انت من اللي يتمشون بالكشته؟ اويزبن بمكان؟

[مطر سهيل]

مساء الخير اعضاء المنتدى
ان احب اشوف رأيكم عند الطلعه للبر ,فيه ناس اذا كشتوا يحبون يتنقلون من مكان الى مكان ,فيصير غداهم بمكان والعشاء بآخر ويمرحون بمكان , وهكذا , وهناك ناس يطقون الخيمه وتصير كل الكشته بمكان واحد ,
ودي اشوف رأيكم اخواني الاعزاء وابدأ برأيي
انافضل واستأنس اذا غير الواحد مكانه ماهوب كل وجبه ولكن كل يوم مثلا بمكان وافضل انه يمرح بالمكان اللي هو قاصد افضل .
وش رأيكم ؟

[المشراق]

أخي الكريم موضوع جيد وممتع تشكر عليه 0

بالنسبة لي فالذي يحدد البقاء من عدمه هو حالة الرحلة فقد تكون رحلة قنص طيور وتحتاج للتنقل أو فقع وهو كذلك أو ربيع ويذكر لك اطيب مماأنت فيه وهكذا أو يجوز لك المكان ولاتغيره أو يحدد البقاء ظرف معين كالحاجة للعودة مبكراً او احد افراد الرحلة أو على وعد مع ربع لك أو فاعلية مثل المزاين للإبل وكل ذلك لظروفك وربعك 0

[ابو ايمن]

حياك الله اخ سحابة سهيل الله يجيبها إن شاء الله
بالنسبة لي لمن يرغبون في التنقل وكما قلت الفطور في مكان ثم المشيء إلى أن يشاء الله حتى لو إلى العصر وهذا أقضل عندي
وإن وجدنا مكان مناسب للغدا ومغري جلسنا فيه للغدا

ثم تمشية إلى مسيان ونحط الرحال قبل الليل لاختيار مكان مناسب ثم العشا والنوم بدري هذا أفضل
وبعد صلاة الفجر مافيه نوم تجهيز الفطور وهكذا .

شكرا لك وكل عام وانتم بخير

[الوعد قدام]

مساء النور والسرور

حياك الله يا سحابة سهيل

انا من الناس اللي يحبون يطقون الخيمه في مكان واحد ومثل ماقال اخوي ابو ايمن من بعد صلاة الفجر على طول تمشيه والغداء نزبطه وحنا انتمشي في احدى الفياض وتالي العصر نرجع للخيمة

بس مره من المرات رجعنا للخيمة ونلقاها مهدومه اثاري الابل متوطيت ن فيها وقشنا صايرن كنه قش .....

وسلامتك

[فايز العامر]

قبل ست سنوات بالضبط طلعنا (في مكان واحد) ثلاث أيام،،، وبعدها بسنة يعني قبل خمس سنوات طلعت طلعة ست أيام، الغداء في مكان، والعشاء والنوم والفطور في مكان، وإلى الآن وأنا أتطعم بالطلعة الثانية أما الطلعة الأولى لولا موقف مر علينا كان ناسيها من ثاني يوم...

والسبب في ذلك -والله أعلم- انك مايمديك تمل من المكان اللي أنت فيه، إلا وانت مغيّره...

[سداااااح]

بالنسبه لي احب كل نومه بمكان غير
يعني قريب افطر فطور دسم وشد الرحال وبعد ساعه اوساعتين وقف وتقهوا وبيلة شاهي على الماشي
واكمل الى الساعه 1 او 2
ووقف وقفه لليوم القادم

[ابو مرام]

اذا كنتم شبااااااااااب تمشا وفلها وخل كل وجبه بالمكان ولكن اذا كنتم عوايل فخلكم بمكان واحد هذا رائي المتواضع
اخوكم ابو مرام...

[خالد777]

يعتمد ذلك اخوي على العدد ونوع الرحلة ((قنص ربيع تمشية مطارد سحب الخ ))
وبالنسبة لي اذا كان العدد قليل 2او3احب الدوجة وعدم الوقوف الا للوجبات وقهوة مسيان

[ا س ح ... 326]

افضل انا كل ليله بمكان ...

[عرق الحمراني]

المكشات تراه تمشي
والجلسه في مكان واحد احسن رح للاستراحه احسن
لانك من اول يوم تعرف المكان اللى انت فيه وتتعود عليه

[شبح الصحراء]

انا احب تكون الكشته كلها بمكان واحد لأنها اونس نقعد نسولف ونلعب ونمزح ونطبخ ويروح وقتنا كله وناسة أما تغيير المكان فما احبه نهائياً وقد جربت طلعة مع ناس كل ساعتين وهم طامرين بمكان وراحت رحلتنا كلها بالسيارة وحسيت بتعب وملل كبير ، احسن شي طق خيمتك وقفل الموتر وتمتع بوقتك .

[عاشق البران99]

انا احب تكون الكشته كلها بمكان واحد لأنها اونس نقعد نسولف ونلعب ونمزح ونطبخ ويروح وقتنا كله وناسة أما تغيير المكان فما احبه نهائياً وقد جربت طلعة مع ناس كل ساعتين وهم طامرين بمكان وراحت رحلتنا كلها بالسيارة وحسيت بتعب وملل كبير ، احسن شي طق خيمتك وقفل الموتر وتمتع بوقتك .

نفس الفكرة :good: :good: :good: ،،،

لكن لامانع بقليل من الدوران والرجعة لنفس المكان أو المخيم ،،،

[شبح الصحراء]

نفس الفكرة :good: :good: :good: ،،،

لكن لامانع بقليل من الدوران والرجعة لنفس المكان أو المخيم ،،،
صحيح يا عاشق البران لكسر الروتين .

[ALBDRANE]

اشوف ان المكان الى صار روضة مربعه والي حولها دهر لا تعداها أما أذا كان المكان وديان و شعبان فالتغيير ينعش شوي الى صارت المدة أكثر من يومين

[الطعس الذهبي]

انا من الي يقعدون

[امبارك]

السلام عليكم،،،

إذا كانت الدنيا ربيع وكل محل زين ومعك وقت وأخوياك على الكيف.. فمعشاك كل يوم بمحل أحسن.. وتمشى من الضحى إلى العصر.. بس لا تنسى تأخذ معك وأنت تمشى وترود.. زمزميات القهوة و الشاهي.. وشوية (لبين) طافحتن زبدته مع سحتن (تمر) غرقانتن بدبسها.. وإذا ابعدت خل آخر محل هوالقريب للديرة.. علشان ما يضيع طعم البر من التعب والأرهاق.

دمتم مربعين

[مهراس]

السلام عليكم ورحمة الله وبركاته

كلام أخونا شبح الصحراء الله يمسيه بالخير معقول، لأنك سوف تطلع للبر مرة أخرى وتغير المكان، هذا اذا انتم طالعين يوم أو يومين أما اذا اكثر من ذلك فلا بد من التغيير وهذه حلاوة الرحلات ابو كم يوم.
شكرا على موضوعك الممتع.

أبو فهد

[سندباد الخليج]

السلام عليكم،،،

إذا كانت الدنيا ربيع وكل محل زين ومعك وقت وأخوياك على الكيف.. فمعشاك كل يوم بمحل أحسن.. وتمشى من الضحى إلى العصر.. بس لا تنسى تأخذ معك وأنت تمشى وترود.. زمزميات القهوة و الشاهي.. وشوية (لبين) طافحتن زبدته مع سحتن (تمر) غرقانتن بدبسها.. وإذا ابعدت خل آخر محل هوالقريب للديرة.. علشان ما يضيع طعم البر من التعب والأرهاق.

دمتم مربعين


:good: :good: :good: :D

[شبح الصحراء]

السلام عليكم ورحمة الله وبركاته

كلام أخونا شبح الصحراء الله يمسيه بالخير معقول، لأنك سوف تطلع للبر مرة أخرى وتغير المكان، هذا اذا انتم طالعين يوم أو يومين أما اذا اكثر من ذلك فلا بد من التغيير وهذه حلاوة الرحلات ابو كم يوم.
شكرا على موضوعك الممتع.

أبو فهد

ايه بس انا اقعد بالمكان ما اغيره حتى لو كانت الكشتة إسبوع كامل ، من الممكن اني الف وأدور حول مكشاتي بس أرجع له على طول . فيه نشاطات مسلية يمكن الواحد يقوم بها بمكان واحد كلعب الكورة أو المطارحة والسواليف بالخيمة وشب النار ، أم اني اقعد الف بالسيارة كل نهاري لين راسي يصدع انا ما أميل له ، وللناس فيما يعشقون مذاهب مثل ما يقولون .

[عبادي العامري]

على حسب كلام اخوي البدراني اذا كانت اكثر من يومين لامانع من اختيار مكان يكون احسن من الاول اما اذا الطلعه يوم فاقظب ارضك

[المنصف]

انا احب تكون الكشته كلها بمكان واحد لأنها اونس نقعد نسولف ونلعب ونمزح ونطبخ ويروح وقتنا كله وناسة أما تغيير المكان فما احبه نهائياً وقد جربت طلعة مع ناس كل ساعتين وهم طامرين بمكان وراحت رحلتنا كلها بالسيارة وحسيت بتعب وملل كبير ، احسن شي طق خيمتك وقفل الموتر وتمتع بوقتك .

كلامك صحيح
أنا جربت التنقل وكانت من أسوأرحلاتي كلها تعب وشقا طول الوقت وأنا أدوج بالسيارة وإذا وقفنا إلى كل واحد منسدح يبغى يرتاح
وجربت المكان الواحد لمدة ثلاثة أيام ويكون مكان كله ربيع ولا فيه أحد
صراحة رحلة مانسيتها

[عاشق التطوير]

الجلسة افضل بكثيرولامانع من التمشية وخاصه اذا الجوزي هالاجواء الجميلة والسمريحلوبالمساء امام شبة النار

[][عزام][]

مساكم الله بالخير طريقتنا واظن انها طريقة اغلب الكشاته هي الدلجه بالنهار وما نوقف الوقفة الصدزيه الا مسيان ونجلس الى الفجر همن بعد الفجر تقهوي ونحرك ندلج نفس الشيء والفطور بمكان والغداء بمكان ثاني لكن بعض الأحيان اذا كنا قليلين وجية الإفطار تكون بالسيارات لعدم وجود والقت والحرص على مرور اغلب الاماكن(الكشته حلاته بالدلجه والتمشي والجلسه حلاته مسيان والليل والصبح)

[راعي الكيف]

اتوقع انها ترجع لعدد الاشخاص اللي يبون يكشتون ..

يعني مثلا ... من اربعة اشخاص وتحت ... لا ولله خفيفين واغراضهم مهيب واجد وخصوصا ان كانو شقردية ... الترحال افضل وضع

أما اذا كانت الكشته اكثر من 6 اشخاص وما فوق ... لا والله إلا انشبو بمكان ... واقترح في هذا الوضع ان احدن يسبقهم بكم يوم ... ويشوف المكان اللي عليه الكلام ... ويرسل الاحداثيات لباقي الربع ... ويجون ... ولا مانع من التمشيات مع المبيت في نفس المكان ..
وتصلح ذي للشيبان اكثر شي ... لانهم مايحبون كثرة الروحة والجية ... بس الشباب لا بالله ماتصلح ابد ... وانا ياواحد ما اقدر اقعد في مكان اكثر من يوم واحد

والله اعلم