فن قيادة القير العادي بالتعشيق الصحيــح

[الشرقيه 03]

السلام عليكم ورحمة الله وبركاته

اخواني كل واحد له طريقته في التبديل بين النمر
للقير العادي وحبيت اشوف طريقة كل واحد منكم يا اخوان في ....:

بداية تحريك الموتر ( القومة ) منهم على الغيار الاول ومنهم على الغيار الثاني
ولا ندري عن الصحيح من ناحيتي دائما على الاول دايركت وانتم ؟؟؟؟
-----------
قبل العبور على المطب وتعرفون المطبات عندنا :mad:
فيه ناس يبدل على الغيار الاول وبعضهم يبدل على الغيار الثاني
برضه مانعرف وش الصحيح منها من ناحيتي الاغلب على الاول وانتم ؟؟؟؟
--------------
بعض الناس يمشي 40 ومعشق على الرابع على قولتهم ( يريح المكينه )
الـ RPM منخفض جدا
و
بعض الناس يمشي 40 ومعشق على الثالث وانا منهم:)
الـ RPM قريب من الارتفاع وليس مرتفع جدا ..

-----------------
المقصد نقرأ ونتحاور ونشوف افضل الطرق للتبديل
بين الغيارت ؟؟؟؟؟

[التمسساح]

كل واحد حسب ماتعود انا اكره شي عندي القير العادي

[عندليب ملهم]

الاولى ..انا ما تفرق والصحيح انه ما فيه فرق بين الاول والثاني في القومه بالعكس الاول يتعب ازين بالثاني.
الثانيه .. انا اشوفها يسوونها بعض اخوياي بس اعتقد انها تتعب القير وتتعب المكينه.
الثالثه .. ازين ما هي على الاربعين فوق الاربعين بشوي! يعنط تقدر تقول 45 ثم تعشقها بالرابع! لان اذا كان الRPM منخفض يتعب القير وكذلك اذا كان مرتفع افضل شئ الوسطيه (خير الامور اوسطها)!

[ماء نوفا]

على حسب قوة المكينه فيه سيارات تقوم بثاني وفيه بثالث وفيه سيارات ماتقوم الا باﻷول ونا دائمآ اقوم بالثاني والتعشيق ابدله لصار الضغط بعد رقم ثنين بشوي

[يالبى الهلا]

فعلا طريقتك صحيحه لابد اعطاء كل تعشيقه حقها ولاتقرررقر المكينه لانه هذا يقطع السير او يتلف سير التايمن للالمكينه من واقع تجربه

[هويدي]

من تالي صاير شاكوش "شايب" احن اممه باثنين او ثلاثه بالحاره

اتعيجز ادعس كلتش اذا تركت الدعسه :) احياناً انساه بالرابع ...ضنكم من الزحمه ولا الكبر شين !

ذكرت شايب بحارتنا الله يرحمه ـ معه ددسن 86 ويروح للمسجد بالاول !! المروحه تهوش

والظعيف ماكان يعرف يدق ريوس ... يامال الجنه

[ريثان القصيم]

اخواني كل واحد له طريقته في التعشيق بين السرعات
للقير العادي وحبيت اشوف طريقة كل واحد منكم يا اخوان
المقصد نقرأ ونتحاور ونشوف افضل الطرق للتبديل
بين الغيارت ؟؟؟؟؟
علي الطريق السريع واريح للمكينه والقير واوفر بنزين
اخوي قوم السياره ب1 الي ضغط 2
ثم ب 2 الي ضغط 2,5
ثم ب3 الي ضغط 3
ثم ب4 الي ضغط 3,5
ثم ب5 الي ضغط 4
ثم ب6 الي ضغط 5

اخوك
ريثان القصيم

[ryyan55]

يا عشقي للقير العادي ما احب اسوق غير العادي : ) تصدقون ما اعرف اسوق قير توماتيك مدري ليه احس نفسي بزر -_-


قومة المكينة عالاول افضل لانه يعطي عزم اقوى للموتر

اما بالنسبة للمطبات اذا وقفت وقوف تام ارجع للأول اما اذا اكلت المطب عالماشي يعني مهدي المكينة عادي عشقها عالتاني

ودي اسألك سؤال قد جربت تغير القير بدون كلتش !؟؟؟؟؟

انا جربت مرة بسيارتي القديمة وشبك معايا من 2 الى 3 لكن وقفت لأني خفت عالقيربوكس ومرة جربت بسيارة العمل من 3 للفاضي بدون كلتش كمان قبل بدون صوت ولا شيء ؟؟؟؟ 0_o

[Rapture]

الى الان في ناس تسوق قير عادي?

حسبت انه منقرض

[sgl2002]

انا من عشاق القير العادي ومن مستخدميه لانه يخدم اطول في الجيوب فقط

لايحتاج متابعه او صيانه ولانظام كمبيوتر وكهرباء


طبعا للمحافظه على القير العادي اهم شي التعشيق
لاتعشق او تنقل من نمره الى نمره وانت متعدي الحد المسموح للسرعه في النمره
وايضا دعس الكلتش وانتظار نزول عداد الضغط الى وضعه الطبيعي حتى لاتتلف التروس

[محمد 2002]

المفروض الجيوب ما تجي الا قير عادي وانا أقصد الجيوب الحقيقية ماهي الكراتين الي يسمونها جيوب
القير العادي تغير براحتك في الجبال والأماكن شديدة الوعورة
وتسحب به سيارات أو اي شي عكس التماتيك تقدر تسحب ولكن بعدها مر الصرافة واسحب فلوس ووضب

[عاشق الددسن92]

على حسب السيارة اذا كانت جديدة او قديمة

[عندليب ملهم]

يازين النيسان وبس!
اتمنى من شركة نيسان انها تعود مثل ما كانت ...يعني ياليتها ترجع مثل القوه والصلابه والتحمل!
وياليت يشوفون لنا هالددسن مشغليننا شغله كل سنه عيب مصنعي وخراب!
يوم جا من ٢٠١٠ الى ٢٠١٢ قالوا سريعه وقويه بس البيبان تطقطق و٢٠١٣ و١٤ قالوا مشكله بالقير والدفرنس !

[سقم المعادي 1]

اقول يازين التماتيك بس شريت موتر قير عادي قعد اسبوع و دخلته المعارض

والظاهر اللي يحبون القير العادي ماقد وقف بخريص الساعه 7 الصبح

و اللي يقول التماتيك يحتاج صيانه و القير العادي يحتاج كلتش وصحن وغيرها

انت بتغير كلتش 4 مرات او نقول 5 مرات و لنفرض ان سعر طقم الكلتش 600 ريال مثلاً

600 * 5 = 3000 ريال بدون شغل يد و هذا سعر افتراضي ولا فيه مواتر اغلى من كذا و هذي قيمه توضيب قير تماتيك !

العالم تركت العادي من زمان اللحين التماتيك لمدور الراحه و بشكل عام حشم الموتر يحشمك سواءاً عادي ولا تماتيك واضب على صيانته الدوريه ولا يخذلك و يكد معك قيره

[عندليب ملهم]

صح القير التماتيك مريح جداً
لكنه ضعيف حتى ولو كان (تربتونتك <ما اعرف اكتب اسمه) المهم اللي هو قير عادي وتماتيك الي في السيارات الجدد!
ضعيف ... والقير عادي هو النشيط!

[بو يو سف]

على حسب نوع السياره بعضهم مايقوم بالثاني
انا استخدمة باترول ٩٧ و ٢٠٠٥ يقوم بالثاني بسرعه
استخدامي للأول في البر فقط

[speed62]

وعليكم السلام

القومه اول واحيانآ2 حسب الديره والمزاج (حنته قويه)
المطب والمديورات بـ3 على سرعة18 وفوق والـRBMعلى900 تقريبآ (مدري هو يضر ولا لا)السياره 8سلندر

[الشرقيه 03]

للرفع الله يرفع مقداركم

[بندر الكبيري]

بالنسبه للباترول القير العايدي
من الثاني للثالث 30
من الثالث للرابع 50
من الرابع للخامس 80 الى 100

[الشرقيه 03]

بندر الكبيري لاهنت ياخوي

لاكن شكلك قرأت الموضوع ولافهمت المقصد
يعطيك العافيه

[جي يونت]

انا من عشاق القير العادي ومن مستخدميه لانه يخدم اطول في الجيوب فقط

لايحتاج متابعه او صيانه ولانظام كمبيوتر وكهرباء


طبعا للمحافظه على القير العادي اهم شي التعشيق
لاتعشق او تنقل من نمره الى نمره وانت متعدي الحد المسموح للسرعه في النمره
وايضا دعس الكلتش وانتظار نزول عداد الضغط الى وضعه الطبيعي حتى لاتتلف التروس

نفس الكلام اللي بقوله :good: