مرة أخرى سيارات الحنين .... سيارة متعطلة في أحد عروق الدهناء [الأرشيف]

صقر

09/10/2006, 01:45 AM

بسم الله الرحمن الرحيم

:::

السلام عليكم ورحمة الله وبركاته

:::

كنت قد كتبت موضوعا عن سيارات الفورد القديمة المتناثرة في الصحراء، وما هو سر توقفها:سيارات الحنين ... ماهي قصتها ؟؟؟!!! (http://www.mekshat.com/vb/showthread.php?t=26028) ........... ولعل أغلبها لم يتم كشف أسراره... قد يكون عامل الوقت سبباً رئيسياً في زيادة غموض هذه السيارات الجاثمة في مجاهل الصحراء.

--------------------------------------

في الربيع الماضي كنت في رحلة الى سامودة وربيعها الذي لاينسى ... ذكر لي أحد الإخوة أنه وقبل سبع سنوات، شاهد سيارة جمس متوقفة بشكل غريب، شرق عرق الدهناء في منطقة المحوى، قرب محطة الشرق الأوسط ، فقررنا البحث عنها ... استغرق البحث عنها (حسب الوصف) نصف نهار ... واخيراً وجدناها ، عبارة عن سيارة (GMC) اعتقد موديلها 1981م خليجية ثنائية الدفع ... توقفت اسفل عرق الدهناء من الجهة الشرقة مقابل خط سامودة وتبعد عن هذا الخط حوالي 5كم غرباً. الغريب أن مفاتيح السيارة مازالت موجودة في مكان التشغيل... السيارة ليست ببعيدة عن الإسفلت .
::::
::.
وإليكم الصور :
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــ
http://www.mekshat.com/pix/upload/images20/mk1377_gmcmap.jpg

:::
http://www.mekshat.com/pix/upload/images20/mk1377_gmc3.jpg
:::
http://www.mekshat.com/pix/upload/images20/mk1377_gmc2.jpg
::
http://www.mekshat.com/pix/upload/images20/mk1377_gmc1.jpg
::::::::::
:::::::
::::
::
إحداثية هذه السيارة المجهولة تقع على هذا الرقم ( غير متأكد) حيث أنني حللت الاحداثية من تراك الرحلة .
N 2823911
E 4410242
::::::::::
:::::::
::::
::

ترى ماهو سبب تعطل هذه السيارة وبهذه الطريقة ؟
ماهو مصير صاحب السيارة وهل حصل له (لاسمح الله) مكروه؟
ماهي المخاطر التي تتهددنا نحن المكشاتيين من الصحاري الكبيرة؟
::::
::
شكراً لكـــــــم
::::
::
والسلام عليكم ورحمة الله وبركاته
::::
::

نفل

09/10/2006, 02:21 AM

وعليكم السلام ورحمة الله وبركاته

هلا اخوي صقر

فعلا غريبة وتحتمل الكثير من الاحتمالات

والغريب كذلك هو بقائها طول تلك المدة دون تشليح حتى المفتاح بقى بمكانه والله غريبة

مشكور اخوي على الموضوع

معدي المرقاب1

09/10/2006, 02:37 AM

وعليكم السلام ورحمة الله وبركاته
فعلا غريبة وواضح ان لها فتره طويله
الف شكر على الصور

الوشاح

09/10/2006, 02:51 AM

فعلا امر غريب :confused:

السؤال مثل ماقال نفل ليش ماحد شلح منه شي !!!

والسؤال الصعب وش مصير صاحبه ؟

شكرا لك صـقـر

عاشق الثويرات

09/10/2006, 04:21 AM

ياجماعة الخير يمكن السيارى تعطلت وراعيها تركها ومشى وبعدين انا لاحظت لوحة السيارة مهي قديمة بالحيل مرة واللوحات هذي كويتية وتم اصدار هذا النموذج بعد تحرير الكويت يمكن بسنة 96 ميلادية اذا ماخانتني الذاكرة

وثاب

09/10/2006, 04:31 AM

اتوقع والله اعلم ان عدم تشلحيها انها بعيده عن الخط

وحتى راعيها اتوقع انه ضيع مكانها

مهلوس الصيد

09/10/2006, 04:42 AM

عجيب والله أمرها وأمر راعيها ؟

مسافر1

09/10/2006, 05:15 AM

الدهنا ذلك المكان الذي ذهبت فيه انفس الله أعلم بها ..
الاحتمالات كثيرة ..
والشيء المحير هو بقاء المفتاح حتى الآن ..

فتى الوادي

09/10/2006, 05:35 AM

السلام عليكم ....

الصورة الثانية أشوف فيها ما يشبه بيت الشعر ( يمين )

أبو فراس

09/10/2006, 06:27 AM

السلام عليكم ورحمة الله وبركاته

مشرفنا ابو احمد

الغريب انكم ماسألتوا اهل الخيمة عن هالسيارة او انكم ما انتبهتوا للخيمة بالصورة الثانية

وكما قال بعض الربع انها لشخص لم يستطع العودة لها ومل فربما تكون هالصورة دليلا له للعودة اليها ويدعي لك بظاهر الغيب وتستاهل يابو احمد

عاشق البران99

09/10/2006, 06:40 AM

وعليكم السلام ورحمة الله وبركاته :

الحقيقة شي يحير والغريب وجود المفتاح

ومن خلال الصور يتبين ان السيارة مافيها خلاف وممكن انها تشتغل ولا أحلى ..

بعدين كأن راعيها كان يحاول يطلعها وهي مغرزة لأن الكفر الأيسر تحته أكياس شعير من القديمة والغريب كيف ما تحللت الاكياس من الشمس ؟؟

كل شي فيها لغز ......

مشكور مشرفنا صقر ،،،

Algthami

09/10/2006, 07:09 AM

السلام عليكم
صبحكم الله بالخير.........
اكيد يكون فيه لغز والغز ذا ماحد يعرفه الا صاحب السياره
وبصراحه حتي لون الوحة حمراء احتمال ماتكون سعوديه.)) الله العالم ))

المربد

09/10/2006, 07:54 AM

يمكن
اقول يمكن
انها معذبة راعيها بالصرفية والتقطيع وما صدق انها ربصت بهالرملة وقال جاءك يا مهنا ما تتمنى، وراح عنها ، ثم من ّ الله عليه وفتح غيرها واستغنى عنها.
مشكور يا ابو احمد

إبن البادية

09/10/2006, 08:27 AM

والله انها حكاية غريبة وتشد الإنتباه

شكرا يا صقر

ابو سمر

09/10/2006, 01:04 PM

شكرا لك أخي صقر

اعتقد أن فرضية ضياع مكانها عن صاحبها مستبعدة بسبب أن البدو يعرفون الصحاري جيدا ، لكن الخوف لا سمح الله هو حصول مكروه له ، خاصة فصل الصيف الحار ، وبُعد الرعاة عنه .

شكرا لك والحمد لله الذي سخر لأهل البر أجهزة الملاحة ، وأجهزة الإتصال ( الردايو والجوال الفضائي ) لكي تقل حالات التيهان وسط الصحاري أو الموت عطشا ..

مدهوش

09/10/2006, 02:39 PM

السلام عليكم ورحمة الله وبركاته

الحقيقة يا إخوان موضوعكم جميل ولي تعقيب عليه قبل ثلاث سنوات كنت أقنص بالدهنا قبال النصافي وما دريت إلى طبو علي أربع مواتر ولوحاتها كويتية وسألوني ما شفت هايلوكس موديلها 98 فقلت لهم لا فقالو تكفى إن شفتها رد خبر لراعي البيت الفلاني بالحجرة فقلت لهم طيب وعطيتهم صابري وكملت مقناصي

وبعد مرور تقريبآ أسبوعين كنت وكالعادة اقنص بالدهنا وحول المنطقة اللي يشتبه بها ان الهايلوكس موجوده فيها ومادريت إلى وأنا أشوف الهايلوكس اللي يذكرونها وكانت على حالتها وما فيها خلل إلى أنها مركوزة ركزة وتد بين عثمور إرطاة كبيرة وبين سافي ما هو صعب ولكن جلست أحلل إن السافي كان طويل وصعب يوم يغرز فيها راعيها.

مالكم بالطويلة أخذت إحداثيتها وخليتها على امل إني أبروح لراعي البيت اللي بالحجرة ولكن عطيته ركبه لأني بعد ما لقيت السيارة نادانا واحد من الربع على جرة خرب ونسيتهاز

وبعد مرور عام على هالكلام رحت لموقعها من عرظ مقانيصي ولقيتها على حالتها ولكن الزمن غيرها فقمت ونزلت السلسلة وسحبتها وأنا حمقان وزعلان ووقفتها فوق راس العرقوب لأنه فيه بيت شعر يبعد عنها 2 كيلو فقط وذهبت إليه بعد ما خليت الهايلوكس تقل مرقاب ووصل للبيت وطلع لي راعي البيت وقلطني وبعد ما كسرت الفنجال قلت له السالفة وقلت له مو معقول إنكم ما شفتو السيارة فقال؟
يا وليدي شفناها وندري وش سالفتها ولكن نبي نعطي (على لسانه) صليب درس علشان ما يحطبون من النفود وكل أهل النفود يتفازعون بهالأمور.

فأنا أقول يمكن إن هالسيارات القديمة اللي بالنفود موجودة مثل اللي بخريمة الفرت والي بمقرن الدهنا مع أم نقي واللي بغربي عرق الدخول كلها لها سوالف مشابهه للي قلته لكم أو من هذا القبيل والله اعلم

عاشق القنص

09/10/2006, 02:56 PM

هلا اخوي
اسئله تضرح نفسها
ويش كان مصير صاحب السياره؟
الدرج حق السياره فتحته او لا وادا فتحته ويش لقيت فيه؟
هل جربت تشغيل السياره؟؟
لمادا اخياش الشعير لم تتحلل ؟
لمادا انت لم تسال اصحاب بيت الشعر القريب عنها؟
هل فتحت الكبوت وييش لقيت فيه؟
فيها بانزين او لا؟
الصندوق حقها ويش داخله؟؟

واسمح الى على الاسئله الغبيه المجهوله

السمح

09/10/2006, 03:23 PM

فعلاً غريبة أبو أحمد ..

جزاك الله خير على هالخبر والأحسن إدراج الإحداثي للموقع ..

شكراً وتقبل تحياتي

مصيول

09/10/2006, 03:37 PM

عن طريق المرور رايح تعرف خبرها

بس تكفى لتنسى تعلمنا عنها ....... هههههههههههه لقافه ههههههههههه

رسلان

09/10/2006, 04:41 PM

تحصل العديد من الحالات في المزارع والبوداي بأن تترك سيارة قديمة ولو لم تكن قديمة جداً ..
إذا تعطلت منافعها أو لم يكن لصاحبها هوى فيها ...
وفي المزارع لدينا الكثير من هذه الحالات لاسيما السيارات رخيصة الثمن ( التي منها السيارة في الصورة ) ...
لذا من المحتمل أن صاحبها أهملها ولم تعد له رغبة فيها وأوقفها عند خيمة له أو حلال آنذاك وبقيت بدون حراك ...

وقد يكون لها قصة مثل قصة أخينا الحابور ..

والله أعلم ...

عافاكم الله أخي الغالي أبا أحمد على الموضوع والصور ...
جزيتم خيرا ً...

جمران

10/10/2006, 01:09 AM

والله إنها من الغرائب يبو أحمد تصدق إني قلبتها يمين يسار ولكن فيه كثير من التساؤل والحيرة :confused: :confused:

في امرها ولايحلها إلا العرب إللي حولها لعلك تجد حل للغزها مستقبلاً .

تحية لك يبو احمد على هذا السبق.

ماجلان

10/10/2006, 01:15 AM

سوبر نيسان

10/10/2006, 01:20 AM

مشكور اخوي على القصه والله يجزاك خير

عاشق البسيتين

10/10/2006, 01:25 PM

الواحد ينتبه لطريقه ومولازم يوصل للاماكن الوعره

عاشق القنص

10/10/2006, 02:18 PM

ما شاء الله عليك أخي صقر ...نصف يوم تبحث عن سياره من سيارات الحنين
صور معبره ...تشكر عليها
ما لا أستطيع فهمه هو كيف تكون السياره وخصوصا زجاج النوافذ والمصابيح الأماميه بهذه النظافه بعد أكثر من سبع سنوات ؟؟؟؟؟
http://www.mekshat.com/pix/upload/images20/mk1377_gmc2.jpg

نعم وهدا كلامي
البارح قبل مانام جلست افكر
ليه مازورها
وتالي تدكرت قصه لاحد السيارات
على طريق الاحساء رأوها محطمه وعادوا اليهم بعد ساعات ورأوها وكانها جديده

وهده ايضا
ليه اللون حقها ماراح من الشمس
ليه الى اللحين مبينه نظيفه وكان احد ينظفها
ولاحظ الشبك الى على الصندوق صدى والبدى حقها ماصدى
وليه من داخل كلها غبار ومن برا لا

:eek:

عاشق البران99

10/10/2006, 02:32 PM

ما شاء الله عليك أخي صقر ...نصف يوم تبحث عن سياره من سيارات الحنين
صور معبره ...تشكر عليها
ما لا أستطيع فهمه هو كيف تكون السياره وخصوصا زجاج النوافذ والمصابيح الأماميه بهذه النظافه بعد أكثر من سبع سنوات ؟؟؟؟؟
http://www.mekshat.com/pix/upload/images20/mk1377_gmc2.jpg

السلام عليكم مشرفنا ماجلان :

السبب في نظافتها والله أعلم بسبب وجودها بالقرب من الرمال فعند الرياح تقوم حبات الرمال الدقيقة بتظيف وصنفرة الزجاج والبدي ولو كانت البويا من النوع الحديث الرديئ لوجدتها الآن صاجة مافيها أثر للبوية بسبب احتكاك الرمال (عوامل التعرية الي تاكل الحجر) ،،،

سنكرس

10/10/2006, 04:19 PM

السلام عليكم ورحمة الله وبركاته

صراحة صورة غريبة وجهد واضح منك ياصقر لكن حسب تحليلي لهذه الصورة فإني أعتقد ان الجمس الي قالولك عنه غير هذا لان هذا الجمس حسب رأي لم يتجاوز وقوفه اذا كان بالصيف اسبوع واحد.

والي حيرني أنه يوجد بالصورة التي فيها بيت الشعر أثار مشي السيارة ومعقولة بعد كل هالسنين مااختفت هذه الاثار ؟؟1!!!!

الربذي

10/10/2006, 05:01 PM

وعليكم السلام
تصدق امرها غريب ياليت يفيدونا الاخوان هل هذة الوحات قبل عام 91 قد يكون لاحد الناس من الذين هربوا من الكويت انذاك وضل طريقه وغرس وعند العوده للكويت نسيها وقد يكون اضاع مكانها وقد يكون تاه وهلك عطشا
لكن انت الحين وضعت لاحداثيه وهناك اناس لايراعون اي شي وغير مبالين واهل طيش وبزرنه تجدهم قد عاثوا بالسياره فسادا وبعدين الاحض ان السواق غشيم مره ليش لاف الكفر ماتطلع بسهوله هكذا
لكن ليش سميت سيارات الحنين مجرد تساؤل
محبكم الربذي

مهاجر11

10/10/2006, 05:28 PM

عجيبة هذة السيارة ولو مامات راعيها من نفس الموقف تلقاه مات ناظر موديل السيارة وتعرف

مسافر1

10/10/2006, 07:07 PM

أليس هذا أثر للسيارة ؟
وهل يبقى بعد تلك المدة ؟
الأمر فيه حيرة ..
http://www.mekshat.com/pix/upload/images20/mk19047_xzza.jpg

عاشق الثويرات

10/10/2006, 07:44 PM

ياجماعة الخير على حسب علمي بالنفود انك اذا تركت الشي فترة طويلة بالنفود يندفن والسيارة مهي مدفونة
وجرة الغراز مبينة والخياش مبينة ولوحة السيارة جديدة لان لحد الحين مستخدمه عندنا بالكويت ويمكن استمارتها مومطوفة :p
والسيارة حالتها جديدة
انا اقول يمكن وقفتها صار لها اقل من السنة لان صبغتها جديدة وكل شي فيها جديد ماعدا الاتربة اللي بالداخل
اتمنى التوضيح وصل

شمالي غير

10/10/2006, 08:01 PM

ما لا أستطيع فهمه هو كيف تكون السياره وخصوصا زجاج النوافذ والمصابيح الأماميه بهذه النظافه بعد أكثر من سبع سنوات ؟؟؟؟؟
http://www.mekshat.com/pix/upload/images20/mk1377_gmc2.jpg

فعلاً امر غريب ومحير

الواضح ان السيارة لها فترة كبيره من الزمن ((مبطيه )) هنا والدليل الحفره اللي هي بها يعني واضح ان الرمل ما كان بهالمستوي يوم وقفت السياره والشيء الثاني الاعشاب اللي نابته حولها بعد ..

صقر

10/10/2006, 09:16 PM

السلام عليكم ورحمة الله وبركاته

أشكر اخواني على تفاعلهم مع الموضوع ، ولي عودة على الردود في وقت لاحق .

هنا المزيد من الصور التوضيحية لكشف بعض الملابسات التي تكلم عنها بعض الأعضاء.

::

http://www.mekshat.com/pix/upload/images20/mk1377_gmc4.jpg

::

http://www.mekshat.com/pix/upload/images20/mk1377_gmc5.jpg

::

http://www.mekshat.com/pix/upload/images20/mk1377_gmc6.jpg

::

http://www.mekshat.com/pix/upload/images20/mk1377_gmc7.jpg

أبو فراس

11/10/2006, 10:19 AM

السلام عليكم ورحمة الله وبركاته

ابواحمد توضيح في وقته وسوف يساعد ببيان موقف السيارة

يبدو ان السيارة منذ زمن وذلك واضح من الشراع البلاستيكي المتأكل وكذلك الرمال المحيطة بها والنباتات

مجرم الددسن

21/09/2010, 03:15 PM

اخوي فيه حدا الصور ورا الجمس فيه بيت شعر
مهو لأهل اليبت

ذيب-الفلا

24/09/2010, 04:56 AM

هذا شكله كان ماشي الساعه 2 بالليل وظايع :lومافي نور الا نور القمر ونور الموتر

وهو ماشي خلص البنزين :eek:ونزل يدور عأقرب مكان يعبي منه بنزين او مكان ينام فيه او
يعرف وين هو فيه:rolleyes:

وهوه يدوربالليل:c
ولا يحصل نار من بعيد:f يقرب اكثر يسمع اصوات ظحك وطبل ودق واغاني:confused:

يقرب اكثر يبي احد يساعده
لما يوصل
يناظر

مايلاقي احد:eek:

الرجال يجلس مستغرب

ولا فجأه
يسمع صوت من ورا

يقله

مين انت

يلتفت مايلاقي احد

يجيه الصوت من قدامه يقله ماجاوبتني انت مين:j

يلتفت بسرعه ولا يلاقي عبد طويل شكله شارب شي لان عيونه حمرا
اخونا بالله يعرف انه مو مننا يعني اعوذ بالله جني

يقله أأأأ أأأاناااا أأنااا أأنا انا ظايع وما ادري وين انا تكفا لاتأذيني

يقله شكلها امك داعيتلك اليوم عندنا عرس ولد شيخ قبيلتنا ومانبي تحول الفرح لقتل تفظل معانا عالذبيحه
,بس عندي شرط
انك
لما تاكل لاتسمي!
قله افا عليك ابشر

واخونا له 3 ايام مو آكل شي قال جن مو جن ابي آكل اهم شي آكل

المهم
العبد ياخد اخونا على الخيمه ولا يحصل اشكال مو زي اشكالنا وعادات مو زي عوايدنا

واكل وخير واجد

واخونا اول مايشوف منظر الاكل والذبايح يقول
بسم الله مشاء الله وش كل ذا الاكل

وهوه قال هذي الكلمه من هنا والجنانين كل واحد مسك ثوبه ومسك باب الخيمه

اخونا جلس واكل

وهذي كانت آخر الاخبار عنه وما ادري وش صار فيه بعدين
>>>>>>>>اقول تخفف دم انت ووجهك روح نام احسنلك:D

تحياتي للجميع بس حبيت اغير جو:burnout2:

ملك الفكتوريا

24/09/2010, 08:23 PM

طيب يمكن يكون مسكن للجن دامه بهالنظافة وحركة الرمل غريبة بصراحة

أبومؤيد1

02/10/2010, 01:44 PM

مشكور يا صقر
بأمكان الاستفسار بمرور الكويت عن رقم اللوحة وسوف تصل إلى الشخص وراعي السيارة
لأن رقم اللوحة كويتية ولي شاف الصوره من أهل الكويت بأمكانه مراجعة مرور الكويت
والله يحفظنا وأخواننا المسلمين من كل مكروه
http://www.mekshat.com/pix/upload/images20/mk1377_gmc2.jpg

مكشاتي الجزيرة

02/10/2010, 02:58 PM

أعجبني الموضوع كثيرا...
ارجوا من الاخوه الكويتيين التحقيق من اسم صاحب السيارة رقم اللوحه 56436 في المرور وتجيبونا اخباره ..يمكن الرجال حي ويبحث عن السيارة من زمان ...ممكن هذي السياره عزيزة على قلبه..فتكسب آجر كبير ان شاء الله...

هذا موقع السيارة في قوقل
http://www.wikimapia.org/#lat=28.39852&lon=44.1707&z=11&l=0&m=b

ابو غند0

02/10/2010, 04:51 PM

يعطيك العافيه على الصور وما قصروا الأخوان

وشكل ما لها فترة طويلة وهي موقفه...

ولد وايل

02/10/2010, 06:13 PM

الموضوع عام 2006 معقوله الى الان ما لقيتوا لها حل

اسير الغضا

02/10/2010, 07:35 PM

وش صار علمونا

أبووليد..

02/10/2010, 11:05 PM

وش صار علمونا
..................

البصراوي1

03/10/2010, 08:05 PM

غريبه جدا لكن ممكن الاخوان في الكويت يستفسرون عن مالكها طريق رقم اللوحه

السلمان2010

03/10/2010, 08:26 PM

بالفعل شي يحير والغريب حولها بيت الشعر

ديم غياظ

04/10/2010, 07:52 AM

اشكرك اخوي العزيز على هالنقل المتميز لاهنت

انا اتوقع والله اعلم ان صاحب السيارة حصل له مكروه لاقدر الله.

ماحد يخلي سيارته .

او تكون مسروقة والمنطقة القربية من الحفر ورفحاء تحدث فيه

سرقات من العابرين للحدود وسمعتو ذلك

الغريب وين الجهات الامنية عنها خاصة شرطة سامودة وم عشر ولينة .

لغز محير

تحياتي لكم

وسيع البنايد

06/10/2010, 02:20 AM

الموتر اضنه لواحد من هالبدوان الي حوله وتلقا الجمس دبل كبده بالخرابات قال خلني اوقفه في ذا المكان وابلش المكشاتيه به

والدليل انه لاهل البيوت الي في الصوره

هو ان الموتر ما تشلح الى الان وخذ العلم من وسيع البنايد

برق الجهمه

06/10/2010, 02:45 PM

اتوقع والله اعلم انها كانت موضع للاعلاف من اصحاب الحلال
وربما انتقل صاحبها لمكان اخر او باع حلاله وتركت كماهي

ام صتمه 87

06/10/2010, 03:19 PM

نعم وهدا كلامي
البارح قبل مانام جلست افكر
ليه مازورها
وتالي تدكرت قصه لاحد السيارات
على طريق الاحساء رأوها محطمه وعادوا اليهم بعد ساعات ورأوها وكانها جديده

وهده ايضا
ليه اللون حقها ماراح من الشمس
ليه الى اللحين مبينه نظيفه وكان احد ينظفها
ولاحظ الشبك الى على الصندوق صدى والبدى حقها ماصدى
وليه من داخل كلها غبار ومن برا لا

:eek:

صدى لانه موب مجلفن ..

لكن بويات السيلره مجلفنه ماتصدي ..

ام صتمه 87

06/10/2010, 03:20 PM

فعلاً امر غريب ومحير

الواضح ان السيارة لها فترة كبيره من الزمن ((مبطيه )) هنا والدليل الحفره اللي هي بها يعني واضح ان الرمل ما كان بهالمستوي يوم وقفت السياره والشيء الثاني الاعشاب اللي نابته حولها بعد ..

صادق

ماتوقع الرمل كان بهالحال ..

اسير الغضا

06/10/2010, 08:38 PM

اما لو واحد ياخذ الاحداثيه ويروح لمه

سديرآوي

06/10/2010, 10:17 PM

والله شي عجيب ويقهر ,,

ووالله جاني شعور غريب ودي اروح لهالسيارة وافتشها وافتح دروجها وتحت مراتبها ,,

واطلع الواير واسحبها لاقرب محطة واشوف العطل وان كان بسيط صلحتها ,,

وكلمت ربع لي بالكويت يشوفون منو راعي السيارة ,,

بس والله قهر قبل شهر ونص كنت بالكويت ليتني شفت هالموضوع من اول :(:( ,,

وهالموضوع والموضوع الثاني صارو ذكريات بعد ,,

هذا بـ2006 وذاك بـ2004 الله المستعان السنين تركض واعمارنا تركض وراها :(,,

راشد الجريبة

07/10/2010, 01:33 PM

الله يسمعنا خير عن راعيها واللي يمر حول المكان الله لا يهينه يمر يطفي السوتش لا تفضى البطارية :)

جبال الرّوكي

07/10/2010, 07:02 PM

أمرها عجيب ذي السيّارة , إن كان راعيها بدوي فلاهب مخليها

حاولت أشيّك ع موقع وزارة الداخلية الكويتي ولكن ما يتشغل معي لأني في الخارج

فضولي بيتعبني إلين أعرف وش قصّتها

ابوسلماااااان

08/10/2010, 12:36 AM

الله يسمعنا خير عن راعيها واللي يمر حول المكان الله لا يهينه يمر يطفي السوتش لا تفضى البطارية :)

الله يقطع بليسك
انا ابروحلها السبوع الجاي وبصورها
حلال سايب

الكونترولCONTROL

08/10/2010, 01:12 AM

بالنسبة لي حللت الوضع كالتالي ... من باب التفاؤل الحسن :
صاحب السيارة و ربعه أهل حلال ( مواشي ) , و معهم سيارات ثانية أفضل منها
و اشغلتهم هذه السيارة أكثر من مرة و هم يسوقون مواشيهم للرحيل لمكان بعيد
و تركها و ترك عليها المفتاح يمكن كان عنده تفكير يوصي عليها أحد بالجوال أو انه وصى أحد
و ما لقى مكانها و انقطعت بينهم الأخبار ... لكن ما أظن صار له مكروه إن شاء الله بما أن الطريق قريب
و لعله عين خير و اشترى غيرها ثم يفكر يبيعها على أحد الورش او التشاليح عندما يمر عليها على السعة

قزيزالنعام

08/10/2010, 10:45 PM

مرحبا بالجميع ابشركم راعي السيارة طيب وبخير قبل قليل دقيت على واحد في ساموده حربي شرواكم وقال السيارة له كم سنه واقفه ورعيها اسمه سعيدان الرشيدي من اهل الكويت ووكل عليه ابا الديبان الشمري وباعه على ابن صعب صاحب محطه الشرق الاوسط ونا منشغل معكم وخبروني رجال شروكم وعطوني الاخبار وقالت ابشركم به وشكرا