مبتدئ وابي منكم الفزعه

[صقر بن حمود]

سلام عليكم ،، لاهنتم جميع ابيكم تعلموني بعض الأمور
يالربع انا شريتلي وكري أمس ب1500 طوله 14 وعرضه 13.05 وياقربها لل14 الطير شريته العصر وقال راعيه عطه عشاه قبل المغرب بس راعيه اعطاه نص سمان مهب كامله ، وش رأيكم انا اعطيه كامله ولا نص وبعدين اعطيه حيه ولا ميته .. اذا ميته انتف ريشها ولا لا ؟
وودي اهدّه عالملواح وخايف

وبعدين متى المقيض ؟

تكفوووووووون اعطوني المشوره واشرحولي ويش اسوي . لاهنتم

[الصيخي22]

والله ياخوي انت شريت متأخر والربطة خلاص ما بقى عليها شي الشواهين تربط نهاية الشهر والحرار اغلبها يربط نهاية الشهر ويمكن يربط قبل اذى الطير حذف ريش وبعدين الوكري وحش ولا ربيب ان كان وحش رأيي انك تربطة للموسم الجاي وان كان ربيب واضح الطير عند تفريعه على يدك وبما انك مبتدأ جرب اربط مرسلة بخيط طويل وابعد عن الطير ولوح بحمامه حيه ان جاك الطير فهو ربيب وتقدر تلوحله بحمامه افضل لين تتأكد منه بعد كذا جرب الملواح

[صقر بن حمود]

بيض الله وجهك اخوي ، الطير مهب وحش قد صاد حمام على كلام راعيه
واما عن حذف الريش ( فتراه حذف ريشتين )
وش رايكم اربطه ولا مهب الحين ؟

[أملج سيتي]

وعليكم السلام ورحمة الله وبركاته حياك الله اخي الكريم بيننا
بالنسبه ان راعيه عطاه نص سمانه ، انت اعطيه سمانه كامله خلّه يعلفها دامه حذف ريشتين فالطير يتطلب ربطه
لاعبه اسبوعين وادعيه على خفيف من قريّب وبعدين اربطه
بالنسبه للهداد لا تهد طير الا تعرف انه محتاج للعلف وعلّمه على الدس كثير واربط عقله ودماغه بالدس
يصير لا فكيتّه بأمر الله ما يروح ، يكون جاهز للهداد من كثر الدعو على الدس والتدهيل من جديد ، لأن راعيه الأول غير الحالي
الوكري من اطيب الطيور وطوع بالحيل وموفق خير يالغالي

[ابو امجد 11]

شف وانا اخوك شف وزن الطير الحين
اذا هدده طيب وانتبه تقصر عليه او ترفع
عليه لانه على ان ارتفع ممكن يثقل وان نزل
وزنه ورجعت رفعته يبي يطيح ريشه يعني يقرنس
قبل وقته .

[صقر بن حمود]

بيض الله وجيهكم جميع عالنصائح
ومانستغني عنكم بارك الله فيكم

[صقر بن حمود]

لكن اعطيه السمانه حيه ولا ميته
بريشها ولا بدون ؟

[AHMED.F16]

أعطيه بريشها وسواءا حيه او ميته ماتفرق وهو ينتف ريشها ويعلفها بس انت نتف ريش معه وهو ياكل عشان يتعود ياكل وأنت حوله

[صقر بن حمود]

لاهنت اخوي احمد وبيض الله وجهك

[خالد العطااوي]

ياصقر السمانى ذكها وطلع الامعاء والحوصله
وعطله الباقي وانتف مع الطير وعشه
وملواح اذا يعرف الملواح لوح له بحمامه ولا بريش كروان او حبارى
والله يوفقك

[ابو وافي00]

السلام عليكم ورحمة الله وبركاته
حياك الله
ياصقر
ومرحبا بك في عالم الصقاره والصقارين وان شاء الله فتره ونشوفك من المعلمين فالصقاره
أنا ما أزيد على كلام أخواني كفو ووفو
لاكن أنا أشوف أنه مدام الطير حذف وحنا على نهاية الموسم أنك تربطه المرابط حالياً بدت في أستقبال الطيور للربطه
أربطه وطلعه الموسم الجاي وابدا معه من الصفر منها تكسب خبره وتعرف نفسية طيرك


تمنياتي لك بالتوفيق


أخوك :
أبو وافي..

[صقر بن حمود]

لاهنت يابو وافي كفيت ووفيت

وانا بربطه في البيت جهزتله غرفه خاصه ومكيف وعلوم زينه

بنجرب والله يوفق الجميع ان شاء الله

[أبومحمد عنيزة]

الله يوفقك بس الله الله بالريشه والجهاز تراه عقلان بعد الله عزوجل