كارونة الهايلوكس

[ابو ناصر2011]

مساكم الله بالخير ومبارك عليكم الشهر الفضيل..

معي هايلوكس 2008 طلع طقطقه بالكارونه اذا صرت مهدي يعني داق عشرة ولا 15

وفكيتها وقالي الخراب رمانات يكفلن 350 مع شغل اليد والزيوت 800

قلت توكل على الله يوم بدا قال فيه خراب ثاني اللي هو التروس الاربع الصغيرات

اللي جنب بعض وقال اني مالقيتهن بالوكاله وقالي جب كارونه تشليح ازين لك

فقلت ودي اشاور من عنده العلم من الاعضاء مع العلم اني سالت عن الكارونه مع

الرجيع بالفين وزود فااخاف ازينها يطلع فيه مشاكل ثانية وماودي اشتري كارونة بالفين والخراب يكلف حول الالف

وماادري قطع الكارونه

تتباع بالتشليح ولا تجي كاملة واسف على الاطاله وشكراااا

[أبوشريدح]

تبي الصراحة
الكارونة اذا انفك فيها اي قطعة
لا يمكن ترجع مثل اول ابد
حتى لو تغيير كل الرمانات اللي بها

لانه لها وزنية لو تتغير بملي واحد تخرب بعد فتره وتطلع لك الونة

لكن افض ل شيء انك تاخذ كارونة من التشليح
وتشترط عليهم ضمان وانها ما قد افك فيها اي مسمار

الله ييسر لك امرك

[عبادي464]

نصيحة دفرنس كامل تلقى هايلوكسات جديده بتشاليح مع ضمان شهر

[راعي الرود]

دفرنس تشليح لا تفكر تصلح

لو صلحتها بتسلك معك مده قصيره و ترجع تون

[ابو ناصر2011]

اشكركم جميعا على الرد
انا شلت من راسي التصليح لاكن وش تنصحوني اغير الكارونة ولا الدفرنس كامل .؟؟
مع ان الدفرنس غالي

[hsdt]

كارونة كافية الا اذا عندك صوت بالعكوس وحتا العكوس تتصلح مب مثل الكارونة صعب تضبط
نصيحة بما انك من الزلفي اذهب الي تشليح بريدة اقل اسعار من تشليح الرياض

[راعي الرود]

غير دفرنس كامل الكارونه اذا غيرتها لحالها نفس المشكله فيها فك وتركيب بورشه ولا فيه وزنيه للكارونه و الله يعوضك خير

انصحك تخليها لين تطق ترا بعضهن تجلس سنين وهي تون ولا فيها خلاف اذا بدت تنتهي مره بتحس فيها لا رفعت رجلك عن البنص تحس ان الموتر يضرب فرامل من نفسه

[أبوشريدح]

اشكركم جميعا على الرد
انا شلت من راسي التصليح لاكن وش تنصحوني اغير الكارونة ولا الدفرنس كامل .؟؟
مع ان الدفرنس غالي

العكوس ما تخرب بسهولة
غير الكارونة فقط
وبتدعيلي ان شاء الله

بس فيه شيء مهم لزوم تنتبه له

اللي هو زيت الكارونة الجديد
رقمه 140
انتبه تغيير اي رقم ثاني
وانا انصحك تغيير زيت فوكس 140
زيت ممتاز جدا
الدبة 4 لتر سعرها 45 ريال
ودبة وحدة تكفي الدفرنس
الله يوفقك

[ابو ناصر2011]

الى الان مازلت حيران اغير الكارونة ولا الدفرنس ولا ارجعها واخليها الين تطق؟؟؟

[.. PATROL ..]

رجعها وخلها اليييين تطق

وعقب غير الكارونة تشليح

[حزوبر]

السلام عليكم
أنا عندي وما زالت نفس المشكلة ، رحت الصناعية القديمة، ولقيت في شرقها محلات خاصة بالدفرنسات، ورزقني الله بابن حلال صاحبورشة متخصصه بالدفرنسات وعليه شغل وعماله واجد، وكشف على الدفرنس بعد رفع السيارة وخلاها تمشي، وهوا تحتها معه اثنين من المكانيكيين ، قالي نصيحتي خلها لين تطق أو يطلع الصوت بشكل مزعج ، والسياره لها معي شهرين بهذه المشكله، وانا اسافر عليها ، ومتوكل على الله تعالى