ما هو سبب غلاء بعض السلع المستعملة في خيمة البيع والشراء

[أبو باسل 1402]

السلام عليكم ورحمة الله وبركاته


أسعد الله أوقاتكم بكل خير

يشهد الله أنني أحبكم في الله جميعاً



نلاحظ جميعاً غلاء أسعار بعض السلع المستعملة في خيمة البيع والشراء .

فمثلاً بعض المنتجات أستخدمها صاحبها لمدة سنه و أكثر سواء كانت بضمان منتهي أو بدون
انا لا أحسد أحد الله يرزقهم بالملايين.

ولكن يا أخوان منتج جديد وعليه ضمان قيمته 2100 ويباع في المنتدى مستعمل ومكدود سنتين بمبلغ 1900 وبدون ضمان فلماذا هذا الغلاء .

والله العظيم لو هو جديد ما أستعمل أو هو نادر لايمكن الحصول عليه لقلت يستاهل القيمة .

وبعض الأعضاء هداهم الله يصفق السعر لأعلى شي ولاهو بشاري أو جاهل بالسلعه اذا اشترى أنلسع بالسعر .

فياليت لو يكون للمشرفين يد في الحد من غلاء بعض السلع المستعملة أو تعين مشرف لنسميه شيخ الدلالين مثلاً يعرف أو له درايه بسعر هذا المنتج جديد ومستخدم يوجه ببداية السوم وحد السوم ولايتجاوزه البائع .

أو اذا لأحد منكم رأي آخر فياليت لو كل واحد منا يدلي برأي .

أرجو من الله ثم منكم أن لا أكون ثقلت عليكم بالكلام أو زعلت أحد بكلامي فهذا رأي وأتقبل الأراء بكل صدر رحب


محبكم في الله أبوباسل

[الجوكر حسن]

وعليكم السلام

تقولنا سنيتن ومحدد 1900 بدون ضمان والجديد 2100 وعليه ضمان

عاد مدري الله يهديهم


لاكن كلامك صحيح

جزاك الله خيررر

[Anwar abdulla]

والله اكثر من حاجه ادورها مستعمله بالاخير اخذ جديد ابرك لي

واقرب مثال الايباد اللي اكتب منه

فرق المستعمل النظيف عن الجديد ١٥٠ريال !!

الحاجات اللي ماشي سوقها ومطلوبه فرقها بسيط عن الجديد
والمشكله السوق يحكمك والناس تزاود عليه

[البانيلي]

سلام عليكم ورحمة الله

اضم صوتي لصوت الأخوان كلهم

ولي مدة ادور لي ثلاجة مستعملة وصراحة

وبالعامي ولا يلومني احد تحوم كبدي اذا

شفت الغلا الغير مبرر .

الله يرزق الجميع بس ديننا نهانا عن بيع الغبن

فعلا بعض السلع مكدودة كد وتباع بفرق بسيط

عن الجديد . البايع الله يرزقه بس المشتري وين

عقله . المعذره يا اخوان بس هذا اللي حاصل

[راعي تاحوف]

بعضهم يسوم السلعه المستعمله على عمااه وهو مايدري عن سعره الجديد لآني شفت كم سلعه مسيومه بسعر اكثر من سعره جديده ولكن الواحد مايقدر يتكلم ويخرب على الناس بيعاتهم

[ابو البر]

لاتقولون ما اودكم ولا اعزكم ولا أنا مخلص في كلامي .......الله يعلم ان كلامي من معزه .


عقلك براسك اشتر اذا بغيت وخل المعلن يغني على ليلاه ...... واذا كان المعلن غبي خلك ذكي ....واذا كان المعلن ذكي فخلك أذكا منه وتنتهي السالفه .

ولعلمك
موضوعك تنبيه فعلا للبعض .

أخرها احد الأخوان اشتريت منه منتج ما يدري كيف يستخدمه ويفتكره لشي معين .
انا شريته بالقيمه اللي هو قالها .......لأن طريقة عرضه لسلعته حسب تفكيره.

وأنا شريت حسب تفكيري وأحتياجي وربحت.

[بدران الدوسري]

أغلب الغلاء في الموقدات أشوف سعرها مهوب حول حريه


رأس دافور بالراحه ياصل ل 150 ريال ! وين حنا فيه

الله يرزقك الجميع لكن يلزم لزوم أنهم يحطون مشرف في هالخيمة وألا بيشدون العالم ولاهم شارين من بعض

وبنفقد الثقه ببعض ولو حنا أخوان في هالمنتدى المبارك

[دانفوس]

جب انت سلعه قيمتها 2100 جديده واعرضها 1900 وشف هل تنباع او لا........... اعتقد فهمت السبب واللبيب بالاشاره يفهم.

[abo-3abd]

السبب : يلقون من يشتري

[الوووحيد99]

صدق اخوي دانفوس

[ماجستر]

السلام عليكم ورحمة الله وبركاته
صدقت والله ياخوي فية شي والمشكلة ليس هنا فقط بل في جميع المنتديات الي فيها حراج
في الاخير وجدت ناس لديها مال ولايهمة شي ولاهو عارف القيمة الحقيقية لسلعة ويشتري
وناس تشتري من خارج المواقع وتبيع في المنتديات ولها اكثر من نك يعرض ويسومها هو ويجي واحد ويدبس
ولكن لدي اقتراح على المشرف

هو ان يلزم المعلن بحد سلعتة
وان ايكون الحد اقل من سعرها جديد 15 بالمية اكثر شي بكذا نقضي على المزايدات الكاذبة
وان يضع المعلن قيمت مشتراها حتى يكون المشتري على علم بسعرها جديد

والله الموفق

[عاشق القصيد]

جب انت سلعه قيمتها 2100 جديده واعرضها 1900 وشف هل تنباع او لا........... اعتقد فهمت السبب واللبيب بالاشاره يفهم.

اخي الكريم
صاحب الموضوع على حق
قله من الذين يعرضون سلعه للبيع
يكون قد وضع حد لها
اغلبهم يخليها على السوم
والسوم يبدا من مبلغ لا يساوي قيمة السلعه
المعروضه وبعدها يبدا سيناريو المزايده
بدون علم بقيمة السلع المعروضه للبيع
وقد تصل المزايده الى سعر مقارب للجديد
وفي بعض المرات اجد إن سعر البضاعه المستخدمه تعدى سعرها وهي جديده
ولكن لا استطيع إن اقول شي لهم
والسبب لا اريد دعاوي من الناس
وكل واحد ابخص بنفسه
(( الرجل خصيم نفسه ))
وسلامتكم

[primus-plus]

اعذروني يالربع
بالنسبة لي ما اشوف فيه اي مشكلة
اي سلعه هنا او بأي مكان تشوف سعرها مرتفع اتركها بكبد راعيها
والمثل يقول العاقل خصيم نفسه
ما احد مجبر احد يشتري شي وهو ما يبيه او سعره مرتفع عليه .
وسلامتكم جميع

[أبو باسل 1402]

أشكر الجميع على مرورهم وأبداء أرائهم وأتمنى أن لا يأخذ الموضوع بحساسيه أو زعل والموضوع وضع للنقاش وكلن منا يمثل رأيه الذي يطرحه
تحياتي لكم

[* ابو باسل *]

كلام صحيح ابا باسل وسبق وان طرح من كثير من الاعضاء صحيح بعض الاداوات تكون ابتكار الشخص نفسه فيحق له التكسب فيها وهذا من حقه بس المشكله الاكبر هي وجود من يرفع السعر ثم يترك البائع معلق لاهو شراء ولا ترك غيره يشري بالسعر المعقول وهنا المفترض يكون له عقاب ويشهر به في موضع يكون خاص بالتشهير بمثل هالعيانات ليكونو عبره ومعروفين امام الاخرين .
وايضا يجيك واحد ويرفع السوم بنفسه يزاود لنفسه ويقول انسام عن طريق الجوال طيب حط رقم من سامه امام سومته وقل تأكدو منه اما كل يوم يرد ويقول زاد السوم عن طريق الجوال وكل يوم مية ريال زيادة يعني المفترض يكون السوم عن طريق الموقع وظاهر للجميع من الشاري ومعرفه وغيرها لايقبل السوم وايضا تمنع ارقام الجوالات لسوم السلعه يمنع وضع رقم الجوال المزايده على العام ومن ثم من تقف عليه السلعه يرسل له رقم جوال البائع عن طريق الخاص .

[وهج الحياة]

صراحة اشكرك اخي ابو باسل على الموضوع وكلامك صحيح مائة في المائة وبعض الناس ليس فيهم نزاهة والا الصادق يذكر كم سعرها في السوق وبعض الناس يستعجل في الشراء .

المهم نصيحة لكل من يريد ان يشتري لا تعتمد على السومات الموجودة فبعضهم لا يعرف السعر وربما ومن باب احسان الظن نفس البائع لا يعرف السعر وساذكر لكم قصة حصلت لي شخصيا ومن تقريبا عشرين سنة كنا مع بعض الاخوة نريد ان نشتري واير الجلنط لجمس قديم وهو الواير الذي يشد الجلنط ( الفرامل اليدوية ) المهم فكرنا بان اسهل شي وارخص ان نذهب ونشتريه من التشليح وذهبنا لتشليح الحاير ووجدنا ضالتنا بقيمة 120 ريال وقلنا سعره جيد واشتريناه وطلبنا من عامل التشليح فكه من السيارة . وفي اثناء فكه وبسبب تهالك الواير انقطع
فقلت للاخوة لا بد ان نشتري جديدا ولا نغامر بقديم مهترئ حتى لو كان اغلا سعرا . المهم ذهبنا للوكالة واشتريناه جديدا من وكالة الجميع ب 80 ريال تقريبا
يعني جديد ومن الوكالة الاصلية وبسعر ارخص مع اني اجزم ان صاحب التشليح لا يعرف السعر الاصلي ولا اتهمه بالغش ولكن اتهمه بالجهل مثلما كنت انا نفسي جاهلا بسعره .

[العطاوي a511]

ماتوقع فيه احد يشتري والسبب ان صاحب السلعه يعرضها ثم يكتب انباعت ويرجع يعرضها مره ثانيه بعد شهر ولا شهرين ويكتب انباعت وهي نفس السلعه يضحك على نفسه يبي يجيب راس ماله مايبي يخسر ريال واحد انا تابعت واحد سوى الحركه ذي اكثر من مره

[فايروخ27]

سبب الغلا ان راعي السلعه يدخل باكثر من معرف ويزاود على كيفه


وبالاخر يجيك واحد مفهي يشيل

[HANI YASSER]

كلامك صحيح والله انى مرات احسن انى انا اللى ما اعرف الاسعار والله بعض السلع تنلاع لاكثر من قيمتها جديدة ممكن يكون اشتراها غالية بس ايش ذنب المشترى يشترى شئ مستعمل اشتراة صاحبة غالى جدا

[وهج الحياة]

سبب الغلا ان راعي السلعه يدخل باكثر من معرف ويزاود على كيفه


وبالاخر يجيك واحد مفهي يشيل


حقيقة مصيبة هذي وحرام شرعا
وتجمع بين عدة اشياء محرمة وهي النجش بمعنى رفع السعر بالمزاودة عليه من غير نية الشراء ، والثاني الغش حيث انه يغش الاخرين ويخدعهم وهو يزاود لنفسه ، والثالث الكذب والرابع الغبن حيث ان سعرها ارفع من السوق

[ولد وايل]

القهر يشتري من بقاله 7 ريال ويبيعه 50 ريال

الشي الاخر

دوافير مدحت وما تستاهل
بينما دوافير الباكستانيه ارخص من الصيني

ويقارن بالهندي والايطالي


وربي قهر

[دايم الخير]

على المشرفين الحذر من لوبي التسويق والنفخ في السلع ..!!

بارك الله بكم