استفسار عن وانيت فود 150ف

[oneizi]

سلام عليكم شباب
حبيت استفسر عن وانيت 150ف رابتر ايش من لحيه هل هي سياره جيده لبر وكشتات ارجو الافاده وشكرا

[قطب 999]

اللحيه تلقاها بشواص اليابان يا تايوتا ولا نيسان اما الرابتر موتر كشخات ومقاومات

[ابوسند9]

وعليكم السلام
سياره ما عليها كلام لا شاص ولا نيسان
بس اذا بتشتري جديد اوكي
اذا مستعمل احرص على النظيف
واذا السياره سعوديه خذ رقم الشاص وروح للوكاله للصيانه وخذ برنت عنها وعن اعطالها يعني هل سبق ان فك مكينتها او القير او غيره
واحينا الامريكي تحصلها داخل ضمان الوكاله
طبعا السياره انصحك تجربها قبل تشتري لان السياره كبيره وتحس انك تقود شاحنه لكن مع الوقت تتعود عليها
وانصحك با الغمارتين لانه افضل عزل من الغماره ونص بسبب الباب الصغير
نقطه اخيره طبعا المكينه حجمها 6.2 لتر اي 411 حصان
وموديل 2010 جاء منها نوع مكينة 5.4 وهي ضعيفه على الرابتر ونوع 6.2 لتر اما من موديل 2011 حتى موديل 2014 جميعها 6.2 لتر

[oneizi]

وعليكم السلام
سياره ما عليها كلام لا شاص ولا نيسان
بس اذا بتشتري جديد اوكي
اذا مستعمل احرص على النظيف
واذا السياره سعوديه خذ رقم الشاص وروح للوكاله للصيانه وخذ برنت عنها وعن اعطالها يعني هل سبق ان فك مكينتها او القير او غيره
واحينا الامريكي تحصلها داخل ضمان الوكاله
طبعا السياره انصحك تجربها قبل تشتري لان السياره كبيره وتحس انك تقود شاحنه لكن مع الوقت تتعود عليها
وانصحك با الغمارتين لانه افضل عزل من الغماره ونص بسبب الباب الصغير
نقطه اخيره طبعا المكينه حجمها 6.2 لتر اي 411 حصان
وموديل 2010 جاء منها نوع مكينة 5.4 وهي ضعيفه على الرابتر ونوع 6.2 لتر اما من موديل 2011 حتى موديل 2014 جميعها 6.2 لتر

جزاك الف خير علي هذي المعلومات القيمه

[الشولة]

السلام عليكم أخي الكريم
الصراحة أنا أنصحك بتجربة السيارة قبل الشراء وبشده لأنه مع التجربه سوف يتبين لك أشياء قد تكون غائبه عنك.
أنا الصراحه كنت ناوي أشتري واحد لكن بعد التجربه غضيت النظر و السبب كون السياره ذات وزن ثقيل جداً لا تفهمني غلط أنا ما أقصد إنه قومتها ثقيله لا بالعكس مع مكينة 6.2 تحس أنه قومتها مره ممتازه وفي الديره سياره رائعه والصراحه أنا إنبهرت بمساحتها الداخليه وهي غماره و نص لأن المقعد الخلفي حجمه أكبر من أي غمارة و نص قد شفتها و حجمها الخارجي على كبرها إلا أنها ممتازه لأن طولها متناسق مع عرضها و هي من أعرض السيارات اللي قد سقتها و أعرف إنها أطول من التاهو القصير بذراع تقريباً بس ما تحس إنها سيارة خجمه.
طبعاً في البر هنا يبين ثقلها اللي أقولك عليه يعني ما بين كفراتها الحجريه و وزنها الثقيل تحس إنك تجهد المحرك عشان يحركها و في الصيف لما تكون الرمال جافه يبين لك كلامي السيارة ممتازه للأماكن الوعره لكن المناطق الصحراويه تجهدها و كثير من ملاكها في السعوديه تلقاهم يضغطون عليها في المطاعس إلا أن بعضهم يخرب عليه القير يحتمي و يفصل و البعض يركب مبرد قير فأنتبه لهذي النقطه.
عيوبها من خلال بحثي عنها هي:
إرتفاع حرارة القير في التطعيس لدرجة إنه ممكن يخرب عليك لأنك راح تجهد السياره بسبب ثقلها.
إذا كنت راعي سرعه في المناطق الوعره ممكن بعض الضربات تعفط لك الشاصي و تلاحظ هذا في المنطقه اللي بين الحوض و الغماره.
المساعدات حقتها قويه و غاليه لكن زي ما فهمت إنه ما يشملها الضمان يعني لو خربت راح تصلحها على حسابك (المعلومه هذي في الوكالات في أمريكا ما أعرف عن الوكالات في الخليج)
أتمنى لك التوفيق أيش ما كان إختيارك.

[فرفور بريده]

^

ياغالي الشركه مستحيل تصنع سياره ثقيله ومعده للطرق الوعره والصحراء

وقيرها ضعيف مايتحمل !!

القير قوي ويتحمل ولحد الان ماسمعنا رابتر خرب قيره

الثقل يعوضه المحرك الجبار

مالفائده من بدي خفيف ومكينه ضعيفه واذا كنت بين نفدان مايمديك تشد عزم

ولا لو طبيت فنجال ماراح تنفعك المكينه الضعيفه او البدي

[الشولة]

الله يجزاك خير أخي فرفور بريده
الصراحه أنا اللي نقلته من معلومات ماخذها من روابط ملاك السياره في السعوديه و في أمريكا و من ملاكها وصدقني لو تبحث بدقه راح تلقى مواضيع كثيره تتكلم عن القير و إرتفاع حرارته مع الجور عليه و إذا بغيت تتأكد أكثر رح لصيانة الوكالة و أسألهم و بإذن الله راح تحصل الجواب الوافي.
أما من ناحية ثقل السياره لا تحسب قومة المكينه كل شي لأنك إذا جيت في الرباض في الصيف و ربض موترك ما تنفعك أقوى المكاين لأن السياره راح تحفر كفراتها و تغطس زود و التجربه و أنا أخوك خير برهان و أسأل اللي يستعملونه ولا هم متعصبين ولا تسأل اللي يسولفون عنه ولا عندهم علم.