تسجيل الدخول

مشاهدة النسخة كاملة : مشكلة في مكينة السيارة


0ابوعبدالملك0
25/12/2013, 10:08 PM
السلام عليكم ورحمة الله وبركاته
صبحكم / مساكم الله بالخير

نبي فزعتكم الله يبيض وجيهكم

انا شريت ددسن موديله 93
فحصته كمبيوتر قال ممتاز المكينة مافيها اي مشكله
وضغط البساتم كله في التسعينات
بس يبيله صيانه من تحت السيارة ( مساعدات ، اضرعه ، ....)

دخلتها ورشة وشريت اغراضه
وقلت اوزن لي البلوف
رحت اليوم للورشة ولقيت الموتر يطلع دخان
سألت الميكانيكي وش ذا الدخنه
قال شنمبر !!!!

علما ان السيارة واقفه 4 شهور والزيت محترق مررره

شوروا علي يا جماعة الخير
شريت الموتر واحط فيه
الآن يقولون شمنبر
وهل يمكن يكون من وزن البلوف لأنهم فكوا صدر المكينة ؟؟
وياليت تدلوني على ورشة ممتازة اروح لهم
المكان الرياض - حي الشفا
وطن العزة
25/12/2013, 11:42 PM
شكل بالبلا بالميكانيكي اللي بالورشه محتاج فلوس ويبي يمسطها منك عشان كذا قال شمبر وهي يمكن تحتاج تغيير بواجي

وتنظيف كبليتر فقط ..

غير زيت وسيفون وبواجي و أسلاك بواجي و إستعمله كم يوم إن حصل تمسك به خط ما هي شينه

ولا تسنى تعاير الزيت بعد ما يبرد الموتر

و إذا ما راحت الدخنه سو تنظيف للكبليتر لكن بدون فك لأن لو فكيته يبي يعلك بالخرابات ونادر

يضبط , وإن شاء الله تروح الدخنه ويضبط موترك


مع اخو اللي معك ولا يدخن إلا اذا إندمر الكبليتر
0ابوعبدالملك0
26/12/2013, 12:00 AM
الله يعطيك العافية

غيرت البواجي
الاسلاك وتنظيف الكلبليتر قال مايحتاج

بكره بإذن الله بغير الزيت والسيفون وبمسك خط وان شاااء الله يضبط

ولكن استفسار وش الزيت المناسب للسيارة ؟
San Francisco
26/12/2013, 01:18 AM
حط الترا سفن ٢٠ ٥٠
وش لون الدخان الي يطلعه ابيض ولا ازرق ولا اسود ؟

على فكره فيه بعض الورش يحط زيت محروق بالمكينه ويزود عليه ديزل عشان تدخن المكينه ويقنعك انه شنبر انتبه

لا تحاول تمشي عليه كثير أو جب زيت وفلتر أصلي وخل الورشة تغيره

رص عليه لا تخليه ثاني شي خذ منه فاتورة مختمه بالشغل الي سواه

لو عيا لا تحاسبه ودق على الشرطة هذا اذا كان موترك مايدخن من اول بس لا تخربها بقوه مع راعي الورشه خلك شاد بدون هواش

امش على الموتر وشف اذا ضبط زين على زين

اذا ما ضبط خذ تقرير الفحص ورح قدم شكوى على الورشه بيحولك على شيخ الصناعية أو شيخ الورش

عطه ورقه الفحص الي شريتبها الموتر وخلهم يفحصونه بياخذون لك حقك سواء من مركز الفحص أو الورشه

ون بغيت معلومات أكثر أرسلي على الخاص
0ابوعبدالملك0
26/12/2013, 07:20 AM
تسلم اخوي بإذن الله هذا اللي بيصير
بالنسبة للزيت فيه اشخاص نصحوني بكاسترول
ما ادري وش الانسب كاسترول او الترا سفن ؟؟

سؤال ثاني هل فيه ورشة ممتازة في فحص المكينة
يعني يعطيك العلم الأكيد
ياليت تكون في جنوب الرياض
San Francisco
26/12/2013, 08:05 AM
مارديت وش لون الدخان ؟
بالنسبه للزيت انا استخدم الترا سفن لي اكثر من ست سنوات والكاسترول جيد بعد
بالنسبه للورش مالي علم او مافيه واحد أثق فيه الشباب يفيدونك
0ابوعبدالملك0
26/12/2013, 08:53 AM
عذراً نسيت
الدخان اتوقع ازرق
منيب متأكد
شفته يدخن سألت الميكانيكي وسد نفسي

ولكن وش الاحتمالات اللي بتكون اذا كان الدخان ازرق او ابيض