فزعتكم يالنشاما يااهل العرف بالديزل

[موتي]

السلام عليكم ورحمة الله وبركاتة ،،،،،

اخواني عندي ددسن ٢٠٠٧ ديزل تيربو فيه مشكله اذا وصل سرعه 100 تكتم المكينة وتولع لمبه المكينه وتنزل السرعه الى 80 لها اكثر من سنة هالمشكلة ووديتها الوكاله وفحصوها وقالو مافيها شي ماعرفو علتها وغيرت حساس الهوا اللي بالقربه ونفس المشكله ووضبت الطرمبه ونفس الشي وغيرت جميع الفلاتر ونفس العله علتني الله يعل النيسان ومشاكلة اذا احد يعرف المشكلة او يدلني على ورشة بالرياض تكفون

[ريثان القصيم]

السلام عليكم ورحمة الله وبركاتة ،،،،،
وعليكم السلام ورحمة الله
اخواني عندي ددسن ٢٠٠٧ ديزل تيربو فيه مشكله اذا وصل سرعه 100 تكتم المكينة وتولع لمبه المكينه وتنزل السرعه الى 80 لها اكثر من سنة هالمشكلة
1-ووديتها الوكاله وفحصوها وقالو مافيها شي ماعرفو علتها
2-وغيرت حساس الهوا اللي بالقربه ونفس المشكله
3-ووضبت الطرمبه ونفس الشي
4- وغيرت جميع الفلاتر ونفس العله علتني
الله يعل النيسان ومشاكلة اذا احد يعرف المشكلة او يدلني على ورشة بالرياض تكفون
اخوي افحص نظام العادم دبات البيئه والكنداسه الكبيره وان حصل فرغهن ابرد للموتر واحسن عزم

اخوك
ريثان القصيم

[موتي]

قبل شوي قصيت حق البيئة ووصلت ماصورة عادية
نفس المشكلة ماتغير شي مازالت تكتم وتولع لمبة المكينة

[موتي]

وين اهل الديزل تكفون

[abo yusef]

وين اهل الديزل تكفون
انا مالي خبره بالديزل بس اذا نظام تيربو اعتقد انك لازم تشيك على التيربو واش فايده التيربو اصلا الا يزيد من ضخ الهوا للمكينه حتى يسير فيه عملية حرق كبيره
نفس نظام الروس للتيريلات اللي تعتمد على التيربو لذلك اعتقادي انك تشيك عليه

[ريثان القصيم]

قبل شوي قصيت حق البيئة ووصلت ماصورة عادية
نفس المشكلة ماتغير شي مازالت تكتم وتولع لمبة المكينة
نصيحت ابويوسف مهمه
واضيف
نظف التيربو
وافحص مبرد التيربو يمكن يحتمي
وافحص وزنية طرمبة الديزل يمكن شدو عليها بعد التوضيب تحتاج من يفتحها
ولا تنسى زيت المكينه حط زيت مصنع لمكاين الديزل التيربو
وافحص زيت القير اذا قديم اشفط لتر وغلقه كل 10000كم الي ان يكون جديد


اخوك
ريثان القصيم

[موتي]

ابويوسف مشكور بس السيارة ماتدخن ابد لو التيربو فيه مشكلة كان تلقاها تدخن

[موتي]

ريثان القصيم
كلامك صحيح ممكن اديتر الهوا فيه مشكله !!!!! بفحصه واشوف

اما الطرمبه قبل اوضبها كانت المشكلة موجودة وقالو لي الطرمبة ووضبتها ونفس المشكلة

اما الزيت اكيد لاتوصي هذي مااحط الا اصلي ومخصص لها

[موتي]

من ناحية التيربو تعرف انه عطلان بحاجتين

1- تلقاه يكب زيت
2- تلقا السياره تدخن دخان واجد

[تميمي.1]

السلام عليكم ورحمة الله وبركاته
افحص حساس الثلاجه
وافحص البخاخات وعسى الله يوفقك في حل مشكلتك

[موتي]

وين حساس الثلاجة

والبخاخات ناوي افكها وانا متأكد انها سليمة

[موتي]

وين اهل الديزل

[أبوسعد111]

السلام عليكم ورحمة الله وبركاته
على حسب ما قرأت من الردود
أتوقع والله أعلم أن المشكلة عندك بالتيربو
لان السياره تعاني من ( كتمه )
بسبب ان التيربو إما لم يستجيب أو هناك ضعف بشكل عام
وليس بالضرورة خروج الدخان إذا كان هناك مشكلة بالتيربو

وأنتبه لا أحد يفك لك الماكينه وهو ماعنده سالفه


كيف العزم مع التغييرات ؟
وهل أنت بالرياض أو قريب منها؟

[موتي]

العزم زين لين ٨٠ وبعدها تكتم وتولع اللمبة والسيارة خارج الرياض وتجي يومين ثلاثة بالاسبوع للرياض وترجع

شرايك اغير التيربو وبس

[موتي]

:looney::director::(

[بدددر]

الا اشور عليك تنطل مكينته وتركب بنزين احسلك من عطالات الديزل‏

[أبوسعد111]

العزم زين لين 80 وبعدها تكتم وتولع اللمبة والسيارة خارج الرياض وتجي يومين ثلاثة بالاسبوع للرياض وترجع

شرايك اغير التيربو وبس

لا
حتى تتأكد انه هو سبب المشكلة

بعدها بكيفك أما توضبه أو تغيره
والتغيير أضمن

لك رسالة على الخاص

[ajaa2009]

مشكلتك بتانكي الديزل افحص الشخال الي بالتانكي وان شاء الله تنحل المشكله

[مركز حراره]

احلى حاجه ان لمبت الكينه تولع مشكلتك بسيطه ان شاالله
افحص كمبيوتر مرنا بلقصيم ونلقالك حل