طبخت لحم غنم بفرن المندي والنتيجة !!

[مرهمه]

بسم الله الرحمن الرحيم

ما اطول عليكم يا جماعة الخير

امس طبخت لي حوالي ربع نعيمي بفرن المندي على درجة حرارة 160
لمدة 50 دقيقة وقبل لا افتح الفرن لقيت يتسرب من الباب دخان ابيض
ولما فتحته لقيت الرز وجهه ناشف واحترق الاشوي واللحمه مقمره بقوه
ولاحظت ان اللحمه قاسية والرز ناشف

وش رايكم يالوجيه الغانمة

اتمنى استفيد من خبرتكم واحصل على رايكم وملاحظاتكم

[nouaf]

عند طبخ الحم ضع معه قدر فيه مويه بس الى ان تصل درجه الحراره تقريبا 180 وطف النار وحله مغلق ساعه وبعدها ضع الرز في القدر ووصل الحراره الى 180 وطف النار وخله نص ساعه الى ساعه الا ربع و ان شاء الله يضبط

[مرهمه]

شكرا لك اخ نواف على مشاركتك
بالنسبه للطريقه اللي قلتها
هل انت مجربها قبل او لا ؟
واذا كنت جربتها
هل تكفي درجه الحرارة اللي مخزنه بالفرن لطبخ اللحم
ووش افض انواع اللحم للفرن المندي ولكم جزيل شكري

[nouaf]

والله انا جربتها بعد ما كتبت موضوع هنا ورد علي احد الاخوان وجربت على لحم خروف لكن صغير وكانت النتيجه رائعه و الفرن يحتفط بالحراره انت بس لا تنسلى قدر تعبيه مويه عشان ما ينشف الحم وتخليه ساعه او ساعه الا ربع وبعدها تطلع القدر وتضيف فيه الرز وبتحصله فيه مويه الحم اوزن المويه فع الرز ورجعه وانتبه تطلع الحم خله في الفرن يعني بيقعد فينره مع المويه وفتره ثانيه بعد ما تدخل الرز لين توصل درجه الحراره 180 تقريبا طف الفرن وخله يكمل استوى على حراره الفرن

[nouaf]

لا تنسى تغطي قدر الرز بعد ما تخلص لمده عشر دقايق بعد ما تخلص عشان ما يكون الرز ناشف من فوق ويطري الرز
ونست اقولك اذا بتسوي رز ابيض تضيف له ماء الكادي شوي لا تكثر ويصير الرز لذيذ

[مرهمه]

الله يجعلك ووالديك في الفردوس الاعلى من الجنة
كفيت ووفيت اخوي نواف اشكرك.
واللي عنده اي افكار ثانية من الاخوه الاعضاء
لايبخل علينا حتى تعم الفائدة للجميع :good:

[nasser a]

اخوي الموضوع سهل انا اسوي ذبيحه بالتنور وتخليها اكثر من ساعه

اللحم شرط اساسي انه يكون طازج والتتبيله حقته لاتقل عن ٥ ساعات وكل مازاد افضل ويكون مشرح
طبعا تتبيلة اللحم اول ٤ ساعات بدون ملح لان الملح يسحب الماي الي داخل اللحمه وينشفها وبعدين تقدر تحط وانا افضل اذا استوى اللحم رش عليه رشة ملح
وعندك اللحم دسم يختلف الرز لازم يكون دسم انا اتوقع ان الرز الي سويته ما فيه دسم والرز يا انه ياخذ الدسم من اللحم يا انك تحط عليه سمن المراعي ممتاز واذا تبي تستخدم زبده بكيفك بس السمن له نكهه مميزه في المندي

الماي لازم يغطي الرز مقدار ٢ سانتي الي هو تقريبا نص اصبع

تشغل التنور لمدة ٢٠ دقيقه تخليه يكتسب حراره وبعدها تحط الطبخه مع مراعاة وضع قصدير على اللحم من فوق لمدة ساعه الاربع وتخلي النار عاليه وبعدها تفتح الفرن وتشيل القصدير عشان يتحمر اللحم الى ربع ساعه او نص ساعه وان شاء الله بتكون افضل طبخه

وسلامتك وبالعافيه

[مرهمه]

الله يسلمك ويعافيك ويجزيك كل خير اخوي ناصر
اشكرك كثيرا على مشاركتك و طريقة الطبخ اللي علمتنا اياها
وان شاء الله بنستفيد منها انا وغيري من اخواننا الاعضاء
واتمنى اي احد عنده طريقة غير اللي قالوها الاخوان يفيـــــدنا بها

[مرهمه]

وينكم يا محترفين المندي

[ثلج ساكن]

يعمي مرهمة انا عندي لك طريقة على المزاج وبدون فخر انا امتلك هذه الفرن منذو اكثر من 15سنة يوم كان بالمزاحمية وحصلت عليه من سواق سوداني كان يجيبه الغربية
خذ من عندي الطريقة وتدعيلي وكلا بطريقته
1- اذا حطيت القدر حق المندي داخل الفرن ضع ثلاث قطع حجرية حتى ترفع القدر عن موقد النار يعني مسلفة بسيطة ممكن 2سم
2- ضع الرز والبصل والملح وو...... انته ورغبتك على الرز اصفر كشنة سادة او معه زبدةعلى حسب
3- ضع الشبك وخلك معي وركز شوي نبدا بال(دجاج 900جرام) بعد التبهير والتمليح يرص فوق الشبك ويوضع داخل الفرن ولاحظ لسه ماشغلنا الفرن وضع تحته القدر وولع الفرن ويليت يكون دفع الغاز مباشر وضع محول الغاز الذي يستخدم بالمطاعم او الفراشة او مباشر مثل صاج المطبق على انبوبة الغاز وشغل النار وافتح الفتحة العلوية اللي هيا الغطا حق المدخنة واذا فيه هواء حاول تداري الهواء بوضع الفرن داخل جدنب جدار وتداريه بلوح خشب او خلافه وراقب الفرن الى يوصل 220ادا الجو بارد و200 ادا بالصيف
وبعدها اطفي الفرن وسكر الفتحة وانظر الى ما ينزل موشر الحرارة الى 140او 150 او 100وبعدها تدعلي واذا حطيت الرز لا تنقعه بس غسل وحط على طول بالقدر والماء يكون بواحد اصباع مرتفع عن الرزده الدجاج

اما بالنسبة للحم
اذا طازة يكون افضل مقطع ارباع اواثلاث او مفتوح من نصف البطن اذا كان صغير وتخليه لين يوصل بدرجة 250 واطفيه بعدها انتظر الى ان يصل الى درجة حراراة 100 يجيك اللح م مستوي ومقرمش ومشهي
وانته بنفك الفرن اول شي تفك من تحت بعدين تفك من فوق لتدفق كميات كبيرة من البخار
واللحم فوق الشبك وانته بتنزل خلي خويك يرش ملح وفلفل اسود فقط لاغير
وبعدها طلع الرز وقلبه معه بعض واغرف في الصحون مع سلطة اللبن والحارة او الشطة وكلا على حسب وتدعيلي
جربها ولاحظ حاجة
ولعتك للنار مرة واحدة وتسكيرت النار مرة واحدة
وان شالله ماتخيب

اسف طـــــــــــــــــــــــــــــــــــــــــــــــــ ــــــــــــــــــــــــــــــــــــــــولة عليـــــــــــــــــــــــــــــــــــــــــــــــ ـــــك الرد تقبل مروري ابو خالد يحيك ويحي الجميع

[الخولاني]

ثلج ساكن ما شاء الله عليك وصفك واضح اتمنى منك تنزل لنا صور لمغامراتك مع هذا الفرن يعني طبخك ونفخك

[مرهمه]

الف الف شكر لك يا أبوخالد
ماقصرت كفيت ووفيت
وجزاك الله الفردوس ووالديك
:r
ان شاء الله راح اجرب طريقتك
واستفيد منها
وغيري من الاعضاء والزوار
الله يكثر من امثالك ويجزاك خير :good2:
تحياتي لك :)