للفائدة،، اذكر لنا موقف حصل لك وحدد نوعه (مرعب،مزعج،مضحك،مفرح،،،)

[فايز العامر]

أكثر الناس تطلع للبر، والكثير منهم ينسى ذكريات الطلعة بعد كم يوم، والبعض الآخر يذكر كم طلعة لسبب موقف حصل له، وبعضهم الموقف اللي حصل له يأكل ويشرب معه (يعني مافيه أمل ينساه).
وبعض المواقف مضحك،وبعضها محرج، وبعضها مؤسف، وبعضها مفرح، وبعضها مرعب، وبعضها غريب، وبعضها وبعضها وبعضها...
المهم،،،

ودنا في هالموضوع تذكر موقف حصل لك (أي موقف) استخدمت فيه عقلك بعد الاستعانة بالله لتجاوزه... سواءً محرج، مرعب، مؤسف، وغيرها...

والهدف من ذكره هو الفائدة،، العبرة،، المعرفة...


وفي البداية ودي أذكر موقف حصل لي (محرج) وبعدين أصبح (مفرح)...
مرة طالع قريّب للثمامة ومعي اثنين من الشباب، والمكان اللي طالع له نظيف جداً وهو في وسط الثمامة على عكس باقي أماكن الثمامة، المهم طلعتنا هذي خفيفة وأخذت معي عزبة القهوة وعزبة الطبخ والشوي (وفيهن كل شي جاهز حسب علمي) وكان الوقت أول الربيع يعني الجو على كيف كيفك، أول مانزلنا للمكان كل واحد من الشباب استلم شغله، وفجأه قال اللي عليه شبة النار: وين الولاعة؟؟؟؟ على طول قمت أفتش بشناط العزب ولا لقيت شي، وبالسيارة ولا لقيت شي...
طرت علي فكرة سويتها مبطي وهي شبّة الدافور من الاشتراك ورحت ابي الدافور وتذكرت ان الشباب قالوا لا تاخذه نبي الدعوة قهوة وشاهي والعشاء مشوي، وكل شي على نار، والدافور عادةً مايطلع من العزبة بس طلعته ابي أعبيه...
قعدت افكر يمين يسار الا وواحد من الشباب لسانه طويل، قام يتكلم ويرفع صوته: أنتم اللي مافيكم خير والشرهة علي يوم اطلع معكم وانا وانا وانا، وهذي فوايد التدخين (لو انتم تدخنون كان ماصار هالموقف لنا) الحين واحد منكم يروح للي كاشتين بجنبنا على رجلينه ويجيب لنا ولاعة من واحد يدخن. (يبي يقهرنا)... والمشكلة اللي جنبنا حوالي نص كيلو..
قلت: اسمع ،،، الله اللي فكنا من التدخين، والله اللي بيدلنا على شبة النار... وراح تشوف،، قاطعنا خوينا الثاني وهو يقول: وش فايدة هذولي الحين وماسك بيده (المكعبات البيض اللي تشب النار)؟، طرى على البال الاشتراك والدافور، والاشتراك والبنزين، وقلت خلنا نجرب مع المكعبات،، وطلعنا الاشتراك (وخوينا الاول يقول:خلّوا عنكم الخرابيط وحديكم يجيب لنا ولاعة أو شخط)، ومسك خوينا الثاني معكبين بيده وانا شابك الاشتراك بالبطارية وشايل روس الجهة الثانية من الاشتراك عشان يكون الشرار بالمكان اللي أحدده ... ومن ثاني قدحة اشتبت المكعبات على طول بفضل الله وحده، وشبينا نارنا...
خوينا اللي أزعجنا سكت فجأه وقلب الموجة من الشماته إلى موجة المدح مع إخفاء لموجة الاستغراب لكن حنا ماأعطيناه وجه عشان يعقل،،، وإلى اليوم والرجال يذكر سالفتنا هذي في كل مجلس يجيبون طارى الطلعات والبر..

لا تنس ،، موقفك


رعاد ،،،، أخيكم

[طلو]

مرة رايحين للمقناص جنوب المملكه ويوم طبينا عفيف وواحد من اخويانا من اهل عفيف يتصل ويسلم وقال وينكم فيه المهم صرفنا السالفه وقلنا حنا في ضلم المهم موتر اخويانا قطع الاشاره ومسكوه الدوريات المهم ان حبل الكذب قصير وحاولنا بالدوريه يفكونا لاكن ما فيه فايده
وكلمنا خوينا وعلمناه بالسالفه وتقبل الوضع وما قصر واعتذرنا لخوينا وقبل الاعتذار

[عاشق البل]

سرقة العزبه
مرة كنت طالع مقناص مع صديق لي خميس وجمعه المهم رتبت العزبه وكل شي فيها ونزلت العزبه من البيت وحطيتها فوق الرصيف
عشان اذا جاء خويي نشيلها بظر السيارة سوا لانها ثقيله شوي المهم رحت ونزلت الحافظه وبعض الاغراض وجاء خويي وركبنا ومشيانا
ووقفنا نصلي الظهر وبعد الصلاه عبينا سيارتنا ورحت للبقاله اشتري رز ورجعت ابحطه بالعزبه والا ماهي فيه ول ياعزبتي وتذكرت انها على الرصيف 0ونرجع للبيت وندور على الرصيف وننشد الجيران ونعود نروح نتسلف عزبه من احد الشباب ولليوم ماشفت عزبتي المسروقه
والله هذا اللي صار معي

[بن عاقول c.o]

مره طلعنا البر عوايل المهم أني خذت طريق غير سالك الظاهر مهب ألي خبري فوقفت وبديور بالسيارة عشان أرجع عكس ومن ثم آخذ طريق غير... فيها شي لما أرجع بالبر لورا وأديور ؟ البر كبير كبير جداُ وفاضي فاضي جداُ .. ماأضن فيها شي لكن عشان تعرفون إن الدنيا ذي صغيرة وآنا داق الريوس !!! ألا وألمخ ذيك التيوتا وفيها عوايل وصدامات سيارتي متوجهة إلى زوجة سائق الكرسيدا لا وفي حضنها طفل أبو 6 شهور تقريباُ ولو أني مامسكت ذاك البريك يوم حسيت ببداية الصقعة كان الله أعلم شصار بهم المهم نزلت من السيارة وألا سيارة وراي وراعي السيارة نزل يناظر بالحادث ويلف براسه على وسع هالبر وفسح المكان وهو محمّق ومتعجّب وأنا أناظر ومنبهر أشجاب ذا الفظولي وراي ياجماعة والله أن البر مافيه ألا أنا وهو ولو تمد بصرك يالله بتحصل سيارة وألا ثنتين من بعيد جداُ ..أشوي وينهد علي بذاك الزعيق ويقول .. والله أنك عجيب ..عجيب : ليش ؟ يقول : في أحد يريوس في البر في أحد يدق الريوس في بر وأضحك في وجهه ذيك الضحكة وأقول له يارجل شتقول أنت .. بعدين مديت له يدي وتحمدت له السلامة له ولولاده وأنا بعد بزاريني كلهم تكودو ورا في الموتر وترقعت جبهتم بالدرايش وأشوي ألا والله ويهدّي أعصابه ويضحك ويقول .. والله إنها غريبة والغريب أني زنقت نفسي ولا جيت ألا وراك وأنت داق الريوس .. المهم تصالحنا وألا لو طالبين المرور عشان يعاين الحادث كان خلينا سيايرنا بالبر وشرينا بدالهن سيارات على مايجون ويتعرفون على هالبر الأقفر . وسلامتكم

[حمد بن الرجال]

مرة كنت في الصان اصيد وبنشر الكفر في البر والله يابو الحبيب اقوم وانزل العفريته ومتاح العجل ابفك الكفر اثر مفتاح العجل اصغر من صامولة الكفر وش اسوي والجو حر ولا حولك من يقول ربي الله توضيت وصليت الظهر وجلست افكر معي منفاخ هواء تفخت الكفر بس البنشر كبير شوي يطلع الهواء بسرعة ضاق صدري وفكرت وهداني رب العالمين للحل الي حبت انقله لكم ولو حصل معكم لاقدر الله ماحصل
الكفر حق الجيب تيوبلس قمت وفكيت مسمار من كبوت السيارة اكبر من فتحة البشر وجبت المفكت وضغط وبرم بالمسمار إلين اخره وتفخ الكفر ثانية والله مانقص ولا شي وعله إلين محطة حفر العش 0 وسلامتكم

[ابو مرام]

السلام عليكم مره وحنا طالعين لصمان كنا نمشي بجاده ونطب بفياضه ما عمري شفت مثله جــــنه ولكن فيها بركسه مهجوره (شكله تبع الجن) ونشوف وايت واقف بين ضلعين وفي طرفت عين اختـــــــــــــــــــــــــــــــــــــــــــــــ ــــفاء الوايت وجتنا ام الركب وانجمنا واول ما طلعنا من الفيضه رجعت المعلومات وارتحنا. نصيحتي للكشاته (لا تطلب حرش مع الجن) اخوكم ابو مرام

[برق و سحاب]

السلام عليكم

قبل 7 او 8 سنوات انا وصديق لي متعودين نطلع بصفه اسبوعيه للبر ونجلس كل اجازة الأسبوع هناك وكان اقرب مكان ممكن نطلع له الصمان .
طلعنا في ايام غير ربيعيه وقبل زحمة الناس في هالأماكن لدرجه اننا نقعد رحلتنا كلها مانشوف ولا سياره الا في النهار نشوف وايت واحياناً بعد.
دخلنا تقريباً 100 الى 150 كيلو ما ادري بالتحديد كم المسافه ووين الموقع بالظبط لأنه له فتره طويله. وسبق واخذنا حاجتنا من اخر بقاله في الدرب . كنا في الليل وكان ليل داااااااااااااااامس المهم قررنا نوقف ونتقهوى ونطبخ عشانا ويوم جينا ننزل العفش من الونيت مالقينا لا فرشه ولا حطب !!! قلنا مافيه مشكله قلت للي معي انا بجهز العده واحفر للضو وانت اطمر جب لنا كم عود نخدر عليه الشاهي والقهوه من اي قشعه راح بالسياره ( السياره عورا من قدام ومن ورا بعد ) مسافه 600 او 800 متر في ليل لم ارى في حياتي مثل ذيك الليله من الظلام. جلست انا على الأرض وحفرت للضو وحطيت المعاميل حولها ( راعي تكتكه ) وبعد كم دقيقه سمعت صكصكة بيبان السياره والصندوق بشكل متكرر من نفس اتجاه خويي وسمعته بعد ثواني يصوت بأسمي ويناديني قمت بروح له وخفت عليه انه مقروص والا ملدوغ والا صار له شي وبعد ماقمت سمعته يصوت لي ويقول خلاااااااص خلك خلك وسميت عليه وقلت الحمد لله مافيه شي وبعد وقت تقريباً 15 دقيقه لقيت السياره جايه من اتجاه غير اللي راحت فيه ( كان رايح من قدامي واسمع صوته من نفس الأتجاه اللي راح معه) والسياره اللي جايه جايه من وراي انا وناصيتني وكانت عورا من قدام ويوم قرب لي ويدور علي دورتين وهي نفس سياراتنا عورا من قدام وورا ونفس اللون ونفس الموديل وفجأه وقف بمسافه 10 متر عني وقال لي وش عندك هنا!!!!!!!! اثاري اللي في السياره مهوب خويي وشكله بدوي خااااااااااااااالص انا ماجاء في بالي اي شي. رديت وقلت له انزل تقهوى .....قال قهوه قلت انزل انزل ....( ماكنت شاب لا نار ولا دافور ولا معي غير المعاميل وخشبه حفرت بها للنار وصافهن على الحفره. قال انت وش انت قلت انزل انزل .... قال انت تبي شي قلت سلاااااااااااامتك وطالع فيني ولا كنت اقدر اميز شكله ميه بالميه بس من شكله بدوي خاااااااااااااالص المهم دار على مكاني كم دوره وراح من نفس المكان اللي جاء معه..... تصدقون اني جالس بدون نور ولا حتى كشاف وشلون شافني !!!!! المهم شوي ويجي خويي من نفس الأتجاه اللي كنت اسمعه منه وكان يدورني شوي شوي لحد ماوصل لي نزل ونزل فرشة السياره اللي تحت الرجلين وانسدح عليها جنبي ونزل الحطيبات اللي معه وتوني اشب الضو واسولف معه واقول سلامات وش فيك تصوت قال جوني اللي انت خابر قلت وشو !!!! قال اللي في الأرض وهبلوا فيني فتحوا البيبان ويصكونها والصندوق يفتحونه ويصكونه واحسب انك انت تستهبل ويوم عرفت انه مهوب انت سميت وقريت قران وجمعت حطيباتي وجيتك .. قلت له وانا اقووووووووووووول وش اللي جاني اثره منهم ... وقلت له اللي صار وكنا متسدحين على ألأرض وتركنا كل شي ولا شبينا الضو ونسولف ونطالع في السماء وفجأه طلع لنا شي مثل النجم في السماء (القمر الصناعي) اللي يمشي في السماء وصرنا نتابعه ونتابعه انا ورفيقي ونقول شفه هناك بيمر من عند ذيك النجمه ومستمرين معه ... وفجأه وقف .... ولله العظيم وقف وشفناه بداء ينزل وينزل ومازال مرتفع فوووووووق وولع علينا ضوء الله وحده اللي يعلم فيه لدرجة اننا غمضنا عيونا وقلت لخوي شفت اللي شفت قاااال ايييييييييه!!!! استمر الضوء ثواني ورجع يمشي بنفس الأتجاه يكمل مشواره ووقف مره ثانيه وكشف الضوء علي المنطقه كلها لدرجه اننا صرنا نشوف معالم الأرض حولنا ميه بالميه والأضائه كانت بيضاااااااااااااء نقيه وكرر هالشي معنا 4 او 5 مرات واختفى .... قمنا نطالع بعض بأنبهار وبدون اي تعليق وشوي قلت له وش رايك قال هااااااااه في وش قلت في وش اقول قمناااااااا قال اي ولله قمنااااااا وركبنا السياره بعد مانطلنا المعاميل والحطيبات في الصندوق ومشينا لديره ( هجره بس مدري وشي) ونمنا حولها عشان اذا قمنا نلقى شي ناكله لأننا ماتعشينا ولا طبخنا شي وكملنا كشتتنا ورجعنا للرياض.
وبعد كم يوم شفت واحد من الربع الخاصين لي مره راعي كشتات الثمامه مخيمات الثمامه وقلت له السالفه واتفاجئ انه يقول لي تصدق ان فلان في نفس اليوم كان جالس برا الخيمه على النفود في الثمامه وجانا منهبل داخل علينا يقول تعالوا تعالوا شوفوا نور في السماء يكشح على النفود من السماء ويختفي ... وهم يضحكون عليه وكملوا لعبوا البلوت ....
الى الأن افكر وش كان هالنور اللي شفته ولا لقيت له اي اجابه وهل كان بالفعل قمر صناعي والا كنا منجمين ....واذا كنا منجمين هل صديقي اللي في الثمامه وشاف نفس الشي كان منجم مثلنا شي غريب مالقيت له اي تفسير.
تحياتي للجميع

[الجو هتان]

بصراحة القصص روعة

نتمنى المزيد

أخوكم
أبو عبدالله

.

[القصبي]

مشكور يابرق وسحاب
بصراحة احسن قصة سمعتها في حياتي

[وافي الهقوات]

قصص جميلة

وفيها غرابـــــــــــــــــــــــــــــــــــه

وقت آخر سأكتب لكم بعض مما حصل علي

لأنه جاني النوم ! القصص رائعة قبل النوم هههههههه

أخوكم وافي الهقوات

[مريقب العيفار]

الله يهديك يا برق وسحاب

وقف شعر جسمي وانا اقرأ

شكرا اخوي رعاد على الموضوع

[ابو سلامه]

مساكم الله بالخير
في عام 1419هـ كنت ادرس بالكليه التقنيه اللي هو المهني المهم دوام باليل بعد صلاه المغرب مباشره
المهم يوم الاحد عندي محاظره وحده المهم طلعت بعد صلاه الاخير وحنا طالعين من الكليه قال واحد من
الشباب وشرايكم نروح للثمامه كنا 5 اشخاص قلت قدام المهم كنا لا بسين بدلات اللي
قال ابروح اغير ملابسي واللي بياصله مشوار قلت انا ابروح قدامكم يوم وصلت للمحطه قلت اخذت اغراضي من البقاله وانسم الكفرات وادخل ولا النفود فاضي مافيه احد اللي موجودين ينعدون بالاصابع ما يتعدون 10 سيارات
في اماكن مختلفه المهم اني رحت دخلت داخل عن الناس وقلت ابطاعس الين يجون الشباب المهم واطاس واستانس
وارقى هاك السيف ويتعلق المتوتر كان معي هايلوكس م 95 المهم واحفر وادفن مانفع يد وحده ماتصفق الى اذا كان
عندك خبره بالمطاعس وابلش ماحولي ريحه انسان واجلي واكل من الفيشار والببسي واولع افلشر السياره واشوف هاك النور من بعيد واشرله والحمد لله ويجي اشوي ولا هم اثنين مساعده يالاخو قلت اي والله مساعد الله يرحم والديكم
وينزلون وماقصروا ونحفر وندفن يوم جت السياره بتطلع ومير ينقز واحد بسيارتي ويحاول يطلعه راح الثاني شبله
زقاره ( تتن ) الثاني جالس بسيارته يدخن مانزل والاول جالس بسيارتي يطلعه انا بالنسبه لي ماشكيت بالوضع
( على نياتي ) قربت سيارتي بتطلع سيارتهم جمس عبارتين قطع عشره المهم فيه واحد بعيد يكبس قال اللي بالجمس
الظاهر انه مغرز ابروح اشوفه انا استغربت قلت وشهم ذولا فرقه انقاذ مغرزين من الدوله والى وش القصه
راح راعي الجمس فاصل لمبات الاصطبات واللوحه الى الان ماشكيت جالس ادعيلهم والمهم يقولي اللي بسيارتي
دف السياره بكل حيلك والمهم وادف وداف اطلعت السياره الحمد لله نزل السياره تحت على الارض وانا جالس فوق
بالنفود اناظر ولا الرجال بتل يمشي قلت بيوقف السياره بمنطقه مافيها غراز المهم شوي ولا الرجال ماشي ومخلين
بمحلي اصوت هيه يالحبيب يالاخوه يالغالي لا حياه لمن تنادي راح وخلاني جلست اناظر الى الان مادخل بمزاجي الموضوع ماش المهم راحو وخلون اخذوا سيارتي وانا جالس مادري وش ازين كان فيه جوالات بهاك الوقت بس انا مامعي جوال وامشي واروح لم الخط رجليه الين وصلت اشوف نور السيارات من بعيد جلست حوالي ساعه وانا امشي من الخوف وصلت وياقفلي رعي دينا سوداني الله يجزاه خير وين مايروح المهم واعطيه السالفه ويظرب فرامل ويديور قلت وين راح قال لمركز الشرطه واروح وابلغ والله يجزاهم خير ودوني الى البيت
مـــــلاحضات ***
كان الوعد مع الشباب في محطه البانزين
السياره الى الان ماادري عنها وبعد البحث والتحري من الشرطه اكتشفوا انها عصابه الله ياخذ اعمارهم بعد ماكثرت البلاغات عن السرقات بالثمامه
واخيرا اقول الحمد لله على ما اصابني

[القصبي]

الحمد لله على السلامة اخوي
والله قصة تضيق الصدر
وبعض الاوادم يخلونك معاد تثق في العالم ابد

[بن عاقول c.o]

سراحة السوالف مع هالأعضاء الطيبين ماتنمّل عسى الله لايورينا وإياكم أي مكروه

[الفتى المجازف]

يعطيكم العافية ياشباب على هاالمواقف التي مابين الطريف والغريب والتي عادة ماتكون مادة دسمة للطرح حول الضوء عند الكشتات.
يازين هاالسوالف اذا كنت في الدهناء في ليلة القمر فيها بدر مكتمل في ليلة اقرب منها للبرد والنار مثل ضوء المنارة حواليها دلال القهوة والحليب وابريق الشاهي والزنجبيل يالله من فضلك، وتعال خذ من هاالسواليف اللي تقضي عليك الليل.
الا ياشباب ماسمعنا عن قصص ومواقف مع الذئب او الذئاب اتمنى ان نرى ولو قصة محبوكة فهي حتما ستضيف للسواليف نكهتها البرية الحقيقية.

تحياتي للجميع

[ابوناصر77]

السلام عليكم ورحمة الله
مرة من المرات كنت كاشت في المنطقة الغربية
ولي صار احسست في حكة شديدة في اسفل القدم
المهم اني حسبته ناموسة لكثرته في هذه المنطقة
وشوي الى تطلع هاك العقرب من تحت رجلي
وقلت وش اسوي وتذكرت ان معي علبة غاز
المهم اني رشيت مكان القرصة حتي غدت رجلي
قالب ثلج ومارحت للمستشفى الى بعد يومين
المهم هذي تجربة الغاز تراه ينفع للطواري

[أبو عزوز]

مرة طالعين للصمان وفي الطريق دخلنا للدهناء قريب يم الزفلت طبعاً بعد مطرة
المهم نمنا يوم أصبحنا
وصلينا الفجر الجو كان براد والسيارة كل القزاز تحس أنه مضلل من البرد أنا كنت دايخ عودت أنوم
المهم بعد ساعة تقريباً أسمع أخواني ينادون على أخوي الصغير
وأصحى وش الوضع قالو جاليسن حول الضو يوم نصيح لخوك ولا مهب فيه
ندق عليه ولا يرد وبعدين انقطع الإرسال
ولنا نص ساعة ندور أخوك مالقيناه غير بدل
حتى أخوي راح يمشي لأعى نقا ورقاه بس ماشاف أحد المهم اختبصنا
ندور ونزاعق له بس ما
أنا قلت الله يستر قلت خل أشغل السيارة وأدوره
يوم فتحت باب السيارة وألقاه نايم داخل الغمارة
قلت الحمد لله
وأصحيه وش بلاك
قال بردت ودخل في الغمارة
قلت ماسمعت جوالك قال إلا بس أزعجتوني وطفيته
يوم بغيت أجلده

[*الأمير*]

السلام عليكم ياشباب مره من المرات كنت الدوام في امن الحدود الشماليه في دولة الكويت حيث اني كويتي واعمل عسكري في وزارة الداخليه مره من المرات عقب ماخلصت النوبه قلت ابغى اطلع بره المركز واصلح القهوه والشاي واستانس وكنت إلحالي المهم عقب ماصلحت الدله والغوري وجلست اتقها وإلا صوت الرجال الي يمشي جاي ييمي أثره اعراقي متسلل ومعه سكين مع العلم اني ماكنت املك في ذاك الوقت اي اسلاح ولما قرب مني حاولت اخلي الوضع عايدي جلس وقهويته وبدا يسرد علي السوالف سئلني وش جابك هنا قلت انا امي عراقيه وودي اروح العراق لاكن مااقدر اروح لان امن الحدود متشددين وبدأ يسولف معي ويقول حتى انا ابي ادخل العراق لاكن المشكله من امن الحدود واثناء السوالف اكتشفت انه يعرف طاقم المركز كله بالاسم وكان متضايق من ريس القطاع الشمالي وحاقد عليه ومن ضمن السوالف كان وده يستغل خروج دوريات المركز عشان ينفرد باي عسكري داخل المركز المهم اكتشفت انه مسلح ومطلوب علما انه لايعلم اني عسكري لان مكان الحادثه يبعد عن المركز 5كيلوا وفجأه ظهرت دوريهمن بعيد واتت بإتجاهنا وحاولت ان ابي له اني اريد الهرب حتى اطبقت علينا الدوريه واستلمته وبالتحقيق تبين انه يريد العبث