&&&&( طمحن جاراتنا والسبب التلفزيون )&&&&

[(هزاع)]

السلام عليكم ورحمة الله وبركاته
الله يجعل اوقاتكم كلها خير وبركه
كما تعلمون الشايب المتقاعد يحب السواليف
ويعلم الله اني احبكم بالله واعتبر هالخيمه من المفضلات الاوائل عندي بعد خيمة الصيد بالصقور وخيمة ادوات الصيد
لاني القا راحت نفسي معكم
..................................
السالفه كانت باخر عام 1399 اوحولها
كنا اهل قريه ونا كنت توني مسجل بالوضيفه
وكان جارنا الله يذكره بخير متزوج من مرتين ومسكنهن بيت واحد
ومورهم تمام لاحس ولارس والرجال موضف ويكد على فلفو ومورهم الماديه تمام
وعندهم تلفزيون ابيض واسود تسعه بوصه والعرب مستانسين عليه وشايفينه شي
ويوم من الايام الرجال تغيرت اموره واطلق لحيته وقصر ثوبه وحذف العقال
وصار مايفارق المسجد
ويوم اخذنا بهاك اليوم الا الصوت اللي ماعمرنا خبرناه عن جيرانا
صوت النسوان ارتفع والا صوت الخبط بالشارع
ونطلع نشوف
الا التلفزيون متكسر وغادي قطع
اثره تناوله التلفزيون بالساطور ونتفه:mad:
ويوم اخذنا الا جاراتنا كل واحده جاره ورعانها وراها وناصيات بيوت اهاليهن
ترا اهاليهن حولنا
جلس الرجال بالبيت عزوبي وكنه تحسف ولاموه الناس وقالوله راضي الحريم ورد عيالك
المهم ان الحريم الظاهر عقدن اجتماع كام ديفد وقررن مايلي
لارجوع الا برضاوه وتكون 24 بوصه وملون
ذاك الوقت تو جاي الملون ولايتواجد الا ببيوت المقتدرين واكبر تلفزيون ال 24 بوصه
المهم يوم اخذنا الا ورعانهم يلعبون بالشارع بكرتون كبييييير كني اتحلاه هالحين
وعليه رسمة تلفزيون
اضن والله اعلم اضن والله اعلم انه راضاهن:)
ههههههههههههههههههههه

[قوافي ( أم نهار )]

عليكم السلام ورحمة الله وبركاته
حياك الله اخوي ابو مشعل
سولف كلنا آذان صاغيه وأعين ثاقبه والله يحييك تتشرف الخيمه بحضورك الكريم..
انا كل ماتذكرت التلفزيون الاسود وابيض أقول ياصبر الارض ،،كنه علامه فارقه التلفزيون رمادي والشاشه ابيض واسود (عمى ألوان أجباري)..
اخبر كنا نرفع صوت التلفزيون وحنا بالحوش وام الجيران تحط صندوق بصطحهم وتطل علينا عشان تسمع،، أخر وناسه الله يرحم الحال ومبسوطين(يازين البيوت الشعبيه منول وياطيبها وطيب أهلها،، كلش واصل حتى التلفزيون)..
لو مصدر قرار وسط وحدد ساعات التلفزيون بدل تكسيره كان أوفر لكن جت من حظهم تلفزيون جديد وملون أو أعلان حالة الحرب والحبس الأنفرادي..
اذكر يوم تجي الملونات قعدنا اسبوع نكتب :
بال سيكام والباقي مدري وشوله ،،همن راح الوالد وشرا لنا مثل هالمزيون،،
http://t2.gstatic.com/images?q=tbn:ANd9GcR4YjYr8v6qY-Jhym32on7g-bhDmP3sLOq4e0bhr9Goz_htmzzK
انقهر لين قفلوه بالمفتاح ،، ،، وافتحه بمفتاح غطى مكينة الوالده الله يطول عمرها واتفرج عليه ..
اشكرك ابو مشعل على السالفه الجميله ومتى مابغيت تسولف الخيمه مكانك وحنا ضيوفك والله يحييك..
دمت بحفظ الله
(عذراً لطول الرد،لكن اثرت ذكريات)
تحياتي وتقديري واحترامي
..قوافي..

[قاهر البدن]

يازين سوالفكم
زمان يافن

[النبهاني]

وعليكم السلام ورحمة الله وبركاته
حياك الله مشرفنا الغالي
واحبك الله الذي احببتنا فيه
وكل عام وانت بالف خير
الله على هكالوقت وقت الانقلاب الشتوي الصيفي مدري الحضاري
ساعة اندفاع خسر فيها اشياء
وجت من صالح الحريم والعيال لقوا لهم تلفزيون 24 بوصه ملون
من يلقاه هكالوقت
الله يعطيك الف عافيه

[ذيب الفقارة]

وعليكم السلام ورحمة الله وبركاته

وكل عام وأنتم بخير

مشرفنا القدير هزاع

وحنا كمان والله أننا نحبك وتعجبنا سواليف الشيبان ( زملانا )

وها الرجال مثل ما يقولون :

( قال : يارب كبر راسي قال : يارب رد راسي مكانه )

وكنك يا بو زيد ما غزيت

..............

تحياتي لك يا الغالي