باترول 99 سكتة دماغية

[طير شلوى1435]

بسم الله الرحمن الرحيم


أسعد الله أوقاتكم بكل خير ..


العلم سلامتكم ..

سيارتي جيب باترول 99 بخاخ

طفى و أنا بالقرب من مفرق الطوقي راجع للرياض .. أخذت مطب من مطباتنا الخفيفة :) المدرجة و أنا أمشي في حدود 100 كلم/ساعة و طفى و لا عاد أشتغل من أسبوعين

كل ما عرضته على ورشة يقول الكهرباء و يحمون حول الديلكو

جبنا أكثر من ديلكو على الضمان و كلها رجعناها و السيارة عيت تشتغل

إذا تقدرون تساعدوني أو توصفون لي مهندس فنان .. أكون لكم من الشاكرين

الموقع شرق الرياض

[كهرووب]

وعليكم السلام ورحمة الله وبركاته

شيك على حساس الكرنك اذا سيارتك موجود فيها حساس كرنك

[طير شلوى1435]

كهرووب

جزاك الله خيرا .. و الله ما أدري فيها ولا لا ..

لكن أقل ما نستفيد منكم .. نعرف نتكلم مع المهندس

اكرر شكري

وفي إنتظاركم

[التمسساح]

ودها لكهربائي متمكن لان الباترول صيانته سهله بس يبيله واحد فاهم

[طير شلوى1435]

التمساح

ما لقينا في البلد فاهم :)

شكرا لك

[بن الزايد]

خذ مني جب سلك اشبكه في + بطاريه ثم اشبكه في ديلكو تم دق اذا اشتغل افصل السلك

[طير شلوى1435]

بن الزايد

الطريقة غير واضحة ..

ثم ، هل كل مرة لازم أشغله كذا ؟!

[محمد النيساني]

اذا قالولك كهرباء وبنزين تمام يمكن يكون عندك الجنزير منقطع
انا صارت لي بباترول موديل 2000 4500 بخاخ وانا ماشي فوق 100 فجأه طفا الموتر كنه بنزين مخلص
طبعن لازم يفك صدر المكينه عشان يتاكد

[SGL]

وعليكم السلام ورحمة الله وبركاته

شيك على حساس الكرنك اذا سيارتك موجود فيها حساس كرنك

مثل ماقالك تأكد منه موقعه خبيث وصعب الوصول إليه حسب وصف واحد من الأعضاء إنه راكب في الثلاجة من الأسفل ممكن فيشه أنفك مع الجبل الي أخذته ههههههههه لا تجامل وتقول مطب خفيف ديرتنا ونعرف مطباتها نصها نعلق فيها غير أشغل الدوفلك علشان أطلع هههههههه:D

[sgl2002]

كيف الطفيه؟

تشغل تدور المكينه بس مايشتغل


اذا كذا شيك وصول البنزين ثم الكهرب ثم الجنزير

[San Francisco]

اذا قالولك كهرباء وبنزين تمام يمكن يكون عندك الجنزير منقطع
انا صارت لي بباترول موديل 2000 4500 بخاخ وانا ماشي فوق 100 فجأه طفا الموتر كنه بنزين مخلص
طبعن لازم يفك صدر المكينه عشان يتاكد

صارت معي كنت أحسبه كهرب وبالاخير جنزير الله لا يعيده

[hsdt]

السلام عليكم
اذا الشكوش يدور اذا شلت الغطاء وديقت سلف فالجنزير سليم
اتوقع والعلم عندالله ان البلاء في الكويل وليس الديلكو
اذا انحلت المشكلة علمنا السبب حتى يستفيد الجميع
موفق خير

[بن الزايد]

معليش اقصد كويل و هذي احد طرق وشباب اعطوك حساس كرنك وجنزير وفتحة المطرقه الديلكو او الصفيه او طرمبه بنزين او بواجي .........

[طير شلوى1435]

محمد النيساني
sgl
sgl2002
San Francisco
hsdt
بن الزايد

غمرتموني بإهتمامك .. أشكر لكم تعاونكم ،،

جزاكم الله خيرا

السيارة دخلتها في مركز الشامل في صناعية النسيم البارحة ..

يقول المهندس بعد فحص الكمبيوتر : أن نظام الكهرباء مات :(

إبتداء من كمبيوتر السيارة .. وانهم خلال 3 أو 4 أيام سيقومون بتشغيلها

و الله يعين

سان فرانسيسكو ... شكر خاص جدا

[طير شلوى1435]

محمد النيساني
sgl
sgl2002
San Francisco
hsdt
بن الزايد

غمرتموني بإهتمامك .. أشكر لكم تعاونكم ،،

جزاكم الله خيرا

السيارة دخلتها في مركز الشامل في صناعية النسيم البارحة ..

يقول المهندس بعد فحص الكمبيوتر : أن نظام الكهرباء مات :(

إبتداء من كمبيوتر السيارة .. وانهم خلال 3 أو 4 أيام سيقومون بتشغيلها

و الله يعين

سان فرانسيسكو ... شكر خاص جدا

[راعي الرود]

موترك كلبليتر و حسب علمي انه مايجي كمبيوتر (أتوقع) ؟

لا تستعجل وتاخذ على كلامهم مهب معقوله تضرب الظفيره كامله عشان مطب يمكن حساس الكرنك ولا فيش طرمبه يعني شيء بسيط ان شاء الله

[طير شلوى1435]

الموتر بخاخ

و إن شاء الله أن اﻷمر بسيط على ما تقول

[sgl2002]

مادخل مزاجي كلام المهندس


نظام الكهرباء اجزاء كثيره ومدعم بفيوزات

شبه مستحيل يضرب كامل


اقرب الاحتمالات الكمبيوتر

[San Francisco]

محمد النيساني
sgl
sgl2002
San Francisco
hsdt
بن الزايد

غمرتموني بإهتمامك .. أشكر لكم تعاونكم ،،

جزاكم الله خيرا

السيارة دخلتها في مركز الشامل في صناعية النسيم البارحة ..

يقول المهندس بعد فحص الكمبيوتر : أن نظام الكهرباء مات :(

إبتداء من كمبيوتر السيارة .. وانهم خلال 3 أو 4 أيام سيقومون بتشغيلها

و الله يعين

سان فرانسيسكو ... شكر خاص جدا

بسئلك كم سؤال؟

العدادات شغاله لمبه تشك انجن شغاله ؟ شيكت على كتاوت طرمبه البانزيم ؟
شيكت على الفيوزات كلها ؟
اذا دقيت سلف تحس المكينه لفته اسرع خفيفه ألفه
افصل واحد من أسلاك البواجي وجب سكروب طويل ودخله بالسلك وقربه من المكينه خله يتكئ على أي شئ وبعده عن المكينه 1 سم ودق سلف اذا فيه شرار الكويل فيه كهرب والكمبيوتر سليم
اذا مافيه شرار احتمال حساس الكرنك او كتاوت المكينه او كمبيوتر او الشاكوش او صحن الديلكو او التماس بعلبه الفيوزات او ضفيره المكينه (هنا يبيلك كهربائي فاهم يحددلك العطل او يصلحه)

انزل تحت السياره ونت مطفي السوتش افصل لي البنزين من عند الصفاي افتح السوتش اذا رش بانزيم معناته واصل كهرب والطرمبه شغاله

صب شوي بانزيم بوسط الكربريتر اذا كانت كربريتر تقريبا فنجال قهوه وشغل

افتح السوتش وافصل أصابع البطارية افصل افياش الكمبيوتر (اضنه وراء الدرج) واشبكا زين ونتضر ربع ساعه وبعدها اشبك أصابع البطارية ودق سلف

حطه ب 2 ودق سلف

اذا كل هذا سويته فاحتمال يكون الجنزير صار معي فحصت كمبيوتر طلع عندي حساس الكرنك وطرمبه البانزيم

وديته لواحد خبره فحص قال من الكرنك او جنزير المكينه لا تأخذ على فحص الكمبيوتر يسجل الخطاء بس

لي رد على الموضوع بعد ما تجاوب

[العابر2222]

يا غالي انحششششششش عن الشامل نصصصصابين واحطها في ذمتي

واحلف انهم ما يعرفون المشكله وصرفك بيجلسون يتطببون الين يلقونها

انا لي تجربه معهم في سيارتين

الاولى فتك ٢٠٠٥
كان يتفتف ويقطع كل شي سويته ما ضبط
ومريتهم قلت افحص كمبيوتر فحصه وقال عندك الكهرب والمشكله الاساسيه كمبيوتر السياره لازم نفكه ونصلحه وبعدين نشوف وش المشاكل الثانيه وشغلنا في الكمبيوتر ١٠٠٠ ريال من غير الشغلات الباقيه وتعال بعد ٣ ايام
يعني نفس الكلام الي قالوه لك تقريبا
ما خشت مزاجي السالفه .. ووديه ورشة التركي ويشبك الكمبيوتر ويسوي اعادة برمجه وكلها ١٥٠ ريال وموتري تمام


والثاني كابرس ٢٠٠٦
طلع صوت في المكينه
ووديته لهم قالو توضيب وعطوني لسته وش طولها قطع اجيبها
وقالو شغل يدهم حول ثلاث الاف
ولا اقتنعت وحملته على سطحه ووديته واحد في صناعية الشفا غيرلي طرنمبة زيت وشدادات ما تعدة ٢٥٠٠ ريال
وجلس معي سنه مافيه الى العافيه


نصيحة اخوو طلع موترك لا تخليه عندهم
هم يمكن يصلحونه بس يعطونك انواع الافلام واسعار خياليه
ونصب وكذب

واحطها بذمتي


وبعدين مافيه شي اسمه نظام الكهرباء مات .. فيه الشي الفلاني ما يعطي كهرباء او ما يوصل ... اما نظام الكهرباء مات قويه

[شاد الرحال]

الشامل نصابين انحش عنهم ما عندهم الا الدجه

موتري كابرس موديل 2000 و القير ماسك نمره ثقيله ولا يبدل

رحت للشامل وقلت ابي فحص كمبيوتر وسوا لي فحص وطلع حساسات القير + طنجره القير tcc

وقال بنغير الحساسات بيكلفك 1000 ريال واذا يحتاج توضيب 3500 والقطع عليك !

ما اقتنعت في كلامه واعطيه حق الفحص 100 ريال واسحب عليه

ورحت للواحد سوري ناس كثر مدحوه لي متخصص في قيور الامريكي وطلع البلا من كتاوت القير فقط

و غيرناها والموتر ما فيه احسن منه يالله لك الحمد

انصحك تشوف غير هالحراميه وكان الله في عونك

[هويدي]

ان شاء الله مشكلته بسيطه وتنحل بسرعه

هالايام تعطل موتر احد الاخوان لاندكروزر 97 كلبليتر " طفى فجأه"

سحبته مسافه 5 كيلو تقريباً والرجال كل شوي يحاول ينتع ما اشتغل الا بعد ما ظربنا مطب

بعد نصف ساعه تقريباً عادت الحاله واسحبه وعيا يشتغل واتحماله بمطب يحبه قلبك واشتغل !!

والله هذا اللي حصل ما استضرف او اتميلح :) والسبب والله اعلم بنزين التسهيلات""

اطلت عليكم

شيك على الطرمبه هالايام تعطل موتري باترول بخاخ غيرتها وضبط ولله الحمد

[111333]

السلام عليكم تأكد ياخوي من حاس الهواء .. اخبر واحد من العيال اكل مطب وطفى موتره وعيا يشتغل باثفندر ويام وديناه للورشه طلع حساس الهواء

[فهد فرحان]

نصيحه اهرب عن الشامل
كلامهم يبين لك انهم فاهمين
والله يكرمكم حمير
غيرت رمانات
وتهريب بحساس القير
والى يومك ذا التهريب
موجود بالرمانات
والحساس

علما اني مسويهم قبل رمضان الي فات

[ماجد الشايدي]

السلام عليكم
شيك على كمبيوتر
اذا كان مايعطي معلومات أثناء الفحص بحهاز الفحص
هذه مشكلة كمبيوتر السيارة ضرب

[طير شلوى1435]

الله يعطيكم العافية جميعا

يا أحبابنا

المهندسين يقولون : سيارتك ديلكو ولا فيها حساس كرنك
و أيضا يقولون شيكنا على جميع الفيوزات مضبوطة

و الحل اﻵن كمبيوتر .. ولا طلع سيارتك !!!

[sgl2002]

ايه ممكن يكون كمبيوتر احتمال كبير جدا

[يالبى الهلا]

طلع الموتر من عند الحراميه وحاول تفحص الموتر مرة اخرى

[طير شلوى1435]

يالربع ..

دقرت فالصفا .. الكمبيوتر المستعمل عند الرسلان ب 2500 بدون ضمان

و ( الشامل ) يقول ما عندنا حل !!

[ابوناصرالمضنى]

حساس الكرنك يكون اذا خرب يشتغل الموتر ويمشي ويطفى بعد فترة حسب سيارة احد الاصدقاء في باثفاندر 2003 اما اذا كانت من مطب دور القطعة او السلك اللي تحرك من محلة او انفصل ويمكن يخترب ويمكن يرجع لمكانة انت وحظك وفي هذي يبيلك كهربائي يمخمخ على الموتر

[طير شلوى1435]

شكرا ﻹهتمامكم و تفاعلكم


س / أين موقع صيانة الوكالة ؟ من فضلكم

[العابر2222]

فيه واحد اسمه ابو ياسين على ما اعتقد

في نفس الصناعيه الي فيها الشامل

في الجهه الجنوبيه

بيعطيك العلم الاكيد

ومشهور ما يحتاج نشده

[طير شلوى1435]

شكرا لك .. يا العابر

ممكن تصفون لي مكان صيانة الوكالة

أنا في إنتظاركم

[يالبى الهلا]

تاكد من حساس الكرنك

[طير شلوى1435]

جميع المهندسين يقولون .. السيارة ديلكو ، ليس فيها حساس كرنك !!

[sgl2002]

ياطير شلوى

دق سلف

اسحب واحد من اسلاك البواجي اذا طلع شرار معناه الكهرباء واصله

[طير شلوى1435]

تكرار طلب

دلوني على صيانة الوكالة .. من فضلكم

[جموول]

تاكد لايستغفلونك تاكد من الكمبيوتر انه سليم صارت مع خوينا 97بخاخ نفس المشكله طفا وجبنا له كمبيوتر لازم يكون نفس الموديل الموتر دقة سلف

[San Francisco]

جميع المهندسين يقولون .. السيارة ديلكو ، ليس فيها حساس كرنك !!

طير شلوى اسمحلي أقولك انت داخل تسئل وأعطيناك الحلول من تجارب وخبره انا وغيري بس شكلك تبي واحد يقنعك بمهندسينك وانه موترك ميت مدري سكته دماغية

احب اقولك شي مهندسينك الي تقول عنهم ذولي سباكين ومليصين وبياعين شورمه واعرفلك معلم شورمه بمطعم الؤلؤه قبل 10 سنين الان مدير مركز صيانه كبير أسئل أكبر واحد في مهندسينك وقله وين شهادتك اتحدا اذا عنده شهاده أصلا

وبالنسبة لحساس الكرنك موجود بسيارتك لا يلعبون عليك لو مو موجود وشلون تشتغل المكينه وش الي يرسل معلومات للكمبيوتر عن دوره المكينه اذا ماكان فيه حساس كرنك فانا ما افهم شئ

ماودي أطول بالكلام بس اذا كنت تبي الوكالة ولا أعجبك كلامنا
وقف لموزين ولا راعي الصطحه بيدلك على الوكالة

كلن ينام على الجنب الي يريحه وسلام عليكم

[الا سير]

لا يا خوي كلامهم صح جيبه مافيه حساس كرنك
مثله مثل الفكسار 97 مكينته بخاخ بس فيها ديلكو
ومافيها حساس كرنك
لان وظيفة حساس الكرنك نفس وظيفة الديلكو
والسياره الي مافيها ديلكو ميه بالمية فيها حساس كرنك
والعكس صحيح مستحيل تلقاهن مجتمعات بسياره واحده

[بدر ابو علي]

السلام عليكم وش صار معك اخوي صلحت الموتر والا ارسلك لكهربائي ممتاز

[طير شلوى1435]

الله يعطيكم العافية كلن باسمه

و لا قصرتوا بيض الله وجوهكم

السيارة صلحها كهربائي سوداني في صناعية الخليج اسمه جبارة

طلع فيها ( كمبيوتر و ديلكو ) ضربة سوا ، و الظاهر أن السبب كان
جرح في الظفيرة اللي عند المكينة و مع المطر حصل التماس و
حصل ما قدر الله

عموما اشكرك جميعا ، و لا هنتوا

ودي لو كنت أقدر أرد على اللي أرسلوا لي رسائل خاصة
بس تعرفون جديد على الموقع

[غاوي طيور]

الحمد لله على السلامة

[سما الهاوي]

الحمدلله عالسلامة وحصل خير انشاء الله
بس حبيت استفسر كم كلفتك اصلاحها والله لايهينك

[طير شلوى1435]

الله يسلمكم

الكمبيوتر 2700
الديلكو 650
سطحات 700
غطاء ديلكو تم شراءه بناء على كلام أحد المنهدسين المتفلسفين 170
شغل يد بعد المكاسر 800

المجموع أكثر من 5000 ريال