مشكله في الشاص

[حبل الوريد]

السلام عليكم
اخواني حبيت استفسر الوالد عنده شاص 2004 ما يشتغل الا بالاسبوع مره يمكن

مشاويره عليه قليله ،، نوبات وقليل تحصل اذا اببطى ما شغله صارت معه من شهرين يمكن ثلاث مرات

اول ما يشغل تجي زي النفضه بالموتر وهي نفضة بطيئة تحس كن المكينه مكتومه

ما اعلم اذا احد قد مرت عليه مثل هالمشكله قبل يتعلمون عليه راعين الورش

[San Francisco]

نظف قربه الهواء وأمسك فيه خط ٣٠ الى ٥٠كيلو ونت زار على الموتر وبعدها شف
بيصفى مكربن من الوقفه والمشاوير الخفيفه

[جني صغير]

هذا لما يحتمي الموتر يصفاء ماعد ينفض

بس بالصيف ما ينفض صح

[حبل الوريد]

لا يا اخوان حتى لو الجو معتدل
الوالد ماهو موجود ولا ودي اتعبث يموتره على غير يمه
بعض الريع قالو عندك كويلات

[الحيسوني-]

رح للوكالة وخذ فلتر زيت وفلتر هواء وصفاية بنزين وبواجي
ثم رح للصناعية ودورلك واحد شغله زين وخله يغييرلك صفاية البنزين والبواجي او انت غيرها بنفسك ( لا تشرحله ان عندك نفضه او اي شي لان لو شرحتله بيدخلك بواضيع كبيره على الاغلب انها مستبعده مثل بيقولك وزن بلوف او بلف ماسك او شنبر او او او على غير علم خله يغير هذلي وانت احكم بعدين )
ثم على البنشري وغير زيت وسيفون وخله يركب فلتر الهواء الجديد
ثم عب فل ووامسك خط ما هو لازم دوسله قوه يعني ١٤٠ تكفي

بعدين شوف اذا زان كان بها او تكون ماخسرت شي واجد واصلا هذلي لزم تغييرهن كل فتره

[الحيسوني-]

بعدين بما ان الموتر استخدام شايب وعلى كلامك شبه مخزن
نصيحه نصيحه انتبه تلمس المكينه
فيه اشياء تسوي نفضه واجد
مثل كراسي الكينه
وكراسي القير
والكلتش و و..
وجرب منظف مستبيشي اللي يحط مع البنزين

[San Francisco]

أي سياره ما تحركها الا قليل طبيعي تكربن وتطلع ميب صافيه لو تروح لورشه بيقولك تصفيه مكينه عشان يأخذ دراهمك والشغله مي مستاهله نضف فلتر الهواء وغير الزيت اذا كان قديم وأمسك خط ٥٠ كيلو يعني زر على الموتر ولا تعطيه الخامس خله بالرابع ونت تمشي بتشوف دخنه بسيطه عادي خلك داعس اذا وقفت الدخنه امش خمسه كيلو وبعده وقف وشف الشكمان يرجع احمر وتصفى المكينه
موتري واقف حدود سنه وكان نفس الوضع وهو واقف تشم ريحه كربون ويتفتف مسكت خط وصفى
لو تروح ورشه بيقول غير صفاي بنزيم وبواجي وأسلاك بواجي ونظف البخاخات ونظف البوابة

[ls1.5700]

نظف الثروتل اللي هي بوابة الهوى اللي يركب فيها خرطوش الهوى
وفلتر الهوى نظفه او غيره اصلي
ولا تنسى حساس الهوى نظفه فيه بخاخ خاص للكترونيات نظفه فيه
يوجد حساسن في الثروتل واحد يقيس الهوى الداخل للمحرك
والثاني للخمول لـ ال ار بي ام
نظف اول واحد من جهت الكبوت اللي بجنب الخرطوش
وان شاءالله يضبط ميه ميه

[حبل الوريد]

مدري ياخواني الي بوصله لكم واضح ولا

الموتر يرقل رقل تحس شوي ويطفى

ومن نصايحكم جزاكم الله خير راح ابدى بالاسهل للاصعب

[speed62]

مدري ياخواني الي بوصله لكم واضح ولا

الموتر يرقل رقل تحس شوي ويطفى

ومن نصايحكم جزاكم الله خير راح ابدى بالاسهل للاصعب

السلام عليكم
اخوي نضف البخاخات وغير والفلاتر والبواجي وكلها ماتتعدى الـ500 وكلها ضروريه كل فتره لازم تتغير
ولايستثنى كلام الشباب..موفق
ملاحظه..شغل السياره ورح للشكمان شف الكربون يقذف او يقطع يعني ماهو طبيعي مثل كل سياره اكيد يبيله تنظيف بخاخات والله اعلم واحكم