كيف تدريب الطير.. لاهل الخبرة

[برجس ال سعد]

السلام عليكم ورحمة الله وبركاتة

مساءكم الله بالخير ...مساءكم اجواء ايمانية بالرضى والمغفرة والعتق من النار انشاءالله

العنوان واضح

قبل اسبوع شريت فرخ شيهانة وحش والحمدلله خالية من العيوب باذن الله ...

الحمدلله اعرف اعلفة وهو مبرقع واكل السمان والحمام والمبروك راغبها

بس ابي اعرف كيف تدريب الطير من أ الى ي؟:good2:


ملاحظة :(كان لي رغبة اشتري الطير من السوق لاكن سمعت ان واحد عنده هالطير لاكن حصلته مجوعة ومايعلفة واغتنمت الفرصة والحمدلله حالة كل مالة يزين اكثر واكثر وصار هو من ينتف الحمام بعد ماذبحها له )

[(هزاع)]

وعليكم السلام ورحمة الله وبركاته
اول شي كثر من نقل الطير ولاتعلفه الا على الدس
وحاول تالف الطير ويالفك ونتبه ان تمر ونت ناقله مفرع قرب الاشياء الصلبه كالبيبان
خوف على جناح الطير من الكفخ ولاتنسى الطير من الماء خصوصا بالوقت ذا
والله يبارك لك به

[برجس ال سعد]

وعليكم السلام ورحمة الله وبركاته
اول شي كثر من نقل الطير ولاتعلفه الا على الدس
وحاول تالف الطير ويالفك ونتبه ان تمر ونت ناقله مفرع قرب الاشياء الصلبه كالبيبان
خوف على جناح الطير من الكفخ ولاتنسى الطير من الماء خصوصا بالوقت ذا
والله يبارك لك به
لاهنت على مرورك وابشر بالمحافظة عليه

[خالد العطااوي]

تبي نصيحتي يالغالي ..
انت علم الأخوان وين موقعك ؟؟
وقلهم وأن شاءالله يفيدونك
ويجونك بمحلك وتتعلم منهم .. والطير يبيله عنايه ..
وتصونه من الكفخ ولازم تشيله على يدك يوميا لين يوالف ..
بس
أذا خاويت صقاره راح يكون أحسن وتعرف ويعلمونها معك .. ويساعدونك
وماراح تفهم من هنا ابد ..
ومايحتاج مايقصرون ابد الأخوان ..
والله يوفقك ويوفق الجمييييييييع ..

[برجس ال سعد]

موقعي بالرياض وماقصرو بالرسائل بيض الله وجهك وجههم

[جلاد الحباري]

لا صاروا ربعك صقاقير ابشر بالعلم الغانم راح تتوجه بسرعة

[خالدد العطاوي]

لازم تخاوي صقاقير عشان تعلم

واعزي للشيهانه ههههههههه راحت غلطه نقل


شف وانا اخوك كان اخذت وكري. لانه يركد بسرعه


وافضل طير للبمتدء

[عبدالرحمن بن ذياب]

مبروك ما شريت و تاكل من صيدها بإذن الله
انتبه من الحمام لا تعلف الطير حمام و لا تعطيه حمام إلا هداد بس
لانه مكمن للفيروسات و البكتيريا بشكل كبير .. السمان المجمد و الحي طيب للطير

[ابو وافي00]

السلام عليكم ورحمة الله وبركاته
مساكم الله بالخير
كلاً باسمه
ماقصرو الاخوان عطوك المفيد
مدام الطير وحش حاول انك تكثر من نقل الطير علئ يدك واذا جيت فالمجلس خله علئ يدك
وفرعه ولاحظه ولا تخلي احد يجي من خلف الطير
وخل الطير مايعلف الا من يدك يعني كبدايه تجوعه وتكون لحالك انت وياه وتفرعه
علئ وكره وتخلي العلفه في يدك علفه بسيطه يعني تنسير تناديه وتحاول انه يجي علئ الدس وعطه شوي من العلف وبرقعه ورده علئ وكره واذا اخذت شوي فرعه وناده وانت عنده
وكررها كم يوم الئ ان يوالفك الطير وبكذا تكون تعديت مرحلة التدهيل
وبعدها تاخذ الطير وانت وياه في البر لحالكم وتربطه بحبل ومايكون طويل عشره متر ولا عشرين كافيه
وتروح وتنتف الحمامه وتصيحله. وترمي فالهوا عشان يشوفها واذا هد عليها تخليه يذبحها
وانتف معه من ريش الحمامه وناده بسمه وخله ياكل منها بالاارض شوي بعدين اشلخها وعلفه علئ يدك شوي
وكررها كم يوم لين تعرف ان الطير عرف يذبح الحمامه


بعدها شفلكك صقاقير ورح معهم عشان تهدها بدون حبل وتشوف هداها وتنومسكك
والله يطعمك من صيدها ويباركلك فيها




تحياتي:
أبو وافي..

[تميم2222]

كل طير. وله طبع. وانصحك لاتاخذ وحش. خذ طير مدهل. اسهل لك. وان شالله مع الوقت تعرف طبوع الطير. وانننننحش عن مكسره المجاديف. اللي يهايطون. ولا يساعدونك علئ طيرك. وسلامتك