قدم نصيحة لصيد السبيطي 2013

[أحمد السوويدي]

بسم الله الرحمن الرحيم

السلام عليكم ورحمة الله وبركاته

كل واحد له خبرته في صيد السبيطي ومن خلال هالموضوع نتشارك النصايح

في طريقه الصيد بكل انواعها الحداق والا اللفاح

طبعا الموضوع شامل كل شي التحضير الترديع الخيوط وقت الدخول المدود الطرحه

من الالف الى الياء

آول نصيحة وقت الدخول

السبيطي مزيته يضرب في كل فصل والحمدلله صدناه في صيف وشتا وخريف وربيع خخخخ

الاغلبية يفضل اول الرشة واخر الثبر


النصيحة الثانية وهي مهمة جدا

الهدوء

اذا كنت تحدق له ع السيف

يفضل عدم التكلم بصوت عالي او انك تخاوض بالماي او اي شكل من اشكال الازعاج

سواء من الطراد او ع السيف

حنا في صدد صيد سمكه يبيلها عناية شوي

النصيحة الثالثه

اختيار الاشخاص المناسبين

سواء تحدق له من السيف او الطراد

يبيلك اشخاص يبيلهم صبر مايملون بسرعة

ع السيف خصوصا اذا مل بيقعد يخاوض ويجرب هالمحل وهالمحل

فبتصير عندك حركه وازعاج ماراح حد يستفيد منها




في انتظار مشاركة الاخوان

قواكم الله

:

[ناسي سنارتي]

اول شي اشكرك اخي الكريم على هذا الطرح المفيد ولمحبي السلفر



بالنسبه لي افضل صيده من الشاطيء ومن الاماكن الطينيه الغير عميقه

استخدم له ربيان او ميد او سلس او مصران اهم شي يكون طازج الطعم

خيط 40 يفي بالغرض اما طريقة الرداع الاول البلد وفي النهايه الميدار رقم 10

الهدوء اثناء الصيد كما ذكرت مهم جدا وكذلك فرص صيده بداية السقيه ممتاز اما بالنسبه اخر الثبره حلو بس لازم ندخله داخل البحر لين عند المجرى لان مواقعنا لمن تثبر مايصير في بحر ابد :D الا داخل مره

كذلك الصبر ثم الصبر ثم الصبر

واذا ضرب عليك لازم تسايسه وتعطيه شوي لانه بيروح جهة اليمين ع طول وبيقرب من سيف :D



تحياتي لك

[أحمد السوويدي]

قواك الله ع المشاركة اخوي ناسي

نصايح طيبة لاهل السلفر

اضافة

يعني لو تقوي الخيط هالفتره من الحين الى شهر اربعه بيكون افضل

هالفتره ماراح يجيك الا المتعافي

للمعلومية اول سمكة تطلع من الثبر هي الشعم

بعدها المزيزي واخرهم السبيطي

لازم تقدم شوي وتتعب

واذا قرحت خلاص ارجع والاغير محل من حيث انك تقط ع مجرى السمكة

[accentkool]

رداع السبيطي متر
وتكون كلش هادي
وحلاتها شي توك صايدة
بالسالية
ميد منشوس سلس

[SNIPER07]

هلا و غلا

مشكور على الطرح

السبيطي : خيط نايلون ابيض من 60 الى 100

الميدار : 7 او 9

الوقت : اول رشت الماية من على الشاطىء

الترديع : ركه ثقل خراري مع سن مقاس 7

اللعفه الطازجه : المصران - الميدر - السلس - الربيان

تحياتي

[أحمد السوويدي]

متر مسافه مناسبه بيني وبينك لمن تحدق للسبيطي

فيه اشياء تضرب عليك مثل الضلعه اللخمه الوحره الحاقول

تخلي الجيمه بين المايتين راح يكون افضل

بلد ثلاث ارباع وميدر 8

واذا الماي حاميه بلد واحد

[أحمد السوويدي]

هلابك اكثر اخوي سنايبر

نصيحة طيبه واسعدتني مشاركتك

من المؤيدين للخيط الستين حق السبيطي

بصراحه الخمسين تسحب ويدك ع قلبك خخخخ

الميدر هو الميد نفسه والا ؟

ننتظر التوضيح اخوي سنايبر

[NOBL3]

للمعلومية اول سمكة تطلع من الثبر هي الشعم

بعدها المزيزي واخرهم السبيطي





من حيث انك تقط ع مجرى السمكة



يعطيك العافية على طرح الموضوع اخوي أحمد

النقطتين اللي ذكرتها فوق , فضلاً لا أمراً تشرحها لنا .. مافهمتها

تحياتي لك

[أحمد السوويدي]

اليوم راح نقدم نصايح عن الخيوط وافضلها


طبعا اذا انت تحدق بسناره فما راح تفرق كثير

اما اذا قبات خلك ويانا شووي

الخيوط 3 انواع تقريبا

بلاستك ونايلون والمدمجة بين الاثنين

الاكثر شيوعا واستخداما البلاستك

طبعا خلك من مقياس 40 الى 70


قبل تشتري اي خيط من اي شركة كانت

تاكد من الاستخدام لانه في خيوط ميزته للماي الملح وفيه خيوط للماي الحلو وفيه خيوط قابله للتمدد

راعي المحل يجيب من كل نوع وانتبه يصرف عليك شي انت غني عن استخدامه


1- التي فورس .. شركة يابانيه

خيوط طيبه وذربه ع اليد وقليله التشربك ناعمه وقويه بنفس الوقت


هذي الصور



http://im32.gulfup.com/Uxuzu.jpg (http://www.gulfup.com/?Df9VLX)

http://im35.gulfup.com/ABOww.jpg (http://www.gulfup.com/?3lQXzh)


http://im35.gulfup.com/16Njm.jpg (http://www.gulfup.com/?dRdsCl)



كل لون له ميزة معينه ويجي منه


الابيض والازرق والذهبي والاحمر

تقريبا اسعارهم هنا بالسعودية

خيط 150 متر سعره 35 اقل او اكثر

طبعا انتبه من الخيط هذا

راعي المحل يبيعه لك ع انه تي فورس وهو لا شركة ثانيه

انتبه تركب الموجة خخخخ


http://im32.gulfup.com/yjCTb.jpg (http://www.gulfup.com/?wJzkKN)



2- البيج قيم معشوق الجماهير ... شركة آمريكية

خيوط قويه وتطيب الخاطر للمقاسات الكبيرة ويفضل استخدامها حول المناطق الصخرية


http://im42.gulfup.com/81JYT.jpg (http://www.gulfup.com/?qZFRPU)

http://im42.gulfup.com/tzBAL.jpg (http://www.gulfup.com/?0dokzf)


نفس كل الشركات اسال عن الميزة وهل الخيط مضغوط او لا

اسال عن قوة التحمل والسحب

سواء اللي منتشر بالسوق اللي هو تجميع دبي او الاصلي الوارد من امريكا

كلهم خير وبركة

اسعارهم 35 ريال تقريبا


3- سفكس شركة امريكيه ع مااعتقد

خيوط طيبة للسبيطي والشعم قويه ماتنقطع بسهولة

http://im42.gulfup.com/bxnIg.jpg (http://www.gulfup.com/?rrxdgX)

http://im42.gulfup.com/XwZCx.jpg (http://www.gulfup.com/?zVMsSa)


اسعارهم تقريبا 40 اقل او اكثر



4- مقنم


http://im42.gulfup.com/e9A6B.jpg (http://www.gulfup.com/?HY4Id7)

خيوط النواخذه راعين الدرادير والحركات

اذا حصلت هالخيط لو يقولك 70 خذه ماعليه حسووفه




هذا ماسعيت فيه اليوم اتمنى اني وفقت في تجميع ماده طيبه

يستفيدون من اهل السلفر


ننتظر مشاركاتكم


:

[أحمد السوويدي]

يعطيك العافية على طرح الموضوع اخوي أحمد

النقطتين اللي ذكرتها فوق , فضلاً لا أمراً تشرحها لنا .. مافهمتها

تحياتي لك




ابشر ماطلبت شي اخوي

في حاله السقي اول م يضرب عليك المزيزي

بعدها السبيطي بعده الشعم

معناته الشعم مايجيك الا اذا الماي سقت عليك نص سقيه او فل

مد كامل او نص مد

اول بدايه الثبر الشعم اول مايطلع من المحل يرد بحر غزير


مجرى السمكة هو الدردور



الدُّرْدُورُ - دُرْدُورُ:
الدُّرْدُورُ : دوّامة البحر التي يُخشَى فيها الغرق .
ويقال : لجَّجُوا فوقعوا في الدُّرْدُور .
المعجم: المعجم الوسيط




السمكه تجي من غزر تمشي مع الدردور لين تحصل اكلها

طبعا الحداقة يميزونه من لون البحر او بشوف العين

فيه طريقه ثانيه

تعال حق المحل وهو في عز الثبر

راح تشوف مكان خط طويل او مايل

ينزل فيه مستوى الارض

او مكانين مرتفعين وبينهم مكان نازل طويل وممتد

هذا هو مجرى السمكة

اتمنى اني وفقت في الشرح

واي سؤال ابد قريب

:

[NOBL3]

الله يرفع قدرك يالسويدي .. كلام نافع و مفيد

الدردور اشوفه وقت القراح .. فعلاً صاير مثل العروق الممتدة من والى الغزير

بس معليش سؤال خارج الموضوع نوعاً ما

كثيرين يعشقون السبيطي وانا بصراحه صدت مره مزيزي يجيله كيلوين وبصراحة ماشوف فيه شي مميز

طعمه عادي زيه زي العريضي .. بالعكس يوجد أنواع من السمك أطعم وألذ من وجهة نظري

فـ اش سبب هالعشق اللا متناهي لهالسمكة بالذات .. يمكن نحارشكم عليها :D

و منكم نستفيد

[أحمد السوويدي]

آمين وياك اخوي

اي هذا هو الدردور من خلاله تعرف مدخل ومخرج السمكة

وبيسهل عليك عملية الصيد

مدري من وين ابدا بصراحه بس هذي حكايه عشق لاتنتهي

الشعم والعريضي والمزيزي والسبيطي والقرقفان يسمونهم اهل البحر السمكة البيضا

طبعا يفرق لحم المزيزي ع العريضي

لحم العريضي شوي يابس

وفي اخر الايام قامت الناس تلعب في طريقة الطبخ لهذا السمكة انا مدري شلون كلته انت

بس المتعارف والموروث والمضبوط دائما

شوي ع الصاج او الجمر+عيش شيلاني + دهن عداني او سمن + لبن المراعي + صحن جرجير

حاله اغماء ع طوول خخخخ

بالفتره هذي قام يسونه بالفرن وبصراحه لذيذ جدا جدا

اما اللي خربها وجاب التايهه اللي يسويه مقلي

هذا دمر السمكة

المقلي دايم حق الشعري الصافي هالسمك هذا

لمن تروح سوق السمك نادر تحصل سبيطي والا شعوم خصوصا الفتره هاذي

طقي عصي عليه خخخخخ

القصد من الكلام

طريقه صيدته صعبه وممتعه بنفس الوووقت واقل تكلفه

ناهيك عن السبب الاول اللي هو الاكل

والسبب الثاني هو لمن تصيده يروح يمين والا يسار يحذف وانت توادعه

حركات تشلع القلب خخخخ

والسبب الثالث المردود الصحي ع المستهلك


من وجهة نظري هو آصعب صيد

لاتقولي جنعد والا هوامير والا شعري

الحداق تعرفه من السيف


تابعنا بهالموضوع بتشووف اكثر من طريقة ان شاء الله

واتمنى لك الفايده اخووي


:

[ABOKHALID1]

الله يبارك فيك اخوي احمد. الصراحه معلومات قيمه تعتبر مرجع متكامل من اصحاب خبره.
مشكور وبارك الله فيك ومن شارك في موضوعك.

[أحمد السوويدي]

يبارك في الجميع اخوي ابوخالد

ان شاء الله يستفيد منها الجيل القادم .. نكتب لهم الهواية خوفا من الاندثار

الشباب ماقصروا كلن باسمه شاركوا ونصحوا جزاهم الله خيرا

ولازلت انتظر مشاركاتهم


تحيتي لك

[يوسف ابو حلا]

بارك الله فيكم جميع فعلا استفدت الكثير منكم

[ذوالجناح7]

ماااا شااااء الله عليك أخوي أحمد


موضوع السبيطي موضوع شيق جداً


وصيده السبيطي مفخره بين الحداقه


من خلال تجربتي البسيطه ملاحظتي في توفر عاملين مهمين


* الصيد يكون في السكون التام + بداية السقي


وفي المعتاد اول شقة النور ( الفجر :s) و في الليل


بالنسبه لي صااار في أول شقة النور :s


يفضل أختيار الأماكن البعيده عن الضجيج:director: لزيادة أحتمالية الصيد


الصيد يمكن الكثير يصيد لاكن السبيطي مطلب الحداقين المميزين :good2:


والله ولي التوفيق


تحياتي أخوك / بوحبيب ( من عشاق صيد السبيطي ) الدمام

[داحم99]

موضوع طيب اخوي احمد واستفدنا منه .....


الف شكر لك

[بحيران]

السلام عليكم
حبيت اشاركم مع ان الخبره ماش خويكم بدوي لكن من عشاق البحر بالنسبه لي عندي طريقه للسبيطي واصيد منه احيان على ثلاثة وهي كل الآتي.
1- اجيب معي كم كيس خبز واقطعه الخبز صغار واقطه بالماء السبيطي يموت بالخبز.
2- اول مايجي السبيطي على الخبز يكون حريص مايكل الخبز على طول لكن اصبر عليه لين يبدا ياكل .
3- اول ماتشوف ان السبيطي قام ياكل في الخبز بدون حرص اجيب ميدار حق سمك صغير تراني عليمي ماعرف المقاسات لكن الزبده ان الميدار صغير والخيط كمان ضعيف لدرجة اول ماترفع السبيطي ينعاج الميدار واحيان ينقص الخيط مايتحمل الوزن .
لكن الطريقه كل الاتي اول مايضرب السبيطي على الخبز احط الميدار في وحده من الخبز الثقيل مثل التميس بدون ثقاله واتركها طافيه واول مايضربها السبيطي اشد الخيط لكن ماهو بقوه اتعبه لين اسحبه قريب وبالشبكه اامسك السبيطي

[غضباوى]

ما شاء الله عليكم يا شباب

معلومات قيمة يستفيد منها المحترفين و المبتدئين

ما قصرتو خلصتو طرق صيد السبيطي

بس معظم السبيطي الي طلعتة كانت الموية نازلة ومرات قليلة وهي ساقية

والله يوفق الجميع في السبيطي ها الايام

[أحمد السوويدي]

بارك الله فيكم جميع فعلا استفدت الكثير منكم

الله يجزاك خيرا اخوي يوسف

واذا عندك اي سؤال ابد لاتتردد الشباب فيهم الخيرو البركة

قواك الله

[أحمد السوويدي]

ماااا شااااء الله عليك أخوي أحمد


موضوع السبيطي موضوع شيق جداً


وصيده السبيطي مفخره بين الحداقه


من خلال تجربتي البسيطه ملاحظتي في توفر عاملين مهمين


* الصيد يكون في السكون التام + بداية السقي


وفي المعتاد اول شقة النور ( الفجر :s) و في الليل


بالنسبه لي صااار في أول شقة النور :s


يفضل أختيار الأماكن البعيده عن الضجيج:director: لزيادة أحتمالية الصيد


الصيد يمكن الكثير يصيد لاكن السبيطي مطلب الحداقين المميزين :good2:


والله ولي التوفيق


تحياتي أخوك / بوحبيب ( من عشاق صيد السبيطي ) الدمام




قواك الله اخوي ابو حبيب نصايح طيبة ومهمة

اي حركه ازعاج مايقرب السبيطي والتوقيت اهم شي قبل اي حاجه

مشتاقين حق حداق الفجريات

فعلا صيده السبيطي لها طعم خاص

لو تعبي ثلاجه شعري وتصيد سبيطي واحد

رجحت الكفه للسلفر

تابعنا اخوي وفالك طيب

:

[أحمد السوويدي]

موضوع طيب اخوي احمد واستفدنا منه .....


الف شكر لك

هلا وغلا اخوي داحم

اسعدني مرورك

[أحمد السوويدي]

السلام عليكم
حبيت اشاركم مع ان الخبره ماش خويكم بدوي لكن من عشاق البحر بالنسبه لي عندي طريقه للسبيطي واصيد منه احيان على ثلاثة وهي كل الآتي.
1- اجيب معي كم كيس خبز واقطعه الخبز صغار واقطه بالماء السبيطي يموت بالخبز.
2- اول مايجي السبيطي على الخبز يكون حريص مايكل الخبز على طول لكن اصبر عليه لين يبدا ياكل .
3- اول ماتشوف ان السبيطي قام ياكل في الخبز بدون حرص اجيب ميدار حق سمك صغير تراني عليمي ماعرف المقاسات لكن الزبده ان الميدار صغير والخيط كمان ضعيف لدرجة اول ماترفع السبيطي ينعاج الميدار واحيان ينقص الخيط مايتحمل الوزن .
لكن الطريقه كل الاتي اول مايضرب السبيطي على الخبز احط الميدار في وحده من الخبز الثقيل مثل التميس بدون ثقاله واتركها طافيه واول مايضربها السبيطي اشد الخيط لكن ماهو بقوه اتعبه لين اسحبه قريب وبالشبكه اامسك السبيطي


وعليكم السلام هلاو غلا اخوي بحيران

الهواية مالها اي انتماء

طريقتك زينة وفعالة ومجربة

لو تسوي لها تحفيز بسيط

خذ خيط مقاس اسمه بيج قيم

وميدار مقاس 8

النصيحة ي شباب التدسيع .. لازم قبل تقط خيوطك تدسع المحل

خبز والا كم ربيانه افركهم بيدك وانثر

خل السمكه توالف ع المحل لمده ربع ساعة

وبعدين ابد حداق

مشاركة مميزة فعلا اخوي بحيران

ننتظر الجديد قواك الله

[أحمد السوويدي]

ما شاء الله عليكم يا شباب

معلومات قيمة يستفيد منها المحترفين و المبتدئين

ما قصرتو خلصتو طرق صيد السبيطي

بس معظم السبيطي الي طلعتة كانت الموية نازلة ومرات قليلة وهي ساقية

والله يوفق الجميع في السبيطي ها الايام






الله يرحم والديك اخوي غضباوي

تونا بالحمد باقي ع الموضوع كثير

فعلا نهاية الثبر + بداية السقي اوقات مفضله للسبيطي

واغلب الاحيان الاحجام الكبيرة تجي بنهاية الثبر


حياك الله اخوي

[أحمد السوويدي]

السلام عليكم .. شحالكم جميع

اليوم المشاركة عن الميادير والترديع

نقدم لكم افضل واضمنها

حياكم الله


بالمرتبة الاولى الميدار المشهور المسمى ابو صده

طبعا ميدار قووي تسند عليه

وهذا صورته


http://im33.gulfup.com/kVb43.jpg (http://www.gulfup.com/?3x4Gh0)



والثاني ميدار اسمه cgs

ميدار قوي تعتمد عليه مع الترديعة المناسبة

وهذا صورته

http://im33.gulfup.com/JbD6L.jpg (http://www.gulfup.com/?0LCrVf)


والميدار الثالث mustad

معروف لدى الجميع اتوقع الاكثر انتشار بالسوق عندنا


http://im33.gulfup.com/YVSVk.jpg (http://www.gulfup.com/?OxXpBd)



الحين نجي للترديع

افضل طريقتين للترديع تابع الصور

http://im42.gulfup.com/8TcaJ.jpg (http://www.gulfup.com/?Ld8HYx)


http://im41.gulfup.com/CBiTQ.jpg (http://www.gulfup.com/?01JNYt)




ترديعه المدور

http://im41.gulfup.com/ED8Bt.jpg (http://www.gulfup.com/?MrUBq5)







هذا افضل الموجود من الميادير

طبعا اللي بيحدق طفاحي في ميدار يجي مخصوصا حق المحاياة

في بدايه ملبس رصاص شي بسيط يغنيك ع البلد

اللي عنده صورة له لايبخل علينا

ننتظر مشاركاتكم

[NOBL3]

هلا اخوي أحمد .. قصدك هالميادير ؟


http://i.imgur.com/CgM0WaV.jpg

http://i.imgur.com/g6U5yUo.jpg

http://i.imgur.com/jB2aTRx.jpg

http://i.imgur.com/WgqpxhU.jpg

[أحمد السوويدي]

اي هذي قواك الله الصورة الثانيه والثالثه

تساعد اللي يحدقون طفاحي بدون بلد


لاتعبت اخوي

[ناسي سنارتي]

ما شاء الله تبارك الله الموضوع متفاعلين معاه شباب وعشان كذا حبيت اضيف لكم صوره صورتها امس طريقة ترديعتي للسبيطي بلد دائري مشبك ثم طرف الرداع قابل للفصل من المشبك عشان اشك الميده


http://im35.gulfup.com/cxC17.png

[م/عبدالله]

موضوع غني بالفائدة والمعلومه... يستحق المتابعة
وفي الحقيقة نحن نبحث عن مثل هذه المواضيع
الثرية شكري الخاص لشخصك
وكل من وضع تعقيب لاكمال صلب الموضوع
وتشييده .

[ذوالجناح7]

قواك الله اخوي ابو حبيب نصايح طيبة ومهمة

اي حركه ازعاج مايقرب السبيطي والتوقيت اهم شي قبل اي حاجه

مشتاقين حق حداق الفجريات

فعلا صيده السبيطي لها طعم خاص

لو تعبي ثلاجه شعري وتصيد سبيطي واحد

رجحت الكفه للسلفر

تابعنا اخوي وفالك طيب

:


تدري مره في أحد طلعاتي لحداق السبيطي في منطقه ممنوعه


أمسكوني أمن المنطقه وصار لي تحقيق من المسؤال الأعلى


وتحقيق وسين وجيم يقول ممكن نطلب لك الشرطه وتوقيف لا يقل 3 ايام :alarm:


علشان جالس تصيد في مكان ممنوع والله أنه قريب بس .......؟؟؟:row:


تعرف شنو قلت له ....؟؟؟:j


والله لوفي ثلاجتى 3 حبات سبيطي وعلى كل حبه يوم تسوى السالفه ...جنون السبيطي :looney:


يقول انت من جدك لهل الدرجه غراااام


ومن مقولاتي حق قروبي لصيد من الطراد كلمتك نفسها حبة سبيطي تساوي ثلاجة شعري :lr


بالتوفيق لك ولباقي الشباب


والله يرزقنا وياكم بالسبيطي العووووووووود مااا أدري كم يطلع وزنه :D

[أحمد السوويدي]

ما شاء الله تبارك الله الموضوع متفاعلين معاه شباب وعشان كذا حبيت اضيف لكم صوره صورتها امس طريقة ترديعتي للسبيطي بلد دائري مشبك ثم طرف الرداع قابل للفصل من المشبك عشان اشك الميده


http://im35.gulfup.com/cxC17.png

قواد الله اخوي ناسي

مشاركة مميزة ومحترفة

والافضل زوريه صغيره طول الاصبع كاملة بدون ماتقطع شي

تدخل الابرة من ورا العين بشي بسيط وتطلعه من قبل الذيل

عشان لادخلت الميدار وفريته ع تحت

صعب السبيطي يشووووفه

ولاعليك امر اذا قدرت تصور الطريقة كاملة راح نكون لك من الشاكرين

ننتظر الجديد

:

[أحمد السوويدي]

موضوع غني بالفائدة والمعلومه... يستحق المتابعة
وفي الحقيقة نحن نبحث عن مثل هذه المواضيع
الثرية شكري الخاص لشخصك
وكل من وضع تعقيب لاكمال صلب الموضوع
وتشييده .

العفو اخوي عبدالله ماسوينا شي

قليل من تبادل الخبرة لتعم الفائدة

اشكرك كل الشباب االي شاركوا واللي بيشاركون

بنهاية الموضوع نطمح لتوفر مادة كاملة لعشاق السلفر

قواكم الله

[أحمد السوويدي]

تدري مره في أحد طلعاتي لحداق السبيطي في منطقه ممنوعه


أمسكوني أمن المنطقه وصار لي تحقيق من المسؤال الأعلى


وتحقيق وسين وجيم يقول ممكن نطلب لك الشرطه وتوقيف لا يقل 3 ايام :alarm:


علشان جالس تصيد في مكان ممنوع والله أنه قريب بس .......؟؟؟:row:


تعرف شنو قلت له ....؟؟؟:j


والله لوفي ثلاجتى 3 حبات سبيطي وعلى كل حبه يوم تسوى السالفه ...جنون السبيطي :looney:


يقول انت من جدك لهل الدرجه غراااام


ومن مقولاتي حق قروبي لصيد من الطراد كلمتك نفسها حبة سبيطي تساوي ثلاجة شعري :lr


بالتوفيق لك ولباقي الشباب


والله يرزقنا وياكم بالسبيطي العووووووووود مااا أدري كم يطلع وزنه :D


وصلت مرحلة الادمان والعشق خلاص خخخخ

تذكر دايم انك طالع للوناسه م تسوى حجز وقلق

شوف حد معرفة قبل تغزي خخخخ

الله يرزقك سبيطي ع راسه نوو وفي بطنه طباق لزق

يونسك هالفترة خخخ

[the dream]

مشكورين ياشباب على الموضوع المميز والردود الحلوة
انا بالنسبة لي افضل اوقات صيده في شقة النور وبداية سقي والطعم يكون مصران
وفي الليل نهاية الثبر والطعم ميد وسلس
وبالتوفيق

[أحمد السوويدي]

اليوم المشاركة عن موضوع مهم جدا في عالم السلفر

هو التدسيع او التزفيرة

عندك كذا حل وشوف المناسب

بالبداية وانت تحدق ع السيف حاول تبعد الخيوط عن بعضها
وحاول انك م تلزق فيها يعني تخلي مسافة سواء ع السيف والا داش الماي لين الركبة

التدسيع يكون حول منطقة صيدك

1- خبز قطعه بيدك ونثره حول منطقه الحداق

2- قشور ربيان .. او كم ربيانه بيدك واحذفها

3- قباقب كسرهم بيدك وعندك خيارين ام تعلقهم بالشيب والا تنثرهم

4- قوطي توونه فتحه شي بسيط والا قضه بسيم وخله حول منطقه الصيد


فكرته الاساسية اما جذب السمكة المطلوبة مباشرة او جذب السمكة الصغيرة لكي يلحقها المطلوب
التدسيع طبعا يكون قبل م تحدق بفترة بسيطة يعني اقلها خمسه دقايق

عشان السمكه تاكل وتوالف ع المحل

اللي عنده نصايح من اخواني الحداقة

فليتفضل مشكور

[أحمد السوويدي]

مشكورين ياشباب على الموضوع المميز والردود الحلوة
انا بالنسبة لي افضل اوقات صيده في شقة النور وبداية سقي والطعم يكون مصران
وفي الليل نهاية الثبر والطعم ميد وسلس
وبالتوفيق

الله يرحم والديك اخوي الحلم

نصايح طيبه من شخص طيب

قواك الله

[ابو حسان اسحق]

ماشاء الله اتعبتوني وانا اتابع دلالة على كرم صاحب الموضوع وفقك الله لما يحب ويرضى تحياتي

[ناسي سنارتي]

قواد الله اخوي ناسي

مشاركة مميزة ومحترفة

والافضل زوريه صغيره طول الاصبع كاملة بدون ماتقطع شي

تدخل الابرة من ورا العين بشي بسيط وتطلعه من قبل الذيل

عشان لادخلت الميدار وفريته ع تحت

صعب السبيطي يشووووفه

ولاعليك امر اذا قدرت تصور الطريقة كاملة راح نكون لك من الشاكرين

ننتظر الجديد

:





الله يسلمك ابشر بس انا قصيت الميده لانها كبيره ولا انا اشكها كامله من عند العين يطلع الميدار او من الفم




اول ماتحصل لي فرصه بسويها وانزل الصور هنا ولايهمك



تحياتي لك

[NOBL3]

وشهي الزوريه يا اخوان ولكم الشكر

[أحمد السوويدي]

ماشاء الله اتعبتوني وانا اتابع دلالة على كرم صاحب الموضوع وفقك الله لما يحب ويرضى تحياتي

جزاك الله ع المشاركة الطيبة

الله يرحم والديك

[أحمد السوويدي]

الله يسلمك ابشر بس انا قصيت الميده لانها كبيره ولا انا اشكها كامله من عند العين يطلع الميدار او من الفم




اول ماتحصل لي فرصه بسويها وانزل الصور هنا ولايهمك



تحياتي لك


تبشرت بالجنة اخوي ناسي قواك الله

كلهم سيان ويؤدون الواجب شكات محترفة نادر يفرط السبيطي منها

في انتظارك اخوي ناسي

[أحمد السوويدي]

وشهي الزوريه يا اخوان ولكم الشكر

الزورية هي الميده الصغيرة

http://www.mekshat.com/pix/upload06/images/2013/10/mk278999_6_12.jpg


تجدي بحدود هالحجم

مفضله وشكه وحده

العفو ماسوينا شي اخوي

[أحمد السوويدي]

اليوم النصيحة ع كذا موضوع ..تابعنا وفالك طيب

يفضل استخدام بلد ثلاثه ارباع خراري

حاول اي شي تشتريه من ميادير او مداور يكون ستانستيل

المحافظه ع الخيوط وقت الرده اغسلهم بماي حلو ولاتتعرضهم للشمس فترة طويلة

الجيم

كل واحد يفضل نوع معين حسب خبرته بالمحل

لكن راح اجمعهم لك في مداخلة وحده لاتدش البحر الا معاك ثنتين منهم

1- اليواف

2- الزورية ( هو الميد الصغير )

3- الربيان

4- الشريب .. صغير القبقب

5 مصران الدجاج

6- صلاخه من الوحره او الدويلمي

7 السلس

8- المنتوسش

اذا وفرت منهم حاجتين وقت الدشه

راح يكون عندك اكثر من اختيار ويساعدك ع الصيد

اللي عنده اضافه او مشاركو او استفسار

فليتفضل مشكورا

:

[NOBL3]

احسنت يالسويدي بارك الله فيك

انا دايماً اصيد منجوس وميد حي .. ياليت تفيدنا عن أنسب طريقة لشك المنجوسة والميده وهي حيه للسبيطي

ولا عليك أمر فيدنا بعد عن افضل شكه للمنجوسه والميده وهي ميته للسبيطي

بالنسبة لي انا ما صدت الا مزيزي واحد في الجبيل والمايه كانت حامية جداً قبل الفجر بساعتين

الترديعة عادية بلد بالاسفل ورداعين فوقه ، ميدارين مقاس ١٢ والطعم خثاق .. لا تسألني شلون ضرب على خثاق

لكن أعرف أحد الصيادين رجال شرواك تخصص سبيطي صاد سبيطين في قعده وحده وانا معاه كل سبيطي يجيله ٨ كيلو

ياخذ صامولي ويقطعه نصين .. ويدخل الميدار ببطن الصامولي ويكبسه بيده بقوه لين يصير مثل القرص

يرميه ويخليه يطفح .. وخيطه ستين

والله العظيم طلع سبيطي لونه كحلي على بنفسجي وبطنه أبيض .. لون غريب اول مره اشوفه بحياتي

هذا اللي عندي ويعطيك العافية

[دابوي]

ما شاء الله اخوي احمد موضوع مميز ومعلومات قيمة عساك على القوة بس لا تخلص السبيطي علينا ترديعة اهل دارين تجيب سبيطي متعافي

[أحمد السوويدي]

احسنت يالسويدي بارك الله فيك

انا دايماً اصيد منجوس وميد حي .. ياليت تفيدنا عن أنسب طريقة لشك المنجوسة والميده وهي حيه للسبيطي

ولا عليك أمر فيدنا بعد عن افضل شكه للمنجوسه والميده وهي ميته للسبيطي

بالنسبة لي انا ما صدت الا مزيزي واحد في الجبيل والمايه كانت حامية جداً قبل الفجر بساعتين

الترديعة عادية بلد بالاسفل ورداعين فوقه ، ميدارين مقاس ١٢ والطعم خثاق .. لا تسألني شلون ضرب على خثاق

لكن أعرف أحد الصيادين رجال شرواك تخصص سبيطي صاد سبيطين في قعده وحده وانا معاه كل سبيطي يجيله ٨ كيلو

ياخذ صامولي ويقطعه نصين .. ويدخل الميدار ببطن الصامولي ويكبسه بيده بقوه لين يصير مثل القرص

يرميه ويخليه يطفح .. وخيطه ستين

والله العظيم طلع سبيطي لونه كحلي على بنفسجي وبطنه أبيض .. لون غريب اول مره اشوفه بحياتي

هذا اللي عندي ويعطيك العافية



الله يرحم والديك اخوي

للميد والمنتوسش الميت عن نفسي افضل طريقة الابرة

اللي هي ادخل الابرة من ورا العين بشي بسيط واطلعه من قبل الذيل

لادخلت الميدار فريته ع تحت

هالطريقة ان شاء الله بينزلها اخونا ناسي بالصور وقواه الله

الميد الحي له طريقه حلوة

وتساعد الناس اللي يحدقون له طفاحي

تلوت الخيط ع العشوة مرتين

عقب تشك الميدار في بداية البطن من الجنب وتطلعه من الجهة الثانيه

هالشكة بتخلي الميده بالووضع هذا ____ طافحه وامورها طيبة

خخخخ ع خثاق رزقك ي ابن الحلال

الله يكتب لك غيره

شوف الخبز سلاح خطير جدا

اول بالهافمون كنا نحدق له طفاحي

نجيب الميدار ونحط الخبز ونجيب له مغاط

ونخليه يروح بالباقه وكان يجيب خير الحمدلله

شوف السبيطي اذا جاك لونه غامق من فوق

دليل ع مرعى السمجة

اذا غامق عايش بغزر او عايش بمنطقة صخرية

هالمعلومه تنطبق ع اغلب السمك

شكرا ع المشاركة ولاتحرمنا الجديد

[أحمد السوويدي]

ما شاء الله اخوي احمد موضوع مميز ومعلومات قيمة عساك على القوة بس لا تخلص السبيطي علينا ترديعة اهل دارين تجيب سبيطي متعافي


الله يرحم والديك عندنا وعندك خير ي ابو عبدالله خخخ

[nasser a]

مشاء الله معلومات وفيره

انا صدته عن طريق التبييت وهو خيط مقاس 0.80 وترديعه الثقل تحت ميدارين فوق الطعم المستخدم ميد
ندخل فيها بحر الى الركبه ونرمي الطعم ونرجع ونخليه الما يضرب


موضوع ممتع

[NOBL3]

تلوت الخيط ع العشوة مرتين

عقب تشك الميدار في بداية البطن من الجنب وتطلعه من الجهة الثانيه

هالشكة بتخلي الميده بالووضع هذا ____ طافحه وامورها طيبة




جزاك الله خير .. والسموحة يخوي انا تعبتك بكثرة الأسئلة ، لكن الغرض هو الفائدة طال عمرك

ما فهمت الكلام اللي كتبته فوق .. ولا عليك كلافه اذا بالإمكان رسم الطريقة هذي

الطعوم الحية أصيدها بالهبل .. من كثرها ارجع فيها البيت وآكلها :D .. أبي استفيد منها لشي كبير




شوف السبيطي اذا جاك لونه غامق من فوق

دليل ع مرعى السمجة

اذا غامق عايش بغزر او عايش بمنطقة صخرية




صدقت .. الرجال صايده في منطقة صخرية عمقها ما يتجاوز 6 متر

[أحمد السوويدي]

مشاء الله معلومات وفيره

انا صدته عن طريق التبييت وهو خيط مقاس 0.80 وترديعه الثقل تحت ميدارين فوق الطعم المستخدم ميد
ندخل فيها بحر الى الركبه ونرمي الطعم ونرجع ونخليه الما يضرب


موضوع ممتع

صحيح هذي بعد طريقها يستفيد منها المتابع

بس لو تخليها ميدار واحد فقط بيكون ارجى


لاتعبت ع المشاركة وننتظر الجديد

[أحمد السوويدي]

جزاك الله خير .. والسموحة يخوي انا تعبتك بكثرة الأسئلة ، لكن الغرض هو الفائدة طال عمرك

ما فهمت الكلام اللي كتبته فوق .. ولا عليك كلافه اذا بالإمكان رسم الطريقة هذي

الطعوم الحية أصيدها بالهبل .. من كثرها ارجع فيها البيت وآكلها :D .. أبي استفيد منها لشي كبير





صدقت .. الرجال صايده في منطقة صخرية عمقها ما يتجاوز 6 متر




تلف الخيط ع ذيل الميده مرتين

بعدها تشكها من الجنب ويطلع من الجنب الثاني من البطن

يكون الراس ماصاده الميدار

اتمنى كذا تكون واضحه واذا ماوصلت ابشر اصور لك

تزعلني اذا طلعت مسوي نفسك فاهم وانت ماطبقت الطريقة

اسال واستفسر خذ راحتك

[ABOKHALID1]

بيض الله وجهك اخوي احمد .

[أحمد السوويدي]

بيض الله وجهك اخوي احمد .

ووجهك ابيض اخوي ابو خالد

[أحمد السوويدي]

بسم الله الرحمن الرحيم

السلام عليكم ..صبحكم الله بالخير

اليوم بنتكلم عن طريقة صيد السبيطي عن طريق اللفاح

اللفاح ....

فيه قواعد آساسية لازم تعرفها وتمشي عليها

1- اللفاح يكون في بداية السقي
2- سرعه الطراد من 7 الى 10
3- اللفاح يكون عكس التيار
4- لازم تحرك اليد اثناء مسك الدرية
5- اذا ضرب عليك لاتعطيه فرصة .. سحبه باقصى سرعة
6- اللفاح يكون في منطقة فيها سبيطي .. او عند كاسر الامواج او حول الجزر او بالدردور
7- اسحبه وانت تمشي انتبه توقف الطراد

الحين نجي حق ترديع الدرية كامل من الالف الى الياء

اهل السنارات يمديهم يطبقون الطريقة بس راح يكون تشخيط

تسحب ع اقل من مهلك واذا شفت حولها شي .. تسحب بسرعه وترخي تسحب بسرعه وترخي لين ما يضرب المطلوب

عندك اربع مقاسات ويفضل تسويهم كلهم كلهم

http://www.mekshat.com/pix/upload05/images253/mk278999_tyjtyjtyj.jpg




طبعا هذي الربطة اللي تمسك فيها الدرية

تسوي لك عقدة عشان تسحب وترخي طول مدة اللفاح

لك حرية الاختيار تحط لها سيم او بلد خراري مقاس نص في منتصف الدرية







الادوات المستخدمة عندك كذا فكره بس الاهم شي ماينزل كثير

الالوان السلفر والابيض والذهبي الوان نهارية

الاحمر والوردي والبرتقالي الوان ليلية .. تقدر تلفح له بالليل



http://www.mekshat.com/pix/upload05/images253/mk278999_bagley-finger-mullet.jpg


السلس يجي منه كسرتين او ثلاث

http://www.mekshat.com/pix/upload05/images253/mk278999_rapala-1.jpg


الربيانه البلاستيك يجي هالنوع ويجي بدون ميدار انت تركب لها

http://www.mekshat.com/pix/upload05/images253/mk278999_sskhk.jpg











الحين الترديعة

http://www.mekshat.com/pix/upload05/images253/mk278999_rapalaknot1.jpg






الحين عندك فكره تقدر تبدا منها لفاح السبيطي

طبعا لمن تصيده لفاح ترا غير الوناسة تصير دبل تايم خخخ

اتمنى من الاخوان اللي عنده اضافه او تعديل فليتفضل مشكورا

واللي عنده استفسار لايتردد


قواكم الله

[ABOKHALID1]

مساء الخير يا اخوان.
هل في احد قد صاد سبيطي لفاح من السيف او كرنيش او جسر مثلا" بسمكه صناعيه او طبيعيه (ميته)؟. مثلا" يحذف و يسحب بسرعه. هل هي عمليه؟.
مشكورين.

[hunter78]

ما شاء الله موضوع مميز
الله يعطيكم العافية ويوفقكم

[أحمد السوويدي]

مساء الخير يا اخوان.
هل في احد قد صاد سبيطي لفاح من السيف او كرنيش او جسر مثلا" بسمكه صناعيه او طبيعيه (ميته)؟. مثلا" يحذف و يسحب بسرعه. هل هي عمليه؟.
مشكورين.


مساء النور

عن نفسي مطبق هالتكنيك جديد

لكن ادخل اليوتيوب واكتب .. حداق المركب دارين

شوفها مباشر

وللحديث بقية اخوي ابو خالد

[أحمد السوويدي]

ما شاء الله موضوع مميز
الله يعطيكم العافية ويوفقكم



الله يرحم والديك اخوي هنتر

قواك الله

[White_Shark]

السلام عليكم ورحمة الله وبركاته

شكراً لك أخوي / احمد السويدي

معلومات مفيدة ومنوعة لعشاق السلفر ومتابعة ممتازة للموضوع , ولدي تعقيب بسيط بالنسبة لصيد السبيطي " لفاح " , نعم بالإمكان صيد السبيطي باللفاح ولكنها حالات نادرة , ولا انصح بها على السيف لأنها ستكون متعبة وغير عملية .

وأود أن أضيف طعم أساسي للسبيطي وهو ( النغاق ) .

تقبل تحياتي ,,

[أحمد السوويدي]

السلام عليكم ورحمة الله وبركاته

شكراً لك أخوي / احمد السويدي

معلومات مفيدة ومنوعة لعشاق السلفر ومتابعة ممتازة للموضوع , ولدي تعقيب بسيط بالنسبة لصيد السبيطي " لفاح " , نعم بالإمكان صيد السبيطي باللفاح ولكنها حالات نادرة , ولا انصح بها على السيف لأنها ستكون متعبة وغير عملية .

وأود أن أضيف طعم أساسي للسبيطي وهو ( النغاق ) .

تقبل تحياتي ,,


وعليكم السلام ورحمة الله وبركاته

صادق اخوي متعبه اذا كنت تحدق بالقبه

ام اذا سنارة بتسهل عليك الامور

فيه نوع من السنارات طولهم تقريبا متر ونص

احسه سريع سريع وبتساعد بالعملية

الاماكن السيف حول مرعى السبيطي .. كورنيش الصناعيه .. الفرضه القديمة .. الصبيات اللي حول المخيمات

يعني اماكن طيبة

النغاق صحيح يعشقه السبيطي

قواك الله اخوي وايت شارك

نتحرا مشاركاتك

[ملح]

النغاق نقص راسه والا نشكه على حالته

[حداق الخبر]

السلام عليكم ورحمة الله وبركاته



حياكمم الله جممميع الشكر


الشكر موصول لكم ولصاحب الموضوع لطرحه


اتمنى تعم الفائده لي ولكم ،،،



لكل سمكه سلوك ونمط معيين يختلف من سمكه الى سمكه


والسبيطي له سلوك ونمط يخلتف كثييراًعن باقي الاسماك حيث انه حيير العلماء والصيادين في طريقه صيده :D


ايضاً السيبيطي يختلف اكله ومرعاه من منطقه الى أخرى


على سبيل المثال فيه منطقه تحدق فيها بميــد والسبيطي موجود لكنه مايكل لكن لما تحط له مصران على طول تصيده والعكس صحيح




افضل انواع الطعوم معروفه لدى الجميع واببتدي بالمفضل لدي



الجواف ، الميد ، المصران ، المنكوس ، الخبز


يليها السلس ، الصلاخة الحاقول



لكن تأكد اذا السبيطي جوعان فراح ياكل اي شي يشوفه تأكد راح يظرب على اي طعم تحطه له لكن احتمالية الصيد في الدرجة الاولى الطعم يكون جديد توك صايده



كل ما قل حجم الخيط ،، زادت فرصة صيده


ف فيه ناس تصيده على مدات بخيط 80 وفيه ناس تصيده على خيط 40



انا شخصياً حداقي على السيف والخيط اللي احطه 50 / 40 وهي من نوع تي فورس الازرق او الاحمر فقط


نوع والترديعه :) ،،، الترديعه 31 او 37 ،،، نعم لا تستغربون الترديعه اللي ذكرتها والسبب ثقتي بالله وبعدها بجودة الخيط اللي استخدمه في السحب وفي الترديعه وراح اعرض لكم صورته وهو اسمه ماكسييم
اقوى خيط بالعالم له دعايه في اليوتيوب لما تكتب في قوقل اقوى خيط بالعالم بيظهر لك دعايته


تو ساحب عليه ضلعه تسسسحيب ولا انقطع :D





الميادير :


كنت استخدم ميدار مجنون لونه رمادي موجود عند الربان البحري بوريكم صورته وميزته مايصدي + اشنكار تبعه حاد وطويل بحيث انه ماينفك بسهوله


حالياً استخدم الميدار المثلث صغيير حييل واشك الميده من ورا الين قبل الراس الخياشييم واخلي واحد من الشناكير مغروز داخل الخياشييم واثنين برا على خفيف ماتبين بشكل واضح مثل ماتشوفون بالسبيطي المسدوح مبين في طرف فمه




للعلم : مسأله السبيطي مايحب الازعاج كلامكم صحيح لكن تراني صدته في اماكن فيها ابو الازعاج في العزيزيه اذا تعرفونها وطلعت اكثر من واحد فعشان كذا قلت لكم ترا كل منطقه فيها سبيطي له نمط معين وسلوك معين



اترككم مع بعض الصور وفالكم السبيطي بهالموسم


أخوكم : يحيى حسين ( ابومتعب )


http://im33.gulfup.com/4fUlg.jpg (http://www.gulfup.com/?7hoXMB)


http://im33.gulfup.com/esGU8.jpg (http://www.gulfup.com/?dWZ6ni)



http://im35.gulfup.com/RE3oY.jpg (http://www.gulfup.com/?gPLCZA)

[أحمد السوويدي]

اذا حجمه صغير خله كامل

اما اذا غير قصه

ويفضل فرش ميت

حياك الله

[White_Shark]

النغاق نقص راسه والا نشكه على حالته

بعد إذن أخوي / احمد السويدي , النغاق صغير ويفضل تشكه كامل , ونادرا ماتلقى واحد كبر الكف هذا اللي تقصه نصين .. وللمزيد من التفاصيل ادخل عبر الرابط :

http://www.mekshat.com/vb/showthread.php?t=501926

[أحمد السوويدي]

السلام عليكم ورحمة الله وبركاته


حياكمم الله جممميع الشكر

الشكر موصول لكم ولصاحب الموضوع لطرحه

اتمنى تعم الفائده لي ولكم ،،،


لكل سمكه سلوك ونمط معيين يختلف من سمكه الى سمكه

والسبيطي له سلوك ونمط يخلتف كثييراًعن باقي الاسماك حيث انه حيير العلماء والصيادين في طريقه صيده :D

ايضاً السيبيطي يختلف اكله ومرعاه من منطقه الى أخرى

على سبيل المثال فيه منطقه تحدق فيها بميــد والسبيطي موجود لكنه مايكل لكن لما تحط له مصران على طول تصيده والعكس صحيح



افضل انواع الطعوم معروفه لدى الجميع واببتدي بالمفضل لدي


الجواف ، الميد ، المصران ، المنكوس ، الخبز

يليها السلس ، الصلاخة الحاقول


لكن تأكد اذا السبيطي جوعان فراح ياكل اي شي يشوفه تأكد راح يظرب على اي طعم تحطه له لكن احتمالية الصيد في الدرجة الاولى الطعم يكون جديد توك صايده


كل ما قل حجم الخيط ،، زادت فرصة صيده

ف فيه ناس تصيده على مدات بخيط 80 وفيه ناس تصيده على خيط 40


انا شخصياً حداقي على السيف والخيط اللي احطه 50 / 40 وهي من نوع تي فورس الازرق او الاحمر فقط

نوع والترديعه :) ،،، الترديعه 31 او 37 ،،، نعم لا تستغربون الترديعه اللي ذكرتها والسبب ثقتي بالله وبعدها بجودة الخيط اللي استخدمه في السحب وفي الترديعه وراح اعرض لكم صورته وهو اسمه ماكسييم
اقوى خيط بالعالم له دعايه في اليوتيوب لما تكتب في قوقل اقوى خيط بالعالم بيظهر لك دعايته

تو ساحب عليه ضلعه تسسسحيب ولا انقطع :D




الميادير :

كنت استخدم ميدار مجنون لونه رمادي موجود عند الربان البحري بوريكم صورته وميزته مايصدي + اشنكار تبعه حاد وطويل بحيث انه ماينفك بسهوله

حالياً استخدم الميدار المثلث صغيير حييل واشك الميده من ورا الين قبل الراس الخياشييم واخلي واحد من الشناكير مغروز داخل الخياشييم واثنين برا على خفيف ماتبين بشكل واضح مثل ماتشوفون بالسبيطي المسدوح مبين في طرف فمه



للعلم : مسأله السبيطي مايحب الازعاج كلامكم صحيح لكن تراني صدته في اماكن فيها ابو الازعاج في العزيزيه اذا تعرفونها وطلعت اكثر من واحد فعشان كذا قلت لكم ترا كل منطقه فيها سبيطي له نمط معين وسلوك معين


اترككم مع بعض الصور وفالكم السبيطي بهالموسم

أخوكم : يحيى ( ابومتعب )



قواك الله اخوي ابو متعب

مشاركة طيبة تحمل الكثير من الفايدة

ماهي غريبة عليك ي ولد الخبر

نتحرا الصور

[أحمد السوويدي]

بعد إذن أخوي / احمد السويدي , النغاق صغير ويفضل تشكه كامل , ونادرا ماتلقى واحد كبر الكف هذا اللي تقصه نصين .. وللمزيد من التفاصيل ادخل عبر الرابط :

http://www.mekshat.com/vb/showthread.php?t=501926




لاهنت اخوي وايت ع التعديل

انا قريت الاسم وراح البال ع سمكة ثانيه

ومع التفكير طرا ع بالي كم شغله ماذكرناها

الحاسوم والزمرور

قواك الله

[حداق الخبر]

أبي ارفع بعض الصور ومو راضي والسبب حجمها لأنها مصوره من آيفون ،،

وش الحل ؟

[أحمد السوويدي]

صغرها عن برنامج الرسام

والا ارفعها من موقع ثاني

[زاحف بحر]

اشكرك أخوي يالغالي على الطرح المتميز ..


بصراحة استفدت من الموضوع بشكل كبير في كيفية صيد السبيطي ..




يعطيك العااافية ,,








تسلم الايادي

[أحمد السوويدي]

اشكرك أخوي يالغالي على الطرح المتميز ..


بصراحة استفدت من الموضوع بشكل كبير في كيفية صيد السبيطي ..




يعطيك العااافية ,,










تسلم الايادي



الله يرحم والديك اخوي زاحف

اي استفسار قريبين

[أحمد السوويدي]

صبحكم الله بالخير جميع

اليوم نتشارك في موضوع طيب جدا

مثلا .. كنت تتمشى ع السيف وتبي تعرف هالمحل فيه سلفر والا لا

شلون تعرف قبل تقط خيووطك

1- نبر الشعم

واللي عنده معلومة ويحب يشارك يتفضل

الحين بتطلع الخبرة

[White_Shark]

مثلا .. كنت تتمشى ع السيف وتبي تعرف هالمحل فيه سلفر والا لا

شلون تعرف قبل تقط خيووطك


هنالك عدة مؤشرات تفيدالصياد بوجود سبيطي في المنطقة , بعضها يأتي من واقع خبرة , وبعضها تأتي بواسطة خبر منتشر بأن فلان صاد سبيطي في ذلك المكان .. لكن بالنسبة لي ابحث عن المواقع التي يحب أن يرعي فيها السبيطي مثل :
- البطوح الرملية التي تنكشف اثناء الجزر وتتغطى بارتفاع معقول اثناء المد .
- الارض التي يوجد بها حفر كثيرة وكبيرة تدل على أنها مراعي للسمك ومنها السبيطي.
- المناطق الرملية القريبة من الصخور .
- المناطق التي يوجد بها بقايا ( اصداف صغيرة , قبقب ) وفي بعض الاحيان تجد بقايا القبقب منثره على الشاطيء .
- الاراضي العشبية الغير كثيفة .
- بعض الخيران القريبة من البطوح يتواجد فيها السبيطي .
- مناطق تجمع الميد والمنشوس توحي ايضاً بوجود السبيطي .

هذا مايحضرني حالياً :).. شكراً لكم .

[أحمد السوويدي]

هنالك عدة مؤشرات تفيدالصياد بوجود سبيطي في المنطقة , بعضها يأتي من واقع خبرة , وبعضها تأتي بواسطة خبر منتشر بأن فلان صاد سبيطي في ذلك المكان .. لكن بالنسبة لي ابحث عن المواقع التي يحب أن يرعي فيها السبيطي مثل :
- البطوح الرملية التي تنكشف اثناء الجزر وتتغطى بارتفاع معقول اثناء المد .
- الارض التي يوجد بها حفر كثيرة وكبيرة تدل على أنها مراعي للسمك ومنها السبيطي.
- المناطق الرملية القريبة من الصخور .
- المناطق التي يوجد بها بقايا ( اصداف صغيرة , قبقب ) وفي بعض الاحيان تجد بقايا القبقب منثره على الشاطيء .
- الاراضي العشبية الغير كثيفة .
- بعض الخيران القريبة من البطوح يتواجد فيها السبيطي .
- مناطق تجمع الميد والمنشوس توحي ايضاً بوجود السبيطي .

هذا مايحضرني حالياً :).. شكراً لكم .



قواك الله اخوي وايت شارك

مشاركة دسمة ووافية معلومات طيبة

اتمنى من الاخوان يستفيدون كلهم

لان هالكلام م تحصله بمكان ثاني


اللي عنده استفسار او اضافه يتفضل

[أحمد السوويدي]

اسم المشاركة اليوم بحر مفتوح

اللي عنده اي اضافه او استفسار او او او

الموضوع بيتم يومين

عقب نبدا الموضوع الثاني من سلسله قدم نصيحة

اللي عنده شي لايرده الا كيبورده

[NOBL3]

يعطيكم العافية .. سؤالي لبن شارك ولبقية نواخذة السبيطي الكرام

الترديعة المناسبة للسبيطي وشهي ؟

واذا ضرب على اللعفة .. متى أشد عليه ؟

وبالنسبة للنعاق .. أوقات ألاقيه لكن ما أعرف من وين وكيف أشكه

وجزاكم الله خير

[White_Shark]

يعطيكم العافية .. سؤالي لبن شارك ولبقية نواخذة السبيطي الكرام



الترديعة المناسبة للسبيطي وشهي ؟


واذا ضرب على اللعفة .. متى أشد عليه ؟


وبالنسبة للنعاق .. أوقات ألاقيه لكن ما أعرف من وين وكيف أشكه



وجزاكم الله خير


توجد ثلاث ترديعات مناسبة للسبيطي :
الأولى : الميدار أولاً ثم الثقالة متحركة ( يعني ادخل الثقالة في الخيط بدون ربطها ثم اربط الميدار في طرف الخيط ) .. وهي المفضلة بالنسبة لي .

الثانية : نفس الطريقة ولكن اربط الثقالة بالخيط بمسافة باع (60-70 سم ) عن الميدار .

الثالثة : الميدار يكون في طرف الخيط وبعد مسافة باع يركب مدور وبعدها ثقالة متحركة .


بالنسبة لطريقة سحب السبيطي :

أول مايسحب السبيطي أمسك الخيط مع شدة خفيفة للتأكد من الميدار عالق ( لأن في بعض الأحيان يعض اللعفه ويهرب بها ) إذا تأكدت بأن الميدار عالق الآن يجي دور المسايسه - اسحب بهدوء ( فقط اجعل الخيط مستقيم ) لاتخليه يرتخي ولا تخليه مشدود مع السحب دون الضغط بإصبعك على الخيط وذكرت ذلك في مشاركة سابقة حتى تتضح الصورة لك ( تخيل بأن يدك فيها فازلين وأنت تسحب الخيط ) :) لأوضح لك طريقة الشد .

بالنسبة لطريقة شك النغاق يفضل من الظهر سواء كان حي أو ميت , مع جعل طرف الميدار خارج قليلاً .. أو إذا كان عندك وقت استخدم الابرة .

تقبل تحياتي ,,

[بحر الكلام999]

انا صدت جميع انواع السمك في بحر الخليج الا سمكتين ماقد صدتها السبيطي والكنعد

[NOBL3]

lAxc2LDjbfg

[NOBL3]

جزاك الله خير يابن شارك على افادتك وتوضيحك

بارك الله فيك

[بحر الكلام999]

انا باقولكم صت كل شي بالبحر الا نوعين السبيطي والكنعد اذكر مره دخلنا بطراد من الجبيل واتجهنا لراس ابو علي ووقفنا وقلنا بسم الله طبعا دايما تردعيتي اخلي الميدار اول وبعدين نص متر وعقبها البلد والله يضرب عندي سمك متوحش شعري فيه 3 كيلو تقريبا بالنسبه لهذي الترديعه العمق يمكن 5 متر تحتنا المهم يوم قلت يانا ياسيبيطي هذا وجالس اقص في هالميد وارمي الا وشو ضرب الخيط عندي قلت بس جاك الحبيب واسحب واطلعه الا هامور 3 كيلو فيه تقريبا خخخخخخخخخخخخخخخخخخخخخخخخخ ياريتني فكرت احدق للهامور كان طلع سبيطي ههههههههههههههههههههههههههه لكن الحمدالله احسن من لا شي

[عمر الخطير]

السلام عليكم
يا شباب انا مبتدأ هنا في الشرقية وتسلموا على المعلومات القيمة وعندي كم سؤال كدا
ايش يعني الثبر والسقي ؟
وهل ينفع البني والحبار الاحمر في صيد السبيطي ؟
اعذروني لسع دوبي جاي من جدة هههه

[ABOKHALID1]

السلام عليكم
يا شباب انا مبتدأ هنا في الشرقية وتسلموا على المعلومات القيمة وعندي كم سؤال كدا
ايش يعني الثبر والسقي ؟
وهل ينفع البني والحبار الاحمر في صيد السبيطي ؟
اعذروني لسع دوبي جاي من جدة هههه

الثبر = الجزر
السقي=المد
الحبار الاحمر الصغير او( الكلماري)الحبار الاحمر غير مرغوب الاستخدام في الشرقيه عموما" ولا اعرف السبب.
البني=(الاسم غير معروف ) اذا تقصد سمكه صغيره حيه جربها ان شا الله تنفع.

[عمر الخطير]

البني قصدي فيه السلماني

[أحمد السوويدي]

lAxc2LDjbfg



يعور القلب المقطع ههههه

لاهنت اخوي

[أحمد السوويدي]

انا باقولكم صت كل شي بالبحر الا نوعين السبيطي والكنعد اذكر مره دخلنا بطراد من الجبيل واتجهنا لراس ابو علي ووقفنا وقلنا بسم الله طبعا دايما تردعيتي اخلي الميدار اول وبعدين نص متر وعقبها البلد والله يضرب عندي سمك متوحش شعري فيه 3 كيلو تقريبا بالنسبه لهذي الترديعه العمق يمكن 5 متر تحتنا المهم يوم قلت يانا ياسيبيطي هذا وجالس اقص في هالميد وارمي الا وشو ضرب الخيط عندي قلت بس جاك الحبيب واسحب واطلعه الا هامور 3 كيلو فيه تقريبا خخخخخخخخخخخخخخخخخخخخخخخخخ ياريتني فكرت احدق للهامور كان طلع سبيطي ههههههههههههههههههههههههههه لكن الحمدالله احسن من لا شي


خخخخ كله خير وبركة اخوي

ابو علي مليان عاد م يبيله

يواف بس والله يكتب لك الخير

[أحمد السوويدي]

البني قصدي فيه السلماني

ينفع اخوي بس دامك بالشرقية

عليك باليواف او الميد او المصران

[أحمد السوويدي]

الحمدلله ع كل حال

الموضوع استوفى حقه

كل الشكر للاخوان كلن بآسمه اللي ساهموا في نجاح الموضوع

شاركوا ونصحوا وافادوا

قواكم الله هذا العشم ي اخوان


تحيتي لكم آخوكم

آحمد السويدي

[عمر الخطير]

يعطيك العافية

[أحمد السوويدي]

الله يرحم والديك اخوي عمر

: