سواق الشاص يتحول إلى كابتن طيار في رحلة برية

[حفرلوجيا]

سلام يامكشاتيين
أبو أحمد وأبو محمد صديقان يمثلان نموذجا لعينة من هواة الرحلات يسود بينهم التفاهم والانسجام.. ولهما رحلات متكررة كل موسم.. ولا تنقضي رحلة إلا وتزداد اللهفة مع مرور الأيام لمرافقة بعضهما في غيرها.
تبدأ عملية الاستعداد للرحلة عادة بالحلوف.. كل واحد يصر على أن تكون بسيارته.. ولا تنتهي بـ(علي الطلاق ما تجيب شي من أغراض الرحلة)..
المهم أنهما يبدآن الرحلة.. ولا تهم العيوب في كليهما.. فهذا راض بعلات ذاك.. خذ مثالا لذلك:
لحظة ركوب السيارة(شاص أبو احمد) .. وخلال الاستعداد للانطلاق يبادر أبو محمد:
* ما شاء الله أشوفك يابو احمد مرتب الاغراض وصافها شد مصنع..
في الوقت الذي انشغل ابو أحمد بحركات متلاحقة وسريعة بتشغيل الرادو وتعليق ريشة الكنود ثم تشغيل القارمن .. يواصل أبو محمد:
* ما شاء الله كأنك كابتن طيار يابو أحمد حافظ شغله صم.. الله يسلم هالايديات وراعيهن.:heart:
----- ومن طقوس الرحلات غالبا التوقف بآخر محطة قبل دخول المنطقة البرية للتزود بالوقود وتكملة بعض النواقص..
= هاه يابو محمد ناقصك شي من البقالة..
* ما بعدك تعدي يابو أحمد أكيد تجهيزك تكاز.. أبي سلامتك يابعدي.
----- ومع دخول البر أو البداية الحقيقية للرحلة.. يبدأ الإثنان بالعزف على الذكريات الجميلة..(وتذكر يوم حنا .. وتذكر يوم شفنا.. وتذكر يوم....).. ولا تخلو العملية من:
* (أشهد إنك سواق يابو أحمد).. عند إدعاء تحاشي مطب ضربته السيارة وسلم شاصي الشاص.. ولم تسلم المرافق والظهر من.. آخ.. أي.:)
* (أشهد إنك دليلة) .. إذا قطع أبو أحمد مسافة 5 كيلومتر باتجاه المكان المقصود باستهلاك نصف تانكي البنزين.:)
*(ذيبان) .. عند إدعاء تحاشي البطناج .. أو شطف الدبايات أو الدروب بكل عواجة وتهد الحيل.:)
المعنى مادام النفس زينة فـ عين الرضا هي (الوالمة).:heart:
---- في محطات التوقف والمراح أول يوم.. يرافق تفاصيل الاعداد للمكان أو الوجبات..
*(هاه يابو فلان وش رايك).
=(اللي تشوفه ما بعد رايك راي).
وهات يا مجاملات ونقاش ودود .. لا ينتهي بالاعجاب بالسوالف حتى لو هي تحوم الكبد..
وهذا يرى ذاك قرم .. سنع .. وليدة.. وخوي يحط على الجرح يبرى...
وحتى الدافور والذراية والأدوات والعدد لها نصيب من عبارات الثناء على صاحبها..
ويا زين طبخك (حتى لو هو بربسة).. ويازين كبسة تسويها (حتى لو هي مريس).. وشاهيك كايف أو خادر (لو هو قار أو غسال خوص)..:confused:
وهذا الاسراف في الود والاعجاب والانسجام لا يلبث أن تخف (نشوته) مع العد التنازلي لنهاية الرحلة..
فيبدأ أبو محمد أولا في الليلة قبل الأخيرة من الرحلة منزعجا:
* وش اللي يخرفش يابو أحمد.. مالقيت تحطنا إلا بمراح ابو جعل..:mad:
* وياخوي ظهري انكسر ..الظاهر يلزمنا شيول حتى نواسي الارض ونريح ظهورنا.. يا خوي وش ها لعواجة باختيار المكان)..
ويأتي الرد
=(وش عرفك .. أنا جايبك للذرى .. وإلا تبينا بروس الحزوم حتى إذا أصبحنا وخشم الواحد صاير مثل منقار الغراب.. أقول نم ولا يكثر هرجك)..:mad:
------
*عمى .. عمى.. عمى..
قالها أبو محمد في الليلة الأخيرة وهو يقف خلف السيارة

..... يتبع

[عاشق النحم]

ممتاز يبو سليمان

ممتميز كعادك


وبيني وبينك انا من النوع الي يسكت والل يستر اذا زادت:d

[grdan]

ياحبك للتوشيق يابوسليمان
بسرعة دخلنا جو مع السالفة ان شاء االله ما يحصل فيها مكافخ :d

[المربد]

الشرهة مو عليك ...!!!
الشرهة على ابو احمد وابو محمد اللي يعلمونك بعلومهم
لكن الله يسامحهم ما يصبرون عنك
من يشوفك احدهم كانه قربة منطلق فمها، اما الثاني راعي الشاص ،،، سبحان الله كانه كفر تيوب لس منطلق بلفه ما يرتاح لين يتصل عليك ويعطيك النشرة بالتفصيل.

تكفي يا بو سليمان لاتبطي

[ا س ح ... 326]

اغديك مكمل ......

[حفرلوجيا]

هلا بالمشرف عاشق النحم و grdan و ا س ح ... 326..
والأمور لا تصل إلى المكافخ بالأيادي..
أما المربد (اللي يطلق عليه خشم الحصان معقد الشوش ) فما نقول إلا .. خير:mad:
----------------------- التكملة
= هاه سلامات عسى ماقرصت يابو محمد؟
* تعال الله يغربل العدو.. ماكفاك تكسير ظهورنا .. الحليب اللي بالترمس متنثر ومختلط مع اللحم والخبز .. كله من سواقتك يا غشيم..:mad:
= إيه.. هين .. مقصدك قابل الصياح بالصياح تسلم.. نسيت إنك آخر من رتب العفش.. ورى ماتقول إن رفالتك وقل تدبيرك هو اللي حاس قشنا..:mad:
* إيه .. خل ننام لا يجي أكثر .. والله يخلف على باقي الهريفي..
--- في صباح اليوم الأخير .. وأثناء الاستعداد للإنتقال لمكان آخر..سأل ابو محمد: ورى ما نروح لفيضة نورة؟.
= الناس تختمها بمسك وأنت تدور مكاشيت العوايل وزحماتهم وزبايلهم يابو محمد .. لا .. مشينا للنفود نظافة وحطب ودفى .. وخل رايك يابو محمد ببطنك..
---- وقبل الانطلاق بلحظات يبدأ أبو أحمد كالعادة بحركات متتابعة بتشغيل الرادو والقارمن وتعشيق الدبل وتشغيل المساحات و...
أبو محمد: يا خوي وراك حركة .. اركد ترانا راكبين كسرة شاص .. أزعجتنا.. وأحس إنك بهالحركات قاصد تنرفزني..:p
أبو أحمد: الله أكبر .. وين راح كابتن الطيارة .. يوم حنا بأولها..:p
---- ربما بقي في ذهن أحدكم بعد قراءة السطور السابقة أسئلة من النوع التالي:
هل هذه الفروقات بين الانسجام في أول الرحلة والتأفف في آخرها .. نتيجة الملل وطول وقت الرحلة؟
أم أن ذلك لا يحدث إلا بين الأصحاب المقربين من بعضهم لدرجة أن كل شخص يظهر على طبيعته وبلا رتوش؟
وهل الاعلان أو التلميح بالتضجر من تصرفات الأصحاب في الرحلة شيء ايجابي بحيث لا يبقى شيء في القلوب؟
وهل الذي لا يعلن عن تضجره هو الذي يتحمل (بسكات).. ثم تأتي ردة الفعل منه في يوم ما عنيفة ولا تطاق؟.
المؤكد أن ابو أحمد وأبو محمد ومن هو مثلهم يتضجرون ويتأففون في آخر الرحلة من بعضهم (ويعلنون) عن ذلك .. لكن بعد أسابيع أو أيام يشتاقون لرحلة أخرى تبدأ بعين الرضا وقد تنتهي بعين السخط..:what:
مع التحية لكل سواق كسرة شاص أو كابتن طيار..
وسلامتكم

[عيون الغلا]

إخلص ياكثر حلومك

[المتهادي]

صدقت ...يابو سليمان ...

والشاعر يقول ....

عين الرضا عن كل عيب (ن) كليلة ....
.....................................لكن عين السخط قد تبدي المساويا

وأنا أعتقد انه وقت الرحله ...هو الي يتحكم ....بالملل من عدمه ...


وسلامتك

[دله وفنجال]

السلا عليكم...
ابو سليمان سلمت على هذة القصة الرائعة والسالفة الشيقة كما عهدناك ...
اما من ناحيت التأفف والتضجر في اخر الرحلة فهي لعدة اسباب الاول زود الميانه ( والدعوى مزح لان السوالف خلصة فصار كل واحد يعلق على الثاني ) اما السبب الثاني ان الطلعه مافيها الا شخصين تجيب الملل اذا طولت اما اذا كانو ثلالثة او اكثر فهذا افضل ...
والسبب الثالث والاخير وهو الاهم ان كل واحد يطلع مابقلبة بوقته لجل مايكبت شي بلقلب على خوية ومع الوقت تكاثر الزلات ولاعاد يواطنون بعض...
والله لايجيب الزعل...
اما من ناحيت ملاحضاتي على الكثير من الشباب اذا كشتو انهم يستلمون شخص بلجلسة ويعايرونة او يتصيدون علية الزلات بلكلام او الفعل وهذي الاشياء تتراكم بصدر ولايضهرة صاحبة مما يسبب الكراهية والبغضاء مع مرور الوقت ...
مشكور يابو سليمان وماقصرت...

[شمالي غير]

هو صحيح ان الملل يصير اذا طالت الرحله لكن مناقر وحط وشيل ما اظنه دايم ولاهو خلا

طرح جميل و اعجبني زيادة المديح اللي انقلب بالضد في نهاية القصه

وكل شيء زاد عن حده انقلب ضده !!

تسلم ويعطيك العافيه

[((( الحر)))]

وانت سالم وغانم يابو سليمان .



حكمة تحتاج الى وقفة طويلة في جميع امور حياتنا نسمعها كثير ولكن قليل منا يعيها وهي






مادام النفس زينة فـ عين الرضا هي (الوالمة).





دمت بخير وعافيه.... ومواضيعم نبراس تنير طريقنا المكشاتي

[خشم الحصان]

الاخ الغالي

والحبيب
حفرللللللللللللللللللللللللوجيا
السلام عليكم
ابو سيلمان موضوع وزنه (قلت تمر) في الزمن الماضي وفي هذا الزمن وزنه ذهب
الغالي الله يحسن الينا واليك ودي احسي ولكن في ثمي مويه
خشم الحصان
.....................
نغزه......... ياكثر ربعك يابو سليمان بس هالمره ماقلت مرو علي

[(محمد العبري)]

ابو سليمان

قصة مادري هي تخيّلية ولا واقع عن اناس تعرفهم!!
لكن الحقيقه انه موضوع يحصل بين ربع الكشته بتفاوت يزيد وينقص من واحد لأخر
لكن يابوسليمان وشرايك بالي يبدون الطلعة بالمناقر والعيارة الي هي مزح برزح وتنتهي بشكر وثناء على قضاءوقت رائع سوية
ابوسليمان اشكرك على سواليفك وقصصك الجميلة الي ماتخلو من عبرة وعضة
تحياتي

[صقر]

طرح رائع أخي حفرلوجيا ومعالجة جميلة لبعض اوضاع المكشاتيين.

وهذا النوع من المزح دائماً يحصل بين الأصحاب المقربين.

دائماً قلمك متألق ومشكور على هذه المشاركة الهادفة.

وبارك الله فيك.

[منتعش]

دايم هاذي علومك يا الغالي : حفر لوجيا
مزحه ورزحه
الله يحفظك ويوفقك

[ملاعب الريح]

مشكور على هالطرح الرائع والمشوق وبإنتظر جديدك .......................

تحياتي (ملاعب الريح)

[الذيب الابيض]

ياخوي ياحفرولوجيا
والله بالضبط هذا اللي يصير بيني وبين واحد من الربع
ارجع للديره وانا اقول توبه اطلع معه
وبعد اسبوع اكلمه هاه في راسك طلعه
وكننا متهاوشنا الطلعه اللي فاتت

وشكرااااااااااااااااااااااااااااااااااااااااا

[حد السيف]

:mad: :mad:



السلام عليكم

:no:

صحيح امدحة بس كبتن طيارة كبيرة شوي

الا اذا هي طيارة فليت يمكن

[سيف السيف1]

باعتقادي أن الرحلة يجب ان لاتخلو من التعليقات الخفيفة التي تضفي على الرحلة لون أخر.. وهذا يتوقف على فهم النفسيات بين الأصحاب..
بعض الناس يعرف متى يعلق ومن هو الشخص المعلق عليه هل يتقبل التعليق بصدر رحب أم لا..
من خلال هذه القصة واضح أن أبو أحمد وأبومحمد صديقان متفا همان لايمكن أن يستغني الواحد عن الأخر ..
وزينهم ويا حليلهم ياليت من ركب معهم وسمع ها التعليقات ..
تحياتي لك ياحفرلوجيا

[الفتى المجازف]

حفرلوجيا

اسعد الله جميع اوقاتك بالخير والمسرات.

حقيقة كثيرا مانواجه مثل تلك المواقف التي ذكرت خصوصا اذا كانت الرحلة تزيد عن ثلاثة وفيها من كل ماهب ودب.
اما بيننا كأصحاب ونحن (ثلاثة) فأعتقد ان هذا غير متاح إطلاقا وهذا ليس بسبب الرسمية مطلقا ولكن بناءا على هدي نبوي تعلمنا منه فوفقنا الله الى رفقة طيبة ذات نفوس معطرة بعين الرضا يسودها المحبة والإخاء صحيح ان آخر الرحلة هناك نوع من (الغلقة) ليس بسبب اختلاف في الرأي او تعنت في القول او تعارض في الاتجاه وإنما بسبب الإفتراق والعودة الى الروتين الممل بعيدا عن التجريح والإسفاف المسيء والاعتراض المقيت اكرر إنما بسبب العودة للروتين.

هناك ادعية كثيرة ومفيدة وهي مهمة وتساعد على الألفة والمحبة والتوافق والتوفيق:
منها دعاء الركوب
دعاء السفر
دعاء دخول القرية او البلدة
التكبير والتسبيح في سير السفر
ذكر الرجوع من السفر
كل هذه الأدعية ضرورية ومهمة وتساعد بعد توفيق الله على قضاء وقت ممتع يسوده الألفة والمحبة والإخاء الصادق.

كما انه يجب ان يتم اختيار امير للرحلة وهذا مما يساعد على اجتماع الرأي وتوحيده والاتفاق عليه بعد المشورة ففي الحديث بما معناه (الراكب شيطان والراكبان شيطانان والثلاثة ركب)الخ..
اذا ومن هذا الهدي النبوي نستشف دروس قيّمة ذات منافع عديدة تصب في صالح الجميع لعل احد الاخوة يتحفنا بالأحاديث التي تعين وتوفق لرحلة كشاتية وغير كشاتية فيها صفاء ومودة واخوة تتجسد على ارض الواقع عند الذهاب وفي العودة.

ختاما اشكر لك اباسليمان موضوعك القيّم والمفيد سائلا الله لي ولك ولجميع الأخوة التوفيق والسداد.

[ريف النشاما]

:) :) :) :)

سلمت أناملك يابو سليمان على هذا الطرح الطائر على وزن طيارة الربع اللي تحسي عنهم

معالجه أحترافيه للمشكلة في نادي الهلال :no:


أقول ماودي أكمل اللي خليته ؛؛؛؛؛؛؛؛؛؛ بس الحيب طويل الأجل هذا للحرقان ولا الصخينه

:D :D

[عاشق البران99]

الله لايهينك أخوي حفرلوجيا على هذا الطرح الرائع والأسلوب الجميل ،،،

جزاك الله خير ،،،

[ابو شلش]

خخخخخخخخخخخ

الله يهديكم على هالسالفة

[المربد]

اظن ضيقة الصدر في اخر الكشتة ما تصير عند العزاب،
فابو العائلة اذا غاب عنهم يومين او ثلاثة بدأ بالهواجيس لذلك يصير تركيزة قليل فيخلط اللبن باللحم...!!!

جزاك الله خيرا علمتنا عن اطباع بعض الناس في الرحلات علشان نتحاشاهم ولا نصدقهم اذا بدأوا بالمدح والثناء

[المترو]

السلام عليكم ورحمة الله وبركاته

مساء الخير وشلونكم عساكم طيبين
خيي الحبيب ومبدع مكشات الكريم تسلم لهذا التوجيه الاخوي لنتلافى بعض التصرفات التى تحدث احياناً بين الخويا والتى قد تحدث مت غير قصد ولا ينتبه لها البعض

لكن المعروف لدى الغالبيه وخصوصا اهل الرحلات والمطاريش ان الميانه لها حدود واللي تمون عليه وتعرفه له تعامل واللى هاه وهاه خلك حبيب معه

ودائما عند بداية الرحله نقول للربع ترى الدعوى رحله وسعة الصدر واجبه ولا احد يدقق ترى العقل والثقل بالديره

وعند نهاية الرحله وعند الافتراق نقول استرو ما واجهتم والقلوب صاح واعذرونا على القصور طبعا مع عدم تخطي حدود الأدب و الاحترام والخطوط الحمر؟

ختاما اقول شيء المزح مسموح بحدود والتعليق بحدود والباقي سعة صدر وتسلم يا ابو سليمان على التوجيه كا عادتك

والسلام

[الطعس الذهبي]

جزاك الله خير بس المشكلة انك قاعد تشهينا للبر