فزعتكم يا شباب تكفون؟؟؟

[raid2011]

السلام عليكم

عندي باجيرو موديل 2007 ستاندر 3.8

قبل شهر وانا امشي قام يتفتف تقل ما يبي بنزين واذا دعست له زادة التفتفه ويوم وقفته بالبيت جته نفضه وطفى وشغلته وطلع صوت طقطقه داخل الكبوت صوت متواصل

خليته يوم وبعدها شغلته جته التفتفه شوي وبعدها صفى وجلس حدود الشهر

ويوم جاء قبل كم يوم رجعت له الحالة نفسها جلست حدود الساعه وراحت

قبل أمس جته وبعدها استمر صوت الطقطقه مريت على ميكانيكيين الاول قال الصوت داخل الماكينة من السبايك ومحتاج توظيب

والثاني قال الصوت داخل الماكينة من البساتم ومحتاج توظيب

ولا ادري أنا رغم ان السيارة ما اشتكيت من الحرارة ابد

حتى السيارة ما مشت كثير ماشية 157 ألف بس

وش رايكم يالربع واهل الخبرة

[1824]

والله اعلم طرمبة زيت بس لا تمشي على الموتر عشان ما تضرب البساتم او تجيم السبايك اسطحها وغير طرمبة الزيت

والتفتفه معروف المكينة يبيلها تصفية من بواجي الى اسلاك وفلاتر بنزين ومكينة وتنظيف الثروتل بالتوفيق اخي الكريم واذا في اسأله ثانية موجودين بالخدمة

[raid2011]

والله مدري بس الصوت متواصل وداخل الماكينه

البواجي عندي جديدة

[1824]

الصوت من الطرمبة حقت الزيت التفتفه اذا ما كانت قوية فلاتر بنزين وهواء حق المكينة واسلاك بواجي اذا سيارتك اسلاك وسيور وبأذن الله ترجع احسن مما كانت

اهم شيء لا تمشي على الموتر خله وغير طرمبة الزيت اهم شيء قبل ما يخرب شيء بالمكينة وتحتاج توضيب بعدها هذي بس طرمبة زيت وطقم وجيه وخلصنا

[raid2011]

تسلم يالغالي طيب ممكن يكون الخلل من الكويلات

طبعا عندي ثلاث كويلات طفيت السيارة و فصلت الاول وشغلتها ما تغير الصوت وبعدها شبكته

نفس الطريقة فصلت الثاني وما تغير الصوت وشبكته

يوم فصلت الثالث قايم يتفتف وتقل بيطفى طفيت السيارة وشبكته ورجع طبيعي باستثناء طبعا صوت الطقطقة المتواصل

[أطلال نجد]

أخوي المفروض أنك ما مشيت عليها من أول مرة سمعت فيها الصوت

مثل ما قال أخونا ١٨٢٤

خذ السيارة في سطحة و على أقرب متخصص في الميتسوبيشي

إذا كنت في الرياض فيه ورشة يافع و هذا رقمه 0561092608 و هذا رقم متخصص باجيرو 0502057739

بالتوفيق ،،،

[باجيرو gool]

هلابك اخوي رائد
انا كان عندي مرانو نيسان سوابي زي كذا بس كان
يدخن والسبب واحد من مسامير الثلاجه تراها صغيره
انفك وطاح وسط المكينه وقام يلعب بالمكينه مره يطلع
صوت ومره يروح وبالاخير غيرت مكينه .
افضل حل انك تروح لمخرطه كويسه وتفحص السرندل والبساتم قبل
ماتوضب .

[ابو هنادي .]

صوت الطقطقه من سير التايمن (جنزير المكينه) لان هو اللي دايم يسوي طقطقه بالمكينه ويجب تغييره باسرع وقت ولا بيعدم عليك المكينه باكملها لو انقطع ... التفتفه هذي لها عده احتمالات .. ربما تنظيف بخاخات .. او تنظيف ثروتيل .. او تصفيه مكينه ( تغيير فلتر هوا وفلتر بنزين وبواجي ) هذا والله اعلم