مسميات الابل.. علمونا يا اهل الخبرة الدعوة فيها مفاطيح !!

[خلدون الدوسري]

السلام عليكم

ارحبو يا رجال

حنا شباب يا الربع نسولف بالاستراحة وطرينا الابل ومسمياتها واختلفنا فيها
والدعوة صار فيها مفاطيح وحلف ولا تشرهون ترى ما لنا فيها خبرة وأنتم ابخص :D

حنا طال عمركم اختلفنا في مسمى حاشي
قال بعضنا انه صغير الناقة اللي توها جابته
وبعضنا قال ان الحاشي هو القعود
وبعضنا قال الحاشي هو القعود أو البكرة

والمسمى الثاني هو مطية
قال بعضنا تقال للجمل من بعيد اذا ما عرفت هو بعير ولا ناقة
وبعضنا قال انه البعير او الناقة اللي تشيل الحمولة عليها

عطونا القول الصحيح يا اهل الخبرة ترى الريجيل يتابعون هالموضوع الحين

[راع العراوي]

وعليكم السلام

الحاشي يقال من 6 شهور وفوق
اما صغير الناقة يقالة حوار

والمطية اذا ماني غلطان الرحول

[تميمي بريدة]

لكل سن من الإبل مسمى
نبدأ من بداية الحمل حتى الشهر الخامس تسمى معشر
من الخامس الى الثاني عشر لقحة
من بداية الولادة تسمى الأم خلفة والجنين حوار ولا حوارة
وسبب التسمية حوار لأن أمه تحير عنده , ولا تفارقه يقولون حارت أمه عنده
من السنة حتى يتم الثانية مفرود ولامفرودة لأن الحوار ينفرد عن امه يروح يرعى لحاله ويسمى الحاشي للحوار الكبير والمفرود ويسمى بكرة للأنثى وقعود للذكر
من السنة الثانية تسمى حقة
والسنة الثالثة تسمى لقية لانها تلتقي بأمها من حيث أن الفحل يضربها
والرابعة إذا أكمل أربع سنين سموه جذع واجذعه لأنه توسط في شبابه والعرب تسمي الولد اللي متوسط في شبابه جذع
والخمس سنين يسمونه ثني لأنه تطلع ثنتين من ثناياه التي توالى بعضهن
وإذا كمل ست سنين سموه رباع لأنه تطلع ثنيتين أخرى فتصير مجموعها أربع
إذا أكمل سبع سنين سموه سديس لأنه تطلع ثنيتين غير الأربع فتصير ست
إذا أكمل ثمان سنين انفطر نابه لذلك يسمون الناقة فاطر أما الجمل فيسمونه هرش لأنه يقوم يهرش

[الفقيرإلى ربه]

السلام عليكم
سلمت يالعروي
نعم الحاشي من 6 وفوق أما المطيه بعض الناس إذا غدا له ابل وقابل هل الأبل قال ياولد عينت لي مطايا
بارك الله فيك يالتميمي ماقصرت بالتفصيل

[nissan 93]

المطيه الناقه وجمعها مطايا والحاشي زي ماقالوا الاخوان

[hadaj]

لكل سن من الإبل مسمى
نبدأ من بداية الحمل حتى الشهر الخامس تسمى معشر
من الخامس الى الثاني عشر لقحة
من بداية الولادة تسمى الأم خلفة والجنين حوار ولا حوارة
وسبب التسمية حوار لأن أمه تحير عنده , ولا تفارقه يقولون حارت أمه عنده
من السنة حتى يتم الثانية مفرود ولامفرودة لأن الحوار ينفرد عن امه يروح يرعى لحاله ويسمى الحاشي للحوار الكبير والمفرود ويسمى بكرة للأنثى وقعود للذكر
من السنة الثانية تسمى حقة
والسنة الثالثة تسمى لقية لانها تلتقي بأمها من حيث أن الفحل يضربها
والرابعة إذا أكمل أربع سنين سموه جذع واجذعه لأنه توسط في شبابه والعرب تسمي الولد اللي متوسط في شبابه جذع
والخمس سنين يسمونه ثني لأنه تطلع ثنتين من ثناياه التي توالى بعضهن
وإذا كمل ست سنين سموه رباع لأنه تطلع ثنيتين أخرى فتصير مجموعها أربع
إذا أكمل سبع سنين سموه سديس لأنه تطلع ثنيتين غير الأربع فتصير ست
إذا أكمل ثمان سنين انفطر نابه لذلك يسمون الناقة فاطر أما الجمل فيسمونه هرش لأنه يقوم يهرش


كفيت وفيت غير ان لقي يقال للحاشي اذا اكمل سنتين ولقي معناه التقى باخوه الجديد

[تميمي بريدة]

كفيت وفيت غير ان لقي يقال للحاشي اذا اكمل سنتين ولقي معناه التقى باخوه الجديد

أهل نجد يطلقون اللقي على من بلغ سن 3 والتقى بأمه من حيث التمام ويسمونه تامه

[تربة الشمال]

حياك اخي الكريم من يوم الئ شهر يسمئ حوار ومن شهرين الئ اربع شهور يسمئ مخلول ومن ست شهور الئ سنه مفرود واسم المطيه يعني مايركب من الابل اي يمتطاء وكلمت بعير او اباعر تعني ابل وليس تحدد جمل ام ناقه

[تميمي بريدة]

كفيت وفيت غير ان لقي يقال للحاشي اذا اكمل سنتين ولقي معناه التقى باخوه الجديد

الله الله كلامك بمحله اشكرك على التعقيب

[روقي نجد]

الحاشي يطلق على القعود والبكرة اذا كان عمره فوق 6 شهور
اما اذا كان دون 6 شهور يقال له حواااااااااار

اما المطيه تقال للناقة او البعير

[دحام متعب]

السلام عليكم
كفيتوا ووفيتوا غير إني عندي ملاحظة عندنا في الشمال اللقية ما تضرًب حتى تكون جذعه وتلد ثنيه حفاظاً عليها وحتى يكتمل زينها ونموها ولاينكسر عظمها وأحب تأكدون المعلومة أو تنفونها لكي نستفيد منكم جزاكم الله خير.

[ابو حلا العروي]

ماقصرو الشباب