لاهل الرحلات وتزويد السيارات بالكماليات

[هاوي قصيده]

السلام عليكم ورحمه الله وبركاته

اخواني الكرام ..

اخوكم شاري له جمس حوض دفرنسين ...للشتا ..وابي اجهزه لطلعات البر والمكاشيت ...

وان شاء الله اني ناوي اجهزه بكل ما احتاجه بالطلعات ولكن لا استغني عن مساعداتكم...

واريد تكميله من والى ..

لا تبخلون علينا ...
وهذي صوره الموتر

http://www.5ymah.org/up/uploads/f51e5fd58c.jpg

[شاص]

ما شاء الله .. الله يطعمك من خيره ويكفيك شره .. في نظري من أهم التجهيزات :

1- تانكي ماء أفضل يكون ستيل بالعرض .
2- شد وطربال .
3- دعامة بعدتها .
4- جهاز ملاحة وجهاز اتصال لاسلكي (قارمن 276 وآيكوم 8000) .
5- لمبة بالكبوت .
6- بطارية إضافية .
7- ماطور هواء .
8- سلسلة أو واير قوي للسحب .
9-......

[F34666]

تصيحة بس لاتزعل مني لاني مجرب هالمواتر سواء كانت جديدة او قديمة لاتبعد عن الاسفلت وان لوحدك

[هاوي قصيده]

خوي شاص حياك الله اخوي ..

واشكرك جزيل الشكرر ..عالنقاط اللي طرحتها ...

وعساك عالقوه ...

نخدمك بالافراح :)

بس وانا اخوك التانكي ..ياخوفي يحلي ..لاني من سكان الشرقيه

والا وش رايك؟

[هاوي قصيده]

اخوي

F34666 (http://www.mekshat.com/vb/member.php?u=10243)



اول شي اشكرك عالمرور ..

وانا اخوك انا معي جيب هدد ..

وشريت هذا للرحلات ...تعرف هذا للمكاشيت اوسع تحميل ولا تخاف عليه ..

هذا اول شي

ثاني شي وانا اخوك الموتر ماشاء الله بالبر والمطاليع نشيط ..مدري يمكن لانه قير عادي ..ومركب فلاتر ...

جربته اكثر من مره ...

والتجربه هي خير برهان...وماشريته الا وانا مجرب اصلا


مشكور اخوي وعساك عالقوه

وابد وجهات نظر نحترمها من اخوان<SCRIPT type=text/javascript> vbmenu_register("postmenu_515592", true); </SCRIPT>

[طخيمان]

الله يطعمك من خيره ويكفيك شره

وهذي بعض نصايحي لك الله يسلمك

اشتراك
واير قوي
عدة متكاملة
وإذا كان ودك ترهم له تانكي ثاني (مهيب مهمة مرة)
ونش وارن 4 طن مع مكرة
تانكي ستيل 100 لتر
صدام أمامي بعدته الكاملة

وألف مبروك الموتر

[غضنفر]

و انا اخوك
خل معك طرمبة بانزين احتياطية
لأن هذي المواتر مشهورة بخراب الطرمبة
ولا تخلي التانكي ينزل عن الربع الاخير باي حال من الاحوال
و باذن الله ما تخرب

[ابـ معزي ـو]

الف مبروك السياره
وانشاء الله تغنيك عن الناس

1- شد وطربال
2- لمبه بالكبوت
3- شنطه احتياطيه تحت القزازه اللي ورا
4- تانكي ماء سوا بالحوض او عن الاستبنه تحت
5- دعامه اماميه بمعداته
6- واير او سلاسل للسحب وقت الضروره

(( من الداخل ))

1- لباست قير
2- قاعده لجهاز الكنود
3- فيش يكون له 3روس ويشبك بالولاعه لاحتيجات شحن الجوال او شبك اي شي اخر عليه
5- بس :rolleyes:


والله يعينا وياك
واذا بغيت شي ثاني انا بخدمتك

[هاوي قصيده]

اخوي ابو الطواري ..

جزاك الله خير يابعدي ...

بس عندي كم سؤال

او شي الصدام وعدته ...وش قصدك بالضبط وعدته ..ووين يركبونها.

والتانكي ستيل ....للمعلوميه انا من سكان الشرقيه يابعدي ...يعني انواع الصداا..تنصح بالفيبر مع انو يقولون يغير طعموو

والله لايهينك ياالغالي عالفزعه

[هاوي قصيده]

اخوي الغالي ..بلاك باث

حياك الله اخوي ...

وماعليك من ناحيه البنزين ..انا طبيعتي والله لو اسوق تيرسل البنزين لا نزل تحت النص يضيق صدري ..

وماقصرت يا الغالي

وربي يجزاك خير ..

ابيض وجه

[هاوي قصيده]

ياهلا ومسهلا بابو معزي ..

اسفرت وانورت..

ياخي ماقصرت والله يجزاك خير ...وحبه خشم..

اما بخصوص الكماليات ..

- شد وطربال
قصد شد عادي بطربال ..والا حنايا؟؟
2- لمبه بالكبوب
موجوده يابعدي
3- شنطه احتياطيه تحت القزازه اللي ورا
موجوده وماشاء الله تاسع كل العده عزبه الطبخ والمعاميل ودافورين ومركاتين وزوليه 3*4
4- تانكي ماء سوا بالحوض او عن الاستبنه تحت
ياخوي كلن يقول يحلي ..يصيبه صدا من الرطوبه بهالديار
5- دعامه اماميه بمعداته
ابي شرح لهالجزئيه لو سمحت
6- واير او سلاسل للسحب وقت الضروره
موجود ولله الحمد

(( من الداخل ))

1- لباست قير
ياخي عجزت القى ...اللي موجود حق لاند كروزر ...وقير الجمس اطول وماله قاعده يعني عالارض
3- فيش يكون له 3روس ويشبك بالولاعه لاحتيجات شحن الجوال او شبك اي شي اخر عليه
الموتر شد بلد فيه 3 فتحات ولاعه متتاليات
,,,,,,,,,,,,,,,,

لاهنت يا الغالي ابو معزي وبيض الله وجهك

بس ياليت تجيبني عالاستفسارات اللي ذكرتها :)

وربي يحفظكم

[تكفون]

بالنسبة للبيات القير .....

روح لأي واحد حق خيام ويقوم بتفصيلها لك .

[الحربي حاتم]

الله يجزاك خير السيارات هذي كم اسعارها الغماره والغمارتين الموديلات الجديده وكم قوة الماكينه والجربكس

[هاوي قصيده]

تكفوون ..


حياك الله اخوي ..

والل يجزاك خير يابعدي

[هاوي قصيده]

الحربي حاتم

حياك الله اخوي


اسعارهن تتفاوت حسب النظافه

فيه دفرنسين وفيه دفرنس ..

وفيه حجم 25 وفيه 15

دفرنس حجم 15 او 10 سهرا بين الــ38 الى 42 حسب النظافه


والدفرنسين حجم 15 (حوض صغير )يكون اغلى سعرها بين الـ 42 و الـ 48

ودفرنسين حجم 25 سعره بين 35 و الـ 42

وازين شي اللي واضح لك بالصور عزمه قوي 8 سلندر قير عادي 350 قوه المكينه وشبابيك تماتيك

وعساك تسلم

[طخيمان]

والله يالغالي
بالنسبة للصدام و عدته
هو صدام يكون فيه مطرقة و مسحات ومصلخ ذبيحة وشكله حلو و أنا اعرف انه ينباع عند المواهب اللي في الصناعية القديمة و ينباع في بعض ورش الحدادة في الصناعية في الرياض

أما التانكي والله ما عندي علم عن الصدأ عنها أما الفيبر أتوقع انه اذا كان للغسيل وللمواعين أتوقع ما فيه مشكله ...


وأي خدمة أنا جاهز

[شبح الصحراء]

أهم شي العده من سكاريب ومفاتيح وزراديات ... الخ ولا تنسى طفاية الحريق .
انا كان معاي جمس صحن دفرنسين وراني نجوم الظهر ونبت في شعري الشيب وأحسن ما فيه اني تعلمت الميكانيكا منه :mad: .
لا تعدي بعيد عن الزفلت إلا ومعاك سيارة ثانية .

[هاوي قصيده]

ابو الطواري حياك ربي ..

وماقصرت ..

بس ممكن اعرف كم اثمانهن ..وهل القاهن بالشرقيه او القصيم...

[هاوي قصيده]

شبح الصحراء
يالله حيه

مشكور عالمرور ..

والعده موجوده من زمان ..

<< شغل ارامكو ..

وبالنسبه للموتر ماشاء الله ...طلعت به طلعات ..وماشاء الله مريحني ...وياما بيض وجهي قدام فكسارات ونياسين

والحمد لله يارب ..ماشفت منه الا سعه الصدر الله لا يضره

والموتر حسب سواقها


لاهنت يا بعدي

[الرهدن]

الثريا00
وربع مثلكم وشرواكم فقط انحش عن القعيطي(وهو رجل غريب الأطوار يحب المال حب جنوني وعند الأزمات يظهرأبوالشباب :j )







.

[الكـاسـر]

ارفع وجه الموتر شوي
والله يبارك لك فيه ويطعمك من خيره ويكفيك شره

[هاوي قصيده]

اخوي الكاسر مشكور اخوي وعساك عالقوه

تشرفت بمرورك يابعدي حيي...

واعتقد لامن رفعت وجهه يبدى يلعب بالخطوط ..

[^-^ طير شلوى^-^]

تصيحة بس لاتزعل مني لاني مجرب هالمواتر سواء كانت جديدة او قديمة لاتبعد عن الاسفلت وان لوحدك
مثل ماقال F34666
أكثر مشاكل السيارات الامريكية وخاصة بالصحراء
الا اذا انك ( $$$ مرتكي على جبل $$$$$)
وسلامتك

[هاوي قصيده]

ههههههههههههههههههههه

حياك الله اخوي طير شلوى

وانا اخوك الموتر لا دخل قلبك ..تبيع ثوبك علشانه ..

اشكرك عالمرور ..

[رعد الجنوب]

السلام عليكم


اخوي الله يعطيك خيره ويكفيك شره ويبارك لك فيه .


اخوي بالنسبة للسيارات الامريكية وخاصة الجمس والفورد على الاسفلت خذ موتر ولكن في البر كل ما بعدت عن الاسفلت (تلفت الموتر اذا ماصار حولك احد قال هذا محلي ):) :) ومثل ماقالوا لك الاخوان لاتغامر فيه لحالك لازم سيارتين مع بعض ..بالنسبة لتانكي الماء انصحك وانصح جميع الاخوان عن تجربة طويله ان لاتركب تانكي غير الالمنيوم لايصدي وخفيف .الاستيل من تجربة وتجارب الكثير من الاخوان يصدي في منطقة الرياض وانت تقول في الشرقية الي الحصى يصدي فيها ..



تحيتي للجميع

[هاوي قصيده]

اخوي رعد الجنوب ...

اشكرك جزيل الشكر ...عالمرور

واذا هي عالمخاطره ...لو معك قلابي ...اللي كاتبه ركبك يبي يصير..

يعني سق بذوق ..ما تقول لك شي السياره


ومن ناحيه التانكي الالمنيوم ...اشكرك جزيل الشكر اخوي عالافاده ...

بس ياليت تعطيني اسامي ورش تزينها

ولك خالص الود

[هاوي الله]

لا تنسى تخلي معك طربمة بنزين + سير مكينه = احتياط ( اسبير ) &

[هاوي قصيده]

فتى البران

ياعسانا ما ننحرم منك

مشكور وانا اخوك

[المواكب]

اخوي بالنسبة للسيارات الامريكية وخاصة الجمس الونيت القطع عشرة اتوقع انه من السواق انا جلس معي الجمس استعمال امريكي اكثر من ثلاث سنوات ولا فيه مكان بالمملكة والخليج مارحت عليه عز الله انه سيارة بس الله الله بالصيانة الدورية على فكره القير تماتيك والله الحافظ وهو ارحم الراحمين تحياتي للجميع ................. كل عام وانتم بخير

[هاوي قصيده]

اخوي المواكب ..وانت بالف خير حبيب قلبي

وماقصرت عالاجابه ..

ونفس كلامي ...الموتر حسب السواق ورجله

يعني تدلعه يدلعك..

تلعن جدفه يلعن جدفك ههههههههههههههه

الجزاء جنس العمل ...ولا هنتم

وانتظر مساعداتكم لا نقدكم

[الدبل الثقيل]

هل الأيرباق ينقفل بمفتاح تحت المكيف ؟ لأن الوالد كان في أرامكو ومعانا مثله تبع الشركه 2002 على وقته.... وكانت فيه هذي الميزة والصراحه حلوه للجيوب اللي فيها ايرباق ... في البر تقفله عشان مايطلع مع اي ظربه ... والله يعطيك خيره .... وياليتك مشتري شويصان .. لكن عساه مستقبلا...

[هاوي قصيده]

حيالله الدبل الثقيل

تشرفت بك يا بعدي ..

وهالميزه انا اشهد انها جيده ..

اما بخصوص الشاص ..وانا اخوك ذا موتر شتاا..

يعني وسع صدرك ..ومريح


وماشاء الله من الحين بدوو الشعب يسومونه :)

<<يفكر يبيعه

الله يبارك بالموتر وبمواتر كل الاعضاء ..

تعقيبك على عيني وعلى راسي وانت وافي