الطير يخافق وش الحل

[ah1122]

السلام عليكم يالربع
طيري فرخ ينقل بكر حر حمر
صارله الحين اسبوعين من اطلعته من المربط بس لالحين الطير ماطاع يركد علي يدي خاصه اذا شلت برقعه ولا علي وكره
واحياننا يخافق بالبرقع
ابي فزعتكم كيف ارب الطير واخليه يستريح علي يدي وما يخافق
وجزاكم الله خير

[أبو فيصل]

طبيعي يتغير طبعه بعد الربطه لكن تأكد ما يلحقه حراره في الغرفة أو السيارة و تأكد من البرقع كذلك

واذا حولك صقاقير خبرة مر عليهم و يحاولون يساعدونك

[راعي لادن]

السلام عليكم ورحمة الله وبركاته

أكيد أن الطير قارصه الجوع عشان كذا ايخافق أكرمه كم يوم

[راعي ياقوت]

السلام عليكم
اخوي لازم الطير بيخفق ويكفخ ومستوحش عقب الربطه ولاكن انا اخوك أنقل الطير بدون تشل برقعه وخلك تسولف على راسه ولاخله عند تلفزون واذا خفق رشه بلماء وخله امبرقع لمدة 3 ايام على هالحال وعقب أبداء تاخذ منه 3 دقايق وصكه بلبرقع وكرر هالعمليه واذا كفخ سبحه بلماء وخلك فلبراد عشان يستبرد ويكش ماعاد يخفق وعقبها ان شاء الله بيزين

[الادعم1]

نصيحه خل بخاخ المياي معاك وسبحه ونزل المكيف عليه خله يبرد ولا راح يكفخ

[عواد الشمري2]

مازود على ماتفضل به من هم قبلي

الطير خله دايم على كفك وفرع وبرقع ومعك نسر كل شوي تنسره طبعن بعد ماتدق خشمه من الجوع ومعك بخاخ مثل ماقالو وعلى هالحال ان الله يسر يومين وانت هاده

[ذيب خيطان]

الطير خله دايم على كفك وفرع وبرقع ومعك نسر كل شوي تنسره طبعن بعد ماتدق خشمه من الجوع ومعك بخاخ مثل ماقالو وعلى هالحال ان الله يسر يومين وانت هاده .
كلامك عين الصواب أخوي عواد الشمري أوافقك بالراي:good:

[ah1122]

الله لا يهينكم
والشكر موصل لكل باسمه

[عساها تساهيل]

افــادوك الاخوان جزاهــم الله خيــر

[كاشت2]

طيب على الوكر كييييف يركد لعوزني طيري مايركد لا على وكر ولا على يدي على اليد بنتبع طريقتكم ولكن على الوكر ماطاع يركد وانا ابيه يركد عشان انقزه :o

[الوالي 999]

قبل لا تشيل طيرك رشه بالماء (( بالبخاخ )) لين يقطر ماء منطحه ودواغره وظهره
وخل المكان اللي انت فيه بااااارد
بعدين شل طيرك وانقله ، الطير بيقرصه البرد وبيضب جنحانه وبيركد غصب
خله شوي وفرعه ... واذا كااافخ على يدك من جديد رشه لاتخااف رشه منطحه ودواغره
بيتعبك شوي بس بيركد
سبب رش الماء لسببين
الاول : الطير مايتملع
الثاني : الطير يبرد ولا يكافخ

[خيال سهيل]

قبل لا تشيل طيرك رشه بالماء (( بالبخاخ )) لين يقطر ماء منطحه ودواغره وظهره
وخل المكان اللي انت فيه بااااارد
بعدين شل طيرك وانقله ، الطير بيقرصه البرد وبيضب جنحانه وبيركد غصب
خله شوي وفرعه ... واذا كااافخ على يدك من جديد رشه لاتخااف رشه منطحه ودواغره
بيتعبك شوي بس بيركد
سبب رش الماء لسببين
الاول : الطير مايتملع
الثاني : الطير يبرد ولا يكافخ

كلام سليم وهذا الصح غرقه بالماء قبل تشيله وهو على الوكر
ولا تنسى تسقيه وهو على كفك

[كاشت2]

كلامك اعطى نتيجه ميتين في الميه:thumbup: على الدس بس كيف اعوده على الوكر اول ما افك برقعه وهو على الوكر ينقلب صبييح جني ابغاه يثبت ولو دقيقه عيا هل اخليه يكافخ لين يبطل والا كيييف:(

[خيال سهيل]

يكفخ وهو مفرع ولا مبرقع على الوكر

[كاشت2]

يكفخ اذا فرعته بس وهو مبرقع مثل المسمار مايتحرك

[خيال سهيل]

اجل خذ العلم اول شي ركد الطير على يدك بالطريقه الي علموك الرياجيل
بعد ما يهدى الطير وينكز على يدك ويتفلى رح يركد على الوكر بشوية مجهود بسيط
وهو تخلي الطير في مجمع ناس اما بالبيت بالصاله مثلا او بالستراحه مع الشباب
تبدا بزاويه تكون بعيده عن الناس ثم تبداء تقربه شوي شوي

[حرة البقوم]

دهله وبس
اخوك/خالد البقمي

[كاشت2]

الله لا يهينكم ماقصرتوا