قطفت الزقارة

[فهد الراشد]

السلام عليكم ورحمة الله وبركاته،،
ومبروكـ عليكم هالشهر الفضيل،،
يالربع حبيت اعطيكم معلومه وهي كالتالي :
كنت مره اسّيخ الراديتر وتخبرون البلاستك اللي فوق المروحه لازم تفك عشان يطلع الراديتر،
فا من الحراره الظاهر او من شد المسمار ع مداخل مسامير البلاستك كان احدى الفتحات منكسره، المهم العامل الهندي سيّخ الرديتر وفجاه قام وجمع قطوف الزقاير😳 انا قلت انجن العامل وقلت سلامات وش بك تجمع القطوف؟ قال مخ هندي مزبوط ميه ميه، قلت وش عندك يبوهناد وش تبي تسوي ؟ قال شوف، المهم انا جلست عنده واراعي وش يبي يسوي يسوي، وهو يمسك كل قطفه ويفكه يمار داخله تقل قطن وهو يركب البلاستيكه المنكسه ويحط ع الكسر من القطن حق القطفه ويصب عليه شمع حق قزاز ابو ريالين😁 انا فتحت افمي من المفاجاه وهي ان هالعمليه هذي تمت بتلحيم الكسر وصارت كانه جديد وقام يحط عليها كلها ويصب من هالشمع يما صار تقل صبه والشي العجيب انه اثناء صب الشمع ع القطف يطلع دخان ويذوب القطن ع الكسر ويمسكه صح .
فعلا ان الحاجه ام الاختراع قال حنا بالهند مانلحّم البلاستيك الا بهالطريقه😎
وسلامتكم ..

[SGL]

وعليكم السلام ورحمة الله وبركاته
يعطيك العافية أخوي على المعلومة بس هذي الحركة معروفه عندنا من زمان وبذات الي قاضي عمره في الصناعية وغثى الورش وفي حركة ثانيه صناديق الخيار والطماطم الي مصنوعه من فلين تحط عليه بنزين وبعدها يذوب يصير سائل وبعدين تحط منه على الكسر أو تغري فيه كل الطريقتين هذي ماأستخدمها شخصيآ ﻷني أستخدم الي أفضل منها ﻻكن في ناس سوتها قدامي

[ابوعقيل81]

شكرا على المعلومة جديدة علي,

انا غسلت ايدي يوم شفتهم يستعملون علاق الملابس بالتلحيم :)

[فهد الراشد]

sgl
توي بعد ادري بسالفة الفلين،
بس ان القطوف متوفره لاسمح الله تعطلت ببر يمكن يكون معك احد يدخن وتنتهي المشكله،
عموما سرني مرورك وتعليقك الجميل

[فهد الراشد]

العفو ابوعقيل،

[مدرس بالغصب]

اعرف واحد خبطت سيارته وراح وخذا قطوف دخان و....امزح حبيت احرك الجو شوي:D

[حسن الشمالي]

اعرف واحد خبطت سيارته وراح وخذا قطوف دخان و....امزح حبيت احرك الجو شوي:D

كمل السالفة
اخاف انك تقصد خويي:D:D

[ابوسند9]

الله يعطيك العافيه
وهذا شي معروف
غراء ابو جني + قطف زقاره تاخذ منه شي بسيط وتضعه بين مثلا قطعه بلاستيك لتلحيمها ومن ثم تضع الغراء= اقوى لحام على وجه الارض

[فارس البيد]

وش نوع الشمع ابو ريالين هذا لو تكرمت ؟

[MSAN]

أيضا لتثبيت الديكورات الداخلية للسيارة.. غراء قزاز أبو ريالين مع صابون تايد.. يصير مثل العجين الأبيض.. واذا مسك في شي يصير كأنه حجر.. أقوى من الاسمنت

[وهج الحياة]

معلومات قيمة صراحة وفوق كل ذي علم عليم

وياليت يكون فيه موضوع لذكر مثل هذه المجربات

[ابوالترهيم]

السلام عليكم
يافهد انا لي بهالشغلات الترهيم والتدبير بس تسلم على المعلومة بصراحة جديده على
لو تتذكر ايش الصمغ اللى استعمله في عندنا ابو ريالين نوعين نوع نسميه باتكس لون العبوة
عصار اصفر واسود وصمغه لين جف يصير مطاطي شفاف وصلب قليل ونو حجمه صغير تجي معه
ابرة وهو سائل شفاف ويتبخر بسرعة وبنتج عند لمسه حرارة خفيفة ويلزق حتى اليدين ف ايهم المقصود

مع الشكر لمشاركتنا تجربتك
http://odeu.scene7.com/is/image/odeu01/3225249?$lg$
http://www.art.gov.sa/vb/imgcache30/11940.png

[العطاوي a511]

اعرف واحد سيارته تدخن وداها مكافحه التدخين طقوها ابرتين وصارت ماتدخن


بسالك وش الشمع ووين اللقاه ابي اجربه وياليت اسمه الله يبارك فيك

[اسدهم]

اسمة سوبر قلو

[كاشت بالبر]

وعليكم السلام ورحمة الله وبركاته

برأيي معجون لحام حار بارد أو ما أدري وش يسمونه .. أفضل من قطوف الدخان ( الزقاير - السجائر )

http://www.theboxotruth.com/images2/e75-5.jpg


لكن أحرص على الأصلي تلقاه عند ساكو

[الصيخي22]

عندي شي افضل من قطف الزقارة تعلمته من ابوي رحمة الله عليه طبعا تعرفون الفلين حق كراتين الطماط الي الياكسرته صار كور صغار تجيب لك سحله وتحط فيها بنزين لا تكثر ربع السحله وحط الفلين بوسط البنزين يذوب ويغدي شمع بعد ما يذوب جيب لك صوف غنم واخلطه معه ورقعبه اي شي بلاستك مثل توانك الموية الفيبر ولا صدام موتر ولله ياشيخ لو تنجخه بمشعاب ما ينفك خذ طب البدو وترك عنك قطف ابو هنود

[متعب الجهني]

وشي نوع الدخان الله لايهينك


ههههههه

[الحربي حاتم]

بارك الله فينا وفيك