مشكلتي مع البروسي ( المرساه)

[كسير الموج]

سلام عليكم جميعا واسعد الله ايامكم بالخير والمسرات

الحمدلله اشتريتلي بوت وتوي ع البحر فواجهتني مشكله اني لما ارمي البروسي ماينشب بسرعه فوجدت ان المشكله اني اطفي الماطور ولما اطفي البوت يرجع ع وراء وبذلك البروسي ماينزل تحت يبقي ينسحب فصرت ارميه وابقي الماطور شغال وينشب معاي بسرعه بسسسسس المشكله الحبل يرجع ع الماطور ويلتف ع المروحه سوالي هل في وضعيه صحيحه للرمي الحبل او فيه طريقه تدلوني عليها عسى الله يدلكم ع الصلاح

[أحمد السوويدي]

وعليكم السلام .. مساء النور اخوي

ارم المرساة اذا حسيت انه مسك

اربطه الحبل بصدر الطرد وطف الماطور

طبعا الطراد بيتحرك شوي ع اتجاه الماي لاتحاتي امور كذا طيبة

حاول تربطه زين بصدر الطراد من حيث انه ماياخذ زيادة


وللسلامة والحرص اذا شفت الموج عالي انتبه تقط المرساة

[برهوم جدة]

وعليكم السلام ورحمة الله وبركاته .. ما قصر الاخ احمد ، اخوي كسير الموج بالأول تحياتي . الثاني ترى البروسيات تختلف فيه شيء للشعب وفيه شيء للطينة . واكيد بتكون محدد الطرحه حقتك فين بتكون . عموما طريقة الرمي هي فن .. هي صح بسيطة بس .. تحتاج لفن ، اقول لك : اذا انت مشيت ووصلت نقطتك اللي تبغى تجلب فيها لابد تشوف الهواء من وين جاي وترمي البروسي من الجهة الامامية التي تكون مقابله البروس (يعني ما يكون ترميه من الجهة اللي تخلي الحبل ( العربه ) تجي من تحت البوت يعني يكون على اساس اندفاع البوت للخلف بسبب التيار المائي .المهم تقدم عن نقطة الصيد مسافة للامام بحيث ياخذ الحبل وقته بالنزول ( يعني هي زي ما قلت لك فن واحساس ) فاذا وصل البروسي يصير يحطحط الين يمسك وبطبيعة الحال البوت بيصير يرجع للنقطة اللي تبغاها وهو ماسك وما يكون تتعدى مكانك. بالنسبة للماطور فيه حالات اذا كنت في مكان غزير ولا فيه هواء ممكن تتطفي الماطور لان ما بيكون فيه خطر عليه يدق بشعب مثلا ، او مافيه هواء تحتاج معاه التحرك بسرعة للرجوع لنقطتك او حتى تتلافى الموج . اما بالنسبة اذا كان البحر فيه مو غزير وفيه هواء انا افضل يبقى الماطور شغال مع الحذر في طريقة التعامل السريع . ارجوا ان اكون افدتك فان اصبت فمن الله وان قصرت السموحة. والسلام عليكم ورحمة الله وبركاته

[sultan22222]

اربط مع البروسي بلكه صغيره تساعد علي سرعة نزول البروسي ...

[كسير الموج]

اشكرك اخوي احمد ع ردك لكن المشكله ليست بعد ماينشب المشكله قبل انه لما ارمي الحبل لابد يكون تحت البوت وعشان يكون تحته لابد يكون شغال الماطور واذا شغلته جاء الحبل والتف

[كسير الموج]

ماقصرتم والله

[قناص ام القرى]

سلام ارمي البروسي الين يوصل واذا وصل افرض حوالي 10 متر كمان عشان ما يصير البروسي معلق فهمت قصدي

[نجم الأحيمر]

خذلك بروسي اسياخ 12 ملم وعبي الماسورة خلطه اسمنت
وان شاء الله ينزل سريع

[naif911]

السلام عليكم ورحمة الله وبركاته
ياعزيزي انت ترمي البروسي شكلك والبوت ماشي عشان كذا يلتف عالمكاين لازم ترميه والبوت واقف خاصة اذا كان مافي هواء ولاتطفي المكاين الا بعد ما يمسك البروسي

[زاحف بحر]

ما شاء الله الاخوان افادوك ..

[accentkool]

اعرف المكان اللي تبي تحدق فية لان فية وحدة للطينة واخرى للصخرية
الموت في سحبة البورسي للطراد يكسر الظهر اذا مافي ماكينة تسحبة

[MoOoN ShAdOw]

أخوي الشباب ماقصروا ماشاء الله لكن حاب أضيف كل طرحه لها بروسي وكل عمق له بروسي وأيضا يعتمد على البوت البروسيات حسب علمي ثلاثه أو أربع مقاسات اذا البوت كبير المقاس الصغير مايخارج معاه ويمنك بعد مايمسك بفتره يفك اذا الشعبه خفيفه انت أدرى مننا باللي يناسبك وكل مازاد العمق تزيد المقاس أفضلك الذهاب الى محلات بيع الصيد ومعرفة المقاسات ومرافقة ذوي الخبرة لكسب خبرة ولو لفترة بسيطة..

لكن مايهمني لا تتساهل في موضوع لف الحبل على المواطير لا سمح الله ممكن يكسرلك المراوح أو يسبب بعطل الماكينه..

وحاول عن طريق الجي بي اس تحدد موقع الزهره أو الشعبة اللي تطرح عليها..

الله يوفقك ويبعد عنك أي سوء وجميع أخواننا..

[عبده الشعيبه]

اكسنت كول اداك زبده الهرج

[كسير الموج]

ماقصرتم بيض الله وجهيكم