المساعد الشخصي الرقمي

مشاهدة النسخة كاملة : شريتة وتورطة وش الحل؟؟


سعــــد
07/10/2006, 01:36 AM
ياخواني شريت برادو اربعة سلندر والموتر عزمة ردي وابي شي يقوي من عزم الموتر ولا يضرة
عمار السفينه
07/10/2006, 02:30 AM
أول شي على البركه (الله يعطيك من خيره ويكفيك شره)

لكني ماأنصحك تلعب فيه وهو جديد

وشف رأي الاخوان أكيد بيفيدونك
راعي الهـــدد
07/10/2006, 02:37 AM
تبي الصراحه



هذا هو عزمه لاسيما انك ماخذه جديد



مع التحميل والبر والكرف عزمه يكون ردي وبالنفود اردى



تمنيت انك استشرت قبل ماتشتري


ماخاب من استشار


على العموم حاول تصرفه في بيعه فيه ناس ترغبه توجه للمعارض وبيرزقك الله



لأن فيه ناس ماهم اهل بر يبونه بالديره فهذولا يصلح لهم


ودمت طيب
منتعش
07/10/2006, 03:59 AM
ما دامك شريته
فزينه في عينك .


وعلى العموم ترى البرادو موتر وجيد ووثب وحليو
ومع أحد الشباب برادو مثل اللي معك :
ويمدحه ويثني عليه ويقول : عزمه زين
ويومياً يداوم من الخرج إلى الرياض .
وأصبر وإن شاء الله إنه زين .
فهد 1426
07/10/2006, 05:24 AM
والله انا اعرف واحد معه اربعة سلندر وديزل بعد
الصحيح الرجال يمدحه لاكن العزم لك عليه بس عذره انه ديزل
اتوقع سيارتك عزمها طبيعي ـ وبتتعود عليه مع الوقت ـ يمكن انك متعود على سيارة اسرع عزم
والا ترى شور اخوي راعي الهدد عين الصواب
وفقك الله 00
عاشق البسيتين
07/10/2006, 01:32 PM
ركب للموتر فلتر (kn) وانشالله يبي يزود عزمه لا الفلتر هذا يعطي عزم قوي
سعــــد
07/10/2006, 02:44 PM
طيب الموتر مايجيب 170 مع الوقت يجيب اكثر ضنكم والي يعرف احد معه زيه يسئلة كم يجيب طبلونه
راعي المسرى
07/10/2006, 04:46 PM
السلام عليكم ورحمة الله وبركاته وبعد:
أولا : البركة السيارة والله يطعمك خيرها ويكفيك شرها.
ثانيا : ماعقب 170 شي الله يستر عليك .
ثالثا : اترك عنك التخريب ترى السيارة جديدة وهذا عزم الأربعة سلندر.
رابعا : المعارض فاتحة أبوابها خصوصا بعد العيد والله يرزقك.
خامسا : شكلي طولتها بنصائح الشياب!!!!!!
غضنفر
07/10/2006, 06:18 PM
ما فيه حل ابد
نصه المعارض وتخلص منه
وشفلك باترول Sgl او برادو 6 سلندر قير عادي اقل فئة او باثفايندر او فورتشنر 6 سلندر
وابشر بالعزم الي يطربك اذا شريت حدى المواتر الي ذكرت
الكلاسك
08/10/2006, 04:48 AM
تبي الصدق ؟ اللي ما فيه مجامله جيب اربع سلندر ما ينفع بتاتا البته ( حلوه البته ) لكن خذي الحقيقه اخوك مجرب جيب اربع سلندر لا عزم ولا تطعيس ولا سرعه ولا راحه في سواقته دايم كابس الدعسه عشان يمشي وبعد يصرف بنزين بقوه لانك دايم كابس الدعسه عموما نصه المعارض وشف لك جيب ثمانيه سلندر قير تماتيك وترتاح من الصجه واللجه
حـاتـم
08/10/2006, 07:38 AM
فعلا

كلام الاخوان سليم

غير الـ6 سلندر لاتدور

والبرادو الـ6 سلندر مجنون وعزمه جدا قوي

وشكرا

أخوك / حاتم
مسير عليهم
08/10/2006, 02:31 PM
ابعد عن الاربعة سلندر

وأحسن حل اذا انت تحب العزم القوي بعه وأشتر لك باترول سياحي طاره هواء وقزاز كهرب
أبو مسفر
08/10/2006, 04:49 PM
هل هو مكيفين
وقزاز كهرب
ان كان عندك نية بيع
علمنا وش حدك فيه
وان بغيت معاريض علمنا
إبن فيصل
08/10/2006, 05:14 PM
السلام عليكم ورحمة الله وبركاته أخوي الله يطعمك من خيره ويكفيك شره إنشاء الله ...

السيارة مهيب شينه أشوف الناس هابه فيها هاليومين ورزتها ممتازة وعملية في الديرة والمدينة يمكن إنها مهيب زينه مرة في البر لكن ياخي هذا جيب مهما كان بيعمل عمايله بالبر زيه زي الثانيات لكن بمستوى يمكن أقل ..بس يمشي الحال.
وهناك نصيحتين لك مني إختر منها على حسب طريقتك الي تبي:-
1. إن كانك راعي بر وصيد ومطامر بالبران يعني ما تقعد بالمدينة أبد..فنصيحة الاخوان زينة إنك تبيعة وتأخذ جيب 8سلندر أحسن شي وأقوى شي يريحك جداًَ.
2. إن كانك راعي بر على خفيف وكشتات بسيطة ولاهيب بعيدة وحقت يوم أو يومين فتوكل على الله وخل سيارتك عندك تراها هي الافضل لهذه الحالة.
آمل أن لا أكون طولت عليك لكن الله يوفق للفيه الخير والصالح.
وتقبل تحياتي...إبن فيصل،،،
GMC79
08/10/2006, 05:15 PM
بعه واشتر باثفيندر او برادو 6سليندر لان مافيه حل

على فكرة وش كان معك قبل
المطرطع
08/10/2006, 09:03 PM
هلا اخوي سعد ..

انا معي جيب برادو زيك Gx 2005 4 سرندل طبعا ..

بالنسبه لكم يجيب .. انا الحمد لله يجيب الـ 180 بالراحه .. طبعا يفصل عند 180

وبالنسبه اذا تبي تقوي عزم الموتر . . انا مركب له فلتر K&N والحمد لله له سنه مركبه وروعه بس عيب الفلتر يحتاج تنظيف كل اسبوعين تقريبا او بعد كل طلعه للبر

البرادو ماعليه نشاطه .. لكن يبيلك تزر عليه شوي .. يعني بعض الاماكن الجيوب تمشي بالدبل الخفيف .. البرادو مايمشي فيها الا بالثقيل

بس بشكل عام .. ممتاز
الله يعطيك خيره ويكفيك شره

ملاحظه : " انا موب صاحب هالمعرف .. "

واي خدمات هذا ايميلي hoyo_666 @ hotmail.com
احب القصيم
08/10/2006, 11:48 PM
الاخوان عاشق البسيتين والمطرطع اخوي معه نفس النوع ودي بس اعرف من وين هالفلتر ينباع ولكم جزيل الشكر
عريدان
09/10/2006, 03:47 PM
كلام بن فيصل والمطرطع يريح الواحد ويهدي لجته. وتكلموا بحلول معقوله.!!!
كن كن
10/10/2006, 01:02 AM
جيب و أربعة سلندر الله يعظم اجرك حاول تبيعه وتشتري ستة سلندر لو تخسر شوي بس تفتك
المميـز
10/10/2006, 02:32 AM
بعه احسن لك