المساعد الشخصي الرقمي

مشاهدة النسخة كاملة : علاقه الصيد السمك باوقات حقت الرياح


عبده الشعيبه
19/11/2013, 05:06 AM
السلام عليكم ورحمة الله

انقل لكم المعلومه عن البحر
هادي اللي كانت حكر
من اهل البحر
عن الرياح والنجوم و القمر
عن التيار و المد والجزر
اه يابحر
الجلب في القمرة يحلى السمر
ومجرور الصبحية مع الفجر
ومع النقم انتر الجلب نتر
وراحت ايام الهوري ياقهر
المعلومه كانت على عبدو حكر
واليوم نهديها لاحلى بشر
البحر معروف بالغدر
لازم نتعلم يا بشر

حندخلكم في التفاصيل حقت المد والجزر وشرح مبسط يفيد الجميع

احاول اجيب معلومه بطريقه مرستكه سهله يفهمها الاعضاء نحاول نشرح المصطلحات ونبسطها للجميع

المشكله كتير يحتكرو المعلومه
وكتير يتكلمو بمصطلحات غريبه على المبتدئين لكن باذن الله حنحاول نكسر الاحتكار ده ويستفيد الجميع
عبده الشعيبه
19/11/2013, 05:09 AM
بسم الله نبدأ

الرياح وعلاقتها بالبحر والصيد البحري

الرياح تختلف بحسب وقتها وسرعتها واتجاها و موسمها

بحسب الاتجاه شماليه شرقيه جنوبيه غريبه وايضا انحرافيه يعني متلا شماليه شرقيه ولما تقول رياح شماليه يعني جايه من الشمال رايحه الجنوب



علاقه الرياح بالمد والجزر


المعروف للناس انو المد والجزر مرتبط بالقمر والشمس كل فتره معينه

واللي ما يعرفوه كتير من البشر انو فيه بعض الفترات المد مررره عالي بحيث انو البحر يتعدى الشاطىء بمسافه واكيد لاحظتو الشي دا وهادا سببو الرياح اللي جايه من الجنوب تخلي المد عالي جدا

اما الجزر فلما البحر تشوفو جازر راجع لورى ومرات تشوفو مرررره راجع بزياده
والرجوع بزياده سببه الرياح اللي جايه من الشمال



وعلى حسب اتجاه الرياح تنشأ ظواهر متل التيار واتجاه التيار يكون على حسب الرياح مع العلم انو التيار لو اكتر من سبب ومن ضمنها الرياح

وعلى نوع الرياح يتحدد برضو نوع الصيد و طريقه الصيد مثلا الشباك لما نحوط بيها في فتره نحسبها يكون بدايه الجزر مع هبوب رياح شماليه عشان البحر يجزر مررره ويكون صيد السمك وفير مره السمك ينحشر ويتحشك في اخر شبكه من جهه البحر والاعتماد هنا على الرياح برضو اضافه لوقت الجزر


ورحلات البحاره زمان برضو تعتمد على الرياح يعني اللي رايح افريقيا ينتظر الرياح تكون جنوبيه عشان تساعدو في الرجوع وهادي الرياح يسموها ازيب جايه من الجنوب الى الشمال

وعندك فتره السماك تكون الرياح جايه من الشرق ما يقدر فيه هدي الفتره يبعد عن الساحل او البطان بسبب انو فتره السمكمك او السماك يكون هبوب الرياح قوي جدا
عبده الشعيبه
19/11/2013, 05:10 AM
الفائده طبعا من دا كلو

نعرف من الرياح حاله البحر
والمكان اللي بنروح فيه
وبرضو تفيد لصيادي الشبك ومحبي المجارير
وبرضو مفيده لصيادي الكساره يعرفو منها حاله البحر في كسارات مو اي وقت تقدر تجلب منها

احنا في فتره النطح وفيه غالبيه الرياح تكون غربيه وشمالية غربية ويصادف خلالها رياح شرقيه

الموضوع يطول في هدا الجانب

وبالمناسبه احنا في موسم العربي بانواعه وصيدو هدا الايام وسمين مره والفارس برضو لاهل الغزير والشريف

وعموما استقبل الاستفساراتكم واسئلتكم ونجاوب على قدر حاجتكم من الاسئله

الموضوع القادم

معلومه يعرفها القليل

نوع من الاسماك اللي ينصاد منو بالنهار يكون سمين و لذيذ واللي في الليل مايصلح ويكش وطعم مشي حالك

اسماك تعتمد لذة مذاقها بمواسم معينه

اجمل التتبيلات والطبخات والايدامات في العالم للسمك هي الطريقة البرماويه مع الوصفه كامله

بحر الشعيبه والصيد الجائر من اهل السنوركل وماهو السبيل للحفاظ علية

اشكركم جميعا يا اعضاء المكشات على المتابعة
اخوكم عبدالقدوس نورالحق من مكه
المعروف ب عبدو الشعبية
coolfishing
19/11/2013, 07:47 AM
بارك الله فيك اخي عبدالقدوس

وجزاك الله خيرا على مبادرتك و مجهودك في طرح هذه المعلومات

والظاهر مازال في جعبتك الكثير ونحن في الإنتظار

تحياتي

اخوك
ابو وجيه
يوسف ابو حلا
19/11/2013, 08:37 AM
شكراً بارك الله فيك وننتظر مزيد من التوضيح
accentkool
24/11/2013, 03:05 AM
الرياح لها تاثير كبير عالصيد سواء شاطي او داخل البحر
على طول يضعف الصيد والنقد
لما تسمر للبوت يصير مسرع ماتعرف تصيد
the dream
28/11/2013, 03:05 PM
سلمت انااملك يااخي الكريم على الموضوع الجميل
وجزااك الله خيرا
دلفين زهران
11/12/2013, 06:41 PM
بارك الله فيك


تم الإرسال بواسطة iPhone بإستخدام Tapatalk (http://tapatalk.com/m?id=1)
mansour12178
11/12/2013, 08:43 PM
تسلم يا عبدوه
موضوع ممتاز ومفيد لكل الشباب
( ابو سدين )
11/12/2013, 11:52 PM
يعطيك العافيه اخوي عبده
موضوع شيق و مثير و معلومه مثيره نابعه من خبره لا يستهان بها

كل الشكر و التقدير لك