المساعد الشخصي الرقمي

مشاهدة النسخة كاملة : دافور غاز في الرياض


الشاطر00
16/10/2006, 10:25 PM
ياشباب تكفون دلوني كيف اقدر اعبي دافور الغاز في الرياض خصوصا وان محلات الغاز ما تعبيها
هل يوجد محلات اقدر اعبي الدافور عندهم
طشي وامطري
16/10/2006, 10:31 PM
يا أخي عبه بالبيت.

لكن إذا ما ودك.

رح لمحلات الغاز ونزل الدافور ولا تشاوره ، خلك واثق اجدع الدافور وقله عبي... وإن عيّا رح لغيره لما تلقى أحد يعبي.

وبعدين حدد موقع من الرياض علشان الشباب يساعدونك.

تقبل تحياتي
طشي وامطري
16/10/2006, 10:33 PM
لو تبي أخدمك وأعبيه عندي بالبيت ما عندي مانع أنا بالشفا إن كانك حولي أبركها من ساعة .
سفير الصمان
16/10/2006, 10:45 PM
خابرلك محل رحلات وهو البرية في حي السلام على طريق الامام الشافعي عند مستوصف حي السلام يعبي الدوافير وان عبيت في بيتكم اوفرلك
راعي الهـــدد
16/10/2006, 10:53 PM
أخوي الغالي

محلات الغاز ماله داعي تعبي عندهم

يالحبيب عبه عندك بالبيت

وطريقته اسهل من السهله مره

كل مافي الأمرتشتري لي التعبيه من محلات الرحلات

اولاً / جب دبة الغاز واجعلها على مكان مرتفع ومقلوبة الشكل مثلاً تكون انت على الدرج وتضع دبة الغاز على درجه عاليه والدافور انزل منه بدرجتين مثال

او تجعل دبة الغاز بين دبتين وتقلبها راسها تحت وقاعدتها الي تحت تكون فوق تماماً من اجل ينزل الغاز صافي قليل الهواء ويبطي معك

ثانياً/ اربط لي التعبيه بمفتاح الغز طبعاً الطرف الأول بدبة الغاز والطرف الثاني بالدافور

ثالثاً /قم بفتح مسمار التنسيم حق الدافور خله مفتوح بقدر ان الهواء يطلع معه عند امتلائه

رابعاً / احكم الربط للي التعبيه جيداً بمفتاح الغاز طبعاً

خامساً / أجعل الدافور على الوضع OBEN من اجل يستقبل الغاز القادم من دبة الغاز وأدرأيضاً مفتاح دبة الغاز على الوضع OBEN واتركه يعبي حتى يبدأ الغاز يطلع مع فتحة التنسيم حقت الدافور

سادساً / أرجع مفتاح دبة الغاز على الوضع CLOSE وبنفس الوقت اربط مفتاح التنسيم بدبة الدافور

سابعاً / اغلق مفتاح الدافور ايضاً واجعله على الوضعCLOSE

ثامناً / فك لي التعبيه من الطرفين وبذلك تكون قد وفرت على نفسك خمسة ريالات أو عشرة ريالات كان بياخذها محل الغاز

هذه طريقتها باختصار

أنا كنت مثلك شاق بنفسي ادورهم واتطلبهم يعبون لي ويوم عرفت لها وادركت انها سهله قمة بالتعبيه لنفسي

محبك

راعي الــهـــــدد
نجد 1
16/10/2006, 11:00 PM
اخوى راعى الهدد



ماقصرت على المعلومات وجزاك الله خير
kaaaatm
16/10/2006, 11:34 PM
انا في حي السويدي وكل محلات الغاز عندنا تعبي الصغير بـ 10 ريال

والوسط بـ 15 ريال


والكبيير بـ 20 ريال



واذا كان انك تبيني اعبيلك ابشر بسعد انا مستعد



ومجانا بعد ...........




وقهوتك عندنا .....................
راعي الهـــدد
16/10/2006, 11:45 PM
انا في حي السويدي وكل محلات الغاز عندنا تعبي الصغير بـ 10 ريال

والوسط بـ 15 ريال


والكبيير بـ 20 ريال



واذا كان انك تبيني اعبيلك ابشر بسعد انا مستعد



ومجانا بعد ...........




وقهوتك عندنا .....................



يوووووووووووه

ليه

20

ليه

10

ليه


15


ياخوان الشغله بسيطه ولاتاخذ 5 دقائق

الطريقه وضحتها بالتفصيل الممل

ياليت تسمع كلامي وتعبي لنفسك
الشاطر00
17/10/2006, 08:01 AM
اشكر جميع من افادني بالتجاوب والرد
والطريقة سهلة ومعروفة لي ولا تحتاج اي مجهود ولكن الحقيقة انا يو جيت اعبي الدافور في الحوش عندي !!!!
الله يجيركم كل الجيران اتصلوا علي والا دق الباب
الظاهر شامين الريحة وخافوا وان اعذرهم
وبعدها صرت اعبي الدافور في البر بس الطريقة متعبة تشيل الاسطوانة معك وشغلة
انا على العموم في الروضة واللي يعرف محل غاز يعبي الدوافير الله لايهينة يدلني واون شاكر له
واشكر الجميع مرة ثانية على التجاوب
ابو عادل1
17/10/2006, 02:38 PM
اخوي الشاطر
السلام عليكم ورحمة الله وبركاته والعشر مباركة على الجميع
فيه محل غاز على طريق الرياض سدير القصيم يعبي الدوافير ولاهوب غالي موقعه بعد ثالث او رابع محطة بنزين كبيرة ماني متأكد من اسمها
اتمنى ان تنفعك هالمعلومة
(محمد العبري)
17/10/2006, 06:20 PM
الاخ الشاطر
محل البرية شرق الكليه المتوسطه على شارع الشافعي في حي السلام
وللجميع تحياتي
بن نويشر
18/10/2006, 02:25 PM
يا خي لا تتعب نفسك في اللف والدوران !! ما دام عندك حوش فحمد ربك .. غيرك ما عنده .. وبالنسبة للريحة الظاهر أنك فاتح بلف التنسيم للدبة أكثر من اللازم ..

عموماً .. أحذر أن تعبي الدبة داخل المنزل نهائياً ،
1 - قم بشبك اللي والخاص بالتعبئة في الدبة الكبيرة (25) .
2 - قم بشبك اللي بالدبة الصغيرة .
3 - قم بفتح بلف الدبة الصغير فتحة صغيرة للتنسيم وخروج الهواء .
4 - قم بقلب الدبة الكبيرة (25) رأساً على عقب لنزول السائل لكي يخدمك فترة أطول .
5 - تأكد من تركيب اللي في الجهتين بشكل صحيح وآمن .
6 - قم بفتح الدبة الكبيرة فتح بسيطة حتى تسمع صوت التنسيم يخرج من الصغيرة .
7 - إذا كنت تخشى من الريح جب لك فوطة رطبة وضغها على الدبة الصغيرة .
8 - أنتظر حتى خروج السائل الأبيض من الدبة الصغيرة بعدها قم بإغلاق بلف التنسيم في الدبة الصغيرة وبعدها قم بإغلاق الدبة الكبيرة .
9 - بعد ذلك قم بفك اللي من الجهتين .

أرجو أن أكون قد أفدت الجميع ..
abo fasil
18/10/2006, 02:41 PM
السلام عليكم ورحمة الله

في محل غاز علي خط القصيم اول ما تطلع من الرياض علي يدك اليمين.

ومخصص مكان لتعبية الدوافير.

وسلامتك
فايز العامر
18/10/2006, 02:48 PM
بدور دوران على محلات الغاز ولا أي شي، هذا يرفض وهذا يتغلا...



رح لأقرب محل عنده تعبئة فريون وعطه الدافور...
واثق
18/10/2006, 02:54 PM
أخي الكريم الشاطر
بما إنك من أهل الروضة فبإمكانك التوجه للمكان الذي ذكره أخونا النقي
شرق كلية المعلمين محل البرية - حي السلام - شارع الإمام الشافعي ، واستعجل قبل لا يمنعونه لأن الناس في تلك المنطقة يشكونه دائما للدفاع المدني ، وأظن الدفاع المدني منعه لكن ليس بشكل جدي والله أعلم
وإذا أنك بتنتظر فإذا توجهت لحفر العتش بالقرب من التنهاة فستجد محل الغاز هنالك يعبيلك :D