يقولون ما للعبد بد عن المقسوم للشاعر

[تكاشف ابروقها]

يقولون ما للعبد بد عن المقسوم= وأنا أقول صح ويقنع العبد مقسومه

عسى الله يعين اللي توافد عليه إهمـوم = هموم تخلي طبلة الراس منجومه

ترى والله انه مايكدر عليك النوم = سوى كلمة من بعض الاصحاب مسمومه

إليا جت من الغالين وإلا الرخوم رخوم = ولا أمحق من الغالي إليا شانت علومه

ضعاف الروابع تبتلش والقروم تشوم = ولاهي بلا شيمة ٍ من الشيم مليومه

ولا أزين من القاع الخلى والوجيه سلوم = ولا رفقة مع طول الايام ملغومه

ولا ألذ من عشرة شريف من أقصى القوم = يبادلك فعل الطيب معناه وسلومه

ولا شفت في جو الصداقه غبش وغيوم= عطيت الدروب اللي مع الارض مرسومـه

ولا مثل عز النفس لو مامعك مطعـوم= وعن أهل الشماته خل الاسرار مكتومه

معي لو سمحت شوي عقب عداك اللوم= أبعطيك عن بعض الرجاجيل معلومه

ترى اللاش لو وقف معك في حياته يوم = تشوف الردى متبين فيه من يومه

وأنا أقول لو إن في وجيه الرخوم وسوم = عرفنا نميز قيمة النذل بوسومه

علشان نجلس مع رجال الوفى و نقوم = ونبعد من اللي عند الاجواد مذمومه

وأنا أسمع مع أهل التجربة في الحياة علوم= بعضها صحيح وبعض الاخبار موهومـه

يقولون وكر الحر ما يعتليه البوم=وأنا شوف عيني وكر حر تحت بومهُ


للشاعر .. راجح ال شامر العجمي ..

[ابو البر]

هاذي القصيده من القصايد اللي تشفي الغليل وتوصف حال الكثير من الناس في هاذا الزمن .
اشكرك على طرحها واشكرك على ذوقك الرفيع .

والله لا يورينا مكروه دنيا وأخره.

[الوانيت1]

رائعه بكل ما تعنيه الكلمة
وتوصف مرحله تمر في حيات كل منا
شكرًا لك أخوي تكاشف بروقها علي هذا الذوق الرائع
والاختيار الغني بالمعاني .
....../////.