إذا زرعت الطيب ازرعه بقياس **** تراك ما تجني من الورد ثومي

[راعي مرات]

معاني مبعثرة

آمل أن ترتقي لذائقتكم

سبحان رب صور الناس أجناس **** أطباعهم مختلفة والسلومي

بعض البشر يجمع مع العز نومـاس*** يشفي غليلك لابدالك لزومي

كريم سبلا في البذل ماله قياس **** يا عـل خيـره للبــرايـا يـدومـي

وبعض البشر تدعي عليهم بالأفلاس*** مما عطـاه الرب منه محـرومـي

وبعض البشر لازود لا نقص لابأس*** مــراجله قـده وقــد اللـزمومـي

وبعض البشر أمره على العين والرأس*** ربعه شغاميم العيـال القـرومي

وبعض البشر ملجا إلى حميت الطاس*** لاجـاء اللزوم وثار عـج السمومي

يضرب على الكايد كما ضربة الفأس*** يسطي على العايل شجاع جزومي

وبعض البشر عالة كما سوس الأضراس*** ثـقيل نـفس لاقعـد ما يقـومـي

وبعض البشر ذكره يغطى بالأخماس*** وبعض البشر صيته تعدى النجومي

وبعض البشر قوله يوثق بقرطاس*** وبعض البشر هرجه سواة الحلومي

وبعض البشر خراط نصاب بلاس*** يضحك على العالم بزين الهدومي

وبعض البشر يضن حاله بتكساس*** ما يستحي ما ينتخي ما يشومي

يبحث عن الصيدات والكيف والكأس*** يـارد مـواريد الخنـا والرخومـي

هذا الردي ودك على الخد ينداس **** نذل خسيـس ما يـعرف السلـومي

وبعض البشر يذي كما البـق والحـاس*** الـرابح اللـي صار منه معـدومـي

وبعض البشر ينقل على الهم هوجاس*** فوقه غراب البين قبله يحومي

غامض ومبهم دايم الدوم حساس ***** ماتفهمه طبعه عنيد كتومي

ومن يرفع البنيان يحرص على الساس **** كانك لجزلات المعاني ترومي

وحبل الأمل لا يقطعه خنجر اليأس **** وقل الرجا يفثل قوي العزومي

وإذا زرعت الطيب ازرعه بقياس **** تراك ما تجني من الورد ثومي

عبدالرحمن المجلي - راعي مرات




(https://www.facebook.com/shares/view?id=605188229542559)

[ذيب الفقارة]

تسلم أخوي عبد الرحمن

القصيدة رائعة بمعنى الكلمة

اختيار الألفاظ والأفكار كان بعناية

الميل إلى الحكمة والأمثال لإيصال المعلومة كان ممتازا

إعتمادك على الإيجاز الغير مخل بالمعنى سهل على المتلقي التعرف على الهدف

كل فكرة حصرتها في بيت أو بيتين ومن ثم الانتقال إلى التي تليها

وهذا أضفى على القصيدة رونقا من الجمال تبعد المتلقي عن الملل


والكلام يطول لكن أقول لك :

رغم أن القصيدة حوت الكثير من الأفكار المتباعدة إلا أنها ( خالفت العنوان ) وكانت ( متراصة كعقد

اللؤلؤ )

تحياتي

[صافى السريره]

سلمت اناملك وفكرك ياعبد الرحمن قلت فأبدعت وهذا هو السهل الممتنع شعر اعشقه

[الشرقيه 03]

صح لسانك يا خوي

[اديب بن صالح]

راعي مرات

صح لسانك ماشاء الله تبارك الله

نهيجن فيها ماملينا الله يكثر من امثالك

[بدوي ممطور]

صح لسانك يعطيك العافيه
جزل والقصيده جزله

[فيروزه]

يتوقف القلم وتعجز كلمات المدح أن توفي هذه القصيدة حقها .....زادك الله من فضله

[الغنامي 511]

صح لسان وقصيده طيبه من وجهن طيب

[غروب الانس]

صح الله لسانك قصيده جزله من شاعر جزل

[راعي مرات]

صحت ابدانكم جميعا ومروركم اعتز به

شكرا لكل من مر من هنا تقديري واحترامي

[ريف النشاما]

صح لسانك شاعرنا المبدع

قصيدة جميلة


وتقبل تحيتي

[سحاب نجد راعي شقراء]

ماشاء الله تبارك الله ياعبد الرحمن المجلي والنعم ومليون نعم

الا راقت لنا وطربتنا بعد

وشعرك يدخل القلب ونقراه مرتين وثلاث وكثر اسكت لياني هلحين اشيلها بعلا صوت ولوي مامن صوت

انت شاعر ومافيه شك
بس عندي احساس ونت علمني بعد صح ولا مهوب صح عزتي للي يغلط عليك ويظيق صدرك تجيه القصيده تسابق قوافيها:D انا حسيت كذا صح علي ولا من يمها

ودي اقول شي تعرف ام سليمان المجلي وخوه عبد الرحمن ياحبي لهم بعد الي سكنوشقراء جعلها للفردوس الاعلى من الجنه تراها رفيقه لمي بالحيل بالحيل الله يجمعهم بالفردوس ونحن معهم وكل مسلم هذا الي ودي اقوله وسلامتك