طريقة تحويل قدر الضغط الصيني الى القدر الاصلي سب

[إبن فيصل]

السلام عليكم ورحمة الله وبركاته يا شباب..صارحة أنا عندي حركة تعديل سويتها لقدر الضغط وصار تمام التمام وشي الحركة....الحركة كالتالي:-
أنا في أحد الايام قاعد أزبط بعدة الكشته خاصة عدة الطبخ وقعدت أشيك على قدر الضغط الصيني العادي الي أكثر الناس تستخدمه في طلعات البر قمت وسويت شد لبعض المسامير فيه وفجأه :( إنكسر أنبوب فتحت التنسيم الي يشيل الصفارة حقت القدر والله النشبة خرب القدر :confused: خليته فترة ورحت لم حقين المواعين قلت يمكن ألقى له حل والا القى قطعت غيار له.
يوم رحت لقيت قطع غيار للقدر سب (قدر الضغط فرنسي إظاهر ما نيب متأكد منه لكنه أصلي) قالي يمكن تصلح وفعلاً رحت وركبت الانبوب لكن ما تجاوب مع الصفارة حقت القدر الصيني قلت ما لها الا أني اجيب الصفارة الخاصة في الانبوب حق القدر الاصلي سب...وفعلاً جبتها وطلعت النتائج مرضية وسريعة وأحسن من الاول حيث أن الاول كان رديئ ويطلع منه بخار يتكثف حول الانبوب وذلك ناتج عن ثقل الصفارة حقت الصيني الي ما تخلي الضغط يطلع على فترات ورب ضارة نافعة وأخليكم مع الصور ...طبعاً نصيحتي للي عنده قدر صيني يغير الانبوب والصفارة ويحط الاصلي ويشوف الفرق والعمل..
الصورة الاولى: الانبوب والصفارة الصينية حقت القدر الصيني.
http://www.mekshat.com/pix/upload/images21/mk26692_20061020235.jpg
الصورة الثانية : للأنبوب والصفارة والصفارة الجديدة طبعاً الانبوب الجديد ركبته في الغطا

http://www.mekshat.com/pix/upload/images21/mk26692_20061020238.jpg
الصورة الثالثة: صورة من الاعلى للصفارتين الجديدة والقديمنة ولاحظ الفرق في الحجم

http://www.mekshat.com/pix/upload/images21/mk26692_20061020240.jpg
الصورة الرابعة: منظر للأنبوب الجديد في الغطا حق القدر بعد التركيب منظر من الداخل

http://www.mekshat.com/pix/upload/images21/mk26692_20061020242.jpg
الصورة الخامسة: لاحظ الفرق بين الأنبوب القديم والانبوب الجديد الحجم مختلق وبذلك يكون الاداء مختلف.

http://www.mekshat.com/pix/upload/images21/mk26692_20061020247.jpg
الصورة السادسة:أيضاً منظر للأنبوبين من الاعلى لاحظ الفرق أيضاً.

http://www.mekshat.com/pix/upload/images21/mk26692_20061020245.jpg
الصورتين الاخيرتين : منظر للصفارة الجديدة على القدر.

http://www.mekshat.com/pix/upload/images21/mk26692_20061020236.jpg

http://www.mekshat.com/pix/upload/images21/mk26692_20061020237.jpg

وتقبلوا تحياتي...إبن فيصل،،،،،

[مسافر1]

تسلم أخي .. ابن فيصل .
جهد تشكر عليه .
لكن المسألة في القدر كامل والأهم هو الأمان والربلات الخاصة بالغطاء الرائيسي ..
وكذلك العراء وسرعة تكسرها وانحلالها ..
تشكر وتجربة موفقة ..

[أبوأحمد98]

مشكور اخوي (ابن فيصل)
لكن نبي النتائج والي صارت معك والايجابيات بعد التغيير ؟؟
وشكرا

[إبن فيصل]

شكراًَ لك أخي مسافر1 (أبو فهد ) على المشاركة وكلامك سليم لكن من إعتقادي أن الشي الاساسي والذي يلعب دور في عملية الطبخ بقدر الضغط هو عملية تنفيس البخار الخارج من القدر.

شكراً لك أخي أبو أحمد98 على المشاركة والنتائج كانت أفضل من السابق من حيث الوقت والجودة.
وتقبوا تحياتي....إبن فيصل،،،،،

[كحيلان 11]

لكن السؤال هنا هل نجحت العمليه وجربتها ؟؟
ومشكور يالغالي

[إبن فيصل]

شكراً لمرورك أخي كحيلان 11 لو نظرت لردي السابق لعرفت الاجابة...نعم كانت النتيجة ممتازة في الوقت والجودة.
وتقبل تحياتي ...إبن فيصل،،،،

[Abu Saad]

اهم شي في قدور الضغط هو الجودة والامان والتحمل ...
الناس طارت بهالقدور الصينية وياخوفي بعد فترة .. نسمع بحوادث القدور الصينية.. الله يستر علينا وعلى كل مسلم...
سلام.

اخوكم
ددسن

[صوح الجبل]

ماشاء الله ..... ياخوي ابن فيصل ...... فعلاً فكره حلوه ...... واللي استنتجت من كلامك جعلك تسلم ..... ان فتحه قدر السب انفع من فتحة قدر السيف .... بمعنى ان زبدة القدر الفرنسي .... صارت وانا اخوك عندك .... تقبل تحيتي لك يالغالي ....

[إبن فيصل]

شكراً لمرورك أخي ددسن 79 وكما قلت الامان أهم شي لكن الامان شي يعرف بسهولة وذلك من عمليه شد القدر بإحكام وخروج البخار منه طوال عملية الطبخ.

شكراً لك أخي صوح الجبل...فعلاً الزبدة في عملية تنسيم البخار أكثر من الاشياء الاخرى.
وتقبلوا تحياتي...إبن فيصل،،،

[أبوأحمد98]

طيب اخوي (ابن فيصل)
وين احصل قطع السب ؟؟
وشكرا

[kaaaatm]

انا كنت من اول اذم الكاتم الصيني علشان ثقل صفارته لكن عقب هذه التجربه كنه بدا يدخل مزاجي

[إبن فيصل]

أخي أبو أحمد98 تشكر على المرور والقطع تلقاها عند محلات بيع الاواني المنزلية وخاصة الي يبيعون قدور الضغط...أنا شريتها من محل في الروضة لكن يمكن تلقاها عند أي محل ثاني أو أعتقد بتلقاه أكيد عند سوق السبالة الي فيه كل شي يخص الاواني المنزلية.

أخي كاتم شكراً لك على المرور والقدور الصينية حليوه من ناحية السعر الرخيص يعني ما تخاف عليه في طلعات الكشتات تخرب او تضيع على عكس القدور الاصلية الغالية الي من 300ريال وفوق وبها الطريقة الي سويتها جمعت بين الرخص وجودة الاداء.
على فكره القطع كلفتني 10 ريال للأنبوب و 25ريال للصفارة يعني كمبليت 35 ريال..قد تختلف الاسعار حسب حجم القدر.
القدر الي معي والله ما أعرف على كلامهم كم لتر لكن يكفي لحبة ..حبة ونصف دجاج.
وتقبلوا تحياتي...إبن فيصل،،،،

[بواسامه]

روعه يابن فيصل
بس هل فرق عليك الوقت في الطبخ
يعني بالفرنسي ينضج قبل الصيني
بحكم ان الصفارة اخف

[المعاكس]

ابو فيصل السلام عليكم ورحمة الله وبركاته سؤال القدر الصيني يردني عنه انك اذا فتحت القدر طبعآ جوهو جديد ومريت بيدك على جوانب القدر من الداخل يصير لونها رصاصي وهذا والله اعلم شىء ماهو صحي وش رايك اخوك ما عنده قدر كاتم لا ساعتك ودمت ابو فيصل

[إبن فيصل]

أخوي بوأسامة تشكر على المرور وعلى كلامك القدر الصيني صفارته ثقيلة ولا تصفر الا إذا كانت النار عالية جداً وهذا دائماً يتسبب في إحتراق الطعام في أسفل القدر(حكاكه القدر)وشكل الصفارة وحجمها للقدر الصيني مهيب تمام ثقيلة وحركتها صعبة وفي الصفارة فتحات في جوانبها لا تتناسب مع حجمها..أما صفارة القدر السب فتحاتها الي على الجنب تحسها كبيرة شوي عن الصينية وهي مناسبة للحجم...وعمل الصفارة السب حلو كيف؟....مع الحرارة تكون هي ضاغطة على الانبوب ومع زيادة الحرارة والضغط تصفر الى أن يقل الضغط الى المستوى المطلوب وتسد الانبوب وهكذا..يكون تفريغ البخار على دفعات تضمن نضج الاكل بدلاً من التصفير المتواصل أو عدم التصفير الذي لا يفيد.

أخوي المعاكس تشكر على مرورك وكلامك صحيح وهذه تصير في معضم القدور الي غير مصنوعة من الستيل وهذه يتم التخلص منها في البداية بوضع ماء وملح وطبخها في القدر مدة ربع ساعة ثم غسل القدر من الداخل وبذلك تكون كل الاوساخ زالت بإذن الله.
آسف على الاطالة والسلام عليكمز
وتقبلوا تحياتي....إبن فيصل،،،،،

[اخوكم بري]

مشكور أخوي أبن فيصل على هذه الفكره الجيده

[إبن فيصل]

الاخ/ أخوكم بري تشكر على مرورك وجزاك الله خيراً.

وتقبل تحياتي....إبن فيصل،،،

[راعي الهـــدد]

اخوي الغالي ابن فيصل

جهد تشكر عليه حقيقه

والله لايحرمنا من امثالك

لكن الا ترى معي ان الصفاره اذا صارت خفيفه مثل السب انها بتكون تصرف هواء اكثر من الصفاره الثقيله لأن خفتها تجعلها تتحرك بسرعه وتفوت هواء اكثر

وتجربتك طيبه لكن هل تركيبها سهل او يحتاج معابط ياليت تشرح شوي وتسلم يابن فيصل

--------------------------

أما عن الأخ الي متخوف من القدر الصيني اقول له خذ ولا تشاور

اخوي الكريم انا استخدمه من اكثر من ثلاث سنوات ولا شفت منه الا العافيه وقاظي لزومي وزياده وعندي منه ثلاث احجام وروعه

وعندي السب الفرنسي والله انه تعطلت الجلب حقته قبل الصيني وش رايك

اشتر ولا تشاور

[ابوريان]

يعطيك العافيه نقدر نقول قدر مرهم على وزن السيارات.

[إبن فيصل]

تشكر أخي راعي الهدد على مرورك الرائع والصفارة السب ما يحتاج على القدر الصيني وكثر الهواء داخل القدر يخلي الزر يعجن ويصير مثل السليق....وهذي ميزة القدور الاصلية إنها ما يجلس فيها ماء او بخار زائد يخرب الطبخة.

تشكر أخي أبو ريان على مرورك والله يعطيك العافية.
وتقبلوا تحياتي...إبن فيصل،،،،