بعض المصطلحات المكشاتيه .. خذ ماعندي وعطني ماعندك

[سقم المعادي 1]

السلام عليكم



شلونكم مع المربعانيه و البراد اللي جانا .. اللي متعلق بالدفايه واللي حول الوجار ,, نحمد الله سبحانه وتعالى على هذه النعم ولا ننسى اخوان لنا في سوريا في هذه الاجواء الشديدة البروده فهم بلا مأوى ولا عتاد ماعندهم الا الله سبحانه وتعالى

لا تنسونهم من دعائكم الله يصلح احوالهم


نرجع للموضوع

كثير من بعض المصطلحات فيه البعض مايعرفها سواءاً لاختلاف المسميات بين المناطق وغيرها من الاسباب


نبي هالموضوع يكون كفائده ومرجع للبعض اللي مايعرف هالمصطلحات

و البدايه عندي انا

اولاً

كلمه ( الشقه )

اول مايطري على بال الواحد هي الشقه اللي بوسط العماره :D

لكن ماهو ذا قصدي .. الشقه كلمه قصيميه و بعض اهل الشمال يسمونها نفس المسمى

وهي الارض المستويه بين كثبان رمليه .. يعني ابسطها لك عزيزي القارىء , تكون ارض منبسطه في وسط النفود و تحدها يمينها و يسارها نقيان و عروق ,, المكان اللي في النص هذا يسمى شقه او ( خبوب ) و مفردها خبه


الكلمه الثانيه :

خباري او خبراء

خباري هي الارض اللي تجمع الماء .. يسميها البعض فيضه من قوله ( فاض منها الماء ) و عاده يجتمع بها الماء بعد المطر و تصب فيها الشعبان و بأمر من الله ينبت فيها النفل والخزامى و كل مالذ و طاب منظره و ريحته :D


أترك الباقي لتفاعلكم و لي عودة أن شاء الله بالمزيد :good2:

[قوافي ( أم نهار )]

عليكم السلام ورحمة الله وبركاته

حياك الله بخيمة المنوعات واشكرك على موضوعك القيم والهادف

بارك الله بك وحفظك واتمنى من اخواني المكشاتيه التفاعل وحيا الله الجميع..

تحياتي وتقديري واحترامي

..قوافي..

[لورن]

يقولون (أرض زبلقعه) أي ارض فلا ماعندك من يجيب ولا فيها حياة

[صياد الخبر]

السلام عليكم

قفرة - جردة

خرمس - ظلام

بييز - وقاية او قطعة القماش اللي تمسك بها اي شيء ساخن

نقرة - حفرة او دحل

هذا بعضه وان جد برجع

بالتوفيق

[راعي الرود]

شغايا مفردها شغيه

هي مجرى يمشي فيه السيل اصغير من الشعيب

http://mw2.google.com/mw-panoramio/photos/medium/63564687.jpg

---

دحول مفردها دحل

غار او حفرة عميقه على الارض و تكثر في الصمان بشكل عام ( لذا يُنصح بالمشي على الجواد السابقة وعدم اختلاق طريق جديد خصوصاً في الليل ماتدري الا وانت بوسط الدحل ولا احدن درى عنك )

http://www.athagafy.com/somman/images1/Sommn4.jpg

--

صياهد مفردها صيهد

ارض منبسطه قفر .. تنبت احياناً ببعض النبات الحولي لكن ماتطول وتموت
( ماحصلت صورة مطابقه )
--

الحرات مفردها حرة

الاراضي اللي حول البراكين تكثر حول المدينه المنورة و تتميز بكثر الحجارة السوداء فيها و الالوان الداكنه بشكل عام سواءاً من تربه وغيره

http://www.aawsat.com/2007/08/01/images/travel1.430540.jpg


بالنسبه للكلمه اللي اشرت فيها بموضوعك ( الخبوب )

مثل ماسمعت من الشيبان و كانت على نفس وصفك لكن بشكل ادق تسمى للارض الزراعيه اللي تقع مابين مرتفعات رمليه واذا انا غلطان صحح لي عشان استفيد



شاكر لك على الموضوع الممتع

[الدوسري2010]

الحدبه - وتعني الارض المستويه المنبسطه ههههههه

[زلفاوي 2011]

الله لايهينكم

معنى



*عرق
*قفر
*شيب

[أبو نور]

صبخه :

الارض الطينيه

الصمعاء :

الارض اللي فيها حصى ولاينبت فيها نبات

[شاق النفد]

الله لايهينكم

معنى



*عرق
*قفر
*شيب

عرق يعني طعس وكل ما كان اكبر واطول من اللي حوله يسمى نقا
قفر يعني الارض الخالية على ما اضن
شيب هو اللي ياردون منه الويت ماء
وفيه ذيب يسمى شيب ان كانك تقصده

[شاق النفد]

الخبوت وهي جمع خبة
وهي المكان اللي بين العرقين في النفود

[ابو صقر ٧٧٧]

المدعى - ايضاً الارض المنبسطه المتساويه ع مد النظر

[راعي العجراء]

صبخه :

الارض الطينيه

الصمعاء :

الارض اللي فيها حصى ولاينبت فيها نبات
الصبخه


الصبخ او الصبخه الارض المالحه التي لاتنبت اي نوع من الاشجار
الا اشجار الطرف او الطرفا
الصمعاء
هي نبات يطلع في الشتاء او اخر الربيع وما تاكلها الحيونات الا اعزكم الله الحمار ياكلها وهي خضراء
واذا يبست تاكلها بقية الحيونات
هذا ماحبيت ايضاحه

[jabal radwa]

حنا بالغربية نسمي الديرة اللي ماجاها ربيع او كمله ماجاه مطر والشجر يابس /دهر/
فم الوادي /اي موقع اتصال الوادي بالاودية الاخرى
الصمد / الديرة الواسعة المفتوحة اللي ماحولها ضلعان ومافيها رمال واللي فيها رمال نسميه /دارة /

[ذيب الفقارة]

خذ ما عندي وهات ما عندك :

قرص الجمر

قرص الملة

أبو جابر

عبود

الكسرة

كلها مسميات لشيء واحد عندنا في الغربية

[صياد الخبر]

يقال

تهاجروا - اقدعوا ( لفظ لتقديم التمر )

الي يبخص او انه خطا يصحح لي

[ذيب الفقارة]

أبخص

عندنا يعني أعرف وأدرى بالشيء

[راعي العجراء]

نسريه

وهي الرياح او المهب الشرقي ويميل قليل للشمال وتكون شديدة البروده

يقول فيها الشاعر دغيم الضلماوي

نسرية ياكليب صلف مهبه = لاهب نسناسه كما سم دابي

كذلك يطلقون عليها العرب مبكيه الحصني او مبكيه الارنب

فالحصني اذا تذرا عن مهبها بالصباح خلف قشعه فقد وضع نفسه في ضل القشعه وهو يريد الشمس

واذا تبين للشمس هبت عليه النسريه البارده

[ابوصالح3]

السلام عليكم





شلونكم مع المربعانيه و البراد اللي جانا .. اللي متعلق بالدفايه واللي حول الوجار ,, نحمد الله سبحانه وتعالى على هذه النعم ولا ننسى اخوان لنا في سوريا في هذه الاجواء الشديدة البروده فهم بلا مأوى ولا عتاد ماعندهم الا الله سبحانه وتعالى


لا تنسونهم من دعائكم الله يصلح احوالهم



نرجع للموضوع


كثير من بعض المصطلحات فيه البعض مايعرفها سواءاً لاختلاف المسميات بين المناطق وغيرها من الاسباب



نبي هالموضوع يكون كفائده ومرجع للبعض اللي مايعرف هالمصطلحات


و البدايه عندي انا


اولاً


كلمه ( الشقه )


اول مايطري على بال الواحد هي الشقه اللي بوسط العماره :D


لكن ماهو ذا قصدي .. الشقه كلمه قصيميه و بعض اهل الشمال يسمونها نفس المسمى


وهي الارض المستويه بين كثبان رمليه .. يعني ابسطها لك عزيزي القارىء , تكون ارض منبسطه في وسط النفود و تحدها يمينها و يسارها نقيان و عروق ,, المكان اللي في النص هذا يسمى شقه او ( خبوب ) و مفردها خبه



الكلمه الثانيه :


خباري او خبراء


خباري هي الارض اللي تجمع الماء .. يسميها البعض فيضه من قوله ( فاض منها الماء ) و عاده يجتمع بها الماء بعد المطر و تصب فيها الشعبان و بأمر من الله ينبت فيها النفل والخزامى و كل مالذ و طاب منظره و ريحته :D




أترك الباقي لتفاعلكم و لي عودة أن شاء الله بالمزيد :good2:






موضوع جميل ومفيد ورائع جدا


الشقه زي ماتفضلت هي الارض المنبسطه بين هضبتين اودشتين ولايشترط ان تكون نفود

بدليل ان فيه أرض اسمها الشقه تقع بالمنطقه المحايده بين السعوديه والكويت والعراق

وفيه ارض تقع بالقرب من منطقة الابرق بين الكويت والعراق اسمها الشقه

وانا جايها وقانص فيها عام 1980 الموافق عام 1400 ه



والخبرى طال عمرك هي الارض المنخفضه في وسط الفيضه ؟ يفيض الماء اليها وتكون ارضها صخرية لايوجد مسامات للصخور حتى تتسرب منها المياه لباطن الارض بل يبقى فيها الماء حتى يتبخر ؟