المساعد الشخصي الرقمي

مشاهدة النسخة كاملة : وين يباع المرقد الطيب (كيس نوم) الرياض


Abu Saad
18/10/2006, 03:46 AM
غير حقين الشرع في البطحاء ..
ماتخبرون محل رحلات يبيع مراقد طيبة .. وجزاكم الله خير مقدما ..
ان حصل تفصيل في الوصف والسعر ومكان المحل .. يكون اطيب .
في انتظاركم يا اخواني.
طارق الحربي
18/10/2006, 07:44 AM
اخي الكريم

لا تبعد عنهم


اللي تلقاه ب 250 ريال تلقاه برا ب 450 ريال

نصيحه اشتر منهم

وتلقى على اللي انت تبي والمقاس اللي تبي والزيادات اللي تبي

بس احرص بالمكاسر واسأل بأكثر من محل

وانتبه فيه فرو وتنزاني اصلي

انا شريت واحد تنزاني اصلي ب 140 ريال قبل سنه


تحياتي
فتى الوادي
18/10/2006, 08:28 AM
السلام عليكم ....


أنا كذلك أنصحك بالغرابي اللي في البطحاء ...
فيه محلات أخرى في شارع التخصصي ( الرميح ) ومحلات أخرى لكن نوعيتها ما تتناسب مع جو المملكة وتضاريسها وتجدها غالية جداً ...
ابوعلي7
18/10/2006, 01:09 PM
حقين الغرابي، لاتقربهم ، كلهم بنجاليه غشاشين، ولا ينفع لهم الا واحد عنده خبره،،، وعليك بأحد نوعين:

* السنيدي( عندهم عدة انواع خذ اغلى واحد هو الأفضل _ اذا كانت طلعاتك بالشتا واجد_
* فيه ايضا فراش ( الدريويش) فيه محل يبيعه اسمه الجنادريه ( بالغاله) الدايري الشرقي مخرج (17)بإتجاه الغرب ماأدري رقم الإشاره اللي تلف معها يسار ( الشارع كله معارض ، يجيك محله على اليمين بعد منتصف الشارع تقريبا) وابدور تلفونه اذا حصلته أرسلته لك، بإذن الله
ابونايف الروقي
18/10/2006, 01:23 PM
حقين الغرابي، لاتقربهم ، كلهم بنجاليه غشاشين، ولا ينفع لهم الا واحد عنده خبره،،، وعليك بأحد نوعين:

* السنيدي( عندهم عدة انواع خذ اغلى واحد هو الأفضل _ اذا كانت طلعاتك بالشتا واجد_
* فيه ايضا فراش ( الدريويش) فيه محل يبيعه اسمه الجنادريه ( بالغاله) الدايري الشرقي مخرج (17)بإتجاه الغرب ماأدري رقم الإشاره اللي تلف معها يسار ( الشارع كله معارض ، يجيك محله على اليمين بعد منتصف الشارع تقريبا) وابدور تلفونه اذا حصلته أرسلته لك، بإذن الله


هذا الكلام عليك بالدريويش ولا تاخذ من داخل فرو خذ مخمل ازين .
Abu Saad
18/10/2006, 04:15 PM
الله يجزاكم خير على التوضيح ..
اخوي ابوعلي في انتظار الوصف او التلفون وكم سعره عندهم (الجنادرية)..
في انتظار المزيد من المحلات..
ابوعلي7
18/10/2006, 09:17 PM
الله يجزاكم خير على التوضيح ..
اخوي ابوعلي في انتظار الوصف او التلفون وكم سعره عندهم (الجنادرية)..
في انتظار المزيد من المحلات..


أخوي الله يرحم والديك ، كأنك بتصير متعهد الجيش، هو فراش بيعيش عندك بإذن الله سنوات،وثق أنه حسب علمي لا يوجدأفضل من فراشي الدريويش والسنيدي وأنا أفضل الأول ،،، وعلى كل حال أنا عطيتك الوصف بالرد ألأول فكيف تكرر طلبه، وبالنسبة للهاتف فهة (2412866) وأعانك الله على لغة الهندي
راعي الهـــدد
18/10/2006, 09:24 PM
نصيحه لاتعدى الدريويش الأصلي

ترى تلقى ختمه عليه من برى رقعة كبر جدي هههه

وخذ فرو

تراه رهيب وعملي اكثر من غيره

ويفي باحتياجات البر على مدار العام

من ناحية ان كنت في الشتاء فيدفيك والله ماتشوف البراد حتى لو نمت في الهواء

وإن كنت في الصيف فكذلك رهيب

كل ماعليك تفتح الغطاء يعني ماتسكر الفراش عليك

وتتلحف إذا بغيت بلحاف رقيق يكون معك بالفراش

وسوف تجد هذا الفراش عملي وجوده عاليه

بالعربي ترتاح مره

بس فيه عيب ويعتبر مقبول بالنسبه لمميزاته الباقيه

الي هو الكبر شوي

تقدر تقصر من مقاساته بعدين على كيف ماتبي

على العموم فراش الدريويش وبس
Abu Saad
18/10/2006, 10:03 PM
أخوي الله يرحم والديك ، كأنك بتصير متعهد الجيش، هو فراش بيعيش عندك بإذن الله سنوات،وثق أنه حسب علمي لا يوجدأفضل من فراشي الدريويش والسنيدي وأنا أفضل الأول ،،، وعلى كل حال أنا عطيتك الوصف بالرد ألأول فكيف تكرر طلبه، وبالنسبة للهاتف فهة (2412866) وأعانك الله على لغة الهندي

ماقصرت يبوعلي ولاهنت ..
وارجو انك ماتزعل يومني طلبت المزيد من المحلات وهو من باب زيادة الاطلاع على النوعيات ومعرفة الانواع ..
وكررت طلب الوصف لانك ماتأكدت من الاشارة اللي الف معها يسار ..
عموما مشكور على فزعتك وبيض الله وجهك ..
وناوي اطمر لهم ذالحين ان شاء الله تعالى ..واذا رجعت عطيتكم العلوم .
اخوك
ددسن
ابوعلي7
18/10/2006, 11:30 PM
ماقصرت يبوعلي ولاهنت ..
وارجو انك ماتزعل يومني طلبت المزيد من المحلات وهو من باب زيادة الاطلاع على النوعيات ومعرفة الانواع ..
وكررت طلب الوصف لانك ماتأكدت من الاشارة اللي الف معها يسار ..
عموما مشكور على فزعتك وبيض الله وجهك ..
وناوي اطمر لهم ذالحين ان شاء الله تعالى ..واذا رجعت عطيتكم العلوم .
اخوك
ددسن

لا ولا يهمك ، هذا من باب المزح فقط ، وبالنسبه للفراش انا قريت احد الأخوان أشار عليك ، بالفرو( عندهم ثلاث انواع: فرو، مخمل، عادي) العادي لاتقربه، المفاضلة بين المخمل والفرو، وانا عندي الاثنين ، عيب الفرو يمسك الرمل شوي،لاكنه ادفأ ، وعلى كل حال الفرق بينهن بالسعر (30) ريال ، الفرو أغلى

الله يوفقك ويجعلها نومة العافيه فيه
Abu Saad
18/10/2006, 11:37 PM
شريناه يبوعلي ..

وصف محل الجنادرية:

مخرج 17 غرب اول اشارتين(ورى بعض متقاربات يعني) تعدهن ثالث اشارة رح يسار (جنوب ) امش حوالي 500 متر يجي المحل على يمناك ...


انواع المفرش الداخلي :

1- فرو 330 ريال
2- مخمل.300 ريال
3- قماش عادي .270 ريال


اخذت النوع الثالث قماش :) .. الصراحة كنت ناوي اخذ مخمل ولكن نوع المخمل ولونه اللي موجود عندهم حالياً لك عليه ( الوان هنود).
وبالنسبة للفرو زي ماتفضلت حتى الهندي اللي في المحل يقول لاتاخذه يمسك التراب .
واخذنا القماش لونه زيتي ونظرته مهيب شينه طبا الشراع الخارجي لونه رملي وضد الماء تنزاني اصلي ..

شكرا للاخوان على تفاعلهم واخص ابوعلي :)

اخوكم
ددسن
متفائل
19/10/2006, 12:49 AM
ددسن 79 مبروك عليك الفراش والله يطعمك من خيره ويكفيك شره

ولا عليك أمر ممكن تضع لنا صور للفراش وهو مفتوح وكذلك وهو مربط ابي اشوف حجمه

لاهنت اخوي


وبخصوص المحلات الي في البطحاء حقت التفصيل في أحد جرب منهم فراش نوم ياليت يقول لنا وش الزين واسم المحل . واهم شي الحجم يعني مايخذ محل في الموتر وكذلك يصير خفيف
راعي ساموده
19/10/2006, 01:39 AM
السلام عليكم ورحمة الله

أحسنت الاختيار اخوي الدريويش والسنيدي لايعلى على جودة الفرش اللي يصنعونها وخصوصا الدريويش اما الغرابي مايروح له الا واحد تفرق معه الماده كثير لان الفرش هناك رداءه في الخام والتصنيع ايضا .
اما بالنسبه لقول بعض الاخوان ان الدريويش عيبه كبير فهذا صحيح لكن عز الله انك تنام مواجه للهوا النسري ولاتدري عنه
Abu Saad
19/10/2006, 01:51 AM
عيبه كبير نوعا ما ... وبناء على طلب الاخوة وخاصة ابوحمد فسوف اقوم بتنزل الصور للفراش وهو مطوي وهو مفروش الليلة ان شاء الله تعالى قبل صلاة الفجر ..

اخوكم
ددسن
سكّين
19/10/2006, 03:24 AM
ننتظرك يا [ددسن]
Abu Saad
19/10/2006, 04:12 AM
وهذه صور المرقد كما وعدناكم وسامحونا على القصووور وننتظر تعليقاتكم:






http://www.vip6600.com/up/uploads/e56f674975.jpg
ابوعلي7
19/10/2006, 04:22 AM
على فكرة ترى فراشك ياشاص , ترى حجمه بيصغر مع الإستخدام ( بيصغر واجد) مقارنة بحجمه وهو جديد لأن (الأكريلك) او الحشوة حقت المفرش تندق واجد، يعني لاتنزل الصورة هالحين تروع الأعضاء
متفائل
19/10/2006, 05:26 AM
الله يجزاك خير أخوي ددسن يالذيب ماقصرت

شكله يفتح النفس ويوم شفته جاني النوم هههههههه الله يبارك لك فيه

وان شاء الله ان كنا من الحيين بكره باشتري واحد
kaaaatm
19/10/2006, 05:43 AM
عليك بالدرويش لكن يعيبه كبر حجمه
riyadco
19/10/2006, 08:11 AM
نوم العافيه لكم جميعا
riyadco
19/10/2006, 08:14 AM
يامال نوم العافيه ان شاء الله
سكّين
19/10/2006, 08:22 AM
عندي واحد حوله [السنيدي]

وله معي سنتين وهو ماشاء الله ماتغير

عوافي يالغالي
sharp
19/10/2006, 03:56 PM
http://www.mekshat.com/vb/forumdisplay.php?f=59
عاشق البران99
19/10/2006, 04:09 PM
الدريويش وبس ...
سفير الصمان
19/10/2006, 04:34 PM
نصيحتي لك الدريويش لاتعداه هذا ازين فراش طلع للبرمن ناحية الخياطة والقماش تنزاني اصلي وتلقاه خذ الوصف اطلع مع مخرج17يمين وثاني اشارة اطلع يساروطول شوي تلقاه يمين الدريوش للمفارش سعرالفراش 270ريال وشكرا
Abu Saad
19/10/2006, 05:07 PM
شكرا للجميع ..
اخوي مهاوش ياليت تقرا الموضوع كامل :)
وشكرا على الوصف ..
اخوك
ددسن
باب هداج
20/10/2006, 04:07 AM
والله يا انا تندمت اثر فراشي اردى نوع وانا على بالي ممتاز وزين اثره اردى نوووع ليتني ماشريييت
كحيلان 11
20/10/2006, 05:51 AM
تقطعه بالعافيه يالغالي ...
راعي الطعوس
22/10/2006, 02:28 PM
ياخوي ددسن79 الله يحفظك اسأل برق الحيا او رحلتي مخرج 15 عن كيس النوم الصمان او الربيع من منتجات القاضي واذكرني بالخير ححجمه ماهو كبير وله شنطه .