مشكلتي مع انبير ظغط الزيت لاندكروزر 2002

[مرير الشوق]

السلام عليكم ورحمة الله وبركاته


اخواني مساكم الله بالخير


عندي مشكلة في انبير ظغط الزيت والمشكلة هي : :(


وهو واقف الموتر يكون الظغط تحت الربع


وهو متحرك الموتر يوصل بعض الاحيان تحت النصف او فوق الربع بشوي


ومع الدعس على بنص البنزين وهو واقف يرتفع الى النصف وحولها على حسب قوة الدعس


مع العلم مافيه صوت طقطقة بالمكينة ابداً سوا عند التشغيل الصباح او لفتره طويله


وسويت فحص كمبيوتر امس وقال لي المهندس الحساسات مافيها شي أبد :good:

الزيت توني مغيره جديد مع السيفون



الموتر جي اكس ار تويوتا 2002 القير اوتوماتيك



ياليت تفيدوني ياخواني بالحل .. جزاكم الله خير

[محيسن123]

اخوي عندي vxr2004
نفس وضعك من يوم شريته له فوق السنه
لاتدقق دام مافيه صوت طقطقه في المكينه
فالوضع طبيعي

[ابوراكان تبوك]

عادي يا اخوي عندي نفس موترك بالضبط من يوم اخذته كان ماشي قليل واللحين كمل 300الف نفس الشيء الانمبير ماتغير فالوضع طبيعي لأني بحثت مثلك وسألت كل الصوالين نفس الشيء تقريباً

[مرير الشوق]

يعني اقضي هالشتويه واسافر على خير ان شاء الله :D

[ابوراكان تبوك]

موفق خير اخي مرير الشوق توكل على الله و لا تشغل بالك فيها

[مرير الشوق]

جزاكم الله خير اخوي ابو راكان انت و محيسن

[الوافي.]

اخوي مرير كبر الوسادة ونم
انا معي 2003 ومثلك يرتفع وينخفض وهالحين ماشي حول 800000 ماجانا الا الخير

[مرير الشوق]

مشاء الله تبارك الله

الله يبشرك بالخير يالغالي

وجزاك الله خير

[الفريح1]

طبيعي تدعس يرتفع لين النص وتوقف ينزل مثل موتري وش المشكلة

[تيرانو]

معي فكس ار 2003 وعندي نفس المشكله .. وكنت ناوي استفسر عنها
لكن بعد ردود الاخوان تطمنت اللهم لك الحمد

[ABO AZZAM 123]

السلام عليكم ورحمة الله وبركاته

الموضوع عادي الله يسعدك وطبيعي جدا
بس اهم شي شيك على الزيت بعد ما تخلي الموتر واقف على ارض مستوية مافيها ميلان وتخلي الموتر واقف فترة لجل يطلع معك وزن الزيت مضبوط
إذا كان على النقطة أو تحته بحاجة بسيييييييييطة عادي لكن اذا كان اكثر فلابد انك تراجع اقرب بنشري وتنزل من الزيت للحد المطلوب


الله يوفقك ولا تشيل هم الموتر كلنا مواترنا كذا

أسعدك الله

[صديق كلم رفيق]

عندنا جكسار 2003 ضغط الزيت وهو واقف ربع ، وهو ماشي تحت النص بشوي واحيانا فوق النص بشوي .

[Essa zeed]

الي اعرفه اذا كان انبير الزيت غير ثابت .
اما تكون المشكله خلل في تصنيع السياره مدام الاخوان عندهم نفس المشكله وماوجهتهم اي ضرر منها

ثاني شي . احتمال تكون المشكله في نفس الانبير او توصيلات الكهرب للأنبير

ثالث شي . تكون المشكله في ترنبه الزيت .

هذي المشاكل المحتمله من عدم استقرار انبير الزيت . للمعلوميه . ان ترنبه الزيت في الموديلات الجديده تكون حجمها صغير . ومشاكلها كثيره . عكس المويديلات القديمه.

الله يسهل امورك .

[التمسساح]

طبيعي جداً لا تلعب في الموتر

[مرير الشوق]

جزاكم الله خير اخواني جميعاً على هالمرور اللي اسعدني

ومبروك عليكم الامطار والخير والله يجعلها امطار خير وبركة


على كذا نستنتج من الموضوع والمشكلة بحكم أكثر الردود :

بأن الخلل ممكن يكون مصنعي وليس له تأثير على المكينة وانه طبيعي في سيارات لاندكروزر


أشكركم أخواني

[محب للخير]

تأكد اذا كان فيه شخال تحت حساس الزيت قم بإزالته وسوف يرتفع ضغط الزيت

[مرير الشوق]

تأكد اذا كان فيه شخال تحت حساس الزيت قم بإزالته وسوف يرتفع ضغط الزيت


اخوي محب للخير

مافهمت عليك ..؟

شخال حق ايش بالظبط ؟

[ابوسليمان12]

الشاعر الكبير بندر بن سرور يقول بأحد قصائدة رحمه الله. مقعد انبير نيم الحرارة و هو يصف موتره فأتوقع ان عندك مشكلة انا عندي نفس موترك و الامبير يضرب علا الخط الثالث اذا دعست بنزين

[محب للخير]

اخوي محب للخير

مافهمت عليك ..؟

شخال حق ايش بالظبط ؟


حساس الزيت تحته الشخال غالبا يسكر بسبب نوع الزيت المستخدم والرايش
فك حساس الزيت اللي في الماكينة اللي راكب فيه السلك وتلقاه تحته شغل السيارة مع وضع قماش حتى لا تمتلى السيارة بالزيت وسوف يخرج الشخال وركب الحساس وشوف الفرق
هذا الكلام من قبل ميكانيكي سعودي ثقه وهو مطبق هذه الطريقة اكثر من مره

[موقق111]

انا عندي نفس المشكلة طبيعي لا تشغل بالك وتوكل على الله