لأصحاب ورش السيارات ومن لديه معلومه (مقبل على فتح ورشه)

[GMC 111]

السلام عليكم ورحمة الله وبركاته



مساكم / صبحكم الله بالخير



يالربع انا مقبل بأذن الله على فتح ورشة سيارت في مدينة الرياض


الفكره ماكانت في راسي ابد لاكن رحت يوم بصلح سيارتي في صناعيت ام الحمام


قابلت رجال يمني صاحب ورشه وانا انتظر الين ينتهون من الموتر خذناها سواليف انا والرجال المهم الرجال قالي وش رايك تدخل معي شريك في ورشه انا ف البدايه مادخل الموضوع في راسي ابد المهم سألت الرجال عن الطريقه وش المطلوب مني وش المطلوب منك قال الرجال ابي منك 60 الف اجار الورشه او تأثيث ولك حريت الأختيار واهم شي اسمك والمعروف ان الورش اذا اجرو يأجرون بمقدم 6 شهور يعني اذا فرضنا ان الاجار 10 في الشهر يبون اجار سة شهور مقدم 60 الف
انا مشيت من عند الرجال والمشروع عيا يطلع من راسي والى الحين بيني وبين الرجال مكلمات بخصوص الموضوع
انا سألت الرجال كيف راح يضمني وراح اضمنه قال انت بتضمني في حال اني انا راح ادفع اجار الورشه 60 الف واحطها بأسمك وفي الحاله ذي راح اضمن الرجال بعد مشيئة الله
وهو راح اسلمه 60 الف تأثيث للورشه وراح انقل كفالته علي انا يعني بيصير على كفالتي ورحاح نطلب تأشيرات بأسمي انا وهو اللي راح يتكفل ويكون لي من الورشه 5 الاف كل شهر مهما كان مدخول الورشه لو 30 الف انا مالي غير خمسة الاف
المهم اتفقت انا وياه الى الحين
ونجي للمهم اللي هو مشورتكم يالربع هل حقي بأذن الله مضمون وكل شي بيد الله سبحانه


ووش الأجرأت المطلوبه مني وهل في الحاله ذي ضمنت الرجال انه ماياخذ حقي ويمشي وهل فيها مشاكل لاقدر الله


على حسب كلامه ان المشروع ناجح بنسبة 90 % بعد مشيئة الله وهم اهل الشغله وابخص فيها


عمومآ انا سألت الرجال ليه جاني انا بالذات قال الرجال بيني وبين الكفيل مشاكل ويطلب كل شهر مبلغ اكثر من الشهر اللي قبله


عشان كذا الرجال يبي ينقل لكفيل جديد وينقل الى صناعية الأمير سلمان


انا عارف اني كثرت عليكم ونص الكلام غير مفهوم لاكن تحملو يالربع وعطوني مشورتكم

والأهم دعواتكم

[العطاوي a511]

واحد بصناعيه النسيم العمال باسمه والايجار يدفعونه العمال هو ماله دخل باي شي ولا يدفع شي الاهم بس يتستر عليهم ياخذ 8 الاف بالشهر لايضحك عليك اليمني ويدفعك ايجارات يبيلك سنتين ترد راس مالك بالاخير تحصله شبع وزبن لليمن تهريب هاذا اذا مانتف ال 60 الف ونحاش تهريب

المهم الزبده وانا اخوك اذا انت مصمل اول شي خله ينقل كفالته عليك اثنين استاجر الورشه باسمك ثلاثه لاتعطيه ولا ريال انت اللي ضبط شغل الورشه وحط الاثاث اللي تبي حتى لو انحاش اثاثك عندك وشغلك عندك وعمالك عطهم راتب ولازم تدير حلالك وصدقني الخمسه اللي ارح يعطيكيها راح تطلعها 30 الف اقل شي بالشهر ليش تاخذ اذن البعير وتخلي الباقي لليمني

والنظام الجديد راح يكفل حقك وماعاد فيه تستر الناس فتحت اللحين والخير مقبل

[قناص الدبدبة]

العطاوي ماقصر وعطاك العلم
واحب أزيد على كلامه لاتعطية ولا ريال
انتبه انتبه انتبه
والله يوفقك بمشروعك وان شاء الله بداية خير

[ajz]

شوف الرابط هذا يمكن يفيدك ...
http://www.btalah.com/showthread.php?t=523413

[sgl2002]

الله يعينك على مكتب العمل


هنا في السعودية يقولون السعودي مايشتغل


ويوم بغيت اشتغل عقدوني تعقيد لاني ماشي نظامي

لي سنة الحين ادفع اجار محل ولا جابوا التاشيرات وكل يوم يقولون بعد شهر وبعد شهرين




اللهم يارب في هذا الشهر الكريم من ظلمني وتقصد تاخيري وولي امري واعسر علي ان تجعل له داء ليس له دواء

[SGL]

http://www.mekshat.com/vb/showthread.php?t=561661
شوف الموضوع هذا راح يفيدك إن شاء الله والله يوفقك ويسهل أمورك

[وطن العزة]

انتبه منه وانا أخوك , هالعمال لقوا المده التصحيحيه فرصه للنصب والسرق


نعمر لنا بيت ومتقاولين مع عامل مساح وكل ما يخلص شغله عطيناه حقها , المهم انه قبل لا تنتهي مدة تصحيح العماله

يوم كانت بآخر شهر 8 وقبل لا يصير التمديد.... جانا يبي 10000 ريال دفعه وحده ورفضنا وبعدها قام ينقص

المبلغ لين قال خلاص 1000 ريال تكفيني قلت خلاص عقب اسبوع


المهم بعدها بأيام فقدته ما جاء يشتغل , سألت عنه وطلع الخسيس يمر على أصحاب العماير يتفق ويوقع معهم عقد شغل

وكل واحد نهب منه حول الـ 5000 ريال مقدم وعلى أقرب رحله للهند الله لا يوفقه

[راكان745]

سلام عليكم ورحمة الله وبركاته


ابويمن نصااااب ﻻتثق فيه ... فرصتهم اﻻيام ذي انتبهوووو ترا وضعهم مايطمن ﻻيضحكون عليكم

[خوي البيداء]

مثل ما قال لك الاخوان لا تدفع الاجار خله يدفع وأنت كيفي تضع الورشة باسمك وتضمن له الشغل اقل ورشة أخي تطلع شهريا 40 الف ريال يريد يحملك الاجار ويدفع لك فقط خمسة آلاف ريال فقط لا يضحك عليك النظام الجديد من صالح السعوديين العمالة الله يرزقهم ناهبين خيرات البلد ويعطون الكفيل 300 ريال في الشهر وهو يطلع عشرة الاف . زيت انك استشرت ومن استشار ما خاب.

[GMC 111]

واحد بصناعيه النسيم العمال باسمه والايجار يدفعونه العمال هو ماله دخل باي شي ولا يدفع شي الاهم بس يتستر عليهم ياخذ 8 الاف بالشهر لايضحك عليك اليمني ويدفعك ايجارات يبيلك سنتين ترد راس مالك بالاخير تحصله شبع وزبن لليمن تهريب هاذا اذا مانتف ال 60 الف ونحاش تهريب

المهم الزبده وانا اخوك اذا انت مصمل اول شي خله ينقل كفالته عليك اثنين استاجر الورشه باسمك ثلاثه لاتعطيه ولا ريال انت اللي ضبط شغل الورشه وحط الاثاث اللي تبي حتى لو انحاش اثاثك عندك وشغلك عندك وعمالك عطهم راتب ولازم تدير حلالك وصدقني الخمسه اللي ارح يعطيكيها راح تطلعها 30 الف اقل شي بالشهر ليش تاخذ اذن البعير وتخلي الباقي لليمني

والنظام الجديد راح يكفل حقك وماعاد فيه تستر الناس فتحت اللحين والخير مقبل


الله يعطيك العافيه على ردك وكلامك سليم انا اعرف ناس ياخذون 7 الاف بس اسم

وهي ارزاق ياخوي لاكن لو جينا للجد حلوه 5 الاف كل شهر ولاعندي اي مشكله فيها

لاكن انت خوفتني من ناحيت انه بياخذ الدراهم وينحاش وهذا اللي انا خايف منه لاكن الرجال راح يدفع اجار والمحل بأسمي وراح يكون بأسمي ابي منكم تقنعوني كيف ينحاش
وهذا الكلام جاني من ناس واجد

[GMC 111]

الله يعينك على مكتب العمل


هنا في السعودية يقولون السعودي مايشتغل


ويوم بغيت اشتغل عقدوني تعقيد لاني ماشي نظامي

لي سنة الحين ادفع اجار محل ولا جابوا التاشيرات وكل يوم يقولون بعد شهر وبعد شهرين




اللهم يارب في هذا الشهر الكريم من ظلمني وتقصد تاخيري وولي امري واعسر علي ان تجعل له داء ليس له دواء



الله يعينا وياك ويسهل عليك ان شاء الله

[GMC 111]

انتبه منه وانا أخوك , هالعمال لقوا المده التصحيحيه فرصه للنصب والسرق



نعمر لنا بيت ومتقاولين مع عامل مساح وكل ما يخلص شغله عطيناه حقها , المهم انه قبل لا تنتهي مدة تصحيح العماله


يوم كانت بآخر شهر 8 وقبل لا يصير التمديد.... جانا يبي 10000 ريال دفعه وحده ورفضنا وبعدها قام ينقص


المبلغ لين قال خلاص 1000 ريال تكفيني قلت خلاص عقب اسبوع



المهم بعدها بأيام فقدته ما جاء يشتغل , سألت عنه وطلع الخسيس يمر على أصحاب العماير يتفق ويوقع معهم عقد شغل


وكل واحد نهب منه حول الـ 5000 ريال مقدم وعلى أقرب رحله للهند الله لا يوفقه




اخوي انا راح انقل الرجال على كفالتي وجميع العمال راح يصيرون على كفالتي

والرجال راح يدفع اجار محل اقل شي 6 شهور من جيبه وانا لي الاسم ابيكم تعطوني سبب مقنع ليه ينحاش ووش مصلوحه مادامه دافع اجار محل وانا اللي راح اشتري قطع الورشه من جيبي وانتم والله خليتوني اتردد شوي

انتظر ردك يالغالي

[GMC 111]

مثل ما قال لك الاخوان لا تدفع الاجار خله يدفع وأنت كيفي تضع الورشة باسمك وتضمن له الشغل اقل ورشة أخي تطلع شهريا 40 الف ريال يريد يحملك الاجار ويدفع لك فقط خمسة آلاف ريال فقط لا يضحك عليك النظام الجديد من صالح السعوديين العمالة الله يرزقهم ناهبين خيرات البلد ويعطون الكفيل 300 ريال في الشهر وهو يطلع عشرة الاف . زيت انك استشرت ومن استشار ما خاب.

اخوي انا ماراح ادفع الاجار الاجار عليه هو انا علي اغراض الورشه بس (تأثيث)
وماراح تكلف على كلامه 50 الى 60 الف بس

وبخصوص اني اصير انا صاحب الورشه وهم يشتغلون بالراتب هذي صعبه مع الأجانب وقليل من يقبل فيها ولا راح يشتغل زي مايشتغل اذا كانت الورشه بأسمه وكلانا عارفين الشي هذا والمشكله اني موضف ودوامي من 8 الى 6 يعني مافيه وقت تظلع وتراقب حلالك عمومآ الله يعطيك العافيه على مرورك وماقصرت يالغالي

[GMC 111]

سلام عليكم ورحمة الله وبركاته


ابويمن نصااااب ﻻتثق فيه ... فرصتهم اﻻيام ذي انتبهوووو ترا وضعهم مايطمن ﻻيضحكون عليكم


من اي ناحيه اقنعوني

[GMC 111]

العطاوي ماقصر وعطاك العلم
واحب أزيد على كلامه لاتعطية ولا ريال
انتبه انتبه انتبه
والله يوفقك بمشروعك وان شاء الله بداية خير


يعطيك العاافيه يالغالي

[GMC 111]

شوف الرابط هذا يمكن يفيدك ...
http://www.btalah.com/showthread.php?t=523413



لاهنت ويعطيك العاافيه يالغالي

[power.x]

الاخ الفاضل الاخ العطاوي صادق انا ماجر ورشه بالشرقيه وما علي شي كل شي عليهم من الاقامات والتجديد والمخالفات اذا وجدت على الورشه واخذ 10 الاف ريال شهريا كل مازادو العمال زاد المبلغ طبعا السمكره بسعر والميكانيكا بسعر والكاهربائي بسعر