عزم اللاندكروزر ردي وش السواة معه ؟؟؟

[سقم المعادي 1]

السلام عليكم ورحمه الله وبركاته
يالربع شريت لي لاندكروزر 6 سرندل قيره تماتيك موديله 99 من الشكل القديم يعني
الموتر الحمد لله متماسك ولا لاحظت عليه شيء الا العزم عزمه ردي بالحيل خصوصاً بالقومه بس لا شاف الخط استوى ماشاء الله مشى ماعليه خلاف بلاه بالقومه بس

علماً اني يوم فحصته قبل اشتريه قالو يحتاج تصفيه مكينه ولا حدد لي بالضبط وش يحتاج يعني وش الشور وش اللي له علاقه بالعزم اكثر عشان ما اتخسر على الفاضي ؟؟؟؟
و لا مسيته خطوط و حشرته بنمره بيزين عزمه ؟؟؟

شيء ثاني الدبل كيف طريقته العصى حقت الدبل كذا
-H
-N
-L4

[شاد الرحال]

مبروك الموتر والله يعطيك خيره ويكفيك شره

ابد بالشي السهل

غير القطع هاذي :

بواجي
اسلاك بواجي
فلتر هواء
صفايه بنزين

ما تكلفك 500 ريال

اذا ما فيه تحسن ملحوظ تاكد من طرمبه البنزين احتمال دفعها ضعيف

وان شاء الله بتنحل مشكلتك

[sgl2002]

الدبل

الخفيف موجود عندك زر

والعصا هذي للثقيل لازم توقف وتحط الموتر بn بعدين تعشقه ولاتتعدى عليه 40

[راعي الرود]

الله يعطيك خيره ويكفيك شره

معي نفس موترك و تراه ثقيل شويتين من ناحيتي متعود عليه لأني اسوقه من زمان و زي ماقلت انت في القومه ثقيل لكن في الخطوط يعجبك و كل ماكديتها خطوط كل ماتفتحت المكينه وصار عزمه افضل


اول شيء تسوي له تصفيه ان لقحت ولا ماضرها و احرص على صفايه البنزين اهم شيء سعرها 130 ريال و البواجي لا تاخذ دينسو خذ NGK سعرها ان ماخاب ظني طقم 60 ريال

هذا رقمها سجله عندك ( bkr5ekb-11 )

الموزع حق NGK في شارع الامير سلمان بالصناعيه القديمه يقال له البابطين

و نظف الثروتل وغير فلتر الهواء ( اصلي ) اهم شيء انه يكون اصلي ترا التجاري يسبب كتمه بالموتر و تولع لمبه فلتر الهواء بالطبلون لا دعست له

واسلاك البواجي اذا ودك تغيرها سعرها 420 ريال

و طرمبه البنزين اضمن لك من عندي انها سليمه معروفه طرمبه اللاند بالصبر نادراً ماتخرب لكن مايمنع تقيس ضغطها بالساعه

و الدبل افادك فيه اخوي sgl2002 و زي ماقال الخفيف زر تحت الفليشر و الثقيل العصا تحطها على L4 و الدفلوك على يسار الطاره تحت فيش التانكي

[يالبى الهلا]

غير القطع الاستهلاكية وهذا عزمه مهما كان الا في حالت فصلت ترس الدبل بسابق لكوامري وتخف نفسه ويصير مثل الريشه

[ابوراكان تبوك]

تماتيك

ركب له فرار واحد يسار وشوف الفرق

معي نفس موترك بس 2002

ركبت له بواجي بنفس الرقم اللي في رد راعي الرودود قيمه الواحده 11 ريال
غيرت فلتر الهواء أصلي اذكره حول 120
صفاية بنزين حول 130
صارت المكينة صافيه مره ويسابق المفتاح في التشغيل وبقي الثقل
طقيت له فرار واحد يسار برازيلي بـ 380 وصار الموتر خفيف وقل صرف البنزين وبعد التجربه لو قيمة الفرار دبل سعره 3 مرات بركبه مافيها كلام

الطرمبة لاتغيرها
والثروتل لا تقربه حساساته عله في البرمجه

[ألشاكي]

والله مدري عنه