هــــــــــــــــام وأرجو من الأخوة الأعضاء المشاركة

[ركان]

السلام عليكم ورحمة الله وبركاته :

أولاً أُبارك لجميع الأخوة الأعضاء بشهر رمضان المبارك .
ثانياً موضوع نجدة للأسف يتكرر من بعض الأخوة هداهم الله وهو بعد الإتفاق معهم على البيع تتغير النوايا لديهم منها بسبب سومات عن طريق الخاص وهذا مخالفة شرعية لقول الرسول صلى الله عليه وسلم ( لايبع أحدكم على بيع أخيه ) .
ومنها بسبب أمور الله يعلم بها وعلى سبيل المثال قبل فترة طرح أحد الأعضاء ثلاجة للبيع وحدها علي بسعر وقبلت وكان حسب كلامه خارج الرياض وقلت له اتصل علي أذا وصلت علشان اسلمك المبلغ وأخذ الثلاجة ولم يتصل علي وكلمته مارد علي ودقيت عليه مرة ثانية وقال كلمني بعد ربع ساعة دقيت عليه طنش وبعدها بيومين كلمته ورد وقال انا عندي جيب وأذا كانها بتركب فيه يمكني أهون قلته ترانا متفيقن على البيع ومتفرقين على كذا وانت بعتني والمشكلة أني ماخذها لشايب عنده وحد مقاس 40 لتر ويبي أكبر وحسب كلام الرجال قلته خلاص أن الموضوع منتهي وقام و أعطى ثلاجته واحد يبيها ، وانا علمته أني ماخذها لشايب موصيني وقال أنا بعطيه 500 ريال من عندي ، كلام ماودك به قال شف يمكن بنسبة تسعين بالمية ماتركب قلت طيب كلمني مادق كلمته لأني محرج من الرجال وقال أنا أرسلت لك رسالة أنها ركبت وقلت له ماجاني رساله ولا ما كلمتك ورجعت لجوالي والله لاحصلت رساله ولا شئ ، وش رأيكم هل هذا يجوز شرعاً . أرجو منكم الرد وأسف على الإطالة

[بايكال]

الله يهديهم

اﻷمور لازم تكون واظحة وعساك تسلم.

أرجو التفاعل وإبداء الرأي.

[طلولي]

الله يصلح النيه والذريه

[مكشاتي النماص]

اللي هذا اسلوبه ثق تمام الثقة بانه لن يوفقه الله
وانا والله لا اعرفك ولا اعرفه وواثق انك لو تبحث انك بتلاقيه باعها بزود
ياخي مع احترامي للاخوان ان مافيه ثقة يبيع ضميره عشان 50 ولا 100
ولكن والله والله انه لو يبيع بفرق كنوز الدنيا انه مايتوفق
انا بعد باقول مشكلة حصلت لي مع احد اخوانا عضو كبير وله وجوده بمنتدى مكشات
السالفة اني شريت منه سلعة معينه على انها جديدة وقابلته واتفقنا اعطيته دراهمه واخذت غرضي واللي حصل اني حطيتها بالبيت وجاني ظرف سافرت على طول لمدة 5 ايام بالضبط...
المهم رجعت وقلبتها ولقيت فيها كسر وملحم واثار صدا وشغلات توضح ان السلعه مستخدمة استخدام يهود مو مسلمين
رجعت ارسلت له رسالة يشهد الله ماقصدي ارجع دراهم ولا ارجعها يمين بالله ماقصدي الا اني انبهه اذا انه اخذها من احد انه لاعب عليه
تفاجئت برد غير مهذب وبصراحة انصدمت انه طلع من شخص مثلة
قلت برسالتي له ع الخاص
الاخ الفاضل .......
السلام عليكم
الله يعافيك انا سافرت لظرف وبعد مارجعت قعدت اقلب الغرض ولقيت فيه بعض الملاحظات اللي تدل انه مستهلك بزيادة وقلت بسألك ؟؟؟؟

قالي بالنص(معليش يا الحبيب ترا لها عندك اسبوع والحين جاي تقول ماتصلح ..وبعدين البيعه تمت وانت اخذت اغراضك وانا اخذت دراهمي الله يعوضك..)
)
المهم ارسلت له رسالتي التالية::
الله يجزاك خير ويبيض وجهك وردك كشف لي شخصيتك
ولكن ان كنت تدري بما فيها وبعتني فأسأل الله ان يسامحك دنيا واخره وثق بانه ماهو كل مره بتلقى شخص يدعي لك المره الجاية بيدعي عليه واحد من قلب وتجي بين العيون وان كنت ماتدري فالله يسامحك


ومن وقتها مارد ولكن انا تاكدت انه على علم بعيوبها

[مكشاتي النماص]

والله ان فينا بالمنتديات سواء مكشات او غيره ناس تبيع ضميره بطفسه مالهم منا الا ندعي لهم ان الله يصلحهم

[(هزاع)]

ماعاد به جاهل
لكن
الحياله لازالو موجودين
البيع عن بعد
التطور
يفتح الباب لقليل الذمه
اول العام باحد الخيام عرض احد المحتالين سلعه وتجاذبو الاعضاء بالسوم ورست البيعه على احد طيبي القلوب وارسل المبلغ بالبنك
على ان يرسل هذا المحتال السلعه عن طريق شركات التوصيل
ولكن هيهات ان تصل
وتدخلت بالموضوع ووصلنا الى الطريق المسدود
واراد الله سبحانه ان سام هذا المحتال سلعه فوصلني الخبر
فقلت للبائع بلغه ان يرسل لك المبلغ
وكان ان ارسل المبلغ وكان اكثر من المبلغ اللي نصب على الرجل به
وعند وصول المبلغ تم التفاهم معه
وارجع له الزود
الاجواد واجد والمحتاله يندسون بين الاجواد
الحل
اجعل لك في كل مدينه صديق يخدمك
يستلم مبلغك ويسلمه لا استلم سلعتك
والاعذار الواهيه من الحياله واجد ويستغلون الاجواد بطيبتهم
اسمحولي على الاطاله
لكنها النصيحه والتجارب
اخوكم ابومشعل

[الخلاوي 090]

الله المستعان

[الجوكر حسن]

الله يهديهم

[ابو طاهر]

وعليكم السلام

الله يهديهم
وانا من منظوري اشوف ان هذا الفعل لا يجوز ولا يرضي الله

[راعي الصنف]

الله يصلح الحال ....

سؤالي الوحيد هل المبلغ الي بيأخذة الشخص عن طريق الكذب والاحتيال وغيرة .. بيغنية وبيجعلة من اثرياء العالم والا وشلون ...

[الشيخ الظريف]

مادام هو لم يقبض منك دراهم وانت لم تقبض السلعه فاعتقد انه مافيه شيء علما انني طيلة حياتي اذا اعطيت احد نيه لا اتراجع حتى لو التراجع فيه مصلحه

[وطن6001]

الله يهديهم ويصلح الحال
بعض الناس مهو تشري منه لو تسوم سلعته بس سوم في الموقع زعل وقام يدعي عليك وهو ماحد المشكله
الله يرزق الجميع المغفره بها الشهر المبارك

[web]

مادام هو لم يقبض منك دراهم وانت لم تقبض السلعه فاعتقد انه مافيه شيء علما انني طيلة حياتي اذا اعطيت احد نيه لا اتراجع حتى لو التراجع فيه مصلحه

وانا خوك السالفه ماهي اعتقد ولا تعتقد انت ولا اشوف انا ولا تشوف انت ان مافيها شيء
السالفه وانا خوك (شرع) وفي الشرع لايجوز الرجوع عن البيعه الا اذا كانت تدخل في الغبن وهذي قضيه ثانيه

"البيعان بالخيار مالم يتفرقا "