تضيق نفسي من معابيس الوجيه الوساع وهذاك لامنه تبسم ....

[ابو درع]

.....شفت للدنيا طرف


ياهلا يا مرحبا

الفرق كبير .. بلا شك

ليمنك اقبلت على بعض الكشاته عبس في وجهك كنه شايفله قاطع طريق

ولبعظ يهلي ويرحب قبل ان يعرف غايتك


ارجو التعليق حول هذه الظاهره

تحياتي للجميع

[الفتى المجازف]

ابودرع

حياك الله وبياك

تصدق ذكرتني بموقف في الدهناء كان فيه واحد متعلق معه يوكون 4×4 موديل 2005 وكانت تعليقته شينه بالحيل لدرجة ان الواير انقطع مرتين اثناء السحب المهم رحنا ندور له واير عند بعض اهل الابل والسيارات المارة في خبة العمود ونادينا بالجهاز ياللي معه واير يسعفنا ترانا بحاجة ومفيش فايدة بعد ربع ساعة نداءات وتكبيسات للسيارات الا ونشوف ذيك الضوية وكان ذلك حول المغرب وننصاها نصو تقل غنيمة فرحين بها عشان نسعف راعي اليوكون هو ورفيقه يوم تبينت السيارة الا شاص فيه بكرة وموديله مشاء الله 2004 بريمي متكتك وراعيه جالس ومولع الزقاره يوم تقل عبسنا انا ورفيقي المهم نسلم السلام عليكم جانا رد السلام بارد هاذي الثانية زقارة ورد سلام بارد ياالحبيب فيه سيارة متعلقة يوكون4×4 طايح شاصه للرمل ونبي فزعتك لو تكرمت قال على طول وسيارتكم وش فيها قلنا معك واير سلسلة او اي شيء تعرف امريكي ثقيل ومعنا باترول والواير يالله يسحب شاص وكثير عليه اقصد الواير اللي انقطع.
قلنا بتفزع والا لا قال تيسرو رديت انا قلت نعم؟ :confused: قال تيسر من قال نعم سمع تعوذت من ابليس وقلت خير ان شاء الله وكان فهمي على قدي ظنيت انه يقول اسبقوني وباجي وراكم تشطرنا عنه ننتظر يتحرك ورانا ماتحرك شوي الا ويضف عفشه ويمشي توقعنا بيجي ورانا الا نتفجأ يوم مشى عطانا مقفاه ومعاد شفناه شاورت خويي نلحقه ونجبره يسعف راعي اليوكون قال خويي تعوذ من ابليس هذا فيه بلا مو طبيعي انا حقيقة ماصبرت الا واخذ كم لفة واشوف النور والحقه واكبس له ويوقف يوم توي وصلت له ويمشي يوم قال رفيقي ماقلت لك هذا فيه بلاء قلت الحين وجبت.

السالفة طويلة ومملة ولا ودي اطولها وهاذي زبدة الموضوع....

تحياتي ابو درع

[ابو درع]

اشكرك على هلسالفه اخي المجازف

حقيقي الي اختشو ماتو .. والناس فيهم الخير وفيهم الشر

لكن طبيعه المكان والزمان توجب لك مساعدة الاخرين وتقديم الخير بما تسطع عليه

تحياتي

[منتعش]

صدقت أخوي الغالي : ابودرع
وأشكرك على طرح مثل هذا الموضوع الحساس جداً .
الكثير منا يصادف أناس في البر أو الكشته
وربما يحتاج منهم بعض الشي وإذا ذهب لهم وشاف كل واحد ينظر له بشمأزاز خاف من نظراتهم وتحسف إنه جاء لهم ينشدهم
بعكس لو قابلت أناس رحبوا فيك وقالوا ما نعطيك حاجتك حتى تتقهوى معنا ونأخذ علومك وهذا يبتسم وهذا يقدم لك القعود والقهوة والشاهي والماء وتتمنى إنك تكشت معهم وتطول .

وحصل موقف لأحد الأخوان - تراه خارج شوي عن الموضوع - وهو :
كان الرجل يعمل بدعوة الجاليات الغير مسلمة وكان المكتب يقيم رحلة شهرية في أحد الأستراحات
وتكون الرحلة ترفيهية لوجود بعض غير المسلمين ومن ثم درس بسيط عن محاسن الإسلام
المهم : فيه شخص فلبيني غير مسلم شرح له الشيخ - من نفس بلده - مبادى الإسلام ومحاسنه ومزاياه -
ولم يدخل في الإسلام .
وكان معهم شخص - سعودي - مرح ويعرف بعضاً من لغتهم وكان يضحك معه ويمازحه ويسبح معه في المسبح حتى أحبه هذا الفلبيني الغير مسلم .
وجلس معه وأخذ يعلمه بعض الأمور البسيطة ثم قال الفلبيني : أنا سوف أدخل في الإسلام من حسن معاملة هذا الشخص وابتسامته وحبه للأخرين .
وعذراً على الإطالة .

[المترو]

السلام عليكم ورحمة الله وبركاته

مساكم الله جميع ابالخير والمسرات
حبيت اشارك بهذا الموضوع
اولا المساعده يجب ان تكون لوجه الله تعالى طلباً للاجر والمثوبه وهذه اخلاق المسلم
ثانيا من يساعد لغير ما ذكر اعلاه فليس فيه خير لنفسه ولا للاخرين والشرهه مرفوعه عنه
ثالثا اذا وجدت كريم ولد كرام فهذا من حسن حظك وحسن نبا اللى استقبلك وان وجدت العكس فطبق الآية من قول الله تعالى ((( {خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ }الأعراف199

فكما قال احد الاخوان البشر فيهم الطيب وفيهم الخيب والجهل يغلب على البعض

فلدي همسه لاخي الكريم الفتى المجازف ان المساعده لاتأتي بالقوه وانا اخوك من احب ان يساعدك هلا وسهلا ومن رفض فليس لك على الناس سلطان سوى كان فيه بلاء او لا

واستقبال الضيف وراعي الحاجه من كرم الاخلاق

ولكم وافر التحايا

[عاشق النحم]

حياك الله يبو درع اي والله انك صادق

مرة من المرات راح اخوكم عاشق النحم يدور النحم رحت لم مكان يبعد عن بيتي 40كلم
حت لم مزارع الحقبا((الثامرية))
خابرن هناك مكانن يجمع فيه ما الرشاش والننحم عنده ما يعتاز
المراد ان الارض غداره يعني معرقه من فوق يابسه ومن تحت (تقل عجينة مطازيز) المهم اني امشي بدربي على خط واحد(السيارة يوكون)
يووووم وازيت البركة قلت ابكسر عليهن كان به شين به زان لي مرماهن يو كسرت ويطير نحمتين وادخن بهن :)
لكن يوم وقت مع الدريشه ولا اخوكم مغرزززز
وش السواة واجيك احاول اطلع الموتر عجزت ماش اعرف اني لقيت عظامة بعير كامله جنبي كسرتهن وحطيتهن تحت الكفرات
ابيه بس يتحرك
يوم احترت الشمس احتر الطين وصار حار قلت الشكوى لله
واحط البندق بالسيارة والصيد واقفل عليهن وانزل انا واخيي الصغير نبي نروح لأقرب مزرعة به اوادم
ونمشي حول كيلو وشوي يوم وازينا مزرعة واجيك انا ظر هي به احد ولا لا اثر به راعي المزرعة وولده
ومعهم شاصيين 96/2004 واستانس قلت بس هذا الفرج
واروح لمهم واسلم عليهم طبعا الكتاب باين من عنوانه وواضح اني ابي الفزعة لان ثيابي طين والوجه اشهب :)(بس هاك اليوم)
واحوي غادن تقل طماطة سورية حمراااا
المهم قلت للرجال ابي منك الفزعه ان موتري هابشن بطين وعجزت اطلعه كان عندك دركتر ولا حراثة تطلعه(وتراي جاين من *** يعني من ديره عنا هالحين 40 كلم وجوالي قاظين شحنه يعني ماحولي الا الله ثم انت)
وترا معي واير
وجان الجواب: (انت وش اجبك هنا)
عاشق النحم: (جابن قدري ولا كتب القدر عمي البصر)
راعي المزرعة: (ووش تبي مني)
عاشق النحم : (ابي فزعك يالحية الغانمة)
راعي المزرعة: ( وش موديك لهاك الجهة حتى تغرز)
عاشق النحم : (الصيد ولعه)
جاني الجواب زي الصدمة بغيت اقوله ياسفاب لحيتك عليك....قـــــــــال
((((((((((((((((((خل الي جابك يطلعك))))))))))))))))))
يوس سمعت هالكلام واتركه واروح ولاي عافن محطه عنا 2 كيلو
وانصاه انا واخوي طبعا(بالمتوسط)يوم وصلنا المحطة عقب استراحة قليلة بالخط
واروح لم البقالة وانا مابجيبي الا خمسه اريل (البوك تاركة بالدرج حق الموتر ما ابي يجه الطين ونسيته بالسيارة)
واخذ لي ما وبارد واحاول ازهم على احد اعرفه يفزع لي لكن خط راعي البقالة مابه صفر وعجزت ادق على احد(الارقام بالجوال ورقم البيت ماودي ادق عليه اخاف ابلش الحريم)
قلت يارب دبرتك وش اسوي يوم آفيت شوي ولا راعي سطحة سوداني جاين من المذنب(سطحة من سطحات شركة السويداني بالمذنب)
قلت للسوداني ابيك تجدعن بس على أول مزرعة بديرتي (اعرف راعية) قال وش ديرتك (قلتله) قال هي بعيده وانا عندي شغل
لكن قوه معي قلت الله يجزاك خير قال ابوديك للمذنب بذاك به الكدداه خذ لك واحد يجدعك
ولا اذا تصبر نص ساعه اوديك انا لم بيتكم
قلت الله يجزاك خير منب مكلف عليك ودن للكداده يو وصلنا لم مكانهم ولا به شايبن راعي هايلكس
قال رح لم ذا وانا الحين ابجي قلت زين
واروح لمه قلت ابي(****) قال بعشرين قلت زين ودن واعطيك بذاك قال زلل و باطل تعطين اياهن قبل تركب
قلت يامؤمن منب سارقك اعطيك اربعين بذاك قل لا
ولا على جية السوداني قال وش المشكلة
وعلمنا يوم اطلع بوكه وعطا الشايب عشرين واتشكر منه وامشي يوم حطن بعنيزه
واغير ملابس واتنظف واطير لم المذنب ادور الزول لما لقيه ولاي جاين معي غدا وقروش
واغطيه واعطيه قروشه دبل دبل الدبل المدبول :) جزاه الله خير.

آسف عالاطاله لكن والله من حر مابي ان الغريب يفزع للغريب وولد ديرته ما عاونه

تحياتي
عاشق النحم

[ابو درع]

منتعش


المترو


عاشق النحم


اشكر مروركم لكريم وأطراكم حول هذا الموضوع ... ومعذره على تأخر الرد

تحياتي

[ابو شكاع]

قصص الزكرت فيها ما يحزن من قل فزعة ووجيه باردة
وفيها ما يسعد من فزعة بعض الناس حتى الغريب عن البلد
ماعندي شي الصراحة وان تذكرت جيت
مشكورين

[الرسن]

السلام عليكم ورحمة الله وبركاته

مساكم الله جميع ابالخير والمسرات
حبيت اشارك بهذا الموضوع
اولا المساعده يجب ان تكون لوجه الله تعالى طلباً للاجر والمثوبه وهذه اخلاق المسلم
ثانيا من يساعد لغير ما ذكر اعلاه فليس فيه خير لنفسه ولا للاخرين والشرهه مرفوعه عنه
ثالثا اذا وجدت كريم ولد كرام فهذا من حسن حظك وحسن نبا اللى استقبلك وان وجدت العكس فطبق الآية من قول الله تعالى ((( {خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ }الأعراف199

فكما قال احد الاخوان البشر فيهم الطيب وفيهم الخيب والجهل يغلب على البعض

فلدي همسه لاخي الكريم الفتى المجازف ان المساعده لاتأتي بالقوه وانا اخوك من احب ان يساعدك هلا وسهلا ومن رفض فليس لك على الناس سلطان سوى كان فيه بلاء او لا

واستقبال الضيف وراعي الحاجه من كرم الاخلاق

ولكم وافر التحايا

كلامك على متمه يامترو الديره