المساعد الشخصي الرقمي

مشاهدة النسخة كاملة : سيرا 2013 غرقان في شعيب ( فزعتك )


مصايب
07/01/2014, 07:00 PM
السلام عليكم ورحمة الله وبركاته
اخوي معه سييرا 2013 دخل بشعيب وطفى عليه
سحبناه واخذناه بسطحه لورشه
صارت المكينة مليانه مويه
فرغ المويه من المكينة وغير الزيوت
ويوم شغل السيارة طلع فيها صوت
قال لازم تنفك المكينة
،،
انا ابي ورشة ممتازة بالرياض يفك لي المكينة
يفضل ان تكون بالصناعية القديمة
شاق النفد
07/01/2014, 07:39 PM
الله لا يجيب المصايب وترى كل شئ مقدر ومكتوب و الحمد لله على كل حال
لا تستعجل لا تستعجل لا تستعجل في فك المكينة واصبر وانشد ويمكن يزين من نفسه بعد
موتري شاص وقد دخلت شعيب وياخذني السيل معه طبعا طفح الموتر مهوب غرق وبس واسايس له ورحمني ربي وطلعت والماء دخل علي لين وصل القير وانا في غمارة الموتر عقبها ما عاد يشتغل ولا فيه اي استجابه
و ابدا رحلة الصناعية اللي ماتنتهي وانشد عن التوظيب والكمبيوتر والضفيرة وكنت ملزوم اسافر
وسافرت حول 3ايام يوم جيت غيرت زيته وشغلته ويشتغل وعتق الحمد لله والشكر ولا اعترضت اي مشكلة
N.m.a
07/01/2014, 07:41 PM
شوري عليك اصبر .. وقفة بالشمس لاتفك مكينتة اصبر عليه مع الوقت يمكن يزين
مصايب
07/01/2014, 08:49 PM
المكينة اشتغلت بعد فك البواجي وتفريغ الماء
لكن فيها صوت
وتم ايقاف تشغيل المحرك خوفا من ان يؤثر عذا الصوت على شيء آخر

انا ابي ميكانيكي كويس
اودي له الموتر عشان يعطيني العلم الاكيد
روقي نجد...
07/01/2014, 08:57 PM
أضم صوتي لصوت إخواني لاتستعجل اصبر شوي ويزين...صار لي حادثة غرق هايلكس في شعيب لمدة ثلاثة أيام حتى جفت الموية وطلعته ووديته التلميع وضبط معي والحمد لله
فرفور بريده
07/01/2014, 09:02 PM
اخوي

لاتفك المكينه موترك جديد والمكينه جديده

انت وقف الموتر بالحوش وافتح كبوته

وخل تضربه الشمس
ابوسند9
07/01/2014, 09:10 PM
وعليكم السلام
لا تستعجل بفك المكينه يمكن الصوت مو منها,,يمكن شداد سير او دينمو يعني ممكن الصوت من خارج المكينه
ويمكن طرمبة الزيت
لذا لو تغير الزيت بالبيت كذا مره وكل مره تشغل خمس دقايق ومن ثم تغير الزيت وفيه زيت اماراتي رخيص العلبه ب 5 ريال خذلك كرتون
لاني اتوقع لو المويه داخله بنسبه كبيره كان مع التشغيل راح يطلع احد البساتم مع جنب المكينه
يالبى الهلا
07/01/2014, 11:00 PM
لاتفك المكينه حلول تكب زيت في اماكن البواجي وحرك الكرنك دائم تصير وتسلم المكينه
جنيفاوي 503
08/01/2014, 12:14 AM
عاير زيته مرتن ثانيه وشف فيه اثر ماء وناظر فلتر الهواء
A6006A
08/01/2014, 12:25 AM
دام السياره 2013 الضمان ساري
ودها للوكاله
مصايب
08/01/2014, 01:10 AM
دام السياره 2013 الضمان ساري
ودها للوكاله

الضمان الى 60 الف
انا ماشي اكثر من 60
بدوي جنوبي
08/01/2014, 01:24 AM
حتى لو رحت الوكاله
راح يستغلو الوضع
ويقولو بنفك المحرك وبعدين بيقولو هذا بسبب دخول الماء وليس خلل مصنعى

انتو استعجلتو في التشغيل
المفروض غمرتو المحرك بالزيت
وفك البواجى
ودقيتو سلف عشان يدور المحرك ويختلط الماء بالزيت
وبعدها تفريغ الزيت ،،،

ووضع زيت جديد وان شاء الله ما كان ظهر الصوت

عموما ممكن سبب الصوت ان فيه اجزاء باقي خالطه المويه فيها
وطبعااى جزء داخل المحرك يتحرك ممكن هو مصدر الصوت

الجزء اللى يخوف هو عمود الكرنك والسبائك والباقي امره بسييط

الحل :

تفريغ الزيت بالكامل مع السيفون
فك البواجى
فك البخاخات
فك غطاء الراس عدد 2
فك الثلاجه
اذا وجد ماء تنشيفه

بعد فتره يوم تركيب جميع اللى انفك
ممكن تنظيف البواجى ما يحتاج تتغير
بعدها اضافة زيت وسيفون جديد

ويتم دق السلف فقط بدون تشغيل (فصل كتاوت طرمبة البنزين ) عشان ما يشتغل
ويدور المحرك ويختلط بالزيت لمدة 30 ثانيه
كرر العملية 3 مرات
بعدها حاولو تشغيله
وان شاء الله يختفى الصوت

وتأكد من تانكى البنزين يكون ما فيه ماء
بدوي جنوبي
08/01/2014, 01:32 AM
سيارتك غرقت بسسب الامطار والسيول خطوات لتلافى وقوع ضرر اكبر للمحرك (http://www.mekshat.com/vb/showthread.php?t=295370)

دورة الزيت داخل المحرك (http://www.mekshat.com/vb/showthread.php?t=602485)
http://www.mekshat.com/vb//showthread.php?t=249360 (http://www.mekshat.com/showthread.php?t=249360)
بن الزايد
08/01/2014, 05:25 PM
يوجد مادة منظفة تخلط مع زيت بعد عشرين دقيقة غير زيت وفلتر زيت وفلتر الهواء
وخذلك بخاخ تنظيف المكينه من الخارج ثم غسلها بالماء
ريثان القصيم
09/01/2014, 10:53 AM
انا ابي ورشة ممتازة بالرياض يفك لي المكينة يفضل ان تكون بالصناعية القديمة

ان استعجلت ولا سمعت شور اللي يعزونك وفكيت المكينه اخلف الله عليك بالمكينه والسياره
واذا استخرت ولا فكيت المكينه تراك على سنع

اخوك
ريثان القصيم