شوركم في هالقصة

[سليل قروم]

مساكم الله بالخير جميعاً

يالربع العلم سلامتكم

سيارتي ار اكس 2007 قبل اسبوعين غيرّت زيت وفلتر عند بترومين وانا متعامل معهم من سبع سنين ومرتاح لشغلهم

المره الاخيرة ولأول مرة شفتهم جايبين هندي مع الفلبين والمرة هذي اللي اشتغل سيارتي الهندي وماكنت مرتاح له بس خليته يكمل شغلة

بحكم سفري كل اسبوع اليوم الثاني مشيت بسيارتي وبعد 90 ك شفت دخان ولما جنبت لقيت الزيت يهرب

حسبت الموضوع من السرة وعشان كذا مشيت لأقرب مكانيكي وقال التهريب من هوز الكارتير اللي يودي للمكينة

حملتها على سطحه ووديتها للوكالة وبعد الكشف اتضح ان التهريب من الفلتر المهم صلحوها واتصلوا علي اليوم الثاني وقالوا نبيك قدر الله وماشاء فعل احترقت المكينة بعد ماطلع الزيت مع الهوز اللي عند الكارتير وشب لما لمس القزوز

جيتهم لقيت الدنيا مخصبوصه عند المكينة وكل شي بلاستيك او مطاط محترق وبعد الكشف طلع كل ماسبق مع الظفيرة والبخاخات

المهم البودي ماجاه شي

قالوا بنصلح كل التلفيات على حسابنا ونرد لك السيارة احسن من قبل قلت لهم اوكية ولكن خلال هالفترة لازم تأمنون لي سيارة وبالفعل عطوني سيارة صغيرة اخر موديل وكل خمسة ايام يجدودن المدة لأني اخذتها على حسابهم من بدجت

وكل خمسة ايام اجيهم ويعطوني ورقة لتمديد فترة استخدامي للسيارة اللي من عندهم ويرحب فيني مدير الصيانة ويقهوني بشكل غير طبيعي

اليوم مريتهم وكالعادة يرحبون وبالأحضان وياهلا وابشر ومن ذا الكلام المهم قلت بدال مااجيكم كل خمسة ايام خلوا فترة استخدامي للسيارة مفتوحة واذا خلصت سيارتي سلمتكم السيارة قالوا على هالخشم :type:


تعاملهم اللي ماتعودته من شركاتنا الحبيبه خلاني اشك ان لي حقوق اكبر من اللي طلبتها مع اني راضي ولاابي شي زود غير انهم يردون السيارة مثل ماكانت بس ابي بعد افهم اللي لي واللي عليّ او انها تكون مماطلة لحين انتهاء فترة شكوى او غيرة


مالي غنا عن مشورتكم ياأعزاء

[اليامي قطر]

الى الحين وامورك كلها فالسلييم ومافيها اي شي يلفت النظر

[سيد القوم]

الشركة او الوكالة قصدك بترومين سيارتك ع اي ضمان

[سيد القوم]

يارجال انت بالسعودية حقك ماراح تأخذه من الوكالات والورش الخ الا بعد جهد جهدي وممكن بقوة يدك لسانك لأكن بالنظام ماراح تحصل شي الله المستعان

[sgl2002]

لو أنا والله ما اخذ سيارة محروقة

مهما صلحوا مستحيل ترجع زي ماكانت

المفروض اخذت منهم كاش وبعت الموتر تشليح

[سليل قروم]

الى الحين وامورك كلها فالسلييم ومافيها اي شي يلفت النظر

بيض الله وجهك ياليامي

[سليل قروم]

الشركة او الوكالة قصدك بترومين سيارتك ع اي ضمان

بترومين اللي غيرت عندهم الزيت والسيارة ماهي على الضمان

[سليل قروم]

يارجال انت بالسعودية حقك ماراح تأخذه من الوكالات والورش الخ الا بعد جهد جهدي وممكن بقوة يدك لسانك لأكن بالنظام ماراح تحصل شي الله المستعان

الله يقوينا عليهم

[سليل قروم]

لو أنا والله ما اخذ سيارة محروقة

مهما صلحوا مستحيل ترجع زي ماكانت

المفروض اخذت منهم كاش وبعت الموتر تشليح


هذا لو السيارة احترقت بالكامل لكن الاحتراق كان عند المكينة فقط

وبأذن الله راح اخذ ورقة عليهم بحيث اي اعطال مستقبلة من جراء هذا الاحتراق راح احملهم اياه


لاهنتوا

[آخر العنقود]

نصيحه اخوي رح قدم شكوي بالشرطه ووثق المشكله عندهم اخاف يماطلونك ثم يجحدون انك غيرت الزيت عندهم اهم شي لازم يكون معك فاتورة بأنك غيرت الزيت عندهم وبلغنا وش يصير معك بالتوفيق.....

[سليل قروم]

نصيحه اخوي رح قدم شكوي بالشرطه ووثق المشكله عندهم اخاف يماطلونك ثم يجحدون انك غيرت الزيت عندهم اهم شي لازم يكون معك فاتورة بأنك غيرت الزيت عندهم وبلغنا وش يصير معك بالتوفيق.....


كل شي موثق في الايصالات

لاهنت

[سليل قروم]

اخر المستجدات اليوم ان الظفيرة احترقت وطلبوها من المصنع لعدم توفرها في جميع فروع لكزس

تاخذ 25 يوم لين توصل


السؤال هل بعد تغيير الظفيرة ترجع السيارة كما كانت دون مشاكل في الكهرب ام مثل ماسمعت الظفيرة اذا احترقت يكون لها تأثير ولا ترجع السيارة مثل قبل لأن توصيلاتها معقده حتى لو التصليح في الوكالة

[الحربي 591]

انصحك تسويها وبعها

[أبوأسامه...]

والله النصيحه الغبراء شكلك شريطي



صلح وبع وبع


يأخي انا دخلت بشعيب مليان ماء على فورد وخرب الكهرب كله

ووديتها عند مركز القافله ببريده وجددو الضيفيره تجديد وطلعت تشتغل ولا أشتكيت منها ابد لمدة سنة ونص وبعتها على اخوي وجلست معه سنه وصار عليها حادث وباعها وزن حديد 4500 مافيها شي صالح غير الاصطبات الخلفيه


والحين هم طالبين ضفيه وكاله يعني فك ركب مو تجديد ل

_________اهم شي ياراعي السياره _______
تكون الكلبسات مركبه صح وسلامتك وانا اغير الزيت عند البيت والسيفون اشريه من الوكالة وأروح لاهندي بعشره يركبه

[الحربي 591]

والله النصيحه الغبراء شكلك شريطي



صلح وبع وبع


يأخي انا دخلت بشعيب مليان ماء على فورد وخرب الكهرب كله

ووديتها عند مركز القافله ببريده وجددو الضيفيره تجديد وطلعت تشتغل ولا أشتكيت منها ابد لمدة سنة ونص وبعتها على اخوي وجلست معه سنه وصار عليها حادث وباعها وزن حديد 4500 مافيها شي صالح غير الاصطبات الخلفيه


والحين هم طالبين ضفيه وكاله يعني فك ركب مو تجديد ل

_________اهم شي ياراعي السياره _______
تكون الكلبسات مركبه صح وسلامتك وانا اغير الزيت عند البيت والسيفون اشريه من الوكالة وأروح لاهندي بعشره يركبه



اخوي افهم
انت اقرا زي الناس و رد هذا اول شي فيه فرق ان السياره يدخلها ماء او انها تحترقو اي واحد اخطر من الثاني
ثاني شي انا شريطي ولا ماني شريطي ماهو شغلك;)


هو كاتب ان المكينه احترقت وفيه اشياء تضررت صح ولالا
هم بيسوها لك لكن بترجع مثل حالتها الاول؟؟:eek:

ما تضمن انها تمشيك سنه سنتين ولا 100 سنه

على العموم يا صاحب الموضوع
ويا ابو اسامه
اسفين ان غلطنا عليكم :D

[ابوراكان تبوك]

هذا لو السيارة احترقت بالكامل لكن الاحتراق كان عند المكينة فقط

وبأذن الله راح اخذ ورقة عليهم بحيث اي اعطال مستقبلة من جراء هذا الاحتراق راح احملهم اياه


لاهنتوا

اذا غيروا الظفيره المحروقه بدون اصلاح للسلاك المحروقه مافيه مشاكل ان شاء الله
دامهم متعاونين بهذا اشكل امسك عليهم ضمان بعد الاصلاح بالمده اللي تقدر عليهم فيها
والمهم قبل الاستلام يفحصون لك المكينه في الوكاله

[راعي المجهم]

السيارة الغرقانة او المحروقة

انسى ترجع زي اول كل بعد فترة تخرب عليك وتخرب اشياء ثانية