الذبيحه كم تكفي ؟؟

[ابو فهد07]

السلام عليكم ورحمة الله وبركاتة

مساكم الله بالخير جميعا
انا عندي زواج وتقريبا معازيم الرجل حدود 250 الى 300 شخص

وعندي استفسارين ياليت اهل الخبرة يفيدوني فيها ...

1- الذبيحه ( لو قلنا ثني او جذع ) كم تــفرد صحن ؟ لو قلنا تكسير
2- الحسيل الجذع كم يفرد صحن ؟ لو قلنا تكسير

طبعا للرجال فقط الحريم بسوي لهم من ذا الخمبقه ميز والا مشاوي

[وهج الحياة]

تقدر تخليها تكفي 16 على صحنين وتقدر تخليها تكفي 32 على اربع صحون او خمس صحون بس مو مفاطيح ارباع او مقطعات يمكن تعطيك اكثر على البلم الصغار

[ابوانهار]

اهلين وسهلين

انا انصحك تسوي الذبايح طبخ عربي وانتم تقسمونها على كيفكم بالقصر
ولو قلنا 13 ذبايح ثنيه راح تكفي على حسب توزيعك للصحون تقريبا 250 شخص واكثر على خمسين صحن

والاقتراح الثاني انك تطبخ الذبايح بخاري13 ذبايح ثنيه راح تكفي 300 بالراحه .

طبعا لو تحسب كل خمسه بصحن راح تطلع 500 شخص
لكن توقع ان فيه صحون مايجلسون الا ثلاث شيبان مع بعض مثلا او او

[بازار شريف]

الحسيل يكفي من 40-50 صحن بالراحه واذا بتزيد خروفين معاه كل خروف 5 صحون كافتراض بعض الناس
مايحب البقر والله انشالله يتمم على خير

[ابو فهد07]

يعطيكم العافيه وما قصرتم وبانتظار اراء الشباب الباقين

[ابو فهد07]

سبحان الله وبحمده سبحان الله العظيم

[الدبا]

الله يوفقكم والف مبروك وإن شاء الله الشباب يفيدونك

موفقين يارب

[تربة الشمال]

مبروك الزواج وجزاك الله خير انتبه من الاسراف بالطعام

[بدر سليمان]

وشو نوع الغنم؟
نجد ولا نعيمي ؟
النجدي الطلي الطيب يكفي من 8 الى 10 بالكثير وراح يفيض بعد
اما النعيمي فمن 12 وفوق حسب الجرم..
والنجدي الطيب الذبيحة تشيل ثمان صحون وسط تقريبا مايقل عن خمس أشخاص عليه.
هذا شي تقريبي ومثل ماقلت لك حسب جرم ونوع الطلي والله يوفقك المعاريس بالزواج وهو الأهم.

[الواهج]

الذبيخه من 5الي 6 صحون قوايم

[فرخ قطا]

حط حاشي وزنه ١٢٠ كم

واقسم عدد البوادي يعني كل باديه عليه ٣ كيلو


وحط ذبيحتين احتياط


هذا الي يسوونه اكثر الناس والله يوفقهم

[قليقلان]

الحاشي الطيب يكفي 30 صينية شماليه ام كرسي يقلط عليها ٨-١٠ اشخاص

كذلك النعيمي الطيب يكفي 3 صواني شماليه

[يا عمليات]

الله الله في الجمعيات الخيرية اذا باقي عندك طعام

[ابو فهد07]

يعطيكم العافيه وما قصرتم وجزاكم الله الخير الكثير

[ابن فهدالشمري]

أسال الله ان يبارك لهما

بفيدك حسب معرفتي
اول شي احرص تكون الذبايح نعيم وجرمها طيب
الي اعرفه ونسويه حنا نقسم الذبيحه على 4 صحون وكل صحن يقلط عليه من 5 - 7 اشخاص

يعني الذبيحه الوحده بتكفي 20 - 28 خذ المتوسط 24 رجال لكل ذبيحه يعني 10 ذبايح بتكفيك بإذن الله بالراحه

بالتوفيق إن شاء الله

[ابو فهد07]

ماقصرتم كفيتم ووفيتك
طبعا بعد ما سمعت شوركم طلعت بنتيجه وراح اسويه واتوكل على الله

الذبيحه ( نعيمي - سواكني ) تفرد 8 صحون طبعا تكسير

اذا حسبنا 8 ذبايح راح تفرد تقريبا 64 صحن

اذا حسبنا ان الصحن الواحد يجلس عليه 4 اشخاص كحد متوسط ( احيانا اقل واحيانا اكثر )

تكفي 256 شخص هذا اذا جينا حسبناها
( ادري مجنوووون رياضياات ) ههههههههههههههههههه

وش رايكم ؟ طبعا مع مراعاة الميزانيه الماليه

[ابوانهار]

اذا بتراعي الميزانيه
انصحك بالسواكن
قسم بالله اكثر لحم واقل تكلفه واذا ضيفك من 300 الى 400 بتكفي 10 ذبايح

[أباعبدالرحمن]

شف 300 رجال باذن الله يكفيهم 12 من الخرفان الطيبه اذا تقطيع وانت وما تريد

[فايروخ27]

اولا الله يوفقك ويرزقك الذرية الصالحه .. قل آمين

ثانيا فك نفسك ونا خوك من الخنبقه الزايده ترا وراك التزامات ثانيه تهد الحيل .. ان شاء الله انك سمحان تقدر تشلها


والثالثه العام الماضي زواج اخوي ومعازيمنا مثل معازيمكم رحت سوق النسيم وخذت 11 راس سواكني متربي هنا له اكثر من 6 شهور .. المهم اني اتفقت مع المطبخ وخلى كل ذبيحه على اربع صحون
10 ذبايح * 4 صحون = 40 صحن للرجال .. 40 صحن * 8 اشخاص = 320 رجال

وحده من الذبايح قطعها على سراويس جات يمكن 50 صحن سرويس حطيناها مع البوفيه للحريم


شريت الغنم كلها جذعان من 900 ريال وعليك الحساب والبوفيه حساب 250 شخص على القاعه واضفت من عندي حساب 50 نفر زياده


الوكاد ونا خوك انها كفت ووفت وزهمنا الجمعيه اخذت الباقي .. الله يكتب لنا ولكم الاجر

والله العظيم ان بعض الناس الحاضرين قالو من وين جبت الغنم الطيبه ذي .. مادرو انها سواكني
بس راعي المطبخ فنان عرف يخفي ملامحها هههههه


وبالتوفيق لك

[أباعبدالرحمن]

نعم صدق فايروخ الاسراف مذموم

[عفازه]

مبروك للعروسين

[محمد ابراهيم9]

يعطيك العافيه علي الموضوع

[محمد ابراهيم9]

اللي اعرفه ان الذبيحه الخروف يكفي من اربع لخمس صحووون

[شايب حرب]

انتبة فيه فرق في التوزيع والطبخ بين النعيمي والسواكني



النعيمي مايجي تكسير لانك اذا كسرتة يذوب مع الطبخ



والافضل تخليه 4 قوايم كل قائمة على صحن وتكفي



اما السوكني يجي تكسير طبخ عربي او كابلي او بخاري



والسواكني الواحد الرباع يفرد 10 صحون



اذا تبي تكسير لاتدور غير السواكني



والف مبروك

[وليد الغربة]

مبروك عليك وربنا يتمم الافراح في دياركم
جميع الاخوة ماقصر

نحن الراس الواحد يكفي اربعون شخص

اخوك وليد الغربة
حضرموت