السؤال لاصحاب القوارب !!!!!

[قرصان الجزيره]

السلام عيكم ورحمه الله وبركاته
امس كنت مع الاخ ابو سدين وتكلمت معاه في موضوع دائما يسير مع اصحاب القوارب ولكن لم اجد اي سبب مقنع !!!
انت اذا طلعت قارب ايجار مثلا 12 ساعه ودفعت 1400قيمه الرحله ومعاك معاك قروب وقدر الله واحد تعب بعد ساعتين ولازم يرجع ليه تنتهي الرحله ليه مانرجعه للسياره ونرجع نكمل وقتنا باقيلي 10 ساعات تروح هباء ؟؟ واذا كان على الببنزين مو مبرر انا مستعد ازيدك 100 ريال في حاله رجعنا احد واحسب مسافه الطريق من وقتي لاتعطيني من حقك شي اديني حقي بس اللي هو وقتي الباقي واللي الاحظه بعض اصحاب القوارب ينبسط اذا شاف احد تعب.
ياليت واحد من اصحاب القوارب يوضح النظريه وياليت يكون الكلام مقنع للي يقراه .

وشكرا

[قرصان الجزيره]

100 مشاهده ولا رد
شباب اللي يشوف كلامي خطا او عنده تعليق يقول ......

[ذوالجناح7]

أخوي قرصان الجزيرة


آنا أعطيك رأي الشخصي لأني طلعت طراد كثير لاكن مش أجار مع أقاربي


يفترض لمن تعزم تطلع رحله :-


* تتفق مع راعي الطراد على جميع التفاصيل ومنها النقطة المهمه لوتعب شخص


* لازم يكون عندك معرفة بقدرة قروب الطلعه وتحملهم


* معرفة مواقع الصيد المقصوده مقدماً علشان تكون الأمور واضحه للجميع وتكون عندك فكره عن طبيعة الوضع فيه ( البحر المفتوح ، قرب جزر ، قريب ، بعيد )


علشان مايصير ظلم للجميع في ( بعض ) أصحاب طرادات الله يهديهم ماخذ الشغله تجاره بحت



وأعتقد من أهم أسباب أن صاحب الطارد يبي يرجع في أقرب فرصه


* بعض القروبات تكلم صاحب الطراد تبي تطلع وبس مهما كانت ضروف الجووو


* بعض القروبات تتعامل مع صاحب الطراد كنه سواق تكسي بدون أحترام


* تملل القروب من وضع الصيد والمطالبه بتغير الموقع بشكل متكرر ( بعض المواقع تحتاج صبر )


* تغير وضع الجووو أو أحساس الربان برتفاع سرعة الريح وبالذات في المياه المفتوحه والبعيده يمكن يصير طريق الرجعه بدل ساعه ونص يصير أربع ساعات (وهذا حدث معانا مرات )



إن شاء الله أكون قدرت أوصلك الفكره


تحياتي أخوك / بوحبيب

[عاشق البحرE]

عليكم السلام و رحمه الله و بركاته أخوي قرصان الجزيره ..

كلامك في السليم ... و هذا حقك .. بس اصابعك مو سوا ...

رد اخوي الغالي ابو حبيب مقنع و مفصل ..

اتفاقك مع صاحب البوووت هذا عين العقل .. عشان ما يستغلك او يعطيك قوانين من راسه ,..

انا صاحب بوت و عمري ما أخذت فلوسي الا بعد الخروج من البحر .. الثقه و الحمد لله موجوده .. و صارت لي بعض المواقف مع الزباين و الحمد لله أحاول اكون عادل .. و بالنسبه لأي رحله انزلها للزباين قبلها اكون مشيك حاله الطقس و ارتفاع الموج .. كنت سابقا احذر الزباين من النزول لو كان في موج عالي .. و بعضهم يصر على النزول و يقول لو انه طوفان بدخل البحر و في الاخير يندم .. و الأن ما انزل مع الزباين الا في حاله الموج المتوسط مع تحذري لهم قبل الرحله ..

و لو صار اني قطعت مسافه طويله داخل البحر لا تقل عن 30 كم بتكون في صعوبه كبيره اني ارجع للفرضه و انزل احد و ارجع مره ثانيه 30 كم .. مو عشان الفلوس عشان الجهد الكبير و خصوصا اذا كان الموج متوسط و السرعه للطراد خفيفه ..و لو برجع مثلا ما راح ابعد كثير انزل الشخص و أوديهم مسافه قريبه يكملون الوقت الباقي ..




اخوي قرصان الجزيره افضل حل انك تتفق مع صاحب البوت قبل النزول ..

[( ابو سدين )]

مساء الخير اخوي عبدالعزيز
مثل ما ذكرت انه تكلمنا حول الموضوع هذا خلال الرحله. وانا اعطيتك مثال بسيط و انت ما اقتنعت راح اذكر المثال هنا و نشوف رائي الشباب.
لنفترض انك ركبت مع صاحب ليموزين و طلبت منه ينزلك من الطايف الى مكه. وفي نص الخط تذكرت انك نسيت جوالك او اي شي مهم، وطلبت من الرجال انه يرجع لاجل تاخذ غرضك وترجع تنزل لمكه! ! !! انت جاوبني وش بيكون تصرف صاحب السياره. هل بيرجعك بلاش؟ ولا بيحسب عليك حق مشوار جديد.

مثل ما ذكر اخونا ابو حبيب. اعضاء القروب مسؤليتك وتخذير صاحب القارب من اي احوال جويه سيئه لابد ان يأخذ في الاعتبار والا سيكون الامر تحت مسؤليتك.
حدثت معي وتم تحذير القروب من سوء الاجواء لكن كان اصرارهم اكبر وفي اعتقادهم اني ابالغ في الموضوع. والنتيجه 3من 7 اشخاص اتسدحوا و طلبوا الرجوع.
هنا الامر خرج من نطاق مسؤليتي وصار في مسؤليتهم.
اتمنى تكون وصلتك الفكره

[makkawi_f]

وعليكم السلام ورحمة الله وبركاته
يعطيك العافية قرصان على طرح الموضوع
وجهة نظري ان ياخذو الشباب حقهم برحلتهم في الساعات اللي اتفقوا عليها خاااااصة اذا كانت مثل ما ذكرت ساعتين من اصل اثنعشر ساعة
لما يكون فيه هوا وأمواج من الطبيعي تلقى واحد أو اثنين أو كل اللي في القروب يتعب وما يقدر يستحمل الجلسة أبداً في النهاية اللي طالعين معاك بشر واذا ماهم متعودين يطلعون بحر بكثرة هذا مهو ذنبهم ولا التعب بارادتهم
طيب ايش ذنب الباقين ؟؟!!
الحل في نظري سماحة صاحب القارب قدر المستطاع وخلي الرجوع على المرسى آخر الحلول وابعد عن الظهار والأمواج وحاول ترسي البوت في منطقة خلف كسارات ساعة زمان يرتاح اللي معاك او ينزل البحر يسبح شويتين وراح يكون وضعه أفضل بكثير من جلسته في مرجيحة وتلعب راسه وتخض في بطنه خاصة منطقة ذهبان تشتهر بكثرة الجزر البحرية لو نزل رقد ساعة زمان راح يتعدل حاله بإذن الله وبعدها يكملوا رحلة صيدهم
اعرف بعض أصحاب القوارب من أبحر يعطيك حقك من الساعات ولما يتعب احد يرد وينزله ويرجع يكمل حق الشباب الباقين
طبعاً فيها خسارة بنزين وزيت وتعب غير الوقت اللي يضيع في الروحة والرجعة لكن همه يرضي الشباب الباقين والله يستر على التعبانين
وبكذا يكون كسب العملاء بشكل شبه دايم حتى لو طلعو في السنة مرة وحدة لكن رضاهم عن سماحة صاحب البوت تخليهم يهتموا في الرحلة معاه ولا يدورا غيره

[قرصان الجزيره]

اشكر مرور الشباب مقدما...
مكاوي كلامك اشوفه عين الصواب من وجهه نظري واشكر مرورك الكريم .
الكابتن ابو سدين انت ضربت مثال بعيد جدا لا تنسى انك راكب الليموزين بالمشوار مو بالساعه يعني اكيد بينحسب مشوار ثاني لكن لو مستاجره بالساعه والله ليرجع ويجيب الجوال غصب عليه
معطيك مثال احسن من مثالك : لو انت ركبت ليموزين وقلت مشيني اربع ساعات واخذ 500ريال وطلعتو وبعد ساعه تذكرت انو جوالك بالبيت وطلبت انو يرجعك وراح وداك للبيت وقالك انزل معاد لك شي !!! بتسكت وتطلع البيت تنام ؟؟
حدث العاقل بما يعقل ياخي كل واحد يحاول يبراء ذمته من حق الناس ليرزقه الله من حيث لايحتسب انا ما اقصد احد بكلامي بس كثير ماتسير من اصحاب قوارب . سبق طلعت مع واحد ووصلنا خفر السواحل مارضيو ينزلونا البحر لان بطاقتي منتهيه على الرغم اني طلعت فيها كذا مره قبل وهي منتهيه ولا احد هرج وطحنا في عسكري مايقدر وخرب الرحله رجعنا للسقاله ولا كملنا نصف ساعه قلت ابرضي صاحب القارب اديتو 300 ريال رفض قلت امر كم تبي قال ابي حقي كامل !!! لاخسر بنزين لاتعب لا لا لا على وش 1200 تاخذها ؟؟ هذا انسان يخاف الله ؟؟ والله اديتو ظهري ومشيت واسمعو يهلل يقول تراها في ذمتك يعني ياافشخك ياتراها في ذمتك حلال عليه وحرام عليه اتقو الله ياناس...
اسف على الاطاله وشاكر مروركم

[wafi6556]

السلام عليكم
الـ12 ساعه المدفوعه من حق المستأجر
واذا جد جديد بالبحر مثل ماتقولون واحد تعب وباقي من الوقت عشر ساعات...راعي القارب يعيد النظر فالدراهم واكل عياله
وياصاحبي قرصان البحر ان سمحتلي
صاحبك راعي القارب والعسكري اللي رجعكم عشان مشكله عندك
ترى حقه صدق يوم يقول في ذمتك وتدفعها الآن ابرك لك من بكره
انتو حاجزينه يوم وضاع اليوم عشان مشكلة بطاقتك
ان سمح لكم بطيب نفس ولا حقه عندك

[g h r e b]

المتفق عليه 12 ساعه هنا انا كزبون لي 12 ساعه بحر

رجعت وقفت نزلت طلعت وقتي 12 ساعه حتى لو الجو صعب والمكان بعيد

من حقي اطالب باي شي

والشباب ضربوا مثال بسائق الليموزين وهذا غير منطقي ابدا
فمشوار الليموزين يقاس بالمسافه واتفق عليه كذلك ومن نسي جواله يدفع الفرق

اما سائق البوت فتم الاتفاق معه بالزمن 12 ساعه
لكن انا مع من يقول

ان يتم كتابة عقد رحلة توضح لصاحب البوت والزباين حقوق كل طرف للاخر

فلو فجأة قلب البحر واضطر القروب للعوده

فعلى صاحب البوت قضاء بقية الوقت بالمرسى ان امكن او تعويض القروب بخصم قيمة الوقت المتبقي
من القيمه

يا اخوان كل الرحلات البحرية تتم وفق الزمن

ولكل وجهة نظره ونحترم وجهات نظركم

انا مع الاتفاق قبل الابحار على كل التفاصيل

فحرام انا اكل 1400 وبسبب هيجان البحر تطلع رحلة القروب ساعتين

طيب حقهم لو افترضنا انها بسبب طبيعة البحر

اما سالفة ان صاحب البوت حذرهم فليس لها اعراب ابدا

هو سائق فاهم لعمله مستثمر في نفس الوقت

ولو حدث خطر سيعود ادراجه بدون مشورتهم

والعقد شريعة المتعاقدين

[قرصان الجزيره]

الاخ wafi6556 : لاتنسى اني وفرت للرجال البنزين + الزيت + المجهود + الوقت ولو طلب 600 ريال والله لاعطيه لاكن مو منطق ياخذ 1200 في حاجه تكنسلت . في ناس تاخذ عربون مبلغ لايذكر واذا حصل اي شي وتكنسلت راح العربون وانت لو تفكر فيها المشكله من العسكري مو مني وش دخل خفر السواحل في البطاقه منتهيه والا لا عنده اثباتي فيه الصوره بعدين بطاقه احوال مو اقامه ^_^
شاكر مروركم الكريم

[ذوالجناح7]

حبيت أقدم شكري لأخوي قرصان الجزيرة على طرح مثل هذا الموضوع الشائك


مداخلة أصحاب الطرادات مثل أخوي الغالي الخلوق عاشق البحرE بوعبدالله و أخوي أبوسدين وهو معروف للجميع بتقديم المساعده ورجال فزعه ، مهمه جداً وإن شاء الله نشوف ردود لباقي الأخوان من مالكي الطرادات :good2:


وآنا في السابق كنت صاحب طراد لاكن ماااا أطلع أجااار للحبايب فقط


الحل :- آنا أعتقد أن الحل صاحب الطراد يعمل دفتر إتفاقية فيها جميع التفاصيل من و إلي
يطلع عليها المستأجر ويوقع ويعدها ياخذ نسخه المستأجر وبعدها يكون كل شي واضح للطرفين ومحد يزعل


أما نترك الأمور المفروض والمفروض كل واحد يشوف روحه أن صح وبعد الأتفاق كل النقط على الحرووووووف


والسلام


وبالتوفيق للجميع وإن شاء الله الكل راضي



تحياتي للجميع أخوكم / بوحبيب

[تاري الرايس1]

والله ياذو الجناح7 هذا عين العقل هذا المفروض حتى كل الطرفين يعرف اللي له واللي عليه

[محمدالنهدي]

والله ياذو الجناح7 هذا عين العقل هذا المفروض حتى كل الطرفين يعرف اللي له واللي عليه

[برهوم جدة]

السلام عليكم . لا اخص احدا بما اطرحه لا من اللي ردوا قبلي او من سيردون بعدي حتى لا يقول احد انني اقصده ، انما هو كلام ارغب من وراءه التوفيق للاستمتاع بمتعة البحر دون فقدان الثقة ، فان كان فيه فائدة وحبيتوا تأخذوا به او طنشوا .

اخواني الاعضاء . كفيتوا ووفيتوا . بارك الله فيكم . الحقيقة ان كثير من الافكار راح يتم طرحها ، واود ان اقول ان البحر متعة يا اخواني وسلا وراحة ، وكل ما كان فيه تشدد زائد انقلبت الى عملية تركيز من المستأجر على المؤجر وكذلك المؤجر على المستأجر وخذلك بعدها .. حقي .. وحقك .. وتنقلب المتعة الى تعاسة :eek:، الا ان الموضوع بكل سهولة كالآتي :):
1- الاتفاق على عدد الساعات مثلا 12 ساعة = 1200 ريال (اذن كل ساعة بمئة)
2- المؤجر يضع حد ادني مثلا النصف 600 ريال (في حال طلب المستأجر الرجوع حتى لو ان المستأجر ما جلب الا ساعة ). ما معناه انه سيكون على علم بانه سيدفع النصف ، فبالتالي يكون المستأجر يأخذ قراره من عند المرسى اما انه يدخل البحر او انه يقول ما ابغى ويا دار ما دخلك شر).
3- عدم احتساب مشوار البدء والانطلاق من المرسى الى جهة الصيد (وهذا فقط في البداية) واما التنقل بالقارب بين الطروح فهو ضمنيا محسوب بدون جدل.
4- مسئولية الاجواء :lهي وبصدق تخص راعي القارب أي المؤجر لان المؤجر هو الاخبر والادرى بالرياح او الامطار ، وكذلك الارجاع من قبل سلاح الحدود لان المؤجر يعلم بانه حتى لو خرج يصطاد لوحده فانه قد يتوقف من قبل طراد سلاح الحدود :good2:ويطلبون الاثباتات عنه وعن القارب وتصريح الخروج ويتواصلون مع القطاع الذي يبتع له القارب.

ملاحظه لأخواني المستأجرين : يفترض ان لا تخرج الا البحر الا بعد ان تكون لديك معلومات بحرية وتطلع على اوضاع الاجواء خاصة في ظل توفر تقنيات ومواقع عن الارصاد كثيرة جدا ، كما انك لابد ان تتعرف على الاسباب للدوخة والتعب في خروجك للبحر. وحقيقة ان كثيرين والله متدينين المال دين ليشتروا بها هذه القوارب لطلب الرزق والاهم من هذا وذاك .. سماحة النفس ، فهذا بحر ولا تدرون تعودون او لا .

ملاحظة لأخواني المؤجرين : المال انت تجيبه وليس هو من يجيبك ، وقد ترفض خرجه بناس للبحر والله يعوضك احسن منها وقد ينجيك الله من شيء ويريد الله بك خير ان رفضت اصطحابهم فيجب عليك ان توضح لهم بان الاجواء في البحر متقلبة عكس ما هو على اليابسة (البر). وكذلك تقول لهم انه في حال داخ وتعب واصبح ينوح من التعب ، فانك سترجعهم والمال لك (يجب ذلك لأنك ما تدري هل الذي تعب او تعبوا ممكن يتفاقم عندهم التعب الى مرحلة فقدان الماء بالجسم او ارتفاع او انخفاض بالضغط ، وهذا هو الظرف الذي يجب ان لا ينتظر المؤجر فيه رأي المستأجر لأن المسئولية على المؤجر خاصة اذا كان غير مخصص للتأجير (وهذي كارثة كبيرة). والاهم من هذا وذاك .. سماحة النفس ، فهذا بحر ولا تدرون تعودون او لا .

اساتذتي الاعزاء الاعضاء .. العقد شريطة المتعاقدين فلا مانع من ان تكون هناك ورقة اتفاق ( على حد علمي ان هناك اوراق تحرر في ابحر ببعض المراسي ان لم تكن جميعها ، لكن قد لا يستطيع عملها كثير من المؤجرين لان قواربهم غير مخصصة للتأجير) ، وعملية عقد الاتفاق ليس فقط لحفظ الحق المالي للطرفين ، بل لكي لا تزهق روح بسبب سمك تستطيع ان تشتريه ، واسمع من بعض المؤجرين والمستأجرين قصص عناد ومشاكل تحصل في الابوات وقد تكون بين المستأجرين انفسهم على الرجعة وإلا الاستمرار بالصيد ( وان كانت نادرة ) الا انها خطيرة وما احد يدري عن ما في الانفس.

اخيرا ارجوا من الله التوفيق لنا جميعا ويرزق المؤجرين والمستأجرين كل خير . ارجوكم اخيرا ان تدعوا لاخوي عبدالعزيز بالرحمة حيث توفاه الله الاحد الماضي والسلام عليكم

[قرصان الجزيره]

اخي برهم جده : احسن الله عزائكم ورحم الله ميتكم واسكنه فسيح جناته والحمد لله على كل حال.
تشكر على الطرح الجميل انت والاخوان ولكن لم يصل احد للهدف المطلوب ...
انا ماعندي مشكله في المبلغ انا مشكلتي في الوقت اللي باقي . يقولك اذا رجعنا للمرسى ماعاد اقدر اطلعكم الا اذا تدفع حق رحله ثانيه ؟؟ ادري مو من حقي استرد شي من المبلغ . لكن ليه مو من حقي اكمل وقتي ؟؟؟ هنا نقطه البحث ( البنزين مو مبرر من حق السواق ياخذ حق البنزين في حاله رجعنا احد ).

[ذوالجناح7]

أخوي برهوم جدة عظم الله أجركم واحسن الله عزاكم


متابع.........:s

[محمد متعب]

12 ساعه 1400 ريال ايش المشكله في انه يرجع طالما اني حاجز ودافع حق 12 ساعه ؟؟ يعني لو احد منهم تعب بعد ساعه وحده خلاص تنتهي الرحله مو معقول وكيف يقبلها على نفسه صاحب القارب واذا المساله بنزين يعطوه حقه اما انه ينهي الطلعه هذا ظلم .والله لايؤمن احدكم حتى يحب لاخيه مايحب لنفسه

[الاسامي خلصت]

السلام عليكم
اخوي برهوم جدة احسن الله عزاكم وغفر الله لصاحبكم

[( ابو سدين )]

اخي العزيز ( برهوم جده ) احسن الله عزاكم و عظم الله اجركم و غفر الله لموتنا وموتاكم و ادخلهم فسيح جناته ,,, امين امين امين.

مداخلتك بصراحه مثيره جدآ للاعجاب. محايده 100% و انا اتفق معك فيها و اتمنى انها ترضي جميع الاطراف.

تحياتي و احترامي لك

[محبوب جده]

اسمحولي ابدخل معاكم في الموضوع انا صاحب بوت وأأجر بوتي في الطلعة الوحده يكلف رايح لابو مدافع راجع مع شوية مجرور على الطريق واوصل والتانكي فاضي وتقريبا طلعاتي ثلاثه طلعات في الشهر
220 لتر بنزين ب 120 ريال تقريبا + اربعه علب زيت 1 لتر العلبة ب 15 يعني 60 ريال
+ 20 ما بين مويه وثلج للطلعة هذي 200 ريال لطلعة الوحده
+ اجار موقف في الشهر بـ 500 ريال شهريا نحسب ثلاثه طلعات بمتوسط 180 ريال للموقف
+ صيانة القارب الشهريه يحتاج من 200 الى 500 مستهلكات نحسب 100 ريال لكل طلعة
+ متوسط 150 ريال تقريبا أدوات صيد في الشهر + 50 ريال مصاريف شخصيه بنزين سيارة وأكل
200+ 180 + 100 + 150+ 50 = 680 ريال تكلفة الطلعة الواحدة تقريبا علي ك مؤجر وبوتي اصغر من بوت ابو سدين وابو سدين ماشاء الله خبرة في المجالب
وعلى شغلة انه يطلع المستأجر ساعتين مشكلته هذي لو يقضيها في الخور دامه اخذ مني الرحله 12 ساعة
وحتى لو ساعتين طلع بشرط اني ما طلعت مجلب بعيد وخسرت خسارتي في البنزين والزيت احاسبه على الساعه اخذها منه بـ 250 لساعة اذا اقل من اربعه ساعات اذا اكثر بـ 200 لساعة
وخذ هذي القصه واحكمها انت :-

مرة طلع معاي مستأجرين وقلت لهم يا شباب الوضع سئ في البحر سرعة الرياح 28 كم في الساعه اذا دخلنا

بتدوخون أصروا علي الا ندخل ولا بنروح نستأجر من ابحر

دخلت البحر والموجه عالية ما كملو اربعة ساعات الا وبدت الوان الطيف بدت تتضح معالم بدى الاول

وبعدهـ الثاني والباقين يضحكون عليهم شوي الا كل واحد يجاوب من جهه:looney: شفت جميع الوان الاكل الي اكلوهـ قبل الرحله :Dأحمر واصفر وشطة كريستال وكتشب شكلهم ضاربين مندي ومارين يحلون عند ماكدونالد تحلحلت صررهم في سطح البوت

فقررت ارجع


بحكم انهم اقرب للميتين 7 متسدحين والبروسي كل شوي يفك مع قوة الهواء رجعت فيهم

ووقفت في منطقه يخف فيها الموج كملوا 6 ساعات وقلت لهم رجعنا ورجعت للمرسى جاني خويهم ويقول لي حسابك 400 ريال ليش

طيب كذا قال احنا ما صدنا ورحلتنا هوا وساعة الطلوع والرجوع مي محسوبه وجلس يحسب معاي

وجلس يناحلني مع اني حاسب له الساعه بـ 125 وكان الاتفاق على 12 ساعه وهم جلسوا 7 ساعات وعليها

تقريبا وحط خمسميه ومشى 2 من الجلبان والباقي الي ملخبط والي تاركينه بلعفه في البحر

نص الرصاص والسنانير منثره

خسارتي معاهم في طلعتهم اكثر من القيمة الي عطوني هي عشان كذا صار المؤجر يبي

ياخذ حقة اول وطلعة كامله ويريح راسه من المناحله مع المستأجرين وأعتذر عن الإطالة

[عاشق البحور]

اخي برهوم جده : احسن الله عزائكم ورحم الله ميتكم واسكنه فسيح جناته يارب العالمين ..

[fisher jeddah]

أولا السلام عليكم ورحمة الله وبركاته


لتشعب الموضوع قلت لازم يكون لي صوت لأنها صارت لي نفس الحكايه لي مره مع راعي بوت ..

أولا الدين المعامله والله كل تعاملي مع اصحاب الابوات يكون على بينه .. لكي لا اظلمه ولا يظلمني والحمدلله كثير من اللي اطلع معاهم صارو يخفضون بالسعر لاجل نطلع ..

ثانيا..
بخصوص مداخلة اخونا الغالي أبو سيدين ومثاله " التاكسي " أخي الكريم انت في موضوع سابق لك "الرد على بعض الاستفسارات من بعض اخواننا المكشاتيه " ذكرت انه تكاليف القارب تفوق 100 الف وانه السعر عادل .. فردو عليك بعض الاخوه بمثال الليموزين وانه لو كان معه كامري 2012 او هونداي 2009 فيأخذو سعر المشوار نفسه .. فهي نسبه وتناسب .. من حق المستأجر ان يستمتع بالساعات الكامله المؤجره له ومن حقك ان يتتم محاسبتك حسابك كاملا ..

بدون أن يتم الاتفاق على هذه النقطه رعاكم الله .. لكن فلان راعي بوت تم استئجار البوت منه لمدة 12 ساعه تم الطلوع خلال ساعه شخص منهم تفاقم عليه الدوار ورجعتم للمرسى فهل يتم هضم حقه بـ الـ 9 الساعات المتبقيه ؟ ماهو العذر المناسب هنا .! اذا كان البنزين هم مستعدين للتعويض واذا الزيت هم مستعدين .. فلا يحق لك رعاك الله ان تهضم حقهم الكامل ولا يحق لهم ان ينقصو من المبلغ او لا سمح الله وحدث فيتم حسم مقدار الساعات من المبلغ وصلى الله وبارك..

" معلومه " إذا تم ابلاغهم من قبل ان الاجواء لا تساعد واصرو على الطلوع فهنا لصاحب البوت حق في أن لا يرجع لهم شيء

[قرصان الجزيره]

محبوب جده : حياك الله كلام جميل لكن ابتعدت شوي عن نقطه البحث انا معاك انو من حقك تاخذ حقك كامل قبل الرحله لكن اذا قلت لك ارجع للمرسى بننزل واحد قدر الله عليه بضرف قاهر او تعب لازم يرجع واحنا نرجع نكمل وقتناوبعطيك حق البنزين والزيت. وش راح تكون رده فعلك ؟؟
( مثلا قبل يطلعو معاك الشباب تقولهم ياشباب 12ساعه بتكلفكم 1400 ريال وفي حاله لاقدر الله حصل ضرف ورجعنا للمرسى وبترجعو تكملو وقتكم تدفعو 150 حق البنزين والزيت ولو مابتكملو مايرجع لكم شي من القيمه ).

fisher jeddah : كلام منطقي وتعليق جميل والاجمل من كذا مرورك :)

ياشباب انا والله مانزلت الموضوع هذا من باب مناحله علشان حقي وحقك لاوالله لكن بصراحه سرنا نجبر الشباب اللي يتعبو على الرحله كامله وبعضهم يخرب الرحله وبعضهم يقول مستعد ارجع لكم قيمه الرحله بس رجعوني وبعضهم تحس كبده بتخرج واجلسه 12 ساعه ليه ؟ اصلا كيف تحس متعه في الرحله وجنبك واحد تعبان ؟ في ناس يكلموني يبون يطلعو معاي رحلات واصرفهم علشان لايتعبون لاقدر الله واخسر على الفاضي والسسب قانون بعض اصحاب القوارب اللي مدري من وين جايبينه .
وشكرا...

[محبوب جده]

محبوب جده : حياك الله كلام جميل لكن ابتعدت شوي عن نقطه البحث انا معاك انو من حقك تاخذ حقك كامل قبل الرحله لكن اذا قلت لك ارجع للمرسى بننزل واحد قدر الله عليه بضرف قاهر او تعب لازم يرجع واحنا نرجع نكمل وقتناوبعطيك حق البنزين والزيت. وش راح تكون رده فعلك ؟؟
( مثلا قبل يطلعو معاك الشباب تقولهم ياشباب 12ساعه بتكلفكم 1400 ريال وفي حاله لاقدر الله حصل ضرف ورجعنا للمرسى وبترجعو تكملو وقتكم تدفعو 150 حق البنزين والزيت ولو مابتكملو مايرجع لكم شي من القيمة )...
ارجعة للمرسى ولا اخذ منه شي اذا جات على ردة فعلي انا
وانت كذا حكمتها بالي يرضي صاحب القارب والمستأجر اما انه يرجعك للمرسى وياخذ فلوسك هذا اسمحلي نصاب

والاصل فيها انها تحسب له ساعة كساعة الصيد بالمجرور وعشان اوضح لك اسعار البحر بخصوص جده وذهبان بحكم اني اشتغلت واستأجرت واجرت منها :-
أبحر الشمالية :-
1- طلعة صيد من ابحر سعر الساعة فيها من 200 الى 250 ريال
2-طلعة رحلة كامله من ابحر 8 ساعات في حدود ال 1400 الى 1600 ريال
3- ساعة الصيد بالمجرور من 250 الى 300 ريال
ذهبان :-
1- طلعة صيد من ذهبان الساعه من 125 الى 150 ريال
2- طلعة صيد من ذهبان 8 ساعات في حدود 1000
3- طلعة صيد من ذهبان 12 ساعة من 1200 الى 1400 ريال
4- ساعة الصيد بالمجرور من 200 الى 250 ريال

* رحلات الصيد الكاملة ال 12 ساعة لا يحق للمستأجر المطالبه بأي مبلغ متبقي له ولو

انه طلع ساعة واحدة ورجع

فأنت كمستأجر شوف هذي القائمه واصحاب القوارب سمحين ترى ينزلون اكثر من هذي

المبالغ وبعضهم والله ينزل ل 800 و 900 لل 12 ساعة اذا وجد شباب متعاونين

في حالة الاتفاق مع صاحب القارب بالرحله له الحق كامل بأن يأخذ مبلغ الرحله كاملا

كرحله

واذا كان الاتفاق بالساعة لا تحاسبه بأكثر من حقه

[accentkool]

المفروض صاحب الطراد ماينهي الرحلة عشان شخص تعب ولا شي
انا دافع قيمة ال12 ساعة انا معاك لين تخلص الاتفاقية

[م/عبدالله]

موضوع هادف وحوار شيق واذا خرجتم بنتيجه
واتفاق يخدم الطرفين .... كونكم مستأجرين
واصحاب قوارب ... لن يكون هناك اشكاليه
فيما لو كان اتفاق معمول به وثابت وكلا يعرف ماله وماعليه

[مغزول]

ماشاء الله تبارك الله
كل واحد فيكم كاتب رد حسيته خطبة الجمعه مابقي الا الدعاء في اخر الرد
هي الشغله واضحه ..
اذا انا طلعت مع قروب ودافع 300 ريال قطتي وواحد تعب خلال ساعتين رجعنا عشانه.؟
يعني اخسر 300 ريال عشان واحد تعب ورجعنا عشانه ؟
والله ترجع فلوسي ريال ينطح ريال ولا لي شغل اهم شي اقضي 12 ساعه حسب الاتفاق
من بدايتها اتفاق على كل صغيره وكبيره قبل الرحله ^^

[غوااص رابغ]

انا صاحب قارب لاكن ما ااجر..

لآكن لي رأي في موضوعكم انا اشوف مهما كانت مدة الاتفاقيه 12 ساعه او 24او8 ..

موضوع اني اضرب مشوار للمطرح واقعد فيه ساعه او ساعتين ويتعب عندي واحد من المستأجرين

ارجع انزله وانزل اللي معاه واخذ قيمة الساعات اللي جلسته بالمطرح ومشوار الرجعه

انا انزلهم كلهم لسبب واحد لان الطلعه طعمها وحلاوتها اذا كانت الروحه وحدا مو ارجع للمرسى واضرب مشوار ثاني للمطرح..

البحر يبغاله تركيز وعقل ... يمكن كلامي هذا ما يحس في المستأجر لانه مريح يطقطق بالجوال ومايعرف ظروف البحر وتأثير طول المشي على الموآطير خصوصا لو كانت فيه موجه..

[عجااااج]

اخي العزيزانا صاحب بوت ولا تهم الفلوس بكث الوناسة والمتعة


بس بصراحة الرجوع وتنزيل احد ومن ثم عوده ولله صعبه وخاصه لما تكون بعيد وحصل معي عدة مرات ونا طالع بدون اجره والعكس ولاكن تصعب العوده للبحر حسب الاجواء وذا عدة لاتكون بنفس المسافة اللي رجعت منا لانها مجهده حقيقه ويمكن ما يعاني منها الا سائق البوت والمخاطر ونا اتكلم عن موقعي من كثر الشعب لاني بالصورة وهي معروفه ولو الجهاز معك احيانا تفقد التركيز ولله الاسبوع اللي فات بعز الصيد قبل المغرب وكنت مخطط على سهره احد الاصحاب
تعب وطلب النزول وخاصه من يصاب بدوار البحر ولم يتوقف الغثيان تضطر للخروج
عموما طلعت ابي انزله وارجع بمجرد رسيت قلت للي معي انزلو ونزلو اغراضنا مافيني رجعة احس اني شايل البوت على ظهري والحمد لله اللي معي اصحاب


ارجع للموضوع لو حصل ماذكرت ولم استطع العوده ولله الا ارجع الفلوس واخذ اقل من نص المبلغ لانه ماهو من حقي وهذي وجهت نظر تخصني ولالي علاقه بغيري


اتمنى التوفيق للجميع

[أبوحافظ]

تشكر اخي على الموضوع

ومع الاسف الاختلاف في وجهات النظر مستمر ما بين المتنزهين واصحاب القوارب

والسبب لعدم وجود اتفاقيه تحكم بين الطرفين صاحب القارب والمتنزه

فلو وجدت اتفاقيه معينه موضحه كافه البنود من ,,, والى

مثال على بنود معينه :

هل يشمل توفير عده الصيد والطعم والمشروبات والثلج وخلافه ؟
في حال العوده لسبب سوء الاحوال الجويه يعاد جزء من المبلغ او لا يعاد ؟
في حال رغبه احد المتنزهين بالعوده هل تلغى الرحلة كامله او يتم زياده قيمه الايجار و و و
هل يحق لصاحب القارب الصيد او لا يحق له
وهل يساعد المنتزهين بالصيد او لا

هذي مجرد امثله تضع النقاط على الحروف وتقطع جميع الخلافات

اما بدون اتفاقيه وشروط وعقد ما بين المتنزه وصاحب القارب فسيكون هناك المزيد والمزيد من الخلافات ولن تحل الامور

لان صاحب البوت اللي يقول انه يترك اهله 12 ساعه والمتنزه نفس الشي بيقول انه ترك اهله 12 ساعه وطلع قارب

فاتمنى ان تكون هناك اتفاقيه وعقود تحكم ما بين الاثنين يفترض ان يوفرها اصحاب القوارب

وتحياتي للجميع

[SNIPER07]

بسمه تعالى

اخي/ برهوم جدة

احسن الله لكم العزاء و اسكن فقيدكم واسع جنته

اتفق معك و عين العقل

لا تطلع من المرسى الا عارف اللي لك و اللي عليك


تحياتي