لاغنى عن توجياتكم يالربع .

[G M C_454]

مساكم الله بالخير جميعاً أخواني ربي يسعدكــم مانستغنئ عن مشاركتكم معي ودعمي بـ افكاركم :-

بغيت اسوي لي بيت شعر 8*5 لكن سلمكم الله احسة انة مكلف على الفاضي من ناحية مايدوم عندكم حرارة الشمس ويمتلي اتربة وغبار .بالكثير 3 او 5 سنوات وانت تجدد

فجبت فكرة اللي هي بناء غرفة 8*5 بـ البلكـ طبعاً بالاعمدة وقواعد ويكون لها نوافذ وباب بالامنيوم وشكل ممتاز ولكن السقف يكون مثل بيت الشعر حديد وقماش وكذالك الااضاءات ونفس الشكل الخارجي لبيوت الشعر ابيض واسود وما ننسى المشب والعلوم الزينة. فما ادري يا اخواني هذي الطريقة افضل من اني اجيب بيت شعر كامل .

وفكرتي تعتقدون مكلفة واللي عندة افكار مانستغنئ عنها والله يوفقنا وياكم وسلامتكم.

[كايد2020]

وجهة نظري أن البناء بيكلف والتلبيس من الداخل ما هو زين. أفضل بيت الشعر وإذا ميزانيتك صغيره ركب بيت شعر صغير .... وبالتوفيق

[G M C_454]

وجة نظرك اخوي كايد في الاعتبار ربي يسعدك

[إبريلي]

والله يالغالي بيت الشعر الي بسوق مضمون ولكن البناء أضمن لك ولزمن حتى لو كانه غويلي

[AUX]

ليه ماتسوي من الخيام الجاهزة اللي تبنى باعمده الحديد وتلبس من الداخل والخارج
والاسمنت فقط يكون لجلسة الظهر (ارتفاع صف الظهر تقريبا ) والارضيه اللي هي القاعدة تكون اسمنتيه

والسقف يبلس من الخارج بنوع عازل من الطربال نفس تصميمه و شكله نفس بيت الشعر وضمانه 15 سنه تقريبا

اعتقد الشغل كله يكلف من 20 - 25 الف

[منسدح واقف]

البناء أفضل لك .

بالنسبه للسقف رح لمحلات الجبس وبتحصل عندهم أنواع متعددة من الديكورات التراثية .

كما أن بويه الجدران هناك نوع من البوية يجي شكله مثل بيوت الطين من الداخل وشكله جميل جداً

[ابوفهد الشريف]

من وجه نظري بناء الغرفه افضل بكثير من الخيمه مهما كانت
ومساله الديكورات هذا شي راجع لك ولذوقك
عند البناء لاتنسى بعض العوامل المهمه
ومنها ( تمديد مكيف السبلت + تمديد مروحه للمشب + تمديد مواصير مياه جنب المشب والتصريف كذلك )
احرص ان اللي يبني لك المشب يكون شخص ذو خبره لان المشبات لها مقاسات معينه لتكون فعاله في سحب الدخان

هذا ماجادت به قريحتي
وتقبل تحياتي

[tiger74]

ارشح الغرفة.. لك وللزمن... صيف وشتاء
بعدها الخيمة..
وفي الاخير بيت الشعر.

[G M C_454]

وفقكم ربي يا اخوان

[ابوراكان تبوك]

من واقع تجربة مريره

ارشح لك بناء غرفه حتى لو كلفت سعر بيت الشعر 10 مرات

انا كلفني 17 بس السقف قرميد لكني ارتحت من بيت الشعر وغثاه غبار وروائح اعزك الله والقطط في البرد كل يوم تلقى واحد ملتزق فيه:mad:

بيت الشعر تعبت عليه وكلفني كامل مع مدخنه حجر 22الف

الاسعار بيدك تقدر تخليه يكلفك 20 الف او نفس السعر دبلات

[G M C_454]

إخواني جميعاً وفيتم وكفيتم وبيض الله وجيهكم جميعاً

اخوي ابو راكان الله يكثر من امثالك ويسعدكـ ياليت تفيدنا وانا اخوك بالصور.

[web]

السلام عليكم


الاخ G M C اول شي كم ميزانيتك والبيت ملك ولا اجار !!

لازم تحديد الميزانيه قبل تبداء تطلعلك امور ماكنت محسبلها نهائياً

بيت الشعر انا مانصح فيه بسراحه الا في نطاق ضيق وتكون مجبور عليه الشكوا الله مع ان له جوه في ايام الشتاء.

احياناً الملحق مايكلف عليك واجد على حسب موقعه بالبيت يكون يمينه وخلفه جدار ويساره البيت تستغل هالمكان ويكلف عليك الجدار الامامي الي فيه الشبابيك والباب والسقف حط قراميد ممتاز وشكله الخارجي حلو واخف واقل تكلفه من الصبه ومن الداخل اعزله بجبس مابيكلف عليك واجد .