه والله شين وجهه وشين فاله ,, والله انه عيب و عيب عليه ... ياخي ماعاد خلوا شي ....


لعنبو غيركم حتى السحاب تطاردونه ..... والشي الثاني اللي يقنصون للفقع ... والله انهم يقنصونه وقصدهم المتاجره منه . قسم باله اذا شفتهم اني ادعي عليهم .... ماعاد خلوا للبر نظافه ولا اهميه عند اهل الباديه ....






اقول ضمني معك بس ... انا قاطعت البر والصحراء بسبب ذالخبلان اللي لو لي يد او سلطه كان اخلي معي كرباج و اي واحد من ذالسلاقين اعطيه على ظهره واقول له خلك مع ايبادك والعابك ... وخل البر لاهله واهل البل عطايا الله

[ابن عكاش]

راعي البر الحقيقي يعرف مجاري السيول واسماء الوديان والفياض في الغالب ويعرف اسماء المناطق البريه وحدودها
يعرف الجهات والقبلة واتجاه الهواء يعرف كيف يختار مكان مكشاته والذرا كل هذا بدون التقنية
لكن مع التقنية معناته عطل مخك ولو تعطلة ابلش بعمرك
ليتنا ناخذ من التقنية قدر الحاجه لكن مانعتم عليها اعتماد كلي