نقص زيت باللاندكروزر بدون دخان وش السبب

[راعي الرود]

السلام عليكم


باختصار شديد عندي لاندكروزر 2001 ينقص لكن ماعرف كم بالضبط

لكن مره رفعت العيار وهو ماشي على الزيت تقريباً 4 الاف او 5 الاف ولا لقيت زيت على العيار نهائياً

المهم الحاصل ان شاورت الاخوان قبل كذا في موضوع و الاغلب يقولون جلد بلوف

جربت الطريقه اني اشغل الموتر وهو بارد و اخليه ربع ساعه بعدها اكتم له الدعسه ولا شفت منه دخان ابداً

مجرد ريحه زيت تطلع من الشكمان .. و ريحه الزيت المحروق معروفه

هل تتوقعون ان فيه بدايه شنبر او جلد البلوف ممكن تسوي كذا ؟ لان ريحه الزيت المحروق واضحه تقريباً قريبه للكربون لكن الكربون ريحته تميل للبنزين اكثر اما اللي عندي ريحه زيت

وش الدبره اخاف اتخسر و اغير جلد بلوف ولا استفيد

مع العلم ان عداد ضغط الزيت في الطبلون سليم 100% على النص في الوقوف و ثلاث ارباع مع الدعسه

الزيت جربت انواع كثيره و ما استعمل الا 20/50 ولا فرق معي

الموتر ماشي 360 الف جكسار 2001

[sgl2002]

المديلات من ٩٨ وفوق مشهوره بالنقص وضعف الشمبر

لكن قبل تفك المكينه تاكد ان بلف التبخير ماهو خربان

[hsdt]

اتوقع مثل ما قلت بدية ضعف شنبر
انت سويت اختبار جلد البلوف ولادخن
مابقي الا الشنبر
نصحية زود الزيت كل مانقص افضل من فك المكينة
اذا فكيت المكينة راح تكلف كثير
موفق خير

[الجوكر حسن]

وعليكم السلام

انا معي فكسار 98 لما اتعدا 1800 ولا 1500 واسرع فوق 140 ينقص الزيت مره يدخن مره لا
وهذا اذا سافرت
وانا مافكيت المكينه ولا عملت لها شي الحمد الله اذا نقص اعبيه زيت الى الان وكل ماجيت ورشه قالو شنبر وسحبت عليهم الحمد الله مافيه شي بس اذا نقص اعبيه زيت .
واغيره اذا تعديت 2500 ولا 3000

والزيت الي استعمله سوبر جي تي بلاسيتك العلبه الوحده 13 وفي بعض المحلات 14
واتمنى اني افتدك

[4x4ofroad]

غالبا ضعف شنبر
وجو الصيف يخلي الموتر الصاحي ينقص
زيده زيت ولا يهمك موب قايل شي

[ابو صالح 77]

حياك الله يالغالي
عيار الجيب غير دقيق
فالعيار كله عن علبة فما تدري ناقص علبة أو أزود
وما تعرف كم نقص حتى تغلقه
فلذلك لك خيارين :
الأول : أن تغلق إذا كان النقص خفيف أو متوسط علبة كل خمسة آلاف
الثاني :إذا كان النقص واجد فإنصحك توضب الماكينة تغير البساتم والسبائك وجلد بلوف
وتأكل بحدود ٤٨٠٠ تقريباً
والغالب انه ينجح توضيبه عن تجربة
وإذا كنت بالقصيم عندك ابو خالد الخضير في بريدة حي خضيراء
بالتوفيق
بالتوفيق

[كونجرس الشمال]

يقولون اهل الخبره انه نقص طبيعي حفاظا على المكينه كان عندي ربع 91 ما ينقص وبعته وشريت جيب ربع 2005 الخمسه ينقص وكذلك استخدمت شاص 2009 ينقص برضو وفي الصيف مغاريز يزيد نقصه يعني تنك البنزيم فل ينق علبه الا مع الزر والدبل سالت قالو عادي كل البخاخ كذا

[صبحية البراري]

أخوي مكينة 4500 معروف انه تنقص وشي طبيعي بس النقص من نص علبه الى علبه كل 5000 الى 4000
اما لاكان النقص واجد مثل علبه كل 1000 كيلو اكيد فيه مشكله ولاتنسى الصيف يبخر الزيت

[ماجد الحايلي]

اخوي اسمع مني نصيحه شبابية
نعاني مثلك بالجيوب الربع والشاص
نفس الطريقة اللي ذكرتها اذا طعسنا ليله
وحده بنفود حايل اعاير الزيت من بكره القاه
ناقص نصف علبه وكل اللي عليك تزيده وبس
ومثل كذا اذا سافرنا ومثل ماتعرف مع السرعه
احصله ناقص بس من حايل الى بريده
عجزنا مالقينا حل الا مثل ماقالو الاخوان
هي كذا ماكينة 4500 حاول تغيير نوع الزيت
لاني غيرته مره زيت كاسترول وفرق معي بس
ماهو واجد

واغلب خوفنا يامعشر الشباب انه اذا فكينا
الماكينه سواء لشنبر او توضيب انها ما ترجع
زي قبل وهذا نادر جدا ترجع مثل ماكانت

[راعي المنهاج]

السلام عليكم ورحمة الله وبركاته

طال عمرك وعمر القراء أجمعين أنا حصل لي نفس المشكلة في جيب 2000 جي إكس آر وكان الغالب أن تطلع الريحة ( ماهي بزينة ) ريحة الزيت المحروق ونقص الموتر زيت

ورحت وإشتريت طقم وجيه ( جلد بلوف ووجيه ) ب 450 ريال وشغل يد الورشة 800 ريال وإشتريت 8 علب زيت وسيفون وبواجي وعطيتهم السيارة الساعة 7:30 صباحاً وإستلمت السيارة الساعة 5:30 عصرا

إحرص على أن يتم صنفرة البلوف وتنظيفها وإعادة كل بلف إلى مكانة.

وللعلم الشغلة هذي صارت معي في أكثر من سيارة

شاص 2002 ، جي 98 ، جي إكس آر 2000 ، جي إكس آر 2002

وبهذه الطريقة أغيرها ، بس للأمانة الورشة إلى أشتغل عندها متخصصة للجيوب فقط وموقعها نجران - وصاحبها عضو في المنتدي ( أبوحماس ) يمني .

الله يوفقنا وإياكم لما يحب ويرضى

[ابوسند9]

وعليكم السلام
جرب اخوي بدل بلف التبخير 50 ريال
وجرب زيت التر سفن
ولا تعاير السياره اللى الصبح

[kh4u99]

بالنسبة لي
النقص طبيعي عندي كابرس والكتيب مكتوب فيه اذا نقص زيده وتفقد الزيت من فترة لاخرى
الزيوت تتبخر من الحرارة وانا ما اغير الزيت اﻻ على 10000

[kh4u99]

بالنسبة لي
النقص طبيعي عندي كابرس والكتيب مكتوب فيه اذا نقص زيده وتفقد الزيت من فترة لاخرى
الزيوت تتبخر من الحرارة وانا ما اغير الزيت اﻻ على 10000

[..D7oom]

اخوي لازم تتاكد كم ينقص الزيت قبل ما تشغل السياره الصباح عاير الزيت هذا اولا

ثانيا اذا كان ينقص شي بسيط من ربع علبه الى ثلث علبه كل 5000 الف كيلو هذا اعتبره طبيعي

الزيت اذا نقص بعد 2500 او 3000 الف كيلو يعني لازم تشوف وين الخلل بالظبط

واذا نقصت انصحك تحط علبتين من زيت ستوب مع الزيت موجود عند البناشر واحرص على نوع الزيت

انا استخدم 20/50 فوكس سوبر جي تي علبه بلاستك اسود ما تنقص ابد وفي بعض الزيوت جربتها تنقص شي بسيط وانا معي نفس موترك لاكن vxr

واحرص على نوع الزيت يكون اصلي وغيره مع السيفون مع كل تغيير

السيفون خذه اصلي من منيف النهدي او الضحيان ترى سعره 14 ريال والبناشر يلعبون علينا يبيعونه ب 25 ريال

اتمنى لك كل التوفيق

[العطاوي a511]

اخوي اتحداك تحدي اذا فيه موتر ماينقص جربت سيارات كثير وكلها تنقص وبعضها شريتها وكاله وتنقص فالنقص عادي جدا وطبيعي حسب تجربتي


لاكن فيه خطا لاحظته مع واحد من ربعنا واتوقع انه منتشر وبقوه بين العالم اللي تقول موتري ماينقص هاذا اللي من ربعنا يقول موتري ماينقص ولا ملي قلت اتحداك قال مشينا نغير الزين والوعد بعد خمس الاف كيلو وراح غير الزيت قدامي وحط ثمان علب سحبت العيار الا الزيت فوق المعدل الطبيعي قلت يابو الشباب نقص الزيت واجد شف العيار قال حقه ثمان علب وقلت العيار طيب قدامك قال لا معروف ان زيته ثمان علب ؟؟؟؟؟

ابو الشباب يحط ثمان علب وزيت موتره سبع او اقل شي بسيط ويمشي عليه 5000 ويسحب العيار مايشوفه ناقص ليش لان اللي نقص الزياده


ههههههههههههههههه


اهل العقول براحه

[أبوأسامه...]

كانت معي نافارا 2010 عنيت من النقص بعد 70000 لين وصلت تقريبا 110000 وطلعت من البواجي لئن البواجي ليزر ورجعت طبيعيه لين بعتها


اما ان كنت تقول السيارات كلها نتقص انا اعارض على كلامك والدليل ان الهالكس تاكل زيت والددسن لا

والكامري القير العادي تاكل زيت والكامري الاوتو لا ؟؟؟مو كل السيارات تنقص؟؟؟؟؟

[الجوكر حسن]

اخوي اتحداك تحدي اذا فيه موتر ماينقص جربت سيارات كثير وكلها تنقص وبعضها شريتها وكاله وتنقص فالنقص عادي جدا وطبيعي حسب تجربتي


لاكن فيه خطا لاحظته مع واحد من ربعنا واتوقع انه منتشر وبقوه بين العالم اللي تقول موتري ماينقص هاذا اللي من ربعنا يقول موتري ماينقص ولا ملي قلت اتحداك قال مشينا نغير الزين والوعد بعد خمس الاف كيلو وراح غير الزيت قدامي وحط ثمان علب سحبت العيار الا الزيت فوق المعدل الطبيعي قلت يابو الشباب نقص الزيت واجد شف العيار قال حقه ثمان علب وقلت العيار طيب قدامك قال لا معروف ان زيته ثمان علب ؟؟؟؟؟

ابو الشباب يحط ثمان علب وزيت موتره سبع او اقل شي بسيط ويمشي عليه 5000 ويسحب العيار مايشوفه ناقص ليش لان اللي نقص الزياده


ههههههههههههههههه


اهل العقول براحه



هههههههههههههههههههه :D

[العطاوي a511]

كانت معي نافارا 2010 عنيت من النقص بعد 70000 لين وصلت تقريبا 110000 وطلعت من البواجي لئن البواجي ليزر ورجعت طبيعيه لين بعتها


اما ان كنت تقول السيارات كلها نتقص انا اعارض على كلامك والدليل ان الهالكس تاكل زيت والددسن لا

والكامري القير العادي تاكل زيت والكامري الاوتو لا ؟؟؟مو كل السيارات تنقص؟؟؟؟؟


هاذا رد قديم بمكشات من عام 2010



وعليكم السلام ورحمة الله وبركاته

نقص الزيت امر طبيعي جدا في حالة الحرارة او السرعة الزائدة المفاجئة او التخفيف المفاجيء ومذكور في كتيب دليل المالك لجميع السيارات الجديدة . وطبيعي ان الموظب نفس الشي . وتبخر الزيت بسبب ضغط المحرك المفاجيء سواء التخفيف او التعجيل من السرعة هدفه حماية المكبس حيث انه لو لم يخرج من حلقات المكبس الشنبر فسينكسر لأنه لا بد من متنفس للضغط الحاصل على الزيت . ولو تعمد الصانع عدم تبخر الزيت لجعل الحلقات (الشنابر) غير متعرجة وغير متحركة . طبعا المقصود هنا النقص الطبيعي وليس المرضي يعني اذا كان النقص لا ينزل عن الخطين المحددين في مقياس الزيت حتى لو كان الناقص علبة او اكثر. الاهم ان لاينزل عن الخط الادنى خلال الخمسة آلاف كيلو متر . واحد اسباب النقص هو عدم تغيير الفلتر القديم اثناء تبديل الزيت حيث ان ربع لتر زيت قديمة ومتهالكة موجودة في الفلتر قد تتبخر بشكل وتضعف جودة الزيت الجديد.

اتمنى ان اكون افدتك .

اطيب تحية