استفسار / عن الطير بعد المقيض

[QATAR83]

بسم الله الرحمن الرحيم

السلام عليكم ورحمة الله وبركاته

عندي طير حر السنه بكر

العام راكد وهادي ومايكفخ يوم انه فرخ حتى كنت معلمه على التكايه

أحس طبوعه متغيره

والحين يوم نقلته بعد المقيض ونزلت عدته لين 900

يكون راكد بوقت نقله وبعد اقل من 3 دقايق او 5 دقايق يقوم يكفخ كفختين او 3

وبعض المرات يهف بجنحانه يبي يكفخ ويركد مايكفخ

مع انه انقله طول اليوم صباح ضهر عصر مغرب عشاء

وشو أفضل حل لجعله راكد على اليد على طول

وأتمنى تفيدوني بارك الله فيكم

[ابرق الحرار]

اخوي هذا شي طبيعي لان الطير له مايقارب السنة في المربط وتوحش ولكن خلال اسبوعين مع التدهيل ونقل الطير يرجع مثل اول ان شالله واحسن وسلامتك يالغالي

[mr.silver]

تااااكد من البرقع يمكن انه ضيق عليه .. او يشوف من البرقع او البرقع مب نظيييف


اهم اشياء الي قلتها لك و موفق خير انشاء الله

[QATAR83]

البرقع نضيف وجديد

بارك الله فيكم والله يعطيكم العافيه

[بو_غانم]

كثر النقل هو الحل.

ويكون المكان هادي في أول ايام النقل.

تحياتي لك

[قلب ذيب]

طيرك به وحاشة المربط , والجو مازال حار , حاول رش الطير بالماء اثناء نقله خاصه في الزغون , ومع مرور الوقت سوف يركد , لاتفرع بالطير الا على يدك واخر عملية التكايه في الوقت الحاضر خاصه ان بعض التكايات لايرتاح عليها الطير , وبعض الطيور مايحب الظوله في السياره , ويتضايق من السيارات التي جاماتها مخفيه او كثرة المعلقات في المرايه وعلى الطلبون . فالك حبارى القاعيه .

[جلاد الحباري]

دام برقعه على راسه اللي في راسه يبي يطيح انقله على يدك وامسح على نحره وحاول تشربه بفنجال وهو على يدك ومع الوقت يبي يركد غصب والتكايه اصبر عليها شوي لين تطيح السعاطير اللي في راسه وللمعلوميه الحرار الاباكير بشكل خاص والاكثريه منها تجي فيه وحاشيه وهذا امر طبيعي ومالك الا تصبر عليه وبتزين الامور وفالك الخرب الازرق

[QATAR83]

حالياً فقط أنقله نقال فقط

ومأخر كل شي من الامور الثانيه لحد ماشوفه ركد


وبارك الله فيكم استفدت منكم وجزاكم الله خير

[هم الشمالي]

مثل ماقالو الاخوان الطير فيه وحاشيه ولا تستعجل خل بالك وسيع ومع التدهيل والبرقع بيركد إن شاء الله

[فايل]

اخوي هذا شي طبيعي لان الطير له مايقارب السنة في المربط وتوحش ولكن خلال اسبوعين مع التدهيل ونقل الطير يرجع مثل اول ان شالله واحسن وسلامتك يالغالي

السلام عليكم

مثل ماقال اخوي ابرق الحرار

[راعي كريم]

كثر من نقله وخل السهر يهلكه يعني لا جيت تنام حط عنده رادو ولا حطه عند التلفزيون وارفع الصوت وطبعا مبرقع عشان ماينام يوومين ثلاثه ويطيح غصب وولا صار يومي بجنحانه ولا يكفخ معناه الطير مستانس